Wednesday 30 July 2008

دايسه 180..زقرت مو؟

كافي


يتروالي مافيني احد عنده شي اهم من نفسه او اخوه او اخته او امه او ابوه

قبل يوم وصلني خبر عن وفاة احد الشباب بسبب حادث
وهالشاب وحيد امه يعني بظرف دقايق امه انكسرت احلامها
بظرف دقايق الشاب صار بدون مستقبل
وبهالدقايق انتقل الى مكان اخر في امان الله


المشكله ان شنو
ان الدوس صاير فخر للشباب والبنات بعد
ماتقعد بمكان الا وتسمع فلان شاخط 140 ولا علان حياته كلها تبتون بالسيايير
ولا بنت مستانسه انها بغت تسوي حادث (بس) الله حماها .. يعني وناستها ان الله حماها نست انها بغت تروح وبغت تخلي شخص ثاني او ثالث يمكن يروحون


من الوفيات اللي سمعت فيها


-شاب طالع من بيتهم بعمر الزهور للحين ماشاف خير الدنيا من شرها رايح يشتري لامه كيكه بمناسبه عيدميلادها
لا الشاب شرا كيكه
ولا اهو رد حق امه
والام من سنين للحين تشوف صورته وساكته

-بنت توها بتصير عروس..رايحه تشتري جهازها عمرها ماصار 20 ترد لاهلها ميته ليش؟ الام للحين ماشافت بنتها بفستانها الابيض ولا الريال عاش عمر وياها وبنو عايله
-بنت معروف عنها الاخلاق وبر الوالدين تنقلب بجيب على البحر ليش؟ لان شاب مع احترامي حمار كان يتحرش فيها واذاها بالطريج وراحت البنت من اهلها والابو عينه مازالت تدمع بصمت على بنت احسن تربيتها وماشافها تعرس ولا شاف احفاده
-شاب طالع مع ربعه قروب سياكل ومرته بالبيت يدقون عليها المستشفى تعالي..البنت تروح تتمنى ان مافيه شي او ان مجرد اجراء روتيني ..تشوفه والشرشف مليان دم ومغطي عيونه .. البنت حاليا عمرها 45 وللحين تمسك صورته
-شاب توه خاطب ونفس الشي بسيكل رايح بسيكل للنادي.. العمه تدق على اهل الخطيبه ولدنا توفى بحادث والبنت توها شاريتلها نفنوف ملجه لا اهي لبسته ولا امه شافت ولدها يصير معرس

ترا هالقصص غيض من فيض
مو مهم منو اللي دايس
مو مهم
الموت حق وجايز يزور الشخص بكل الحالات ..نايم مريض يسوق بالدوام صايم فاطر مصلي مسمي بديسكو اي مكان واي ظرف
لكن مانكون احنا وسيلته


اللي يدوس مايدري ان وراه ام تنطر.. او زوجه ولهانه عليه..او اخو معتمد عليه.. او ابو يشوف فيه الدنيا..او اخت تستند عليه؟
مايدري ان وراه دنيا للحين ماعاشها وان الشارع مايقدر يتحكم فيه ومايقدر الا ان يدير باله ويسوق عدل
ماهمه كل هذا ماعليه

مايدري ان بالشارع غيره يهتم
ريال راد من دوامه حق عايلته ولهان عليهم
بنت توها خالصه امتحانها بترجع تطمن اهلها
شاب رايح المسيد
او عروس رايحه الصاله
او معرس امس زافينه



ان كانت حياتك مو مهمه كيفك!
بس حياة الناس ماتقدر تعاملها نفس الشي


ماظنتي ان في شي بالدنيا اهم من صحه الشخص وسلامته
ولا ظنتي ان احنا واايد واثقين من اعمالنا وصلاتنا وصيامنا اللي مستعيلين لهدالرجه على الحساب والقبر
يتروالي كلنا مقصرين


اتقو الله بانفسكم واهلكم
واتقو الله بغيركم!





لاتقطعون قلب مثل هالابو!



31 comments:

Anonymous said...

واي امبيه!

