صفحات من مذكراتها 5

وُلدت الفراشه!

"كل عام وانتي بالف خير"
مسج يوصل لرغد بعد اشهر من انكسارها لايعني شيء سوا مرور اشهر على ذلك اليوم وانقضاء اشهر من حياتها فلم تقابله برد لان تلك اليد التي كانت تندفع لتكتب ماتكتب اليه نفرت من احرف الهاتف وتركته بعيدا مهملا كما هو قلبها.. كما هي حياتها

ثم يعاندها ذلك الهاتف ويرن مره اخرى

قوة
اهلين وسهلين
كل عام وانتي بخير يالعيوز وين بتروحين اليوم احتفالا بهذه الذكرى العظيمه
وديني اي مكان على حسابج
يلا قومي تشيليز

"بالعافيه"
مسج اخر الا انه غير متوقع ويحمل صدفه لم تشأ حدوثها ولانها على يقين انه على مقربه منها خافت ان تراه حتى لاينبض القلب من جديد معلنا تجديد ميثاقه مع الهوى وعالم الاحلام البعيده..البعيده جدا
لذا تعمدت القاء الهاتف في حقيبتها مسجله موقفا ليذكره بما فعل

شيبي بدير قطيعه!
شدراج
بعد شدراني شوفي ويهج شلون متعومس عساج للحين متعومسه من مسج الصبح
لا اهو هني وشافنا
قومي عيل نروح مكان ثاني
محنا رايحين مكان ماني مغيره الاماكن اللي اروحلها عشان خاطر عيونه بنقعد ونطلب ابتايزر ومين دش وسويت وعقب السويت بنشرب قهوه
ماتبين ننام هني
اذا يصير اي
يما منج زين ماتخافيين ايي يم طاولتنا
مايسويها
ليش؟
لانه ردي

وتمضي شهور اخرى معلنه انتقالها من الثانويه الى عالم الجامعه فكثير من الاشياء ستتغير بالاضافه الى تبديل زيها الموحد بازياء متعدده ومن حجابها الابيض ستلبس جميع الالوان معلنه رغد ..رغد جديده

اعلان صدمه جديده تنضم الى غيرها في عالم رغد لم تقبل في كليه الطب لما حققته من نتيجه متواضعه باختبار القدرات وقبولها في كليه العلوم الاداريه جنب لجنب معه مع من ارادت ان يفرقهما قطبي الكره الارضيه
فهي الان زميله له سيجمعهما نفس المكان لمعظم الوقت.


مبروك القبول
الله يبارك فيك احمد
وشفيج جذيه عاقده النونه خو الكويت انترست اطبه بعدين منو يعالج عند كويتيين الحين
انا كنت بعالجهم.. بس اخسروني
ايي قلعتهم .. في شي ثاني مزعلج بالكليه
مثل؟
تدرين
ماكو شي احمد صفحه وطويناها
زين اشوه .. لحظه شوي

ويقطع حديثهما صوت هاتفه النقال الذي جعله يبتسم بطريقه غريبه
فتعلق نور على تلك الابتسامه الغريبه!

شاللي مضحكك ضحكنا
نورو وانتي شكو
منو داقه ..اقصد داق وغيرلك المود
استحي على ويهج يلا مناك
زين مو تعصب ترا يغيرون رايهم فيك

تسألها رغد

شفيج مناجرته
اكيد يكلم وحده ماشفتيه مستانس جنه محصل مليون
الحين مسويلي محاضره على البنت والبنت ستر والبنت سمعه والبنت حاله واخرتها يكلم
وي حظي كل الشباب جذيه بنات الناس عادي بناتهم لا

ثم يتقدم احمد ويحرجها بظنها !

شوفي حق موعد تسجيلج تروحين حق وحده اسمها ابتسام اهيا بالتسجيل ضبطتلج جدولج عساس تصير كل موادج بشويخ وعند دكاتره زينين
شلون سويت جذيه
هذي ابتسام اخت صاحبي الكبيره توها دقت لما دزيتله مسج عشان يكلمها واهيا ماقصرت

فتهمس نور
ويه جنه ظلمناه
سكتي

شقالت سحيله؟
ماقالت شي.. مشكور احمد

ولو..حياج يبا,حاظرين للطيبين


صباح الخير ماودي ازعجج .. هذا اول يوم دوام وانا بس حبيت اقولج ان احتجتي شي بالكليه قوليلي ويريت نطوي الصفحه القديمه وان شاءالله ماراح تشوفين مني كل خير بس مايردج الا لسانج

غلت تلك الكلمات دمائها خصوصا انه يظن بهذه الحروف الوضيعه انه سعيدها الى اسواره حتى يمتع ناظريه برؤيتها من خلف تلك الاسوار .. اكيد ماعنده احد ماعنده بنيه يلعب عليها
بس انا اعلمه منو رغد

فتسير بالكليه بحثا عنه فتراه واقفا في زاويه ينفث دخان السيجاره ممسكا بهاتفه

قوة بدر
كاد ان يحرق دشداشته من السيجاره صدمه من هذا الموقف
هلا.. هلا والله شلونج رغد.. انا دزيتلج مسجات بس مادري يمكن مغيره رقمج او شي انا..
شوف وصلوني كل مسجاتك ولما ما ارد على مسج مسجين مو معناته مستمتعه بتواصلك الخفيف ولا اني ناطره مسجات اكثر هذا يسمونه تجاهل والشاطر يفهمها ترا لين دزيتلي مسجين ثلاثه ماتقدر فيهم تبرر فيهم الشي اللي سويته
رغد شفيج
اسمعني ياولد الناس انا داشه الكليه ادرس يعني ماراح اكرر هالحوار مره ثانيه انت بتوخر عن طريجي وبتمر يمي جنك ماتعرفني وان سمعت بس ان سمعت يابدر ان في احد درا انك تعرفني لاخلي رياييل العايله كلهم يتعرفون عليك عدل .. ترا انا ماني الياهل اللي قصيت عليها واستغليت حاجتها لاحد والحين وخر عن طريجي اهوو

يتبع

صفحات من مذكراتها 4

انا اسف ماكان المفروض اعاملج جذيه على الاقل قبل لا اعرف ظروفج, انا عارف ان جزء من الاسباب كان شعورج بالذنب وهالشعور منتي غلطانه فيه لان بكل صراحه مريت فيه انتي تدرين اني ملتزم ومماشي ناس ملتزمين بس بنفس الوقت مالقيت فيهم اللي ارتاح اكلمه مثل ما انتي ما ارتحتي الا لي على العموم انا عند كلمتي يارغد انا موجود متى ماودج تكلميني او متى مافقدتيني مايردج الا لسانج


هذا كان الايميل اللي وصل لرغد من بدر الصبح, اهيا عارف شنو تبي وعارفه شنو المفروض تسوي لكن كلماته عزفت على اوتار قلبها لحن الماضي فهو بالنسبه لها اذن واكثر.. اهو اول ريال غريب تعرفه!

