Saturday 28 June 2008

احـــــــنا..واهم!

قريتلج شعر حلو كاتبته بمجله
صج؟ اي انا احب الادب واحاول اكتب اشعار او ابيات حلوة بس قلت اخليها هوايه وادخل كليه العلوم الاداريه حسب كلام صديقاتي اضمن لمستقبلي
نو , غلط.. انتي سوي مستبقلج..مو تخلين احد يحددلج شنو الاضمن وشنو لا
عدل.. بس انا اقتنعت برايهم
قود..
انزين توعدني ماتردني ؟
امري
تقولي شنو اللي قريته لي على فنجان ساخن من الشوكالاته اللي تطالبني اياها
بيه..متذكره
اي مانسيت
توقعتج نسيتي.. او يمكن نقول تناسيتي؟
يلا نروح؟
ورفيجتج
اكيد شافتني اكلمك وراحت كملت حوستها لما تبيني تدق

بالكوفي شوب

كل شي تغير
شكثر صايرلك مو ياي الديره
سنتين
تصدق..مع انهم مو وايد لو حسبناهم..بس الديره باللي فيها بتغير مستمر وسريع
يعني كل يوم تشوف شي ييديد..تسمع افكار ييديده..تشوف اشكال غريبه..

اي والله اشكال غريبه صدقتي
بالله هذا شنو اللي فوق راس هالبنات..خلينا صريحين..كلا الجنسين يتجملون للاخر.. وفي منهم للمنافسه
فكري فيها,اذا الشباب نفسهم لايعه جبودهم من هالمنظر.. فمعناته نروح حق الاختيار الثاني
ان البنت قاعده تسوي بعمرها جذيه عشان تنافس غيرها من البنات
معناته في وحده خبله قالتلهم ان هذا حلو وقصت عليهم..واهم قاعدين يتبارون بالحجم واحنا نضحك
انتي لي تحجبتي مو تسويلي هالسوالف

(تضحك)..اي الله كريم

اي الله كريم عدل ماكو اكرم منه .. بس حضرتج ليمتى مطلعه هالكشه وهالسيقان مو عيب عليج

اقول حسين

خلاص اسف ماتدخل

اي عفيه عالشاطر.. حسين بقولك شي

ادري شبتقولين..ماعليه انا مو زعلان,بعدين انا طلبت منج تدزينلي ايميل ان وافقتي .. وان لا ماله داعي تكسرين وانتي سويتي اللي طلبته

مادري.. ترا مو لعيب فيك ولا شي لكن انا الحين..
يقاطعها
فاطمه, لاتبررين من حقج تسوين اللي تبينه.. وانا كنت متسرع يمكن بس ماحبيت تروحين بدون ما اقولك اللي بقلبي ..فاطمه انا مو صغير.. انا فاهم موقفج وفاهم ان هالخطوة كبيره

اوكي.. بس بغيت اقولك انها كانت فتره حلوة وايد وحبيت كل شي فيها.. صحيح اني درست لغه لكن تعلمت اشيا وايد غير هاللغه, وعمري ماراح انسى اي مكان كنا فيه او اي شي قلتلياه.. حسين انا عزيتك وايد..مانكر اني انعجبت فيك وقتها .. بس بصراحه خفت..خفت اني اظلمك باني اخليك علاج من شخص ثاني.. والعلاج فتره وينتهى وانا مو استغلاليه.. انا سافرت بقلب مكسور.. ورديت بقلب قوي خلاني اكسر غيره, انا كتبتلك الرساله بس مادزيتها
كنت كل يوم من وصلت اكتبلك فيها شي ييديد وقبل لايعدون الاسبوعين بيومين قريتها.. شفت كلام انسانه ثانيه.. شفت كلام وايد.. خفت ومادزيت الرساله مادري شالسبب.. انا اخاف من الشي اللي ماعرفه..و اخاف اكثر من اني افقد شي اعرفه.. خفت ادزها .. لاني خفت افقدك بعدين

فاطمه بس, انا ماقلتلج برري
.. رديتيني اشهر ورا
ذكرتيني بحالتي وانا مثل الياهل اللي يوقف عند الباب ينطر وصول امه وابوه
كنت امسك اللاب توب كل مكان يافاطمه كل مكان.. قمت اسمع رويشد يقول وينك, ماوحشتك عيني وحنيت؟ ومثل المينون ارددها وراه , حتى اغنيه ردي الزياره يتروالي الاي بود مل منها
تدرين فاطمه.. انا مادشيت الجيم عشان اظعف ولا عشان صحتي
انا دشيت لاني كرهت حسين الضعيف اللي عاش عمره قوي واخرتها قلبه يخليه ضعيف كنت بغير هالحسين.. بخليه شخص ثاني,ببنيله شخصيه ثانيه .. بس اليوم..الحين دريت انا لو شنو اسوي ماراح انسى شي انا شخصيا مابي انساه
واشوفج الحين جدامي صحيح انتي تغيرتي لكن بكل بساطه انتي كبرتي .. نظرتج توسعت للدنيا
بس فاطمه انا مابي اكون ضعيف.. خصوصا جدامج
انا لما كنت بالطياره كنت ادعي اني ما اشوفج وبنفس الوقت ادعي تكون رده فعلج حلوه ان شفتيني
بذمتج شفتي مثل هالتناقض

