Monday 22 September 2008

صفحات من مذكراتها 7



مشكله لاتساوي بالهوى اثنين .. عنادهم ,حبهم ..وكبر راسهم واحد
محد يباشر للسموحه مرتين .. يشوفون الاسف اعظم من الخطا واجد


بدر زهق ظن ان اللي سواه وقربه منها وسؤاله عنها يساوي الاعتذار
واهيا زهقت من هالقرب وملت من السؤال مابغت الا كلمه اعتذار

وبعيد ميلاده كابرت .. دامه ينطر هالمسج خلينطر طول عمره مثل ما بيخليني انطر طول عمري ان قلبي يبرى
مرت اشهر الواحد فيهم ظن ان الثاني نساه وعاش حياته والموضوع كله ينحل بكلمه اسف من بدر او بكلمه سامحتك من رغد.

بعد اشهر طوال

طلعت رغد من الكلاس وطاح موبايلها
وزميل لها شال لها الموبايل وعطاها ولما كانت تشكره لمحت بدر اللي من شافها مجابله ريال لف ويهه ومشى رسمت ابتسامه تخفي فرحتها بشوفته .. سعادتها بغيرته.. وحزنها من نظرته.. والمها من رحيله بهالسرعه


ولما راحت بتركب سيارتها شافته
سوى روحه يتكلم بالتلفون ويمر يمها يقول اي حبيبتي كملي
اهيا مني شهقت من الضحك
ويلف ويها يقولها في شي يضحك
لاتسمعك حبيبتك
سكرته
ماشفتك سكرته
انتي شكو ليش قاعده تضحكين
عطني تلفونك
شتبين فيه
عطني
اخر رقم داق عليه الساعه زين لاتدق لاتخسر مكالماتك اوقف بعيد وتغزل بالتلفون
بدر
شتبين
مابي شي سلم على ريال الساعه


واهيا بالسياره مامشت الا لما غاب عن نظرها لانها بكل مره تشوفه كأنها اخر مره بتشوفه بحياتها


بعد جم يوم

تتصل نور
شلونج مالت على حظي
زينه شفيه حظج
ما قالتلتج امج
لا شصاير بعايلتكم هذي 5 نجوم
احمد خطب
صج
اي والله قلنالج دام شاريج اخذيه بتصيرين 21 سنه وانتي ماتزوجتي
اعوذ بالله وبعدين ...توني صغيره
ويه صغيره ماصغيره ... شوفي البيبيات حمل بالكليه لا ويلبسون ضيج عشان يبين حمالهم اللهم ياكافي فقدو عقلهم
وانتي محد عاجبج.. منو خطيبته
وحده متدربه بالبنك عندهم عفيا تدريب خمطتلها ريل وانقبلت بوظيفه .. ناس ماتطيح الا وهي واقفه

بعد شوي تطلع من غرفتها تلقى امها
شفيج مستانسه
يما شنو تتضايقين لين استانست؟ بروح السوق اشتري بدله حق ملجه وعرس احمد
ماشاءالله مستعيله اكثر من العروس اشوف
ايي بعد احمد حسبه اخوي لازم استانسله

اليوم الثاني تدزله مسج الصبح
الف مبروك
تحليليني
على شنو
على كل شي
تحليليني

احمد ترا بتزوج مو تروح الحج يبا محلل الله يوفقك
عروستك حلوة مثلي ولا ربي مارزقها باللي رزقني
اشوه انها مو مثلج طبعا احلى

وعقب الملجه بيوم كان الغدا ببيت العايله .. واهم عالطاوله احمد يبي ينادي مرته وكان يشوف رغد فقالها رغد حبيبتي عطيني الشوكه الكل سكت والمره خزته وطالعت القاع لان ماكان ودها تشوف نظرات اللي قاعدين جان تقول رغد حق احمد تتدارك الموقف
والله مرتك قويه
و يقول
ها
بس ترا خلصت الدقه لاتزعل البنت وتشيل علي
مالج شغل فيه اهو قبل متحداني يقول اسمي جدام مرته او اسم نور بيشوفها دلوعه ولا مخها عود
شفتي شلون مرتي عاجل ..