ارد؟
اي اكيد بتردين لاتصيرين بدون احساس
بس ياساره انا ان رديت ماراح اقدر اقطع وان مارديت بظل احس بالذنب اهم ذنبين بقلبي ودي احلهم اثنينهم بوقت واحد بس انتي عارفه ان هالشي صعب
شوفي انا ماعرف بهالفلسفيات انا اللي عارفته امشي مع قلبج دام انتي من الاول كلمتيه اهو من بد كل هالعالم ودام ان اهو الوحيد اللي سمعلج بالطريقه اللي تبينها اكيد بيمر يوم ثاني وبتحسين بوحده وان كلمتيه يوم وهديتيه عشر بتلعبين فيه عاد تحملي قرارج مهما كان
صدقتي

مرت شهور السنه بخفه صاحبها ثقل ببعض الاحيان وبدت علاقه رغد بدر تكبر عن الحدود اللي اهم بنفسهم وضعوها, بظني ان اي علاقه لازم ماتبدا بشروط بل ان التعامل او المواقف اللي تمر فيها اهيا اللي بتحدد مسار هالعلاقه فالنفس البشريه تميل لكل ماهو ممنوع وتحب كل خط تلون بالاحمر وتتحدا نفسها تتعداه

ليش ماعدت تخصصلي وقت اتطمن عليك فيه مره لاهي مره دراسه مره ديوانيه زين ماني طالبه غير ساعه باليوم
رغد يعني مو حلوة ربعي عندي بشبك ولا انعزم على مطعم اكنسل يعني هم هذيل ربي واهلي لازم اوجبهم وانتي بصراحه طلبج مو معقول
ساعه مو معقول؟ لو طالبه منك يوم جان شقلت
رغد احنا بتمر سنه على معرفتنا لبعض ماحسيتي ان كبرنا على النت يعني انا عرفت قصه حياتج حتى رقم بطاقتج المدنيه حافظه شالمشكله لين كلمتج بالتلفون
شنو؟ لا انسى..
انسى ليش ؟ هذا اللي عندي وانا اكثر من مره عطيتج رقمي انا مو قاعد اوخر عنج عشان اجبرج تكلميني بالتلفون بس بنفس الوقت انا ريال لي التزاماتي الساعه معاج حق فيها مو وايد لكن ساعه بنص اليوم تكون صعبه احيانا فليش اوعدج فيها وانا عارف ان جايز ما التزم
نطري دقيقه سمعت حس تلفوني
شيقول التلفون؟
احلى مسج وصلي هذا
من منو
من وحده ماردتني بعمرها وربي يقدرني ماردها طول ماراسي يشم الهوا
زين عساك تقدر
اقدر واقدر واقدر يبا انا ماطلبت هالشي الا عشان نمشي جدام
بس يابدر انت تدري هالشي صعب على اي بنت مابيك تزعل بس ابيك تقتنع بهالشي ان مو كل شي تطلبه مني جايز اقدر انفذه بالنهايه البنت مالها مساحه الحريه نفس الولد

(حاظر) كلمه توصلها بمسج من خط بدر ترسم خط جديد بدرب جمعهم
يوز عن هالحركات
زين بيوز


وبجمعه العايله
عمه الا احمد وينه؟
احمد سافر يمه صارله 3 ايام ليش؟
لا بس اسأل

تضحك عمه رغد وتساسر امها خلاص انحجزت
منو اللي انحجزت .. تسألها ام رغد باستغراب
بنتج خلاص نبيها لولدنا دامها سألت عنه معناته فقدته ودامها فقدته معناته دورته
ويه ام احمد لين تخرجت يصير خير باقيلها هالسنتين بالثانويه وعقبهم اخذيها بخلاجينها مانبي منكم شي

نور تسمع هالحوار وتروح لرغد

رغود جيكي ضبطوج حق احمدو
شنو
اي بل عليج من حظ يبونج حق المدلل الحلو اللي يدرس بره وانا غنوم السحت لازق فيني ويقول البنت لولد عمها
اخذي احمد حلال عليج مابيه عندي اللي تارس عيني
وي عشتو

ترا انت تارس عيني
مسج دزته رغد لبدر ورد عليها
وانتي تارسه علي الدنيا باللي فيها

بعد فتره طويله
وين كنت اليوم ادق ماترد وحتى المسج ماعبرتني وطمنتني فيه!
كان عندي ميتينج يابنت الناس انا قايلج ماقدر ارد
يابدر مهما كان الميتنج مايطول 4 ساعات
تغدينا وبديناه وتالي شربنا قهوه
شلون تتغدون مع بنات وتشربون قهوه
احنا قروبنا صدف بنات وشباب شسوي اقولهم لو سمحتو مايجوز خلاص زماله وانتهينا لاتسويلي سالفه
انت ليش تصارخ .. اول مره تصارخ اخاف عاجبتك وحده فيهم ولا وحده بالجامعه
حتى لو عاجبتني ما انلام ليش انا الحق اشوفج بالذمه في مره شفتج نفس العالم ياخي ماطلبت شي بس دقيقتين اشوفج وخلج مع كل اهلج ان شاءالله سايقكم بعد معاكم بس خليني اشوفج انا حتى شكلج ناسيه
بدر ترا انت كل ما تبي تطلب مني شي تسوي سالفه عشان تجبرني اسوي اللي براسك
براسي؟ يبا انا مو ياهل انا لين بطلب الشي ماني خايف انا طلبت اشوفج وهالشي عادي مابي حتى اقعد وياج بس اشوفج
يصير خير
يصير اللي يصير انتي صايره شكاكه بطريقه غريبه شفيج ترا انا مو كلوني اللي البنات كل ما امشي يخزوني ولا يحذفوني بورده
بدر خلصنا
خلصنا خلصنا بس لاتأذيني يه!


كان لبدر ما اراده
حبيبه وصديقه لاترد له اي طلب مهما طالت فتره رفضها او دراستها فهي لا بد ان توافق
وكان لرغد ما ارادته ايضا.. اذن تسمع وقلب يحوي كل ماتريد بل انه بدأ يغير فيها اشياء لم تسمح لاحد بالتدخل بها لم تعجبه ثيابها فغيرتها , لم يعجبه كم مساحيق التجميل فلم تضع سوا اقل القليل بل انه خطط لها اين ستدرس وحذرها من مصادقه فتيات الجامعه شيئا فشيئا الى ان اقنعها بان ترتدي الحجاب كما ارتدته اخواته من قبل فهو سيزيدها جمالا .. فارتدته باقتناع واقناع

الا ان ما من جريمه تبقى كامله
تصل لاحمد مجموعه من الرسائل بعضها يحتوي صورا واخرا شعرا وغيرها فيها من المعلومات الدينيه وكانت رغد ترسل بعض الرسائل كما كانت (الهبه) حين ذاك فيرى ايميل بدر فيقع في دائره الحيره
اعتادت رغد ان ترسل لبدر الرسائل منفردا ثم تعيد ارسالها لمن تريد من الاهل والصديقات بمن فيهم احمد

يصنع احمد لنفسه ايميل جديد ويضيف بدر الى قائمه المسنجر ويقوم باستدراجه للكشف عن اسمه الكامل تحت حجه انه قد اضاع ايميل صديقه بدر ولا بد انهم يختلفون برقم او بحرف بالزياده او النقصان
ويكلف صديقه بان يستفسر عن بدر وعن طبعه اخلاقه ومن يكون فيأتيه الرد انه كان صاحب مشاكل بل وشارك في عده مشاجرات بالمنطقه التي يسكن فيها وهو غير ملتزم تماما بدوام الجامعه فلن يتخرج الا بعد دفعته بسنه او بسنه ونصف على الاقل