حسين
هلا
سوري
قلتلج لاتأسفين
بس منتي هينه ها
شلون؟
تسإلين ان كنت بيي ويا الشباب يالنتفه
شدراك؟
قالي وهابو.. عاد بيني وبينج..انفرجت اساريري

(تضحك) انفرجت اساريريك ها
لاتخليني اعيدها ترا قعدت احفظها شهر

فطوم
يس
ميس يو
مي تو

بس بليز ابي تلفونج..تلفوني طافي ومادري وين الشباب

اوكي

كاهو تلفونك يرن
..
اي ادري انا دقيت عليه عشان اسيف رقمج خفت تدلعين وماتعطيني اياه وبصراحه مو كيفج غصبن عليك بكلمج كل يوم سواء تبيني ولا لا
والحين يلا قومي جدامي روحي حق رفيجتج ماله داعي احد يشوف قاعده مع مزيون وبعدين يسيء الظن فيج ولا شي
مزيون
ليش انتي شايفه شي ثاني
لا حشا يلا جاو جاو
جاو يالغاليه

جود وينج؟
اشرب هوت جوكليت بالكوفي شوب شفييج
يالعياره.. تتطنزين وينج
يم اول محل دخلناه

بالسياره
جود:يه وانا بضطر منج الحجي
شتبين تعرفين
كل شي وصولا الى العطر اللي حاطه
اوكي .. كان يقول
يقاطعهم صوت المسج
ترا بغيت اتكن وما ادزلج شي الا عقب جم ساعه.. بس ماكو فايده فيني المهم ان فضيتي عطيني خبر

اولا بدينا مسجات .. بعد
وانتي شفيج يه مستعيله خو نطري اقولج
اقول فاطمه
هلا
عسى دوم
شنو اهو
اني اشوفج جذيه فريش وماكو هموم على قلبج,شبتسوين
بعطي نفسي.. او بعطي نفسنا فرصه نشوف

اوكي.. بس ديريبالج مابي اشوفج منكسره.. او مهمومه.. فاطمه انا اقربلج من اخوانج واعزج وايد صحيح فهد اخوي بس ماعرف قدرج عدل او يمكن مكابرته خلته يفقدج لكن مابي اسمح لاحد يردج للحاله مثل قبل

انشالله

بالليل

ماعدت اخشى من هجر شمس النهار
دامك معي اللي تشوفه يبتعد
ولا همني ليلن نوا يعلن قرب الانكسار
بجنبك يحلالي اشوفه للنهايه يستعد

تكتب ابيات وتمسحها وتعدل بغيرها وتضيف لغيرها كلمات
غريبه
لما تحس بوحده تكتب عن احساسها باقوى الكلمات ويكون بامكانها تكتب حتى عن حب ماعاشته.. او شوق ما ارتوى.. او حب مانفذ
لكن .. لما تكون احاسيسها مختلطه.. تكون سعيده.. ماتقدر تترجم هالمشاعر بقصيده او بيت شعر

الو
مسا الورد فاطمه
مسا النور هلا والله
شلونج؟
بخير
انت شخبارك
الحمدلله
مشغوله؟

لا ابد توني بتصل
عياره محاتيه رصيدج
يوز عني انا فواتير
عيل لو ادري ناطر
خلاص راحت عليك.. سولفلي وين رحت وشسويت
الله يسلمج رحت بيت يدي وتالي ديوانيه الاهل وسوالف وعشى وشفت يهال ماكنت ادري بوجودهم
الله يهداك بعد غايب سنتين ماتدري عنهم

مرو ساعات
وظل حسين يقول كل شي وماينسى اي تفصيل
فطوم يلا نماز تايم صلي ونامي غثيتينا بهالسوالف الي ماتخلص
(ونماز لغير المتحديث بالهجه العيميه المتفرعه من اللغه الفارسيه فهي تعني الصلاه)
انا غثيتك ماجنك مبطلي الرادو بل ماتسكت حتى لون هدوم دكاترتك بالكليه قلتهم
يلا لاتطولين حجي خنصلي وننام
تصبح على خير
فاطمه
هلا
ثانكس جد حبيت كل شي صار بهاليوم
مي تو, سويت دريمز باي حسين
باي عيونه انتي

صلت .. بس مانامت كانت تبتسم واهيا تذكر كل كلمه او كل موقف قاله لها
غريبه بيوم وليله تشوف كل شي بطريقه مختلفه
بس مابي اتفائل وايد
ليش ما اتفائل؟
نشوف شيصير؟

يصيحها صوت التلفون
بونجور
اهلا بونجورين شلونك
صح النوم يلا وين النشاط والحيويه
الله يهداك امس نايمه عال 6 مقومني 11 تبي نشاط وحيويه
6؟ شمقعدج؟
مادري مانمت علطول
فكرتي بشنو؟
وايد اشيا
فاطمه فكري بالاشيا الحلوة
فكري بالاشيا اللي تبينها تصير
مو تفكرين باشيا سلبيه
واو اشيا ماتبين تمرين فيها

ان شاء الله .. شنو بتسوي اليوم

والله مادري.. عطيني اقتراحات.. بس من هالاقتراحات اني اشوفج

ولليه ضروري يعني؟

نعم؟؟ شنو ولليه.. خلاص يبا مابي اشوفج زين .. بسألج سؤال
تفضل؟
شنو اللي فكرتي فيه؟ بتعطينا فرصه؟
نستاهل هالفرصه

النهايه

23 comments:

Mok said...