واكسرت رغد الحاجز بينها وبين ساره زوجه احمد عشان تنسى هالسالف لان المره ببدايه حياتها اليديده عقلها يودي واييب وتاخذ بكل كلمه وتفسرها .. وجايز ان مجرد احساس يخليها تهد كل شي وترجع لحضن امها وابوها

بالليل واهيا بالبيت يوصلها مسج
مشكورة سويتي فيني خير
مره ثانيه قول اي جمله براسك قبل لاتقولها جدام البنيه
ترا ماكنت قاصد
ادري وامسح المسجات هذي ماله داعي باجر تشوفهم وتشيش عليك اذا تبي اي شي دق علي بيتنا وان كنت طالعه كلمني جدامها غير جذيه لا
لو موفره علي وعليج كل هذا مو احسن؟

شفيه هذا
ماردت عالمسج ونامت
بعد فتره زارت بيت خالتها ام نور
مقزرتها طلعات ويا بنات الجامعه
اي شسوي ماكو شغل شفيه تلفونج كل شوي يرن ماصارت نور.. منو هذي
محد تلاقين هنود داقين بالغلط خو تلفوني مايدق عليه الا الهنود
ومسج بعد... اقول ترا محنا يهال منو هذا
محد شفيج
نت كليه سوق بالضبط وين شفتيه
لاتأذيني ولليييه انا بروح المطبخ بشوف شقاعدين يسوون عشا

وتيي خالتها

واي هالمسيجينه نور بنيتي ياتدرس يا بالجامعه تعبت راح لونها..
اقولها يما روح السوقه روحي ريحي شوفي الناس كاهي رغد من سوق لي سوق من مطعم لي كوفي شوب بس بنتي مسكينه متعلمه على البيت

رغد تضحك بينها وبين نفسها
اي الله يعينها

ايي عاد انا ماخليها حتى لو تبي لازم تطلع ويا اخوها .. ام سالم , سالم يطلع ويا رغد ولا بروحها ويا البنات اللي مايندرا من اهلهم

لا ياشريفه اهيا تطلع مرات ويا رفيجاتها ومرات ويانا بس رفيجاتها نعرفهم بنات ناس ومتربيين
رغد تقول لامها:
سكتي اختج
ششش لاتسويين سوالف خليها تكلم وترزز بنتها شواراها
وتكمل خالتها

وانتي ليش حاطه حمره هاللون ماحطينا حمر الا عقب ماعرسنا.. حتى المسكينه نويره ماتحط الا زبده خنت حيلي وعينها ساعه تكحلها وساعه لا ويها حساس بعد عيني ماتقدر على هالبلاوي اللي تحطونها بويييهكم

مممم مادري منو مخلص مكياج الهنود غير بنتج ... تتحلطم رغد يم امها وامها تحاول تسكتها
سكتي قلنا خليها

وبعد شهر يوصلها من بدر مسج
ابيج بسالفه اذا بزي عطيني خبر
وتدق عليه
هلا
وعقب السلام والسؤال عن الاحوال
يقولها
ترا نور عندها علاقه مع ولد وهالولد انا اعرفه راعي حجي ويجذب ومعشمها بزواج وماخذ صورها وانا شخصيا شايفهم
يعني الولد مثلك؟
شنو
يعني مثلك لما كنت تكلمني بس الفرق ماعطيتك صور
رغد عن الراس اليابس كلميها
انا بقولها وبس ماراح احن لان مالي شغل وماحب اتدخل ماشاءالله انتو مسوين قروب
قروب شنو؟
لا ولا شي سلامتك بغيت شي
لا مشكورة


يتبع

32 comments:

ZooZ "3grbgr" said...

أبدعتي
الله ياني كارهه بدير
لووووووووول
شكلها رغد بتشارك بالاحداث الياية
آم ويتنق

Super Woman said...

شكلها بتصير هوشه البوست الياي

واي احس احمدو احسن من بدير
@@

ان شاء الله يطلق ويتزوجها
:)

ضـاد said...

مممم

Mok said...

:) شاطره

Anonymous said...

همممم احس رغد صارت وايد جريئة !!
و بدر صار عاقل مو مثل قبل ..
و احمد دوره عادي ..


شو ها كل بنات العايلة اختربوا !! :(

الله يعين من الياي ..

يالله ابي النهاية ..

يعطيييييييج العافية غناتي ..

تحياتي لج

terkwaz said...

لااااه

انا كنت مندمجه قريت كل مذكراتها
وتخشب ظهري لوول

مالاحظت انه اخر بوست

:)


وبعدين ويا بدير ** لايكون حاط عينه على نور ؟!


اول زياره :)

متابعه...

Anonymous said...

ليش :(


راح ابجي


كملي الله يخليج :( :p

ساره النومس said...