لم يجد الوقت الكافي لان يصنع اي كذبه او يفكر باي شي فاول مافعله هو الاتصال برغد وسؤالها عن الشخص ومن اين عرفته ومدى العلاقه وحدودها الى اخره من هذه الاسئله فلم يجد منها الا النكران فالقى عليه بكل مايعرفه عن بدر فسكتت الى ان اجبرها ماسمعته من نبره عصبيه احاطت بحروفه فاخبرته القليل فثار بها
انتي يارغد؟ انتي ؟ ابوج المسكين ماحطلج هالكمبيوتر الا عشان يفيدج وانا سبق وقلتلج محتاجه لشي قوليلي ياخي لاتقوليلي اشكي لربج ساعه كلمي رفيجاتج كلمي اهلج بس تكلمين ريال غريب راعي مشاكل وساعه يداوم ساعه لا انا لو كنت نفس باجي الناس جان ترا ماحاجيتج اقربها اكلم ابوج اقوله امسك بنتك بس انا ادري انج كبيره وفاهمه وبتحلين هالشي بروحج
تقاطعه من قالك راعي مشاكل
جب ولا كلمه! انا حشمتج وقلت انج كبيره والحين مو دورج تتكلمين ولا من حقج تتصرفين انا ماني مخليج تخربين مستقبلج بيدج انتي بتهدينه وتلفونج بتعطينه لامج وايميلج بتدزيلي باسوورده وانا اللي بتصرف وان سمعت يارغد انج سويتي ايميل ييديد ولا ان عرفت انج كلمتيه ماتلومين الا نفسج ترا قسما بالله اهد كل شي وارجع والسالفه بتصير جدام كل العايله
احمد تكفا
انتي اللي تكفين .. رغد سمعيني يابابا انتي عطيتيه صورتج؟
لا
قعدتي معاه بمكان
احمد شهالحجي
شهالحجي؟ والله ماستبعد

واسترسل احمد في تحذيراته واوامره ونسي انها زهره يانعه قد تعيدها مجرد لمسه حانيه الى طريق الصواب واي قسوه قد تكسرها وحينها لن يقومها كائن من كان

وبنبره طفل باكي هجرت الالوان رؤياه تكلم رغد بدر وتسأله
انت راعي مشاكل؟
شنو؟
انت ماتداوم محاضراتك
اي محاضرات شفيج
كلمني؟
يبا انتي عبالج الجامعيين مالهم الا محاضراتهم باجر تداومين ومرات بتزهقين
انت راعي مشاكل ماجاوبتني
كنت قبل بس الحين ورويسج لا.. شفيج قلبي شفيه صوتج
احمد .. احمد ولد عمتي عرف باللي بينا وحذرني اني اقطع علاقتي فيك و .. بدر ما اقدر انا ماعرف شنو يعني اقطع علاقتي فيك
واهو شدراه!
مادري يقول سائل عنك و .. بدر شسوي
مادري
ماتدري؟
لا مادري انتي اللي بتسوينه سويه
شنو يعني
يعني اللي سمعتيه انا مابي مشاكل يارغد والطريج جدامي طويل ماقدر اجذب عليج واقولج مستعد الحين اخطبج واسكت احمد واللي اكبر منه
بدر من صجك هذا ردك



هذا كان رده .. لكن هالرد مافهمته او ماقدرت تستوعب انها لازم تفهمه.. بيوم واحد تخيلت ان اللي مره فيه جايز يكون كابوس .. مو بدر يقول جذيه .. معقوله؟ لا اهو عمره مازهق من كلامي.. عمره مارد لي طلب
اصلا بدر كان همه رضاي لاني ماكنت مقصره معاه! زين جايز يكون معصب وانا ييتله بوقت غير مناسب
اكيد كان معصب! لان اهو مايكلمني جذيه

ازدحم قلبها بمشاعر تائهه لم تعرف الى اين تتجه .. فتلك المشاعر كانت هي من يقودها في هذه الحياة , تلك المشاعر كانت تسجل اعذب الكلمات لترسلها لهاتف بدر وهي نفسها من تملك ان تراضيه حين غضبه.. مشاعر لم تمل يوما من احاطته ومرافقته .. مشاعر للمره الاولى تعجز عن التكهن بالذي سيأتي

سويتي اللي قتلج عليه
ينساب صوت احمد هادئا وحازما ليصدم بكلمات بدر المركونه في ذاكرتها
اي
تخرج خجله من فم رغد
انا بنسي اللي صار كله وبشوفج مثل ماكنت اشوفج قبل لين وعدتيني انج بتقوليلي كل شي تمرين فيه انتي على ابواب تخرج ووراج جامعه ماراح اسمح لمخلوق يخرب حياتج حتى لو كان خالمخلوق انتي
ان شاءالله
رغد
هلا
ترا اللي سويته عشانج
عارفه

يتبع

صفحات من مذكراتها 3

الفراغ الداخلي قوي
جبرت نفسها تندمج مع اهلها
مع زوارات امها
مع استقبالات وعروس
مع عالم مالقت نفسها فيه
وبيوم يمعه العايله

يقرب احمد ولد خالها, احمد اول حفيد بالعايله وكان مدلل وبنفس الوقت شاطر ماخربه الدلال يدرس سنه ثانيه محاسبه بامريكا .

ها بنت الخال
هلا احمد
اشوفج منورتنا بالزياره شالطاري ماعندج خرده تطلعين وتتشرين بالسوق
رغد تقلب عيونها وتطاع تلفزيون
يبا اتغشمر والله , زين شخبار النت امج تقول حطولكم اشتراك وجذيه وين تدشين
ماقمت ادش
ليش
جذيه مليت
اني وي انا عندي جنل بالاي ار سي متى ماشبكتي دشي بس ترا ها تدشين بنك ريال مالي خلق احامي عنج بعالم الشبكه
وي ياحمش لا ينكسرلك ضلع بس اهوو
زين وين بتدرسين لين تخرجتي
مادري
مافكرتي
لا ليش شبغيت
مابغيت شي يبا خلاص خلج بتلفزيونج

تنادي ام رغد احمد ,

احمد تعال المطبخ علمني طريقه القهوه اللي تقول عنها
ويروح احمد المطبخ وتسأل ام رغد عنها شفيها ليش ماعاد لها خلق شي ماقالتلك ليش ماتبطل كمبيوترها نفس قبل , زين اسألها شي
خالتي والله ماني عارف اصلا حتى لما كانت تشبك خذيت نك نيمها من نور ماكانت ترد علي
وانت لا يكون قلتلها انك احمد
لا ماقلتلها كنت بكلمها عادي وبختار اي اسم
زين يما ادري اذيتك وياي
لا خالتي عادي شدعوة اي شي تبين رقمي تعرفينه سواء هني ولا لما ارجع كلميني

نور تتضايق لحال رغد وتقعد على نفس الغنفه
وانتي مازهقتي من التلفزيون, انا والبنات سوينالنا جنل عجييب كله سوالف وجذيه
زين
رغد شفيج , مره وحده تغيرتي .. مو تغيرتي لا رديتي نفس قبل
مو هذا اللي تبونه
لا وع شبي بهالنفسيه انا مابي هالشي ابيج تضحكين وباقي على العطله 20 يوم وانتي حتى سوق ماقمتي تروحين اذا فيج شي قوليلي سولفيلي فضفضيلي ترا ما اتطنز
ماكو شي انا بنادي السايق وبرجع البيت باي

وتفتح الكمبيوتر
تزيد دقات قلبها .. تحتاج احد تكلمه بس شتقوله اهيا اصلا ماكو احد زاعجها محد قط عليها كلمه بس ليش هالحاجه ليش تحس نفسها بروحها بدنيا مليانه ناس .. الناس تسال عنها والبنات يدقون يتطمون عليها ويعزمونها

تدور بدر بين هالاسامي
تنطر نص ساعه
زهقت زحمه الدنيا ماكسرت الوحده
زحمه النت زادت فيها هالوحده اكثر

