Thursday 16 August 2007

تحجيم..للحريه!





جدل يدور بالكويت حول الحريه اللي من المفترض ان الكويتيين يتمتعون فيها
انا مو من نوعي اتحلطم على الديره وايد
لكن بنفس الوقت راضيه جزئيا عن سقف الحريات المتاح حاليا
صحيح محنا ب(الهايد بارك) لكن حالنا افضل جذيه
في اشيا بالدين مثلا حلال لكن ان عملنا فيها جايز نقع بالاثم
مثل الزواج بأربع ومفهوميه العدل
مثل الجهاد واللي تحول لتصفيه حسابات او ارهاب
مو كل حلال تطبيقه ينتج عن حلال
يعني الحلقه الناقصه اهيا كيفيه التطبيق!

....
الدستور كيت والدستور منع كيت والحريه تفرض كيت!
جايز بهالكيت الدستور بكبره يروح! يتغير او حتى يتحول القانون لشريعه الغاب
كمثال بسيط الأحزاب, يراها البعض نوع من انواع الحريات
لكن هالحريه ادت لحروب اهليه بدوله مثل لبنان بغض النظر عن حال لبناني السياسي
وهالاحزاب ادت لتمرد بدون أي نتيجه في دوله مثل مصر
مو كل حريه تنفع!
بوجود هالتكتلات اللي تارسه هالديره واللي تتلون بحسب القضيه والمصلحه الشخصيه للتكتل نفسه الديره بحيص بيص!
مجرد قرار ياخذ جلسات كثيره
روتين حكومي
مسابب بالجلسات
نفاق علني
وقضايا محاكم
هذا واحنا ماتعدينا المليون
الاحزاب راح تقطع الكويت اكثر واكثر
والكل بيدري منو بياخذ اكبر قطعه بهالديره
اهو الحزب الاسلامي
واللي البعض يسمونه المتأسلم
المتلون وغيرها من التسميات
اذا هالحزب نفسه ماسك الحكومه
ماسك المجلس
ماسك الجامعه
تبونه يمسك الديره بكبرها

احمد الله الف مره واشكره ان احنا بدوله اماره وراثيه وهالشي ولا اكبر حزب بيقدر يغيره بإذن قادر كريم
مو كل شي يصلحلنا
احنا نحب نتحلطم
نحب نكثر من كلمه ليش
....
هالشي بالنسبه لي نفس الحريات
وبما ان الكلام كثر حول الجدل الداير حول حريه الكتابه بما معناه حريه التفكير
تسقيف كلمه حريه افضله شخصيا خصوصا بهالحاله!
واهو ما يتعارض مع الدستور بأي شكل من الاشكال
كمثال بسيط
الحريه التي يريدها البعض
حريه الكتابه والخوض بالمعتقدات الدينيه
بما معناه ان في يوم او في اخر اسلامنا مقدساتنا ربنا والعياذ بالله راح يمس من احد الكتاب
وجود الرقابه واجب
الدستور يقول دين الدوله الاسلام
والاسلام يفرض منا حمايته
لذلك تحديد الحريه بما لاتمس الاسلام جائز جدا بل هو واجب !
احترام امير الدوله واجب
احترام العلم واجب
احترام الدستور هم واجب

لما نخلي الحريه بدون تحديد لمعناها مايعني بأي حال من الاحوال تحجيمها
بل الحفاظ عليها من افكار هدامه او اقلام تحاول العبث بالدول بقانونها برموزها والاهم بدينها!

بالنهايه هذا رأي شخصي...

2 comments:

Anonymous said...

امم اتوقع سيس لانه صعب تلقين مقياس معين حق اي شي
كل انسان بيقول هالحريه حدها لي هني على كيفه

عشان جذي صعب

...

تعليق بسيط : الاحزاب موجوده بينه تح عده مسميات مثل كتله تجمع وغيره ...الخ
اللي مو موجود اهو قانون يقنن هالاحزاب
يعني لو تم اشهار الاحزاب بيكون في قانون لها فا شتفضلين احزاب بقانون او بدون؟؟

الشي الثانب اذا الخوف من ان المأسلمين يكونون اهما الحزب الغالب فا في اشياء قةانين وطرق نقدر نقيد فيها هالشي
يعني ابسط شي نقدر نحط لكل حزب عدد معين من المقاعد بالمجلس وبجذي نضمن وصول كل الاحزاب للمجلس والكل يكون له فرصه متساويه

"اني واي مجرد اقتراح غير مدروس بس عشان اوضح انه في حل "

Sn3a said...

ولكم سيس بالبلوق اولا
صح كلامج
لأن معظم الكلمات هلاميه مالها اي حجم معين
فصعب نلقى اثنين يتفقون عليهم

اما بالنسبه للأحزاب
انا اقول خلنا على مينونا احسن
كلمه قانونيه مرات تخرب الشي ماتعدله
حلو الاقتراح بخصوص المجلس لكن من الديمقراطيه ان الناس يوصلون بأصواتهم مو بمقاعد معينه
فكره حلوة
لكن مو الكل بيتقبلها

حياج:)