Saturday 26 January 2008

بينه..وبينها




هو

يظن
ان ارجل الذكور هو من يستطع الاحتفاظ بكامل مشاعره
ولا يظهر منها الا الجزء اليسير
والذي بالنسبه لها لا يسمن ولا يغني من جوع

يحبها
بل
يعشقها,
كيف لا وهي بالنسبه له تربية يديه, عرفها قبل مراهقتها
وعرفته وهو رجل
بل تكاد تجزم انه ولد رجل
ولم يمر بمراحل عبث او لامسئوليه
ولم يطف في مرحله طفوله ايضا

هو:
ارجعي لي, ولنفتح صفحه جديده نرسم فيها مستقبلنا الذي سيجمعنا نحن وماضينا ويزين حاضرنا


هي:
من عاش ماضيك عاف مستقبلك, تبخل علي بابتسامه
تبخل بدقيقه ولغيري تجود بالاف الساعات
تكسر فيني الشوق
وتحطم فيني الافراح
اعرف انك تحبني
لكنك لاتظهر الحب او تخجل من اظهاره, تطل علي من شباك اسود
يد تبعدني
واخرى تحاول ضمي الى بحر من المشاعر المتناقضه

هو:
انا كنت هكذا,
وسأبقى بهذه الخصال.. لقد احببتني لما كنت وستتقبليني لما اكون

هي:
احببتك قاسيا
ظننت ان حراره مشاعري ستلين جبال كبريائك ولم اعلم انني مجرد قطره في بحر هزائم غيري من بنات جنسي

هو:
بل انتي انتصاري على نفسي
انتي معركتي الوحيده التي اردت ان اخسرها

هي:
مازلت تعتبرها معركه,
مابيننا ليس بمنافسه
ليس بارقام تبين مع يعشق غيره اكثر
اريد اهتمامك, اريد ان توليني بعضا ماتوليه لغيري من قلب ضحوك
وعين بارده
اصبحت اكره قربك
ولا اطيق ابتعادك

هو:
فما الحل , لن اتغير

هي:
لست اتمنى سوى ان تعشق غيري بالقدر الذي عشقتك به
حتى تعلم ان ما اشعر به غيرني للقالب الذي اردتني فيه
ليته اعاد الحيا لقلبك حتى يعيده لمراسيه
مللت وتعبت من جمرات غضبك التي لاتتردد في ان تطفئها في قلبي

هو:
فرق بين الملل للتغيير
والتعب من كون قلبك لدي اسير

هي:
ان كنت بعد كل مامضى
تحسب اني اريد التغيير
فلا جدوى في كلامي فما من تأثير
وداعا

هو:
ستعودين










***

ps








بروح مصر هالاثنين ان شاء الله

حشتائلوكو كتير اوي

تأمرو على ايه من ام الدنيا؟

Monday 14 January 2008

مرض الدكتوره 3




رغم ان ظل يتكلم
ويعبر
ويتأسف

لكن ماعدت اهتم
او يمكن ماعادت اذني تبي تسمع غير اللي سمعته من كلام حلو قبل هالمصيبه
اللي صابت قلبي
ردت فعلي كانت عكسيه جدا
انا نفسي استغربت منها

المفروض من كل بنت تتعرض لمثل هالموقف حسب ظني
تنكسر
ويضيق خلقها
وتأيس من الدنيا

انا العكس
كانت هالمصيبه علي قويه بكل المقاييس
خلتني امثل القوة بطريقه جدا غريبه
مثل حبه جوز الهند
جايز تقتل احد بقوتها
لكن من داخل
مثل الماي!
اهتميت بنفسي بطريقه غريبه
نادي صحي
لبس
ميك اب
اسلوبي صار مختلف
انضميت لقروب بنات , ابتعدت عن الوحده

واكثر شي مضحك سويته
اني اشتغلت مع القائمه المنافسه

كل مايشوفني
كان يستغرب
يشوف شي ييديد فيني
ماقمت اقعد بزوايا مهجورة بالكليه
ماكنت اخلي لنفسي فرصه اني اكون بروحي
انشغل بالدراسه
بالتفكير
بالبجي
واعالج الحزن ببدله جديده
او قصه شعر مختلفه
جايز كان في حولي وايد ناس
لكن كثر مازادو
كثر ماكنت احس بغربتي..بدونه

تخرجت وبامتياز
واشتغلت بعده اقسام بالمستشفى
وصادف اني اشتغلت بقروب كان معاي بالكليه
منهم

شاب متمرد جدا,عبدالله
دكتور وينقد على الطب ومحدوديته
كويتي وشاطر بعرض سلبيات الديره دون ايجابياتها
كان ملتزم بكل شي
وموعاجبه ولا شي
كانت خطوتي الثانيه اني ارتبط
وكانت خطوة عبدالله ان يخطبني
الظاهر كنت عاجبته بالكليه, ولأن محد كان يدري باللي كان بيني وبين احمد
عبدالله ماغض النظر عن مشروع ارتباطنا
ورضيت
موحبا فيه
ولا حاجه لزوج او حمايه او غيره