ويوصلها اتصال من يوزر بالاي ار سي
قوة

تتردد ماعرفت تكلم غير بدر بس بدر مو هني.. زين بدر كان يسمع يمكن هذا يعرف يسمع.. المشكله مو بالسمع كلمن يسمع بس المشكله باللي يسمع ..طبعه..رده..تعامله

اهلين
ليش طلعتي من بيتنا بسرعه
بيتكم وانت منو عشان اطلع من بيتكم
طالعه عشان تجابلين النت .. ويحك من فتاة
احمد؟
وهل يخفى القمر
خير؟ وانت بالله منو قالك ان هذي انا يعني لو كنت بسولف وياك مثلا جان قلتلك من زمان
زين يبا كسبي فينا اجر وسولفي انا مابي شي ابي افضفض بس
وانت شبتفضفض بعد؟ مو ناقصك شي تدرس باحسن مكان وتلبس احسن لبس والاهم بصحتك
وانتي بعد تدرسين باحسن مدرسه ..صج فيها بويات بس ماعليه .. وشزينج والاهم بصحتج وشوفي كله متضايقه ومهمومه ..تهقين الملابس والمكان اهم اللي يونسون
مادري
شفيج اذا انا غلطان صلحيلي
مو غلطان..
سمعي انا ادري انتي ماتبلعيني
مو ما ابلعك بس بصراحه وايد مسويلك هيبه بالبيت مادري على شنو

احمد بينه وبين نفسه .. تكفى شبرد عليها الحين وصلتني القاع بس ماعليه تمون

ماينلامون فيني وانتي مضايقج انهم يحبوني يعني
لا بس وايد يحبونك مافيك شي زود عن اخوك ولا عن الباجي
زين خلينا مني حسبيني غريب
ليش ومن قالك انك قريب؟

يتحلطم مره ثانيه اشوه اني مو يمها جان حاذفه علي شي .. اول مره اشوف بنت بهالقساوة!

انا بعرف انتي ليش قاسيه جذيه اول مره اشوف بنت جذيه
ليش جم بنت شايف؟
تدرين شلون انا بروح تحت عيب الناس عندنا وانا قاعد اسولف معاج عشان بس اتطمن عليج وانتي ماسكتني تهزيء يلا عن اذنج
حياك
منتي قايله شي
مثل؟
سلامتج خلج بعنادج وقساتج وبتفقدين وايد ناس ترا حلاة البنت بقوه شخصيتها وقوه الشخصيه مو معناته الكلام الاستفزازي والردود الناشفه ترا قوتها بلينها بالاوقات المناسبه
الحين انا قاسيه واستفزازيه ؟ كل هذا بقلبك
والحين انا اللي ماستاهل حب اهلي لي؟ كل هذا بقلبج

وبالمسا تكررت هالمحادثه مع شد وجذب من كلا الطرفين وفجأه يوقف الحوار
رغد معاي؟

اما رغد فقد عصتها اناملها عن الحركه حينما رأت اسم بدر يضيء شاشتها ويعلن عوده دقات القلب الغير متوازنه والرغبه في كتابه كل شي عن حياتها
مسا الخير؟ ماني مثقل عليج بس عز علي اشوفج وما اسلم
مسا النور بدر شلونك وشخبارك قولي قدمت عالجامعه ووين قدمت
يتروالي سؤال واحد ارد عليه انا بخير الحمدلله اما باجي الاسئله ماهمتج ولا بتهمج فليش المجاملات
ليش تقول جذيه؟
اقولج ليش
ممم صارلي شهرين الا جم يوم مادري عنج اولا وثانيا انا ماقصرت معاج وكنت وياج لما احتجتيني بس لما احتجتج اتلفت اشوفج ما القاج حبيت اخذ شورج برغبات الجامعه حبيت تشجعيني اني اكمل بكالريوس وقت ما االكل قالي انت مو كفو جامعه بس شاللي شفته منج؟ ولا شي
بدر انا ماقدرت اكلمك لاني حسيت الشي غلط .. صحيح احتجتك وكنت معاي لكن كنت احس احيانا بتأنيب الضمير وابوي كلمني بلندن بطريقه غير مباشره وصحى كل هالذنب بقلبي ذنب كنت اشوفه واغمض حيييل عشان يختفي
انا ادري ان غلط وادري ان اللي بينا مايرضي الله لكن انا شبسوي قوليلي تعودت عليج وانتي هديتيني بالوقت اللي احتجتج فيه ومو قاعد العب والله مو قاعد العب بس دام هذا ظنج فيني يبا الله معاج باي

تكتب رغد وتكتب تبرر ساعه وتتكلم عن شوقها له ساعه وتضغط انتر ويفاجئها بدر ان هالمره اهو مو موجود لاول مره مايكون موجود وماوصله الكلام

احمد انا بمشي
حسبالي مشيتي من زمان زين وينج غطيتي
رفيجتي دقت وجذيه عن اذنك باي
زين بقولج عن طريقه
شطريقته؟
لما تتضايقين كتبي اللي ضايقج ترا ان ماكان لج شخص تشكيله لج رب مايردج واهو اللي بيسمعج لو كثرت حولج الاصوات
واهو اللي بيرحج لو ازدحمت بقلبج الهموم وماعاد في مكان للهموم الجديده
انا جايز مو قريب منج وماتنلامين طبيعي مو بيومين الوحده ترتاح لشخص وتشكيله لكن ربج اقرب من كل بشر وماراح يمن عليج انا مو متدين ولا بسوي روحي متدين لكن انتي تشوفيني فرحان وماعندي هموم
انتي ماتدرين ضيقه الخلق اللي اعيشها من اروح المطار عشان اسافر حق الكليه ماتدرين شنو الايام اللي امر فيها اتمنى بس اشم ريحه امي واسمع نجره اخواني اتمنى حتى ابوي ينزرني ويعصب علي بس اني ماكون بهالمكان لكن الهدف اللي رايحلها يهون علي
انتي عايشه بالديره بين امج وابوج تقضين رمضان بينهم الاعياد بينهم على الاقل تعرفين شيمرون فيها العايله افراحهم احزانهم انا مايربطني شي هناك بالديره الا التلفون والنت وهالشيين مايوصلون اللي بقلب الواحد

ليش تقولي جذيه
لاني ادري انج ضايعه وتفكرين بوايد اشيا بوقت واحد توزنين كل شي وتفكرين باللي بيصير باي خطوة
؟مبين
وايد يلا ماطول عليج واي شي تبين لا يردج الا لسانج.. او لا يردج الا كيبوردج ان صح القول
تصبحين على خير
وانت من اهله احمد مشكور
لحظه خل اغسل عيوني
انتي قلتي مشكور
اشوه اول مره احس ان ماراح تحذفين علي شي
تضحك..شدعوة
ما انلام كنتي مسويتلي رعب عالعموم دام ان السالفه فيها مشكور ترا بلوزتج اليوم كانت ضيجه لو تخلينها للبيت احسن سامحيني اني تدخلت
احمد
هلا (ترا قاعد ارجف) سوري مو قصدي اتدخل
ان شاء الله ماراح البسها
بروح اقحص واجي
شنو
ولا شي باي يبا
باي

يتبع

صفحات من مذكراتها 2

قبل هذا الوقت بتسع سنين
وفي العطله الصيفيه حيث تمر النفس بموجات من الوحده او البهجه قد تكون في قمتها حينا
وتلمس القاع حينا اخر
اعتادت ان تقضي الايام في بيت خالتها فلربما يكسر اجتماعهم ضيق وطول العطله التي قضو السنه الدراسيه بانتظارها الا انهم استمتعو باسبوع واحد منها وترقبو ابتداء الدراسه!

