Saturday 8 December 2007

احرف السم..والعسل


بونسوار جميعا..


من زمان ماكتبت عن الاشيا اللي تخصني ويشترك فيها غيري جايز:)


احنا كبشر ننقسم الى نوعين

ذكر وانثى

ولكل نوع طبيعته..تصرفاته..نقاط قوة ونقاط ضعف

بل ان بالنوع نفسه تختلف الافراد بكل شي




انا مثل غيري

عندي عيوب

وعيوبي ماهي قليله !

عندي عيوب مثل العصبيه,سرعه الحكم على الاشيا والناس


عندي عيب غريب الللي اهو اني اخذ اول انطباع عن الناس

واكبر عيوبي الحساسيه!




احنا بشر

جايز نضايق غيرنا بحجي

احنا مانشوفه يضايق

وجايز نتضايق من نفس الكلمه ان انقالت لنا!


طريقه القاء الكلام مهمه


الشخص اللي قال الكلام اكثر اهميه من الكلام نفسه!




مشكلتي بسرعه اعز الناس

ما حب سالفه اني طيبه ومسكينه وهالخبه لا

يعني من يمر وقت على معرفتي باي شخص او شخصه:P

بسرعه اعزهم واسأل عنهم وتصير لهم مكانه لاتتزحزح بسهوله


تختلف عشرتنا مع الناس

في ناس نعاشرهم سنين ومايعرفونا عدل

في ناس باسبوع يعرفون احنا شنو بالضبط

وفي ناس..باختصار مايهمهم الا تعاملك وياهم لين يخلص شغلهم او مصلحتهم






نرجع حق عيبي

اللي اهو الحساسيه

قبل كذا سنه
كنت اكل قهر واسكت!

يعني محد يعرف مني اني متضايقه او فرحانه

بس عشان فلانه ولا علانه لايتضايقون


الحين


ماكو لا فلانه ولا علانه


لأن الناس اللي احاتي زعلهم او مصلحتهم تبين انهم كانو بالكويتي مقزرينها!


بالنسبه لي

كان شي حلو اني اتعرض لخيانه الصداقه

للبيع بزهد

ولكل انواع الالم


لأني بنيت نفسي

وعطيت نفسي حقها

وقمت اقول ابي هالشي وما ابي هالشي



باختصار


قمت اتكلم!


وحساسيتي زادت!


اكره الكلمات العدوانيه


اكره احد يقولي طاف!


اكره كلمه بالطقاق!


اكره واكره واكره لما اكون اتكلم ينقالي:انتهى الموضوع


وجد ماحب كلمه خلاص!




جايز ماكنت اوصل هالاحاسيس للشخص الي جدامي

او ماكنت اعرف شلون اوصلهم


في ناس

مايتقبلون منك انك تحط حدود لنفسك في المواضيع

وفي ناس يحترمون فيك هالشغله

في ناس

حتى لو بينتلهم ستعش مره يردون ويتكلمون بالمواضيع اللي انت ماتحب تتكلم فيها




المشكله

ان الكلام عندي

مو ينقال والسلام

المشكله اني اقعد اقولب الكلام لاني قادره انام ولاني قادره اطوف

وبس:)

22 comments:

Manal said...

مرحبا بالغالية سنعا

احساسج مرهف

بس الاهم انك قوية, فليس بالسهل تدارك الانسان لسلبياتة

انت قمت بمجهود جبار, وان دل, فانه يدل عل عقرنيتك وقوة ارادتك عزيزتي

فهنيئا لك قوة الارادة

اما بالنسبة لعيوب الانسان بشكل عام
فلا يوجد هناك انسان كامل
فالكمال لله سبحانة وتعالى

ولكن علينا ان بحث عن الكمال, كما فعلت انت اخية

وان كان ولا بد
فهناك طريقة تسمى محاسبة النفس
فكما تقومين انت ابالتفكير بما حصل وجرى خلال اليوم وماذا فعلت وماذا فعل الاخرون
قومي بالبحث عن الاخطاء التي قمت بها وادفعي عنها كفارة
وعاهدي نفسك على ان لا تقومي بذلك الشئ مرة اخرى


ما قرأته
لا يختلف عما يحدث معي انا ايضا
وبتعاد البعض عني اكتشفت انه ضعف منهم وليس خطأ مني %100

اتحمل جزء ولكنهم يتحملون الجزء الاخر


:-)


سعدت كثيرا بقراءة موضوعك
اتمنى لك حياه سعيدة

Eng_Q8 said...

خلج مثل ما انتي

والشي الي ما يعجبج قولي ما يعجبني

وراح اتعرفين صديقج من الي يدعي الصداقه

Sn3a said...