مجرد رغبه بتكمله الخطوات الاجتماعيه الي لازم تخطيها البنات بمجتمعاتنا
حبني وعزني حبيت عشرته لكني نكرت جميل او جايز كنت اخونه بتفكيري باحمد احيانا
وبنفسي احيانا اخرى
وبعد سنوات التخصص والدراسه
بطلت عيني على كوني ام لبنتين
وزوجه
ودكتورة
كل يوم افكر بالعياده شلون كانت بتكون حياتي ويا احمد
لين فتر هالشعور يوم عن يوم
غريبه ان فتر بعد سنين طوال
اشرب قهوتي وامسك ملف طفله اسمها نور جدامي انولدت برئه مريضه
وفجأة يدخل
مريم ارجوج مابيها تتعب
وانا لو ما ادري انج دكتورة ممتازة مالجأتلج
خبراتي كطبيب نسيتها من عرفت ان المريضه بتكون بنتي

اقوله
لاتحاتي احمد
نور حسبه بنتي وان شاء الله بتشوف عيالها وعيال عيالها

ارجع البيت
القى عبدالله لام البنات ونايمين على سرير غرفتي والتلفزيون مبطل
احب راسه
ربي يطولي بعمرك ويخليك لنا
مادري ليش
عقب اكثر من 10 سنين
حسيت ان قلبي ماعشق الا ابو بناتي
الحب عشره
الحب ان نلقى الريال اللي يسندنا عقب يوم طويل
ويهمز راسنا ويقولنا ان احنا احسن الناس حتى لو كنا مليانين اخطاء
الحب بالنسبه للبنت
ان تشوف الريال اللي جدامها يحفر الصخر عشان بسمتها وعشان خاطر عياله
ان يكون صوتها يكون ايدها
الحب اهو عبدالله وبناتي

no matter when
it happens, that matters!

Saturday 12 January 2008

مرض الدكتوره 2

انشغل بجو جديد علي
محاضرات
دكاتره
بنات وشباب
كل فرد له شخصيه
وكل فرد يتبعه فرد ماله شخصيه,
كل طبقه لها قروب
انا ضعت

كنت احب ادور زوايا خاليه بالكليه
اقعد فيها
حتى بالحر
امسك اي كتاب
حتى لو ماكنت ادرس
كنت ابطله على اي صفحه واطير بذاتي فوق
لين غطت الشمس عني
رفعت راسي .. تفاجأت فيه
السلام
قالها, سمعت حرف س لكني تكهنت بالباجي
قلت وعليكم
بس ماطلع صوتي
ظل داخل
وبطريقه غريبه
اهو سمعه


لاحظت انج ماتختلطين باحد فقلت اييبلج مذكرات تنفعج فيزيا وكيميا و...
قاطع نفسه, انا اسف ان تعديت حدودي لكن ,
هالمره انا قاطعته, عادي احمد
انا قلتها ولفيت ويهي
اهو : شعرفج باسمي..
جذبت وقلتله, انتي قلتلي لما عطيتني الورقه اول يوم
قالي عيل العفو مريم:)
ابتسمت وقالي شفيج انتي قلتيلي لما خذيتي الورقه
مادري ليش ضحكت وايد
واهو ضحك
جايز كانت هالضحكه فتحتلنا باب..


كل يوم اداوم ماده بالجابريه والباجي بالعلوم
ارجع الجابريه عشانه
نتغدا , ندرس
يفهمني شي..
بصراحه ماكان في شي صعب,
لكن حلو ان تشوف رد فعل ريال يحاول يساعد ويكون اهو الفاهم,, اهو المتحكم بكل شي
احيانا يشرحلي الشغله غلط
فاليوم الثاني اقوله ترا لقيت بالكتاب عكس الكلام, اهو ويهه يصير احمر جني هنته
ارد اقوله: ماتوقع راح يمر علي هالمرض بالكويت, خلنه منه
يضحك ضحكه انتصار
لاحظت بكلامه حبه الشديد لقائمته
وفخره فيها بكل شي
وان قلت حرف ضد كلامه يثور.. ويرد يقول ادري مافي شي كامل لكن انتي ماتدري الحجي بالضبط شنو
ويفهمني ويرد يعيد ويفهمني ويرد يعيد
كنت اطالعه مندمج بقائمته واتخيل اني يوم من الايام بدورله دبله, اتخيل يوم اقوله ييب اغراض البيت,واتخيل لحظات سعادتنا بتفوق عيالنا
كنت اطير بعيد
غلطته ماحطالي حدود
وغلطتي نطرته يحط هالحدود
اتفاجأ فيه يغط فتره
اكثر من يومين
اشوفه