رغد تسأل نور:
شبتسوين
بشبك
شلون! متى اشتركتو؟
ابوي راح حولي امس واشترك طافج تدرين احس كل الكويت يعرفون يشبكون الا احنا
زين علميني

لما تذكر رغد هالبدايه تقول(ريتني ماتعلمت!)
الانترنت كان يمثل شي واحد في تلك الفتره
ايميلات وبرنامج محادثه اسمه mirc
وباب يفتح على قصص بعضها حقيقي والاخر منسوج من خيالات الرواد

مامليتي؟
لا بس تبين تشبكين شوي
اي ابي

اختاريلج نك نيم
مممم شحط
شدراني يلا خو اي شي

زين بحط نكي رغرغ

شنو دوا مضمضمه؟ وبعدين مريوم رفيجتي قالت لاتحطين شي يدل على اسمج

زين زين..

اولااا كل هالعالم قاعدين هالحزة الساعه 12 ماينامون

نامي انتي حبيبتي هالحزة اهيا اللي الناس فاضين فيها

مسا الخير
مسا النور
شخبارج
زينه خير يبا؟
خير يبا؟ خير بويهج شدعوة
امر
انتي داشه النت تزفين العالم مايامر عليج ظالم انا ابي اسولف وياج زهقان
اوكي
شسمج
وانت شكو
ايا شقول! خو سؤال
اسمي رغد

وبعد ان تكتب الاسم تصرخ عليها نور
شفيييج قلتلج لاتقولين اسمج!
يعني ماكو رغد الا انا خو بس اليوم بشبك ولا راح ادري عنه

وانت؟
انا بدر

وبعد ان استمر الحديث حول العمر البرج الهوايات السنه الدراسيه
اذن المؤذن معلنا صلاة الفجر مما يعني ان البنات لابد ان يتركو الكمبيوتر ليصلو حتى لايصيبهم عقاب عظيم نظرا لسهرهم الى هذا الوقت

زين انا بقوم اصلي وانام باي
زين رغد بتشبكين باجر؟
ماعندي انا بنت خالتي تشبك
باي
الله معاج

بعد الغدا واهم يطالعون مسلسل مدبلج من سوالف ام بي سي

نور تقول:
بدر يسلم
منو؟ بدر امس؟
اي بدر امس واليوم يسلم شبكي يبي يكلمج
زين بعدين
وين اللي مهي شابكه وكله يوم واحد
زين مو لازم اشبك
لا شبكي

وبعد بضع ايام تتكرر تلك المحادثات بين بدر ورغد ورأت رغد شخص اخر هارب من الواقع وتصادمات الوالدين الى عالم الشبكه

قولي حق ابوج يشتركلج ترا ماصارت كل ما ابيج اطر اكلمج من المليقه بنت خالتج
ويه ابوي صعب مالي خلق حتى اطلب
طلبي وجربي
يصير خير
سولفيلي شسويتي اليوم

واستمرت تلك المحادثات
كانت عالم اخر لم تشعر فيه الا انها تعيش شخصيتها
لم تلق بالا لتحذيرات والدتها ان الشباب نواياهم سيئه وهالايام مايبون الا يخربون سمعه البنت وابوج ترا عصبي وعمج واعيال عمج .. الى اخره من اقربائها والذين سيربونها ان ماحدث وخرجت لمسافه سانتي واحد عن الخط المرسوم لها
تركت لهم الواقع
فلم تظن انها ستعاقب لوجودها في عالم خيالي
لتحدثها بما تشاء ساعه ماتشاء
لوجود من يسمعها تاره وتسمعه تاره اخرى
فكان هذا الامر وحده كفيلا بان يحيي فيها شجاعه تركتها منذ زمن واصرت على والدها بان ياتي لها باشتراك اسوه ببنت خالتها الا انها اشترطت منه ان يكون افضل وذو ساعات اطول فهي ليست( بالقلاده) ولن تكون!

تهقى انا وين؟
يعني وين
انا بداري
حلفي!
والله
شوفي عاد قومه من النت ماكو مثل مابهدلتيني وغداي وعشاي كله على طاوله الكمبيوتر بتصيرين جذيه
تضحك..اوكي اوكي لاتبدا بالشروط بقولك شي
خير يبا؟
بسافر
ليش؟!؟ ومتى

شنو ليش بدور خو نص الديره تسافر بالصيف بروح عقب اسبوع بس ماراح اطول بس شهر...تضحك بخبث
30يوم وماراح تطولين عيل لو بتطولين جان شسويتي

امها تطالعها وتستغرب

شفيج وايد تبوسمين؟
ماكو شي ماتبيني اتبوسم
لا بس مادري شفيج عكس قبل
ماكو شي ماكو شي

وتحادثها ساره زميلتها في المدرسه واقرب شخص لها من الشله
شقال بدر وشصار اليوم ؟
ماكو قلتله بسافر وجذيه تخيلي يقول راح يوله علي
جذاب كلهم يقولون جذيه
منو كلهم؟
الشباب
وانتي شدراج شيقولون الشباب
والله امي تقول


تمر ايام السفر بطيئه فلاول مره تشتاق رغد لشي في الديار
او لنصدق القول
احد بالديار
احد اعطى تلك الديار روح!

اولعت رغد بكمبيوترها ودخلت محلا متخصص يبيع قطع مختلفه للكمبيوتر باشكال متميزة والوان لافته
وبعد ان اشترت ما ارادت دعاها والدها لتناول ايس كريم تنتصفه قطعه من الشوكولاته

بابا شلونج ويا النت
تمام!

مما يعرف عن رغد انها خوافه
دائما يتراءى لها ان الجميع قد علم انها كلمت بدر وتصادقت معه عبر خبوط الشبكه
وظنت ان اباها علم بالموضوع

بابا انا اعرفج واعرف تربيتج
وصدقيني ماقولج هالحجي لاني مو واثق فيج بالعكس انا اقول لان بنيتي كبرت ولازم اسولف وياها باشيا تناسب سنها

بلهفه يعتريها الخوف
اي ليش شصاير
مو صاير شي بس ابيج تديرين بالج انتي بنيه متفوقه ومحافظه على صلاتج انا حطيتلج النت عشان ينفعج بالدراسه ويونسج اذا زهقتي ترا تلقين فيه نص القصص اللي تشترينهامن المكتبات
بس انتي دوري وين وانا اخلي ولد عمج يعلمج وين تلقينهم ان مالقيتي
ان شاء الله.. ان شاءالله يبا

وافلحت قطرات مطر لندن ان تخفي دمعه تسللت من قلبها
لم تشعر يوما بالذنب مثلما شعرت به هذا اليوم
ذهبت زهوة حاجياتها الجديده
وتلاشى الشوق الذي زاحم الدم في عروقها
هي في داخلها تعلم بل متيقنه من ان هذا الامر ولا بد ان يكون غير جائز سواء اجتماعيا او دينيا فهذا ماتعلمت عليه الا انها احتاجت لتلك الفسحه احتاجت لمن لا يضحك على امالها ويحبط من احلامها الا ان امال والدها كانت اعظم بل هي اعظم فلا لحظه في العالم تستحق اكثر من فخر اباها بها

منذ رجوعها وهي لم تتجرأ الى النظر الى شاشه الكمبيوتر التي كساها الغبار وكلما بدأت نور بذكر سلام بدر وسؤالها واستغرابه غيرت الموضوع وتعذرت بان جهازها قد اصابه عطل ما او ان اشتراكها قد انتهى

يتبع

صفحات من مذكراتها

بيدها جهاز الرموت كنترول
والذي قد تعود على مراقصة اناملها فهو لعبتها الوحيده بعد احرف اللاب توب
واحيانا تدمجهما معا
فهذا مايقتل وحدتها..او ينسيها تلك الوحده احيانا
ولاصدق القول
هذا مايشعرها بوحدتها في غالب الاحيان
ترا جهاز الهاتف النقال صائم كما هو الجميع في هذا الشهر
الا ان صومه دائم
تستغرب من حالها
فهي بنفسها لاتحب كثره العلاقات الاجتماعيه
الا انه وحدتها انستها ماتحب
وماتكره

بقلبها تقول:حتى مايدق بالغلط.. زين مسج اعلاني..راضيه بمسج فواتيري ..الله والفواتير يتروالي اني الوحيده بالكويت اللي فواتيرها ماعدو 21 دينار

صوت امها يكسر (تحلطمها) المستمر!

