Wednesday 4 June 2008

احـــ 2 ـــنا..واهم!


مراهقه صعبه
بين ام تبي طفلتها او بالاحرى بنتها تصير امرأ مجتمع
وبين بنت ماتدري شنو تبي
وبين اب يتوقع الكثير ولا يتواجد بتلك الكثره
وصديق غالبا بعيد
هالشي يتكرر لكل مراهق او لاغلبهم!
لكن كل شخص بهالمرحله يحس اهو الوحيد

بالبيت فاطمه عليها تلتزم قوانين الصوت المناسب واللباس المناسب
وان للاخ هيبه حتى لو كان طوله شبرين

بالمدرسه مفهوم الزماله اختلط مع الصداقه
يمكن لعدم وجود هالمفاهيم او معناهم الصحيح بين غالب الطلبه
ورغبه من هدى ان ماتكون اقل من غنيمه بشي
ففاطمه دخلت مدرسه اجنبيه
المشكله قربها من فهد
صده لها احيانا
مساعدتها له بالدراسه
واكتئابها لما توصل هالمعلومات حق امها
لين انتشرت اللسته
هاللسته كانت تطلع كل سنه
مجهوله المصدر
على هيئه ايميلات او اوراق تنطبع وتنحط على الادراج
جايز فيها معلومات صحيحه
ولكن اغلبها تأليف مجرد كلام او اشاعات
من هاللسته
احمد وجنى.. كل شخص يخون الثاني والمصيبه يدري عن الثاني
ساره ومحمد.. مادري شتبي بهالجيكره ..وعلى فكره امها مو بنت اصل
فهد وفاطمه..لاتخلوني ابدي بسندريلا.. انتي اهلج يدرون عن سوالفج
في..خل ابوج يهد الوزاره ويشوف بنته اللي صارت فيصل عندنا
فاطمه
وقفت عند هالجمله اللي فيها اسمها
اي سوالف؟!؟

فهد قريت اللسته ؟
يضحك:اي,فطيم شنو سوالفج شدعوة ماتعلمينا
فهد انت عارف ان وصلت هالورقه حق اهلي شبيصير
فطوم ترا كلها حجي وحده تلاقينها سحته مو لاقيه احد يعطيها ويه بعدين كاهي كتبت عن في بنت عمي انها انحرفت عن الطريق السوي(ويضحك ) و مافيها الا الخير

بس فهد احنا غير
احنا الكلمه تأثر فينا
ليش فاطمه, واحنا فري كويت يعني بناتنا عادي ييبون طاريهم..شنو يعني احنا غير
ماقصدت , بس انا اهلي يتأثرون بالكلمه
اهلج ماعندهم سالفه

توصل البيت تدخل من باب المطبخ
وتصعد دارها
خافت ان احد يكون قاري اللسته
رغم انها اليوم توزعت بالمدرسه
خايفه ان يوسف اخوها يوصله ايميل عنها
او احد من عيال عمها
خوفها مو لانها مسويه شي
لكن لان اللسته اهي ذنب برقبتها عند اهلها

تداوم اليوم الثاني

واليوم الثالث يستقبلها يوسف
بطراق
شفيك
انا اللي شفيني
الشرهه على امج
مو عليج

هدى:شهالصراخ

يوسف:تعالي شوفي بنتج وسوالف بنتج
مو تبين تصيرين مثل غنيمه وربعها
مو تبين بنتج تصير مثل بنات النواخذ اللي خابتنا فيهم
كاهي بنتج الحين الكل يدري انها لازقه بفهد جنها مو شايفه ريال من قبل
اي لان ماشافت ريال يمسكها

هدى:استح على ويهك يدك وابوك مو رياييل كفو بنظرك
انا اتفاهم وياها

طبعا التفاهم ماكان اقل من تفاهم يوسف
لكن الغريبه
ان اول طراق يعور
لكن الباجي
ابد

انا شسويت يمه
وانا شدراني شسويتي فضحتينا باجر خوالج يتشمتون
وانا شيفكني من لسان ابوج

يسمع اليد الصيحه
يدي والله ماسويت شي

كبرت وصارت 15 سنه
لكن يدها يشوفها بنت 5 سنين
ويرفض احد يمسها
بنتي مانطقت ولا بتنطق وبشوف اللي يمد ايده عليها بعد

هدى:بس يا عمي انت ماتدري

اليد:ولا انتي تدرين
انا يويسف الخبل قالي واصلا اهو مايدري شسالفه وانتي فوق جهل ولدج تحاسبينها

يكلمها بهدوء..بحنان

يبا
شسالفه
ليش حاطين اسمج مع فهيدان وكاتبين سندريلا
وشسالفه عيال الناس اللي كاتبين عنهم

بابا, هذي ورقه وحده تكتبها كل سنه
وتطلع فيها حجي عن البنات اللي بالمدرسه
والحجي غالبا مو صج
عارف يابنيتي مو صج لكن الواحد شنو عليه يسوي..يوخر عن كل اللي يسبب هالاشاعات
انتي كبرتي يافاطمه وماعدتي ذيج الياهل اللي ماتحاسب لين قعدت مع فهد بالحديقه
وانا لين وخرتج عن امج هالمطفوقه
ولا عن اخوج اللي يصبح بويه ابليس
باجر منو بيوخرج عنهم لين رحت

واهم ماوثقو ببنتهم وصدقو قرطاس!
يتبع

25 comments:

فريج سعود said...

