Saturday 5 May 2007

25 hours/day

غالبا اشتكي من الوقت
والقي بكافه المسئوليات عليه
واللي من المفترض تكون مسئولياتي وواجباتي الخاصه
في يومي القى ساعات ضايعه
غالبا بالنت
او بالتلفون
او بإدماني الاكبر اهو التلفزيون
واستمتع لما اشوف اي شي حتى لو حلقه معاده
او فلم صارله مليوون سنه
والغريب
ان بإيدي اليمين الريموت
وايدي اليسار كتاب!
احس بالذنب لما اشوف التي في
لاني قادره استمتع بالحلقه المعاده
ولا حتى قاعده اقرا الكتاب اللي جدامي
تعودت ادرس بالزحمه
لأني ساكنه ببيت في حس اخوان وحس زوار مشالله ماينقطعون عن البيت
اني وي
تعدي سنين وببال الانسان شغله وده يسويها
والشغله يمكن ماتتعدى ساعتين الى 6 ساعات
كهوايه معينه
او تجربه جديده
بالنسبه لي
عدت سنه او اكثر على اخر مره قريت فيها كتاب
وللحين الكتاب ماخلصته
العيب مو بالوقت
اليوم فيه 24 ساعه
صحيح دوام الجامعه يستهلك الوقت الى جانب الدراسه وعدم اغفال الوناسه!
لكن في ساعه او اكثر اقدر اعيش فيها لنفسي باليوم
لكن انا ضيعت على نفسي ايام او حتى شهور مو بس ساعات بإني اشغل وقتي بشي ماستمتعت فيها لأن بوقتها كنت افكر بشي ثاني
الاشيا اللي ودي اسويها بسيطه موصعبه
لكني كبشر نخاف من اي شي نجهله
فبالي العمل الصحفي
كاستطلاعات ومقالات
وفبالي تصميم الاكسسوارات
وفبالي اني اشارك بورشه عمل او دورة بورصه!
وطرا على بالي كذا مره اشتغل بارت تايم
في ناس ببالهم شغلات احلى
وافكار محد سبقهم فيها
ويمر العمر
واحنا ماستمتعنا بحالنا
ولا حققنا اللي ببالنا
يمر الوقت
واحنا نستهل عقلنا
نستهلك وقتنا
نستهلك نفسنا باللي مايسعدنا
نخضع لقيود الخجل والواجب
نرمي المسئوليه على كاهل الوقت, الواجبات الاجتماعيه
مثل مايختار شخص الطب
واهو بالواقع ذو اتجاه ادبي بحت
لا اهو بيستمتع بمهنته
ولا حتى المريض بيرتاح له
ليش؟
اما لدافع مادي بحت
او للخجل من هوايته
بالنسبه لي رغبتي بدراسه الهندسه فاقت كل الرغبات
ما انكر اني كنت احب السياسه بشكل كبير
ولا انكر ميلي بشكل كامل تقريبا للأدب كشعر
ولا اقدر على نكران حبي للتاريخ
لكن
حبي للهندسه فاز باكتساح
وانشالله بشبع باقي الميول من خلال دراسات جانبيه
صراحه حبيت المواد الاختياريه بالكليه
على الرغم من تذمر غالب اللي اعرفهم
لكن مو حلو ان احنا ندرس الجوانب العلميه او التطبيقيه البحته
بدون مانعرف مثلا شنو تاريخنا
او نكتشف جزء من ادبنا العربي
اهيا اشيا حلوة ان خذيناها كمتعه او معرفه
اكيد بنتعب منها ان شفناها كمجرد grade!
واكيد
مانحتاج اكثر من 24 ساعه باليوم:)

6 comments:

Anonymous said...

امم..خوش موضوع
انا اعاني من هالشي، أحب الكمبيوتر
وتخصصي كمبيوتر.. وبنفس الوقت أموت
بالكرة وألعب بنادي، فهالشي مأثر
علي،لأني بالاساس احب وافضل الكره
يعني عادي اذا عندي مباراة اليوم
او باجر "أسحب عالدراسه" !
كنت اتمنى قبل مطبقين الاحتراف منها
أسحب عالدراسه ومنها يمشيلي معاش
وتصير حياتي كله كره :P
الحين بيطبقون احتراق جزئي "بوطقه" بس
ما ينفع لازم يكون وياه شغل :/

الله كريم..

Sn3a said...

ماتحس حياتك فاضيه اذا ماكرفت وحليت هوموورك وحست على درجات
صحيح تحب الكره وتتعب فيها
لكن الطمباخيه بديرتنا ماتوكل خبز
وراك مستقبل تبنيه

يعطيك العافيه
وثانكس عالمرور

Anonymous said...

الحين الطمباخيه بتوكل خبز،
احتراف : 500 دينار بالشهر وغير
المكافئات والسفرات..الخ
مع دوام صغنون حدهم يوكلون خبز مو؟
لول

Sn3a said...

والله مادري عنكم
اخوي كان بنادي
وهده لله الحمد بس موراضين يعطونه شي مادري شسمه يعني يخليه يسجل بأي نادي ثاني
الدراسه احسنله من التكسر والاصابات

N a 9 i R said...

سنعة .. تابعت بلوقج فترة أول ما فتحتيه و شفتج قطعتي و توقعت إنج تركتي البلوق !

لكن اليوم يوم شفت إستانست من كتاباتج لأني من شفت مواضيعج بالمنتديات كنت متأكد إنج بتكونين مدونة ممتازة :)


مقالج سنعة يحكي حياتنا للأسف ، في فقرة أثرت فيني أكثر شي

ويمر العمر
واحنا ماستمتعنا بحالنا
ولا حققنا اللي ببالنا
يمر الوقت
واحنا نستهل عقلنا
نستهلك وقتنا
نستهلك نفسنا باللي مايسعدنا
نخضع لقيود الخجل والواجب
نرمي المسئوليه على كاهل الوقت, الواجبات الاجتماعيه



فعلا كل ما تخطى هذه العقبات نجح في حياته و تميز ، شخصيا وعيت على هذه العقبات متأخر و حاولت تجاوز بعضها ولكن بقي الكثير ..

غلطنا إننا قمنا نصرف أعمارنا عشان نعيش لغيرنا و نعيش حياة ناس ثانيين فروضها علينا ، لي متى نخلي ناس يعيشون حياتهم من خلالنا و نصرف عليهم من سنينا !!

اثر فيني مقالج سنعة .. و حرك فيني الحزن على واقعنا !

مشكورة

Sn3a said...

اهلين اخوي ناصر
صح انا قطعت فتره
بس صراحه احس ان هذا مكاني

اغلب اللي اكتب اكون ماره فيه
او حتى سامعه عنه


اما بالنسبه لمقالتي الاخيره
فكانت تجربه واقعيه بحته
وادري وايد مرو فيها
وخصوصا ان القيود اهي قيود الماضي
واللي احنا ماجددناها ولا حتى غيرنا فيها عشان تناسب الحاضر



اسعدني مرورك خيو
وبانتظار نقدك لأن اللي اكتب ما ايي نقطه من بحر كتاباتك


يعطيك العافيه