متى بتقومين تبدلين؟
وليش ابدل! منو بيزورنا؟
محد بيزورنا ,يعني ماتدرين زواره بيت يدتج هذا ثاني اسبوع وانتي للحين ماباركتيلها بالشهر!
مالي خلق ازور,,اشوفهم بالعيد مره وحده
وانتي كله شايفه عمرج عالناس؟ وكله مالج خلق احد والله لو شوق داقه عليج تطلعين تفرفرين بالسوقه يصير لج خلق
اوكي
دقي على بنت خالج ترا من يوم ملجت وانتي حتى ماباركتيلها
مادقيت على خواتها يوم تزوجو بدق عليها اهيا شمعنى مو من حبي لها
اي مادري منو تحبين انتي
محد
ويه عساج ماحبيتي وترا يوم الثلاثه استقبال نور بعد قولي مالج خلق
ابفهم انا متى كان لي خلق زيارات اجتماعيه شنو حلاو خطبه ملجه حنه عرس استقبال بس مليت يه
اي روحي جود احد يشوفج ويخطبج
مو انتي هذا اللي هامج احد يشوفني ويخطبني صح
والله انا ماودي حتى عدو يشوفج وانتي نفسج جذيه مع الناس تقعدين عندي ولا تفشليني باجر كافخه الريال ومناجره اهله
اي احسن شفيها القعده كاني تخرجت وبتوظف باحسن مناك وبروح دورات وبكمل ماستر بعيش حياتي
باجر بتحسفين لا رحنا ترا حتى الاخوان ماقامو يشيلون اهلهم فما بالج بخواتهم!
اعوذ بالله يما شفيج اليوم ,جنج تأخرتي على بيت يدتي روحي ترا انا حافظه اسطوانتج
ماتستحين!

تتنهد وترد اللاب توب جدامها
تذكر ايام اول
ايام ماكانت ويا بنات خالتها مثل الخوات
بس

كانت تغار
تغار من اهتمام امها باي احد غيرها
وماتحب اي احد يقلدها باي شي
بجر امها وابوها
ودلوعه يدها ابو ابوها لانها ساكنه ببيتهم ورباها مثل ماربى عياله

كبرت شوي
وصارت محل مقارنه مع بنات خالتها
بنات رفيجات امها
رغم تفوقها الا ان امها كانت تطلب منها المزيد والمزيد
كانت تبي تشوف فيها صورة شي اهيا ماعاشته
او جايز عاشت بعضه وتمنت بنتها تعيد تجربتها بصورة افضل

بالثانويه كملت شخصيتها او خلنا نقول شخصيتها السابقه
ماعادت ترضى باي مقارنه
جايز ضيقها من هالشي بنا فيها حاجز غرور خصوصا انها عايشت شله بنات لهم كلهم نفس الطبع نفس الذوق ونفس الاسلوب
ووجود بنت خالتها بمدرستها ماكان ابد شي يسعدها الا بوقت واحد لما كانت تتكرم بحفلات التفوق بعكس بنت خالتها
ترجع فرحانه توري اهلها صور الحفله بعد مايطلعون
امها تتنهد
مسكينه نور اكيد ضاق خلقها
اففف تنطقها بصوت عالي
وبداخلها صرخه تكتمها تشق الصور

الام تتفاجأ:
شفيج الحمدلله والشكر ينيتي؟
اي ينيت

وقبل اي رده فعل من امها يدوي صوت غلق الباب
غلقه عن العالم..غلقه عن امها ورده فعلها اللي ماتغيرت طوال سنين الدراسه
تغلقه عن واقع كارهته
تغلقه عن كل شي
وتفتح الكمبيوتر
وتفتح عالم خيالي اشبع جانب فيها وبنى جزء من شخصيتها وحطم جزء اخر
باختصار
عالم تمنت تكون فيه للابد رسمت فيه كل اللي ناقصها
وحلت فيه كل عقد الطفوله
وحققت فيه كل احلامها
او
هذا اللي تصورته

يتبع!

الوثيقه بها بعض الحقيقه

ماني سياسيه محنكه

ولا حتى محلله ذات خبره

بس انا كويتيه

هذي الوثيقه اللي كانت الشغل الشاغه للبعض

بكل صراحه ماقريتها كلها

لكن كنت اتمنى اني اقرا الاصليه

انا بخليها هني

لاني حسيت ان هالشي واجبي

نقلا عن موقع الامه

نص وثيقة خالد الأحمد .. ونتركم الحكم لكم فيها وما ورد فيها ..
نص البيان:
نعيب زماننا والعيب فينا وما لزماننا عيب سوانا
الساكت عن الحق شيطان أخرس .
أين أنت يا وطني ؟ من الذي أضاع هويتك ؟ومن الذي جعلك تابعا لا متبوعا إنك تئن وتستغيث لأنك تمر في أسوأ حقبة في تاريخك ... أوى أسفي عليك يا وطني، لقد صرت محل سخرية واستهزاء وتهكم من بعض دول الخليج، بعد ما كنت طودا وعملاقا نعتز بك ونفتخر، اليوم أراك ضعيف هزيل تعيش في كابوس من الرعب والخوف، بعد ما جردت من هويتك الكويتية الأصلية، وفقدت الولاء، وصار الولاء للطائفية والقبلية . ( لقد ضعت وسنضيع معك ) .
نحن في وقت قل به الرجال وكثر فيه الدجّال، انعدم به الضمير واتسعت فيه الذمم، عهد الشللية والمحسوبية والنفاق، هذا ما افزعني وصرت أخشى عليك وعلى أنفسنا من نكبات الزمن وتقلباته، ومن هم في مراكز القرار لم يعد يعيرونك الإهتمام الكافي، محاطون ببطانة فاسدة، همهم في المقام الأول ملذاتهم واشباع رغباتهم التي لم تقف عند حد، مما دفعني لقول الحقيقة التي يعرفها الجميع، ولكن اهتمامهم وخوفهم على مصالحهم الشخصية منعتهم عن النطق بها، الكل يعلم حالة التردي التي آلت إليها الأوضاع في البلاد، نتيجة الصراع والتكالب على النفوذ، وصارت الكويت كعكة لبعض الأفراد من النظام لا يتجاوز عددهم أصابع اليد الواحدة، استباحوها لأنفسهم دون حياء أو خجل، يا للعار! ماذا بعد ! صح من قال : من صادها عشى عياله، وأصبحت الكويت ملكا خاصا بهم، يتصرفون بها كيفما شاءوا، ونحن نرى ونسمع بهذا من المقربين من أصحاب القرار وغيرهم .
لقد طفح الكيل، وكثر الكلام، وزادت الأمور سوءا ،. وهم غير عابئين يرون أنفسهم أولى بالكويت من غيرهم، ألا يعلمون أن الكويت الآن تعيش في حالة من التخبط والفوضى الإدارية والسياسية، سائرة نحو هاوية مؤكدة، ماعلينا إلا انتظار وقوعها بين لحظة وأخرى .
كل يوم نسمع عن الجرائم التي ترتكب في وطننا، وتتصدر صفحات الجرايد والمجلات صباح كل يوم، تهدد كيان الوطن واستقراره، وصارت بلدنا مرتعا للمجرمين القادمين من الخارج، أو من هم بالداخل من كبار رجالاتها الذين لا حسيب عليهم ولا رقيب متنفذين في شئونها لمصالحهم الخاصة دون الإهتمام بأمنها واستقرارها ولائهم للطائفية والقبلية باعوا وطنهم لرغباتهم ونزواتهم الشيطانية التي لا حدود لها، وهذا مايؤلمني ويؤلم كل مخلص، لأن الكويت بلدنا جميعا يهمنا أمنها واستقرارها وهي بحاجة لمن يحميها ممن يكتب بالصحافة من فئة البدون (( ومن العصابة المنظمة الموجودة بداخلها )).

