Wednesday 10 September 2008

صفحات من مذكراتها 3


الفراغ الداخلي قوي
جبرت نفسها تندمج مع اهلها
مع زوارات امها
مع استقبالات وعروس
مع عالم مالقت نفسها فيه
وبيوم يمعه العايله

يقرب احمد ولد خالها, احمد اول حفيد بالعايله وكان مدلل وبنفس الوقت شاطر ماخربه الدلال يدرس سنه ثانيه محاسبه بامريكا .
ها بنت الخال
هلا احمد
اشوفج منورتنا بالزياره شالطاري ماعندج خرده تطلعين وتتشرين بالسوق
رغد تقلب عيونها وتطاع تلفزيون
يبا اتغشمر والله , زين شخبار النت امج تقول حطولكم اشتراك وجذيه وين تدشين
ماقمت ادش
ليش
جذيه مليت
اني وي انا عندي جنل بالاي ار سي متى ماشبكتي دشي بس ترا ها تدشين بنك ريال مالي خلق احامي عنج بعالم الشبكه
وي ياحمش لا ينكسرلك ضلع بس اهوو
زين وين بتدرسين لين تخرجتي
مادري
مافكرتي
لا ليش شبغيت
مابغيت شي يبا خلاص خلج بتلفزيونج

تنادي ام رغد احمد ,
احمد تعال المطبخ علمني طريقه القهوه اللي تقول عنها
ويروح احمد المطبخ وتسأل ام رغد عنها شفيها ليش ماعاد لها خلق شي ماقالتلك ليش ماتبطل كمبيوترها نفس قبل , زين اسألها شي
خالتي والله ماني عارف اصلا حتى لما كانت تشبك خذيت نك نيمها من نور ماكانت ترد علي
وانت لا يكون قلتلها انك احمد
لا ماقلتلها كنت بكلمها عادي وبختار اي اسم
زين يما ادري اذيتك وياي
لا خالتي عادي شدعوة اي شي تبين رقمي تعرفينه سواء هني ولا لما ارجع كلميني
نور تتضايق لحال رغد وتقعد على نفس الغنفه
وانتي مازهقتي من التلفزيون, انا والبنات سوينالنا جنل عجييب كله سوالف وجذيه
زين
رغد شفيج , مره وحده تغيرتي .. مو تغيرتي لا رديتي نفس قبل
مو هذا اللي تبونه
لا وع شبي بهالنفسيه انا مابي هالشي ابيج تضحكين وباقي على العطله 20 يوم وانتي حتى سوق ماقمتي تروحين اذا فيج شي قوليلي سولفيلي فضفضيلي ترا ما اتطنز
ماكو شي انا بنادي السايق وبرجع البيت باي

وتفتح الكمبيوتر
تزيد دقات قلبها .. تحتاج احد تكلمه بس شتقوله اهيا اصلا ماكو احد زاعجها محد قط عليها كلمه بس ليش هالحاجه ليش تحس نفسها بروحها بدنيا مليانه ناس .. الناس تسال عنها والبنات يدقون يتطمون عليها ويعزمونها

تدور بدر بين هالاسامي
تنطر نص ساعه
زهقت زحمه الدنيا ماكسرت الوحده
زحمه النت زادت فيها هالوحده اكثر
ويوصلها اتصال من يوزر بالاي ار سي
قوة
تتردد ماعرفت تكلم غير بدر بس بدر مو هني.. زين بدر كان يسمع يمكن هذا يعرف يسمع.. المشكله مو بالسمع كلمن يسمع بس المشكله باللي يسمع ..طبعه..رده..تعامله

اهلين
ليش طلعتي من بيتنا بسرعه
بيتكم وانت منو عشان اطلع من بيتكم
طالعه عشان تجابلين النت .. ويحك من فتاة
احمد؟
وهل يخفى القمر
خير؟ وانت بالله منو قالك ان هذي انا يعني لو كنت بسولف وياك مثلا جان قلتلك من زمان
زين يبا كسبي فينا اجر وسولفي انا مابي شي ابي افضفض بس
وانت شبتفضفض بعد؟ مو ناقصك شي تدرس باحسن مكان وتلبس احسن لبس والاهم بصحتك
وانتي بعد تدرسين باحسن مدرسه ..صج فيها بويات بس ماعليه .. وشزينج والاهم بصحتج وشوفي كله متضايقه ومهمومه ..تهقين الملابس والمكان اهم اللي يونسون
مادري
شفيج اذا انا غلطان صلحيلي
مو غلطان..
سمعي انا ادري انتي ماتبلعيني
مو ما ابلعك بس بصراحه وايد مسويلك هيبه بالبيت مادري على شنو

احمد بينه وبين نفسه .. تكفى شبرد عليها الحين وصلتني القاع بس ماعليه تمون

ماينلامون فيني وانتي مضايقج انهم يحبوني يعني
لا بس وايد يحبونك مافيك شي زود عن اخوك ولا عن الباجي
زين خلينا مني حسبيني غريب
ليش ومن قالك انك قريب؟

يتحلطم مره ثانيه اشوه اني مو يمها جان حاذفه علي شي .. اول مره اشوف بنت بهالقساوة!