اليوم بعد هم نفس الشي وآنا أسوق أشوف الناس كلهم طايرين ودايسين مادري شوراهم... اللي يلحق الثانية واللي جذيه مزاج يبي يوصل مكانه بسرعة! انزين آنا شوي وبغى واحد يشيلني واهو يبتون ودايس!

يا ناس! لييييييييش؟ ترا مو ازقرت ولا شي... السرعة قاتلة!

أشكرج على هالموضوع!

lawyer said...

عيزنا ياسنعه انقول وانتحجى
يردون علينا محد ميت قبل يومه

انا مرااااات اصييح من هالموضوع

Sn3a said...

cece
بالضبط الناس ماندري شوراهم
ماكو شي يسوى والله
اهم عندهم هالشي زقرت
ياخي مو خايف على عمرك انا وحده مابي اموت بهالعمر ولا ابي عزيز علي يموت


نورتي البلوق

Sn3a said...

شرفتيينا بهالزياره استاذه فاطمه

صح محد يموت قبل يومه
بس ربي يقول لاتلقو بانفسكم الى التهلكه
والله الضحايا يقطعون القلب

Anonymous said...

مشكورة سنعة

شكلج مستشارة للوكيل المساعد للمرور :)

kuwaitawy said...

الله يكافينا شر الحوادث يارب



والله يكون بعون المذيع يوسف الجاسم على
المأساة اللي يعانيها




الله يعطيج العافية على اللفتة الانسناية يا سنعه

Sn3a said...

محسد
العفو
لول مو مستشاره ولا شي ياخوي
بس حرام هالشباب قاعدين يروحون من هالدنيا بدقايق والكل ساكت

نورت البلوق

Sn3a said...

كويتاوي
الله يسلمك
عاد ماوصيكم ديربالكم انتو بغربه
هالله هالله بالركاده

تخيل ان في مئات مثل يوسف الجاسم
ويمكن في مئات حالتهم اصعب وللحين ماستوعبو المأساة


الله يرحمنا برحمته

SHAHAD said...

بوستج جدا جدا مؤثر
عن جد .. كلامج كلله عدل بعدل
ياليت الكل يسمعج
ويتعظ من هالقصص
يا ما قلوب امهات وزوجات وأبهات وأخوان وأصدقاء تقطعوا عشان شخص مات من بعد حادث .. سببه السرعة !
شي يعور القلب

مشكورة على هالبوست حبوبة

mo3ath said...

واحد من الشباب الله يرحمه راح بحادث سياره واهو توه مالج وقاعد يزهب شقته

مافي عذر لغباء الإنسان ومافي شي اسمه كل واحد يموت بيومه ، ليش انت مستعيل على يومك مثلا

والله شلعتي قلبي بالبوست :(

Sn3a said...

شهد

العمر قصير
مايسوى نذبح فيه احد
او نموت بهالطريقه

الله كريم

نورتي البلوق

Sn3a said...

معاذ

الله يرحمه
عوار قلب والله
اي والله مادري ليش مستعيلين


سلامه قلبك ياخوي

نورت البلوق

Q8-MaNaL said...

وااااي عور قلبي يوسف الجاسم و اهوا يبجي،حراااااااام :(
عسى الله يشافي بنته يا ربي و يفرح قلبه

سنعة البوست اللي كتبتيه اكثر من رائع مع ان عورتي قلوبنا في قصص الحوادث اللي ذكرتيها،عسى الله يرحمهم و يمسح على قلوب اهاليهم

و اتمنى من كل واحد يقرا البوست يستفيد منه و ياخذه عبرة عشان يحافظ على سلامته و سلامة غيره بالشارع و الله يحفظ الجميع ان شالله

يعطيج الف عافية اختي سنعة و تسلم ايدج

Sara said...

واااي عواار قلب والله

انا بعد امس سمعت خبر وفاة أحد مات بحادث وهم صغير .. الله يرحمهم ويرحمنا برحمته

مادري ليش الدوووس مادري ترا كلش مو فخر كلنا نقدر ندوس بس ليش ندوس دام ندري ان خطر

وصج صج ما انقهر إلا على اللي يموتون بحوادث مالهم ذنب فيها مثل اللي يتحرشون فيهم ويلفون عليهم والله حرام

Organic Kuwait said...

thanks for this post... thanks..