نعم، النظام من اختار الديمقراطية منهجا لحياته، ولكن الديمقراطية والحرية التي لن يتوفر بها الأمن والأمان لا حاجة لنا بها، لأن هناك من استغل الحرية والديمقراطية بالسير بها في الإتجاه الخاطئ، بإسم الديمقراطية سرقوا البلد، واستولوا على أملاك الدولة، بإسم الحرية تطاولوا على الغير لأنهم هم الشرفاء وغيرهم خائن ومرتشي، وكأن الناس ليس لهم كرامة ! لأن من هم في مراكز المسئولية من أبناء النظام ضعفاء لايستطيعون مواجهتهم، والضعيف تسهل السيطرة عليه، والكل يعلم أسباب نقطة الضعف فيهم .
السؤال : هل ما يجري اليوم في البلاد يسمى ديمقراطية ؟ أم فوضى عارمة وخروج على القانون،. وتحدي سافر للسلطة والنظام، أين أصحاب القرار ؟ أين من جلسوا على كراسي المسئولية ؟ غابوا عن الساحة وتركوا الأمر كأنه لا يعنيهم، ورعاع القوم عاثوا في الأرض فسادا ُ ..! ألم تروا معي ان المسئولين من النظام سيطرت عليهم فئة من الشعب يتحاكمون بهم، ويفرضون أرائهم عليهم في كثير من الأمور بعد ما كانوا يأمرون، صاروا يؤمرون ! هذا ما كنت أخشاه . إنها محنة،، بل مصيبة .. إنتظروا لتروا الأسوأ، وماحدث في بيروت سيتكرر في الكويت ( النار تحت الرماد ) .

بدايتها إضراب الجالية الأسيوية وشل حركة العمل في جميع مؤسسات وقطاعات الدولة لأكثر من ثلاثة أيام ذكرتنا بأحداث ( خيطان ) وما نتج عنها، ولا نريد تكرارها مرة أخرى، فالعمالة الأسيوية قد تتحول إلى عواصف مدمرة، ويخرج الطابور الخامس الذي يستغل هذه الأحداث في زعزعة البلد، وهذا ما نخشاه، وهو أمر يتوقعه كل كويتي .

في ذكرى اليوم المشئوم 2/8، والشعب يترحم على شهدائه، ويتذكر المفقودين والمسئولين يتمتعون في إجازات ترفيهية خاصة طالما الدولة تدفع وتغطي جميع المصاريف، ووسائل الإعلام العالمية المسموعة والمرئية تنقل الأحداث التي تجري بالكويت، لا شك أن هناك تواطئ مشترك بين بعض أفراد من الحكومة والنظام وأعضاء مجلس الأمة وأصحاب الشركات من علية القوم لذلك يحاولون قدر الإمكان التكتم والتعتيم على أسماء أصحاب هذه الشركات وغيرهم المتسببين في تلك الأحداث، حتى لايعرفهم الجميع، ألم يوضع حدا لتلك المهازل ؟

الكويت ليست سلعة لتباع . رحم الله أسلافنا وأسكنهم فسيح جناته.
الأيام حبلى . وستلد في المستقبل القريب أحداثا أكثر ضراوة وخطورة وكل ذلك بسبب عدم إهتمام المسئولين في إتخاذ القرارات الرادعة .
الشعب يعلم الكثير من الأمور ويتابعها بدقة، والمخلصين الغيورين على الكويت يتألمون ولم يجدوا من يلجئون إليه بل يتساءلون من المسئول عن ما يجري في البلاد ؟ هل النظام ؟ أم هناك أيدي خفية تعبث في أمن البلاد لمصلحتها ؟ أو أن بعض الأفراد من النظام متواطئ معها، وضحى بمصلحة البلاد من أجل مصالحه الشخصية ؟
الكل يتهم النظام ويتكلم عنه وصار محل سخرية واستهزاء لدى البعض لأنه في وضع لا يسر ولا يبشر بالخير متفكك، يتصارع أعضاؤه فيما بينهم بالعلن والخفاء، والكل يعلم بذلك لذلك نما الحقد والكراهية في نفوس الكثيرين من أبناء النظام، وسادت الفرقة بينهم واخذ البعض من يعمل ضد الآخر علانية دون تحفظ، لانهم يرون من هم في مراكز المسئولية أثروا واستفادوا الكثير من خيراتها دون رقيب .
كانت الأسرة الحاكمة في الماضي كالشجرة يستظل بها الجميع، أما اليوم فهي كالعود لاظل لها بعد أن ضاعت هيبة الحكم وكرامة الأسرة التي أصابها الوهن والترهل . أنها إرادة الله التي أوصلتنا إلى مانحن فيه من ذل وإهانة.

إن التاريخ ملئ بأخبار الأسرة الحاكمة، وهو تاريخ ملئ بالعبر والدروس، وما يحدث بالكويت هذه الأيام هو الشغل الشاغل للكويتيين بكافة شرائحهم، لأنهم يرون الوضع لا يطاق، وصار كل من ايدو،، إلو والكل يتبجح بما في نفسه دون حياء أو خوف، والمسئولين جل همهم الجلوس على الكرسي والإستفادة المادية والمعنوية، أين من كوفئوا ووضعوا في مراكز المسئولية ؟

أين من أقام الدنيا ولم يقعدها في يوم ما يطالبون بالإصلاح في الوقت الذي هم فيه خارج المسئولية ؟ اليوم الوضع أسوأ بكثير مما كان عليه في ذلك اليوم وهم في مراكز المسئولية، ولم نسمع لهم صوت، لأن للكرسي لذة ووجاهة وبريق ! وهم المستفيدون من هذا الوضع،،، إنــه العــصــر الذهبي بالنسبة لهم ...
إن ما يطرح ويناقش على شبكة الإنترنت، وما يتفوه به بعض أعضاء مجلس الأمة عن النظام له ما يبرره، وما تكتبه الصحافة، وما يتداول على مسجات النقال، وما يكتبه الحاقدون والنقاد وغيرهم شي مخيف، لأنهم يرون ويسمعون ما لا نعرفه، وما يكتب على حيطان المدارس واسطبلات الخيول، دليل واضح على أن الشعب يعرف الكثير عن المساوئ ولا يخفى عنه شي .
هناك من وصف بعض أفراد النظام بالخونة، وآخرون يتهمونهم بامور أخرى وصار النظام الحيط الواطي، كل يحاول تجاوزه، وهذا يدل على أن النظام انتهى دوره،، ولم يعد قادرا على المواجهة فقد الثقة بنفسه كما فقد ثقة الشعب به إن مؤشر يوحي بنهايته والمسئولين يسرهم ويرضي غرورهم وجود صورهم صباح كل يوم على صفحات الجرايد والمجلات بالابتسامة العريضة والتصريحات الفارغة التي لا تسمن ولا تغني من جوع .
هناك رشوة،، فساد،، سرقات،، هتك عرض،، تسيب،، تجاوزات لا حدود لها، وأمور كثيرة غيرها لا أحب ذكرها، ' من أمن العقوبة أساء الأدب ' .
المسئولين أضاعوا هيبة الدولة وأضعفوا النظام، فأصبح مطموع فيه، أطماع الموقع والثروة، وهذا ما يبعث لليأس، والقضية غدت ' نكون أو لا نكون '، لأن من هم في مراكز القرار اهتموا بأمورهم ومصالحهم فقط، وكما قيل ' أنا ومن بعدي الطوفان