منال
اول شي
اهلا فيج ببلوقي اختي
وثاني شي ردج وايد جميل
والاحلى معاهده النفس مع محاسبتها

صحيح ان الاخطاء تحتاج لطرفين
لكن دايما المفروض مانخلي اي شخص يستغفلنا

جايز البحث عن الكمال الانساني بيخلينا بتوتر مستمر
انا ابحت عن الراحه النفسيه بس:)

Sn3a said...

eng-q8
اهلين خيو

انا بظل مثل ما انا مثل ماقلت
وبحاول اصلح الاشيا اللي يمكن اصلاحها
لكن ماقدر اتحكم بالحساسيه اللي فيني

انشالله اعرف الصديق الحقيقي

نورت البلوق خيو ويسلمو على الكومنت

بنت الصالحين said...

سنعه بجد بوست روعه

وبجد حسيت منه انك عسوله جدا وطيبه جدا

وفى نفس الوقت حساسه جدا

بجد ودايما بحس انى كل مره بقولها بثقه
انتى سنعه ياسنعه


تقبلى حبى وتقديرى

Sn3a said...

عاشقه الفردوس
جعلتي من ساكنيه انشالله

الكومنت اهو اللي روعه حبيبتي تسلميين


انا عسوله جدا بس مو طيبه جدا:P
نورتي البلوق حبيبتي

بـابـل said...

صباح الور


كل الأحاسيس اللي سطرتيها بهالبوست حسيتها

تسلمين عالبوست الممتع حد الدهشة



وبس


بابل

Sn3a said...

بابل

صباح الفل اهلين
يسلمك
شكرا خيو
ونورت:)

Shather said...

صباح الخير ..


مشكله الاشخاص الحساسين مثلج و مثلي ان نداري الناس و محد يدارينا !!

اخاف اقط كلمه يفهمها اللي جدامي بمعنى مختلف عن اللي اقصده و ينجرح احساسه ..

و اذا صدر مني اي شي تشوفيني اكل بقلبي و افكر اخاف فهمها غلط اخاف انجرح احساسه اخاف شال بقلبه و لا اقدر انام الليل .. و اتشوفين هالشخص اصلا ما يدري اشقلتي لول تاكلين بقلبج عالفاضي


عالعموم اذا طبيعة الانسان كانت زينه و ما فيها شي يغضب الله سبحانه خل يظل عليها و ينتظر و الزمن بيكشف للناس اهو شنو و بتعرفهم ان اللي كان يسويه اهو الصح ..

تسلمين يا السنع :}

Sn3a said...

شذر الغاليه
بالضبط اختي!
هذا اللي صاير


نورتي البلوق

عثماني said...

اخيتي سنعة شلونج ؟؟

الله يهديج ..انعميت

ياليت تغيرين الاوان

اخوج نظرة على قدة

:)

Sn3a said...

اهلين اخوي عثماني
نورت
اسفه لول
ولعيونك غيرت اللون
انشالله الحين احسن؟

يعطيك الف عافيه

Fahad Al Askr said...

أهم شي بونسوار

loco said...

kelmat el 7ag badeeha ! wely eb 5a6reech goolih

Sn3a said...

بونسوار جميعا لو سمحت
مو يقولون الفرنسيه لغه الراقيين
عاد انا درستها جم سنه والظاهر ماطلعت الا ببونسوار والايام والاحرف والاشهر:P


نورت خيو فهد العسكر

Sn3a said...

loco

اهلين وسهلين..
ان شاء الله هذا اللي بسويه
نورت

5roofa said...

عيدج مباارك سويتي

salamz love...

Sn3a said...

ابله خروفه


ايامج سعيده خيتي
كل عام وانتي بالف خير

العرزالــــــه said...

انتي تمثلين طبقه مهمه من الناس اللي متربيه وتبلع وايد وماتحب ترد

بس للأسف هالزمن مايمشي فيه جذي

انا اقول الواحد يلزم حدود الادب والباقي بالطوفه وحصني قلبج من الحساسيه لأن محد يستاهل

وكل عام وانتي بخير :)

Anonymous said...

عيدكم مبارك

Sn3a said...

العرزاله

قبل كنت ابلع وايد ياخوي
اما الحين ابلع شوي وبس هم اسكت
لأن في مرات الاشخاص اللي جدامك ان تكلمت بياكلون حقك بزياده!
دنيا

وعدل كلامك
الحدود تكون الادب وبس

وانت بالف خير وصحه وسلامه
وعيدك مبارك

Sn3a said...

حمودي

ايامك سعيده عساك من العايدين خيو
تسلم