Maximilian said...

مشكلة احيانا لمن يكون ضايق خلقي من شي كله ادووووس لا اراديا

:(

شل الحل

Sn3a said...

q8-manal

هالفيديو من شفته بالتلفزيون كله ببالي
وكل ما يتوفى احد بحادث اتخيل اهله بنفس هالمنظر


الله يرحمهم ويغفرلهم ويصبر اهلهم
الموت حق بس لانكون اداته

تسلمين عالمرور الحلو

Sn3a said...

ساره

سلامه قلبج
اي والله عدل كلامج كلنا نقدر ندوس
بس الناس مالهم ذنب بالينون اللي فينا

الله يرحمه ويغفرله

Sn3a said...

organic kuwait

most welcome
btw you have a realy nice blog!

Sn3a said...

dr max

كلنا مرينا بفترات دسنا فيها
بس دسنا وبعدين
في شيين جدامنا
نرجع بيتنا
ومانرجع

ولما نرجع بيتنا جايز فيه شيين ثانييه
نرجع بصحه
نرجع واحنا ذابحين احد

ديروبالكم
وتذكرو اهاليكم
وتذكرو الناس

الله الحافظ ان شاء الله

Najmah said...

تقطع قلبي
ياليتهم يسمعون يالييييت

Eng_Q8 said...

مشكله هالناس والله

انا ادوس بس بالخط السريع :)

Sn3a said...

نجمه

ياليت اختي
لان هذي ارواحهم
وارواح ناس

Sn3a said...

بش مهندس

دوس
بس مو تدووووس
الله يحفظكم

kazmawy said...

الله الحافظ ويكفينا شر الحوادث والناس المصرقعين
مشكورة على هالمقال الحلو والمؤثر
صج انج سنعة :)

Don Juan said...

أخيييه يبتيها عالجرح :(

انا انسحب ليسني مرة من الوناسة بالعيد كنت دايس 220 جان يصيدني الرادار على سرعة 180 و انسحبت اوراقي

لما قعدت افكر بعدين قلت انا ليش دايس 220 ليش شالوناسة و شالفخر بالموضوع اذا مت بالله منو بيذكرني ما غير العموم بيمر عند سيارتي و بيقول طا هالحمار ضيع عمره و بجى أهله من وراه

من وراها صرت آدمي و ما قمت أدوس .. و قمت أحس بتوفير البنزين لما الواحد ما يدوس ;Pp

والله هالموضوع يثير الشجون .. و انا من بعد السالفة الي اختي قالتها عن واحد انشل بسبة حادث و ابوه من القهر عليه مات و اهو يصب بنزين بالمحطة من القهر :( مابي أحط ابوي بهالموقف :(

مشكوووووورة عالموضوع ;)

Shather said...

بيييييه هالسالفه سا سنعه ازليه

كلمن عند نفسه حررّييييف سياقه

انا غير و انا غير


القصص اللي كتبتيها قطعت قلبي حتت :((

Sn3a said...

كظماوي
اي والله الله الحافظ
العفو ياخوي نورت البلوق

Sn3a said...

دون هوان

اهيا وناسه لحظيه
بس حرام بهاللحظه شي يصير بسبه هالوناسه!

محشوم والله يحفظك وان شاء الله ولا ابو ولا ام بيتعرضون لهالموقف
ديروبالكم

اهم شي توفير البانزين انا حساويه ولا انت:P

Sn3a said...

الغاليه شذر
اي والله ازليه
والمشكله الحوادث قاعده تزيد مع ان الناس شافو مصايب منها

الله الحافظ
وربي يرحمنا برحمته

fatto said...

البوست يعور القلب .. حتن ماقدرت اكمله .. الله يحفظ شبابنا وركدهم .. والي الله كاتبه بسير .. كل واحد مكتوبله يومه .. الله يصبر اهلهم انشاءالله