Saturday 22 March 2008

تعال




تعال
خلنا نتذكر ثمر الايام
تعال نشوف شالللي زرعنا
واللي سقينا من بحر الالام


تذكر؟
لما كنت ناوي تدرس بعيد.. خنقول تهجر!
جايز لأني ماعرفت اتعامل مع بعد المسافه
وقلبي عمره صغير.. جهل كيف يصبر!
كابرت وكابرنا..
رحلت وتوادعنا
لبست احزاني بلون الغرور
و كفي ودعت لحظات السرور
قلت.. مانساها لج.. بعتي من شراج .. منهو غيري بيتحملج!
طبعج صعب
قلبج صعب
صعب
وصعب

ورحت هناك..
والوقت يحسب

وبعد سنين طوال
كبرت
وكبرنا
و سبحانه كتب
تجمعنا خيوط المسافه
وكلمن يستذكر سنينه
ويعيد كلمه حسافه!
خطيت خطوة لورا
لماضي بلحظاته سبق اشواقنا و.. جرى
ماعرفت اخطي للامام
وانت ذكرى ماضيه عيت تنام!

يشاغبني احساسي بالخطا
لاني من طفى السرى
وظلم باسبابي الطريج.. طريجنا

باعنادي.. اخمدت الهوى!
ببرود الوريد.. اللي دمك هاجره..

حاولت اغير كل مافيني..
دورت الغرور اللي تخبى بين حجرات الخفوق
وهدمته
وتهاوى قلب جمعنا

قلتلك
يافلان
محتاج تبنيني
انا مليون قطعه مبعثره..
دور يدي
وامسكها
ونظراتك..تدخل عيوني .. وتقرا خطوط حمره
فيها
توقدت جمره
وهرولت على وجني .. لحين شاغلتني ودخلت بين الشفايف
وحرقت كل ما لمسته بسفرها
ودخلت قلبي
حاولت
ماقدرت
حبك .. كسرها.. ضعفت وسكنت داخل
احلفك
دورها
ابعدها
واجمع البقايا
شكلها مثل ماودك تشكلها
انا مالي بهالدنيا جناح
ارسمني من جديد
للبنت اللي ودك بهالدنيا تشاركها

لاتعاند
ولاتمسك السمع وكل مافيك يصرخ
مثل مانت واقف على هالباب جامد
تراني على وجهه الثاني اسمع انفاسك .. اقرا خطوط يدك على خشب جاف كنها ترويه وترد لونه للحياة
حلفتك بالله
رد لوني
ولا اقولك
لوني على كيفك .. بس مد يدك وساعد
وافتح الباب الوحيد
وعلمني وش معنى سعيد!
تراني نسيت اللغه وماذكر الا اداه التخاطب
انت..بس اللي اذكره
انت..ياللي اطلبه


واللي اغير لجله حدود الهوى.. وارسمله حدود جديده
تعال
القلب بارد
وكفك يقيده

Friday 14 March 2008

بعد ما اصرخ.. شسوي؟




شخصيتي غريبه
مصدر غرابتها
اني عشت بكل مرحله من حياتي حياة مستقله تماما عن الاخرى
طفوله ملتصقه باهلي منعزله عن العالم بما فيه
مراهقه منعزله عن اهلي متصله بالعالم بكل مافيه
شابه منفصله متصله

الكل جرب يفقد صديق
بس اكثر شي يؤلم
او يضحك
ان نفقد باكج من الاصدقاء
بكل سنه شخص
وبكل شخص تسأل ليش
وماتلقى جواب
جايز الصداقه تختلف
صحيح انها كلمه غير مطاطيه
لكن نيه الشخص لما يقيم هالصداقه ماتكون نظيفه 100%

صديقاتي السابقات
الى لحظه الخلاف
كانت الواحد منهم كفر يدفيني
مخده تجمع دموعي
وكتاب يجمع لحظاتي
ما انكر
غالبا ماقصرو معاي
لكن بالاخير
عوضو كل هالاهتمام بطراقات

والحال نفسه بالنسبه حق قريناتي من الاهل

هالشي خلاني لفتره معينه منعزله
اراجع نفسي
طبيعي مو كل الناس غلط وانا الصح
لكن اللي ضعت فيه
شنو الغلط
او شنو اهو الصح!

ماعلينا
كانت دايما تمر علي لحظات اتمنى فيها اختبر الحياة بدون احد
شسوي
ان كنت على جزيره منعزله
مافيها الا انا
شنو اول شي بسويه
؟
اصارخ
يس
ابي اصرخ من قمه راسي
ابي اجرب صرخه قمه الراس هذي اللي يقولون عنها
وبعدين؟
ابي اركض
اركض لين ينهد حيلي
الركض مريح حيل
بره الديره
استغل فرصه ان رحنا مثل رحلات لمناظر طبيعيه
اني اركض حيل
جد الحيويه اللي تلبسني تكون حلوة والهوا نظيف وبارد

وبعدين؟
عقب كل هذا
راح اقول يريت احد معاي

المشكله ان احنا نعرف بعجزنا عن الحياة بدون ولا شي
لكن نتمناها
قالها الامام علي سلام الله عليه:
رب دهر بكيت منه,فلما صرت في غيره..بكيت عليه

ليش نطمع باشيا
ماراح ترضينا
او جايز
ترضينا لفتره بسيطه جدا


بس السؤال:
شسوي بروحي بعد ما اصرخ؟
شبسوي بروحي بعد ما اركض؟