Friday 27 July 2007

comment


حده يناسب المود

مش كل طير يتوكل لحمه!


Thursday 26 July 2007

نــ,, ـــغمــ ,, ــات

أرسلو لهاتفي نغمات
جيت ابخصصلك احلاها
ذكرتك, ماضين و فات
وذكرى مُرها أحلاها
***
جلست اتجاذب الدمعات
وحشه وبعد صحاها
تمر ايام,اثرها ساعات
ياطول الوقت بلا راحه
***
تالي أنشغلت بالمسجات
عطشان,وحروفك الواحه
لقيت ضحكه وألم و اهات
لقيت هموم القلب وافراحه
***
الحق,ترا القلب لا مات
تموت بصاحبه احلامه
لاتخليني لقمه للشمات
كافي على الخافق جراحه

Wednesday 18 July 2007


ابي نبحر سوا بهالدنيا
اعيش مد الهوى وجزرة
ابي نشتاق حيل للقيا
ابي حبك تعرف قدره
ابيك بكل صدق نيه
وراضي من الخبز كسره
جذبتني بنظره مليانه حنيه
وجذبتك بصدي كم مره
وبنيت احلام ورديه
ورسمت بماي الورد قصه
اصبح بوجهك واغمض عنه بمسيه
لجل اشوفك بحلمي الين اصحى

Monday 16 July 2007

لساني طويل!

متى نكون صريحين ومتى (لسانا مفتلت)!
في ناس تقول :
احب الصراحه, وابي الناس يصارحون بكل شي
يعني يمدحوني وينقدون علي
وتشجعك ان قلت كلمه صراحه
لكن من يصير دورها
وتصارحها باللي فيها
يطلع (لسانك مفتلت)
اني وي
انا كل كورس قمت اجرب شي ييديد مع الناس اللي حواليني
اشيا تضحك والله
الصريح ضد الصراحه اللي ضده
الجذاب ضد انك تجذب عليه
المنافق ضد انك تنافقه
الناس يضحكون
والمشكله اضل واقولهم ياناس ياعالم انا تغيرت ماني (أطه مغمضه)
هم ماكو فايده
على كل تصرف
يا فلانه انتي متغيره
يافلانه ماكنتي جذيه
وانا شقاعده اقول من الاول الله يهداكم
قبل
ابلع الموس واسكت
اذا احد ضايقني بكل غباء اراضيه
اذا احد قال عني كلمه اطوف
الحين
اللي يقولي كلمه بيلقى عشر
اللي بيجذب األفله مسلسل
واللي بياخذني على قد عقلي
باخذه بدون عقل
بس صج
شعور حلو
كافي تنام مرتاح
لا تحاتي تراضي فلان
ولاتجامل علان
المكان اللي ماترتاح فيه
لاتروحله
الناس اللي ماتبيهم
السلام كافي
واكثر من كافي
باختصار
طـــــــــــــــــــــاف
...

لو طلبت كلمه صراحه
لاتمثل صدق نيه
جذبتي تشعرك براحه
وان صدقت تزعل عليا!
***

Sunday 8 July 2007

اخطائنا
اما تضرنا او تضر غيرنا!
احس انها بكلا الحالتين تضرنا
...

كم مره جذبنا جذبه (بيضه) وتجرأنا وسمينا الجذب ولوناه عشان نطلع من موقف صعب
او عشان نصالح الناس
او عشان نرضي نفسنا بس

جم مره قلنا احنا اصحاب مبدأ واحد
لكن
نعامل فلان بطريقه
وعلان بطريقه ثانيه
بالعربي نافقنا!

جم مره قلنا احنا كويتيين
وقطينا كلينكس بالشارع
او كتبنا على درج بالجامعه او بالمدرسه
او ماشدينا حيلنا بالدراسه اللي هالديره تدفعلنا كل فلس منها


جم مره قلنا احنا مع الديمقراطيه
وبعد ثواني
دمنا يغلي لما نشوف غيرنا يخالفنا!


قلنا احنا ضد الواسطه
ونلقى نفسنا اول من يستخدمها لما نضطر


اليوم حسيت بشعور كبير بالذنب
كنت بالمطار لأن اختي ردت من السفر وكنت ابي اي عامل يحرك العربانه مالت الجنطه ومحد كان يرد علي من العمال
فلما دزيتها انا ووصلتها يم السياره جان يركضلي واحد وبعصبيه قلتله خلاص وخر
اول مره اعصب على شخص مسكين رزقه من هالجناط
جايز ماكان شايفني
حتى لو كان شايفني
طبيعي عمره يكون اكبر مني
احساس مو حلو بالذنب ملازمني من العصر للحين
خوفي انسى هالاحساس باجر
واتجرأ اظلم شخص ثاني
...
النسيان نعمه
بس مو دايما!
مرات النسيان يخليك تعيد الخطأ
وجايز تعيده بصوره اكبر
مابي انسى
لأنه هالمسكين ماراح ينسى ان بكل يوم يمكن يلقى احد مثلي احساسه انعدم بلحظه ورفع صوته على انسان لا حول له ولا قوة
...
احنا نقدر ننسى ان احنا ظلمنا غيرنا
لكن المظلوم ماينسى
الله كريم

Tuesday 3 July 2007

روحي ماهي بهالسهاله تنملي
محتاجه اكثر من كلمتين من البشر
محتاجه احس بأحد دايم معي
مقدر اعيش بخوف من طعنه ظهر
***
امسي, يومي حاضري ومستقبلي
اشيا تخليني اعيش وقتي بكدر
لين استثقلت على نفسي احس بفرحتي
وحلفت على عمري اقضيها قهر
***

افرح دقايق لجل افرح اميمتي
وارسم بسمه لين ابوي عندي حظر
عجزو يلقون حل لحالتي
غرقوني بحبهم والعطايا من الصغر

***
صحيح اني ماكبرت على حب اهلي
لكن بني ادم اطماعه شكثر
والروح معتازة وحظي دوم عوي
الحمدلله.. كثير حظهم منكسر
***

صحه وعافيه وديرة ماتنحني
راسها مرفوع ورفعتنا بالفخر
وجود هلي وبعون ربي شهادتي
حلم اعيشه لين جروحي تنجبر
***
صعب تكون الاشيا اللي كانت تملى حياتنا بلا تأثير حاليا
تعودنا عالروتين
لكن اهو بدا يعوفنا!
النكت, المواقف او حتى الكلمات اللي كانت تضحكنا قبل
بدون طعم
احس اني كبرت!