انا بعرف انتي ليش قاسيه جذيه اول مره اشوف بنت جذيه
ليش جم بنت شايف؟
تدرين شلون انا بروح تحت عيب الناس عندنا وانا قاعد اسولف معاج عشان بس اتطمن عليج وانتي ماسكتني تهزيء يلا عن اذنج
حياك
منتي قايله شي
مثل؟
سلامتج خلج بعنادج وقساتج وبتفقدين وايد ناس ترا حلاة البنت بقوه شخصيتها وقوه الشخصيه مو معناته الكلام الاستفزازي والردود الناشفه ترا قوتها بلينها بالاوقات المناسبه
الحين انا قاسيه واستفزازيه ؟ كل هذا بقلبك
والحين انا اللي ماستاهل حب اهلي لي؟ كل هذا بقلبج

وبالمسا تكررت هالمحادثه مع شد وجذب من كلا الطرفين وفجأه يوقف الحوار
رغد معاي؟

اما رغد فقد عصتها اناملها عن الحركه حينما رأت اسم بدر يضيء شاشتها ويعلن عوده دقات القلب الغير متوازنه والرغبه في كتابه كل شي عن حياتها
مسا الخير؟ ماني مثقل عليج بس عز علي اشوفج وما اسلم
مسا النور بدر شلونك وشخبارك قولي قدمت عالجامعه ووين قدمت
يتروالي سؤال واحد ارد عليه انا بخير الحمدلله اما باجي الاسئله ماهمتج ولا بتهمج فليش المجاملات
ليش تقول جذيه؟
اقولج ليش
ممم صارلي شهرين الا جم يوم مادري عنج اولا وثانيا انا ماقصرت معاج وكنت وياج لما احتجتيني بس لما احتجتج اتلفت اشوفج ما القاج حبيت اخذ شورج برغبات الجامعه حبيت تشجعيني اني اكمل بكالريوس وقت ما االكل قالي انت مو كفو جامعه بس شاللي شفته منج؟ ولا شي

بدر انا ماقدرت اكلمك لاني حسيت الشي غلط .. صحيح احتجتك وكنت معاي لكن كنت احس احيانا بتأنيب الضمير وابوي كلمني بلندن بطريقه غير مباشره وصحى كل هالذنب بقلبي ذنب كنت اشوفه واغمض حيييل عشان يختفي
انا ادري ان غلط وادري ان اللي بينا مايرضي الله لكن انا شبسوي قوليلي تعودت عليج وانتي هديتيني بالوقت اللي احتجتج فيه ومو قاعد العب والله مو قاعد العب بس دام هذا ظنج فيني يبا الله معاج باي

تكتب رغد وتكتب تبرر ساعه وتتكلم عن شوقها له ساعه وتضغط انتر ويفاجئها بدر ان هالمره اهو مو موجود لاول مره مايكون موجود وماوصله الكلام

احمد انا بمشي
حسبالي مشيتي من زمان زين وينج غطيتي
رفيجتي دقت وجذيه عن اذنك باي
زين بقولج عن طريقه
شطريقته؟
لما تتضايقين كتبي اللي ضايقج ترا ان ماكان لج شخص تشكيله لج رب مايردج واهو اللي بيسمعج لو كثرت حولج الاصوات
واهو اللي بيرحج لو ازدحمت بقلبج الهموم وماعاد في مكان للهموم الجديده
انا جايز مو قريب منج وماتنلامين طبيعي مو بيومين الوحده ترتاح لشخص وتشكيله لكن ربج اقرب من كل بشر وماراح يمن عليج انا مو متدين ولا بسوي روحي متدين لكن انتي تشوفيني فرحان وماعندي هموم
انتي ماتدرين ضيقه الخلق اللي اعيشها من اروح المطار عشان اسافر حق الكليه ماتدرين شنو الايام اللي امر فيها اتمنى بس اشم ريحه امي واسمع نجره اخواني اتمنى حتى ابوي ينزرني ويعصب علي بس اني ماكون بهالمكان لكن الهدف اللي رايحلها يهون علي
انتي عايشه بالديره بين امج وابوج تقضين رمضان بينهم الاعياد بينهم على الاقل تعرفين شيمرون فيها العايله افراحهم احزانهم انا مايربطني شي هناك بالديره الا التلفون والنت وهالشيين مايوصلون اللي بقلب الواحد

ليش تقولي جذيه
لاني ادري انج ضايعه وتفكرين بوايد اشيا بوقت واحد توزنين كل شي وتفكرين باللي بيصير باي خطوة
؟مبين
وايد يلا ماطول عليج واي شي تبين لا يردج الا لسانج.. او لا يردج الا كيبوردج ان صح القول
تصبحين على خير
وانت من اهله احمد مشكور
لحظه خل اغسل عيوني
انتي قلتي مشكور
اشوه اول مره احس ان ماراح تحذفين علي شي

تضحك..شدعوة
ما انلام كنتي مسويتلي رعب عالعموم دام ان السالفه فيها مشكور ترا بلوزتج اليوم كانت ضيجه لو تخلينها للبيت احسن سامحيني اني تدخلت
احمد
هلا (ترا قاعد ارجف) سوري مو قصدي اتدخل
ان شاء الله ماراح البسها
بروح اقحص واجي
شنو
ولا شي باي يبا
باي
يتبع

31 comments:

ضـاد said...