يباركونله ربعه, قلت اكيد حطوه منسق ولا شي
واهو يرد عليهم بفرح ولما شافني فتر شعوره,, او جايز ركن احساسه بمكان ثاني
اقوله مبروك
يختفي لونه, يبارك فيج..انا كنت ابي اقولج, بس خفت توخرين,خفت تبتعدين,خفت لأني نسيت شلون الدنيا بدونج
قلتله شدعوة شصاير
علمني على شنو يباركونلك
قالي على مريم
قلتله يه للحين قولهم خل تتخرج بالاول بعدين يباركونلنا

قالي لا
جان يوريني صورة بالموبايل
حق بنت كتكوته
ومكتوب على الصورة مي مي
قلتله من بنته هذي تينن بس لها نفس لون عيونك الرمادي الغريب
قال
هذي بنتي


ربي يخليها لك
واسوي روحي منشغله بالوقت واطالع الساعه
عن اذنك
عندي محاضره
يقول: ماعندج محاضرات
انا كل يوم اقعد وياج هالحزة.. اسف مريم
قلتله:
ليش مريم؟
قال: على اسمج يالغاليه
قلتله :مو يكفي انك خشيت عني زواجك
خليتني احب البنت اللي كنت اتمناها مني
حبيتها عشانك احمد
حبيتها لأني شفت بعيونها براءة كنت شايفتها او كنت متخيلتها بعيونك
ليش احمد؟


قالي:
مريم
ماقولج كنت مجبور
ولا بقولج ان مادري ليش تزوجت
انا تزوجت بنت عمي
اللي كبرت وياها
كنا ببيت واحد
رحنا مدرسه وحده
عشنا نفس اللحظات
اهيا دشت هندسه معماريه, وانا كان الطب طموحي
كانو الاهل راسميلنا حياة
وماجذب عليج
اقتنعنا فيها
تزوجنا
ماستانست؟
امبلا
الانسانه نفسها اللي كبرت وياها
راح اظل اكبر وياها
كان هذا شعوري

لما شفتج
حسيت بالقلب ينفض غباره
يصحيني, يقول الحين ماتقدر تتجاهلني
يقول هذي يا احمد , هذي اللي تبيها , واللي تبي تشيب وياها..واللي راح يصير رضاها منوه يا احمد

ماقولج حبيتج من اول نظره, انا انسان عملي ما اؤمن بهالسوالف
لكن حبيتج لما عرفتج
عشت وياج طفولتي مراهقتي عشت شبابي وعشت ابوتي لج قبل لا زوجتي تولد
عرفت شلون احميج, احاتيج..ازفج وااذيج
عرفت ليش الناس يندمجون باشعار نزار,و يدمعون لين سمعو كاظم يغنيها..
عرفت ليش رويشد له مكانه خاصه بين الناس..
وليش نوال اهي صوت يلفت قلوب الناس قبل سمعهم,..
عشت حزن راشد, عشت لهفه عبدالمجيد

عشت حبج يامريم
من شلت الصغيره بين ايدي حسيت باللي سويته وظلمج وظلمني وبيظلمها


مم
يتبع مو؟

Wednesday 9 January 2008

مرض الدكتوره


مع اني عايشه حلمي الكبير
دكتوره اطفال بلا غرور ممتازة يطلبوني بالاسم
وام لأجمل طفلين بالدنيا
زوجه لشخص قمه بالاحترام
واعيش حياة احسد عليها , ناس يسمونها مثاليه
لكني اعيشها كتمثيليه, اتمنى يكون بيدي الريموت لأغيرها
الانسان طماع
كنت اطمع بكل هالاشيا اللي حاصلتلي
وبكفه ثانيه
كنت اطمع فيه
قبل سنين
دخلت كليه الطب ,
وبديت اعيش الشي اللي كنت احسبه حلمي ومستقبلي
كان يشتغل باحدى القوائم
استغربت من وضع كليتي الانتخابي
كنت اتوقع ان اطبه المستقبل بالهم جدا مشغول موفاضيين
كان يدور زميلته بالقائمه
اشوفه يلف ويهه يمين ويسار
لقاها , ينطرها تلتفت عشان تبنتبه لي وتكلمني عن قائمتها
لما عجز منها
اقترب مني,
وسلم
وعطاني ورقه وقال اسف عالازعاج لكن احس هالورقه ومبدأها يفيدج
ومشى
ماجذب
كانت اول مره بحياتي يكلمني ريال غريب
جايز هالشي عطاها مدخل خاص لي
وللي بداخلي,
ماقريت الورقه رغم اني ظليت اطالعها بالساعات
وانطر يمر اليوم عشان اشوفه اقين
اليوم الثاني دورت بنت من نفس القائمه
طلبت منها الباج وحطيته على طرف الجنطه
درت بالكليه كلها ولما شفته
مادري ليش ابتسمت
واهو ابتسم
وماجذب
زادت ابتسامته لما شاف الباج
ومن يومها حبيت اكون طبيبه
وحبيت اكون له زميله
...
يتبع