القصة حقيقيه؟
:)

Don Juan said...

come on give us a break this end is like killing superman :@

WE WANT MORE ;D

Sn3a said...

mok
لا خيو تأليف
نورت البلوق

Sn3a said...

دون جوان
يعني خيو شبسوي اهيا طلعت جذيه
ماكو مور بح فنش فينيتو

Don Juan said...

زين اهم تزوجوا و خلفوا صبيان و بنات ولا ما صار شي بينهم ؟؟

نهايتج ذكرتني بالقرار الأخير ;/

5roofa said...

يااااااااختيييييييييييييييي


واااي يشوقوووون حددهم زوووغه

امبي حبيتهم وناااسه حبهم يشووق لوول

القصصصصصه تيين تسلمييين سنعهههه من صج مشكووورة

salamz sis...

Sn3a said...

دون جوان

الله يغربل ابليسك والله والله والله اول ماخلصتها جان اقول شفيها سنعه سوتها القرار الاخير
منت هين والله

Sn3a said...

خروفه
لول حبتج العافيه تيجر تسلمين
نورتي البلوق

Super Woman said...

اي هذي النهايه السعيده

:)


يا حلوهم

esTeKaNa said...

الحياة غريبه
!!
والمشاعر عمرها ما كانت ابدية
الحب مثل الورده
تحتاج دايما ماي يرويها
واهتمام يكبرها
والورده لي فقدت الماي مصيرها تذبل وتموت

فقدت فهد
جرح
والوقت منها يشفيه
وياها حسين
حب
واهتمام
وصبر
باجر بتحبه
وبتتعود على قربه
بس المهم انها ما تسرعت
عطت قلبها فرصه يتشافى
وعطته فرصه يقرب
وهذا ذكاء منها
:)
بوست حلو
جني براجع اخر بوست عندي
وبعطيهم فرصه
:Pp

7osen said...

حلوة القصة
أستمتعت فيها وايد

حواراتج جداً واقعية

يعطيج العافية

:)

N a 9 i R said...

افتقدت تألقج سنعة ... :)

ما قريت القصة كاملة للحين لكن المقاطع الي قريتها شوقتني لقرائته كاملة ..

بس قبل مااقراها حبيت اسلم و ثانكس ع السؤال :)

peace

na9ir

Sn3a said...

شلالات
ثانكس حبيبتي والله اسعدني هالتواصل وحبيت هالمرور على البلوق
انشالله يعجبج كل اللي اكتبه

Sn3a said...

الغاليه استكانه

حبيت الكومنت واايد
المهم الفرصه
بس الاهم
وقت الفرصه

ضحكيتيني لما قلتي بتراجعين اخر بوست

نورتي البلوق

Sn3a said...

حسين
اهلا وسهلا خيو
هالقصه ماتيي جزء من بحر ابداعك بالبلوق جد بوستاتك وايد حلوة

تسلم خيو ونورت البلوق

Sn3a said...

ناصر

والله احنا اللي فقدانك اخوي
وينك شهالغيبه والله ماصدقت عيوني لما شفت اسمك بالكومنتس
جد والله اسعدني هالشي وانشالله ماتنقطع مره ثانيه

انشالله تعجبك القصه
نورت البلوق خيو

Blog 3amty said...

وتبقى قصة :)

Anonymous said...

waaay sn3a wede a6gch


bs nice 8e9aa

7elwa w7a shy esmha fa6ma :P

Shather said...

اصفقلج صراحة علىهالسيناريو الممتع و اللي في عوار قلب نوعا ما :(((((

ناوليني الكلينكس

Sn3a said...

بلوق عمتي
اي عدل كلامك

Sn3a said...

فري موا
ليش يبا تطقوني
اي بعد من قدج
عساج تلقين اللي احسن من حسين

Sn3a said...

شذر
تسلميين حبيبتي
والله ما يوصل جزء من ابداعج بالبلوق

لول ناوليني الكلينكس
جان كملتيها وقلتي المنديل

تراب الكويت said...

تكتب ابيات وتمسحها وتعدل بغيرها وتضيف لغيرها كلمات
غريبه

..

في امور تكون احلى اذا خلت من المنطق
ويبقى الخوف
من فقدان حلاوة اللامنطق

بصراحه

انتي " عميقة " جدا

يسلم احساسج

:)