يحليلهم



:)

Mok said...

:))

قلبج طفلة
:)

بس ابيج تكتبين موضوع البوست القادم

mo3ath said...

من كثر الحجي الي براسي مادري شقول :)

التكمله الله لا يهينج :)

Sowhat said...

typical teenager :)

مادري الواحد بهلعمر ليش يحس انه محد فاهمه معنه مفهوم ممكن الهرمونات ؟
يحب يكون الانسان الغامض الي محد فاهمة

شي غريب ..

قصة واقعية الى درجة تخوف .. ما اخاف الا ان نشوفها مسلسل برمضان الياي .. معني ما أظن لانها وايد حلوة عليهم

كملي ترى قاعد نتابع

kuwaitawy said...

تكملة يا سنعه تكمله




ولنا تعليق بالنهايه


:)

الزين said...

سنعة

ترى انا عايشه القصة

لا تتاخرين ارحم الله والديج

:**

SHAHAD said...

التكملة يا سنعه بسرعه
حده اسلوبج يشوووق
بعرف شيصير عليها

Anonymous said...

يا ربيييي روووعة ^_^

حبيت القصة صج رووعة ..

وينو احمد عني ما يطلعلي !! لول

بس عندي سؤال .. شو هالــ آي ار سي!!


ما راح اطول عليج غناتي .. مشكوورة على هالقصة الغاوية و نتريا باجي القصة ..

سي يو ^_^

Najmah said...

حلو هالبارت وايد

صح مرات الانسان يحس بالوحدة على كثر الناس و احبابه اللي حوله

لكن هذا مو معناته يبتعد عنهم
وينفس عليهم
ومايبادلهم الطيبة والمحبة
!!

يالله لا تطولين
:*

Anonymous said...

متابعين

بس لا يقلب مسلسل مكسيكي :)

أبو لطيف said...

شعور
احساس


اكملي بارك الله فيك

وليكون التعليق في النهاية

فالقصة تحمل الكثير مما يستحق التعليق

حفظك الله

Blog 3amty said...

سجليني متابع :)

|:| DUBAI |:| said...

................................

بانتظار الحلقة القادمة

من أناملج الذهبية

: )

Sn3a said...

ضاد
يسلمو عالكومنت

Sn3a said...

mok

قلبي انا؟
يمكن

موضوع البوست القادم والله مادري بيني وبينك انا مافكر من ايي ببالي شي اكتبه

يعطيك العافيه خيو

Sn3a said...

معاذ
هلا اخوي
ان شاء الله بكمل وناطره تعليقك النهائي

Sn3a said...

دكتور سو وات

المراهقين دايما يحسون بوحده واهم بهالسن عرضه للحساسيه المفرطه من كل شي والسخط على اي شي


ضحكتني بالمسلسل
حياك الله

Sn3a said...

فاير فايتر كويتاوي باشا

ان شاءالله خيو عن قريب

Sn3a said...

الغاليه الزين
يسلملي هالتواصل الحلو حبيبتي
ان شاءالله بكملها

Sn3a said...

شهد
هلا والله اخيتي
ان شاءالله

Sn3a said...

عواشي
اهلين بالضيفه الييديده منوره البلوق اختي

الله يسلمج الاي ار سي اهو برنامج قديم للمحادثه وايد هبو فيه الناس بناهيه التسعينات وبدايه الالفين

Sn3a said...

اهلين وسهليين بالمبدعه نجمه
ان شاءالله ماني مطوله

Sn3a said...

محسد

والله انا كتبت بارت بس حسيته مكسيكي على تركي
فمسحته ان شاءالله اكتب بارت مقنع اكثر

يسلمو عالتواصل خيو

Sn3a said...

اخوي بولطيف

يعطيك العافيه على هالتواصل الحلو
ان شاءالله بكملها وبتشرف بتعليقك

Sn3a said...

بلوق عمتي

نتشرف بهالمتابعه اخوي انت وعمتك اهل البلوق افا عليك

Sn3a said...

الغاليه دبي
ان شاءالله

تسلمينلي حبيبتي

Anonymous said...

ننتظر الجزء الثاني

Anonymous said...

ونااسه حدي اندمجت

كملي كملي :p

Sn3a said...

salemuae
هلا بعيال الامارات الغاليه
نورت البلوق والجزء نزل

Sn3a said...

فري موا
اهليين وسهليين
كملت
نورتي المكان

Anonymous said...

سلاااااام ..

تقولين نزلتي الجزء اليديد !!! وينه ماشوفه ؟؟


سي يو