وييييه مسكينة رغد .. بس بدير مليق واكره كل واحد مليق مثله وييع

كملي القصة ترا مو اي قصة تدش راسي .. وهالقصة صراحة قوية ناطرة البقية :)

مشكورة

MakintoshQ8 said...

واي لو متزوجه احمد احسن
الموقف بايخ

انزين عفيا كملي بسرعه هههه لا تخليني انطر

أتيت متاخرة said...

سنعه :
مذكرات رغد تثير احاسيس عشتها منذ زمن يلآآآآآآآآآآآآآآآآآآآآآ
كملي
حنه ننطر

أتيت متاخرة said...

سنعه :
مذكرات رغد تثير احاسيس عشتها منذ زمن يلآآآآآآآآآآآآآآآآآآآآآ
كملي
حنه ننطر

Om MoD said...

حبيبتي سنعة يسلمي هالقلم الرائع بس نبي أحداث أكثر ...

وبعدين أحمد دامه يحب رغد شكو بغربل بنت الناس معاه ../ليق ما أحب جذيه :)

وشفيها نوره عسى ما شر...
وبدر أحس فيه شي مخليه يكون جذي مع رغد ...
وبس حدي متشوقة

Sn3a said...

zooz 3grbgr

ليش كارهته انا كاسر خاطري ضايع مايدري شيبي
يسلمو عالتواصل الحلو حبوبه

Sn3a said...

shlalat

لول اي شكلها
لووول حلوة ان شاءالله يطلق
يسلملي هالتواصل الحلو شلالات الحلوة

Sn3a said...

ضاد

حياج الله يبا :))

Sn3a said...

mok

زين في احد مدحها
حياك الله خيو

Sn3a said...

عواشي بنت الامارات
يسلمو عالمتابعه حبيبتي
المكان مكانج

Sn3a said...

تركواز
سلااامه ظهرج
يسلمو والله ونسني هالكومنت وهالزياره
تهقين بدر يسويها
ماكنت حاطه هالشي ببالي

Sn3a said...

فري موا
ليش تبجين على شنو
ان شاءالله بكمل

Sn3a said...

السارونه
اهلين وسهلييين منوره البلوق حبيبتي

زين اشوه القصه يازتلج ان شاءالله تعجبج كامله

نورتي البلوق

Sn3a said...

ماكنتووش


حاظر بكمل
يسلمو على هالتواصل

Sn3a said...

اتيت متأخره

كافي ان هالمذكرات لامست بعض الواقع عندج هذا شرف لي اني اجدت القصه
تسلميين حبيبتي

Sn3a said...

ام مود
ام الحلويين اللي ربي يحفظهم ان شاءالله وتشوفينهم احلى معاريس

اكيد في شي يخليه جذيه
لاهو معاها
ولاهو مو معاها

ضـاد said...

تدرين منو اللي يبط الجبد؟؟؟


أحمد! استح على ويهك تزووووجت... جان قعدت عزابي دامك للحين متولع بهالنور!


لالالا انا أكّست عليه

ما يازلي

|:| DUBAI |:| said...

صارت صارت

بانتظار الحلقة الثامنة

: )

esTeKaNa said...

رغم غيابي غير المقصود
الا أنني متابعه
والاهم من المتابعه
مستمتعه
!!
ابدعتي في مذكراتها
ووصف العناد بين قلبيهما واقعي
مؤلم
!!
بانتظار البقية
يارب تكونين بخير
:)

Don Juan said...

لو أنا من هالأحمد أشتغل بالأمم المتحدة و أعمق العلاقات الكويتية مع الدول الخارجية و أساهم في الحؤول دون وقوع الحروب و الأزمات أحسنلي من اني اتزوج وحده و خاطري مع وحده ثانية ;D

Sn3a said...

ضاد

موضه الشباب مو يقولون الزواج شي والحب شي ثاني

Sn3a said...

دبي دانه الدنيا
يسلمو عالمتابعه فديتج

Sn3a said...

هلا والله استكانتنا
يشرفني مجرد مرورج بعد عمري

Sn3a said...

دون هوان


اولاا كل هذا بتسويه
لوول

elq87obi said...

مساء الخير

متابع من بعدي لبعيد عذريني ما أقدر أرد على بوستاتج هالفترة

بوستات و مذكرات روعة ممتعة و شيقة

واصلي :)

تقبل الله طاعتج و عيدج مبارك مقدماً

يعطيج العافية

و سلامي لج :)