هذي القصة حقيقية ؟
والطراق صجي ؟
اح

Sn3a said...

هلا والله فريج سعود

لا مو حقيقيه تأليفي
بس يمكن صار جزء منها باحد

Don Juan said...

أخييييه فقيرة صج الله باليها بعايلة كويتية تيبيكال ;/

أشوه ان يدها موجود ولا جان الحين البنت بخبر كان

و هاللسته هذي بلوة و منتشرة حتى بالجامعة و البلوة انه " المنحط " و سوري على هالكلمة الي يكتبها ما يفكر شبيصير من وراها مجرد انه يستانس انه طلع كلام عالناس !!

ناطرين الباجي ;)

Sn3a said...

حتى بالجامعه
انا خبري فيها ان منتشره بالمدارس

الغريب ان الناس صارت كل ماتكبر معظمهم عقلهم يبدا يصغر
الله كريم

نورت البلوق
ناطرين باجي سوالف السفره
ويا صديقي بوصابون غار

Najmah said...

سننننعة
اح حسيت بطراق بقلبي
ناااااااطرتج لا تطوليييين

Aldenya said...

??

كملي
بشوف اشصار معاها

5roofa said...

بعد عمرييييي

وااي تدرين شنو اكره هاللسته والله اذكر بثنويتنا كانت تطلع في بنات مافي احسن منهم بالاخلاق و الادب بس بقارة بنات شتقولين
لوول اشوة كنت من النوع المليق الي كله مع جماعت الاخصائية و محاربة للفساد و المخدرات

بس امبييي ناطره فطوم و شكله في حب بينها و بين فهد
جان زيين لانه حدي حبيت فهد

و امبي ذكرتيني بيدي الله يرحمة
:"(

كان حنووووووون مثل يد فطومة

na6reeeeeeeeen

salamz sis...

Sn3a said...

نجمه
سلامه قلبج
انشالله بكملها بس خل افتك من هالفاينلات
نورتي البلوق

Sn3a said...

الدنيا
هلا والله خيتي
انشالله بكمل بس خل اخلص فاينل

يسلملي هالتواصل الحلو

Sn3a said...

تيجر خروفه

احنا لله الحمد ماكان عندنا لسته بمدرستنا
لان العقوبات شديده كانت عندنا والكل مجابل دراسته لان ماكو شي يونس لول


سمالله عليج بالعكس
لامليق ولا شي
احسنلج بدال ماترافجين بنات مايندرى شسالفتهم

الله يرحم كل اجدادنا والله وجودهم كان بركه علينا


تسلمين حبيبتي
اي يمكن تحب فهد
كافي كاريزما الغموض مالته


نورتي

Anonymous said...

حمدالله مادشيت ولا لسته
:)

Aldenya said...

فاينل
الله يوفقج ويسهل عليج

Mok said...

الله وفقج سنعة

وبشرينابنتائج

esTeKaNa said...

لي نص البوست وانا مو رابطة ان هذي تكمله القصه
بس بصراحة
يبتي شي غير متوقع
وهني يكمن الابداع
انا نتوقع شي بالقصه غير متوقع
!!
ما يندرا شلون بتكملينها
بس الاكيد..استكانة بالانتظار
:)

Anonymous said...

thkrtene bsalft el ahl\sa3at ykon 3ndhm bnat 9ij adb oo a5laa8 oo 3mrch matlgen a7sn mnhm

bs shno m3amlt ahlhm lhm mafe asw2 menha wmako the8a.. 9ij sa3at agol 7ram fe hal ahl enh hlbnt sn3a tkon bnt-hm

keep going

Blog 3amty said...

والله مشكله ..

المدارس الحكومية مستوى التعليم فيها مو شي، والمدارس الإنجليزية الأخلاق فيها مو شي !!

طبعا البعض مو الكل !




Blog 3amty
Q8 chili سابقاً

Sn3a said...

حمودي
حمدلله
نورت خيو

Sn3a said...

الدنيا
تسلمييين
خلصنا ناطرين النتايج كلها

mok
والله الكورس كان جدا متعب
الله كريم
النتايج مو مثل ما ابيها
بس الحمدلله

Sn3a said...

استكانه
انا ماربطت توني انتبه
عدل كلامج
لاني نزلت هالجزء علطول وكنت جزء ثاني بس مانتبهت اعدل هالاشيا


يسلمو يالغاليه على هالتواصل

Sn3a said...

فري موا
اي
هذي المشكله تلاقينهم محاسبينها على نسمه الهوا
واهيا ماكو احسن منها

الله كريم والله يعين هالبنات

Sn3a said...

بلوق عمتي
وانا ذاك اليوم دشيت البلوق القديم طلعلي ديليت
زين ولكم باك

انا درست بمدرسه خاصه عربيه
دراسه والتزام ومحد اييب طاري احد بشي

يعطيك العافيه ونورت

فتى الجبل said...

بقض النظر عن القصة وهل اهيا صجية والا خيالية
للاسف احنا ما عندنا معايير واضحة للاخلاقيات ولا نتقبل نظرة الآخر المختلف معانا على هذي المعايير

`~MnO YeNSa! ~` said...

سنعة

واااااي
علقتينا

والله
عفية
:*

Sn3a said...

فتى الجبل
معيار الاخلاق صاير مطاطي
يختلف حسب رده فعل الناس

كل شي صار دبل ستاندرد

Sn3a said...

منو ينسى
انشالله خيتي مايصير خاطرج الا طيب