***

تعليقي

هذي واهي منقحه جذيه

لو مو منقحه جان ششفنا بعد

بس يتروالي

كلي اللي قريناه

عارفينه

في منه اللي نردده ونشتكي منه

وفي منه اللي مانبي نقوله عشان لانصدق ان موجود

الديره كمريض الكلى

تتلوى

ماينفع فيها غير كليه جديده شابه

لان الكليه القديمه فسدت

اخيه يالكويت!

صور من ال vication!-تحديث اخر صورة-

مسا الخير والاحساس والطيبه
شخباركم يبا؟

اول شي اشكرلكم هالتواصل الدايم ربي لا يحرمنا

ويلوموني ليش اجابل النت..مافيه لوم دام انتو فيه ربي يطولي بعمركم

انا سافرت مادري باي تاريخ ورجعت امس

الصراحه السفره كانت مريحه لي وكانت كالاستعداد لكورس التخرج القادم-الله يستر- بس كانت خوش سفره

رحت ماليزيا ترانزيت يوم وتالي جولد كوست -استراليا- ومن بعدها ردينا ماليزيا جم يوم

اللي رايح جولد كوست بيعرف انها خوش سفره

الجو يهبل
الناس ايننون واخلاقهم اهون من اخلاق الاوربيين الودريين

وتعاملهم راقي

والنفس مرتاحه

وبالليل الجو يهببببل تلبسلك جاكيت خفيف وتتمشى بالسيرفس بارادايس

انا من نوعي عادي عندي استانس بالسفره حتى لو الديره كلها خليجيين من منطلق ان حالي من حالهم نسافر ونستانس فليش التفلسف واقول ماروح ديره كلها عرب
اروح واستانس بعد ليش لا

بالليل الوضع جنه افنيوز خليجي

يعني الاستراليين قله بالليل وماتسمع الا سوالف خليجيه
ماصورت وايد لاني انا الشاطره صفقولي كسرت الكامره

واختي زفتني زفه قشره لانها كامرتها وشاريتها بمنحه الشيخ اللي طافت مع العلم ان اختي تصغرني بعشر اسنين الا انها لاتنكفأ عن تهزيئي وتذكيري بجريمتي النكراء واني مو كفو امسك شي سنع

اني وي طاف

اللي شفته هالسنه شي يضحك الاستراليين يمشون حافييين

مو كلهم..اغلبهم

بالليل.. بالصبح

بحر.. سوق

حفاي

!
ياخي ليش

لكن اللي يضحك اكثر

كل ماتمشي شوي تشوف جوتي وانتو بكرامه مقطوط

بالمطار بالعربانه لقينا جوتي

بالسيرفس لقينا

بالموفي وورد لقينا

بس طحتلكم على صوره حذاء شوفوها

امي تقول الناس يصورون طبيعه

بحيرات

انتي طايحلته تصور بالجواتي

هالمره لاول مره بحياتي اركب العاب غير الحصان اللي يدور

وسكوبي دو على فكره سكوبي دو تخرععع

لان اخرع لعبه ركبتها قبل هالسفره كانت الدوده مالت شوبيز وقطار الموت مال شوبيز

هالمره لعب بالدريم وورد

شوفو الصورة

طبعا انا صورتها عقب مانزلت

ولعبه لعبه ثانيه ماظل دعاء

ماظل قرأن ماظل شي ماقريته

بس ماصورتها

واللي وراها لعبت لعبه عبالي مالت يهال

وكلمن قالي يلا ركبيها خو بس جذيه تدور

واللي اقنعني ان مافيها حزم ولا شي

بس تركبون داخل مجسم طياره صغيره وكل اثنين بطياره

وانا فيها تبدا اللعبه شحلوها

ولا عيال الحلال قاصين علي

ما اشوف الا الطياره مالتي فوووووق واشوف امي تسويلي حركه لاتبجين يمه شوي وتخلص اللعبه

وابوي مسكين تعرفون اللي يصورون عيالهم الصغار

انا ام 21 سنه صرت جني ام 3 سنين عند ابوي

يصورني اول ما ادخل اللعبه

يصورني وانا باللعبه

يصورني وانا نازله

يقول اول مره تحللين سعر التذكره لول

لما زهقنا اخر شي نطرنا باجي القروب بكافيه

و يمر صاحبنا شوفوه

اتوقع لو بالكويت جان حاذفينه بشي

عجيييب كبيير والوانه تهبل

بس تمقلت فيه سبحان الله

بالاخير صورته

انا نوعي ماحب الحيوانات

بس اضطريت اروح رحله الريف الاسترالي لان التذكره شامله اولا وثانيا ماكان في احد بيقعد بالفندق وكما اسلفت بالذكر ان ابوي يخاف علي لان يشوفني ام 3 سنين وشلون اكل وشلون اشرب وفرضا صار شي وفرضا خطي ماشتغل بالفندق وبدق المهم رحنا

وصورت هالكنغر الدايخ وهالكوالا النايمين

وطبعا مانسيت خروفه

وصورتلها هالخروف بو القرون

لما تضغطون عليه

يقول ماااااء

ولمن يتحدثون اللهجه الفارسيه

يقول

اااااب

:P

الكتكات هناك انوااع واشكاال

على كوكيز واللي على كوكيز نوعين

نوع كتكات داخله كريمه الكوكيز

ونوع داخله بسكوت الكوكيز

غير اللي على برتقال ونعناع القديم

في على مارس جنه

وهناك هبيت ب سبونج بوب

يونسس احبه

واحلى شي بالدريم وورد حاطين محل حقه

شريتلي اقلام وخرابيط منه

وبعدين رحنا برزبن قبل لانروح ماليزيا بيومين

برزبن موديلها نفس موديل سدني

يعني كله موظفيين وشي سيريس عرفتو

بس الطبيعه هم تينن هناك

رحنا مكان بس حق التصوييير

سبحااان الله صج من خلق واحد احد

وبعديين وين رحنا؟

ايي

ماليزيا ام الحر والرطوبه

كلمن كان يقول ماليزيا وماليزيا وعجيبه وحلوه

مافيها زود

جنها تايلند بس على انظف
تلوع الجبد صراحه ماعجبتني وشعبها نسبه كبيره منهم شايفين عمرهم

فيها شغلات حلوة

بس مسويلها بروبوغندا كبيره عالفاضي

في ناس يحبونها..الناس اذواق

انا عندي ماتسوى روحه ثانيه

يعني شفناها كافي

رحنا مجمعاتها طبعا

ورحنا رحلتين فيها

الاولى سن واي لاقون

اهيا المدينه المائيه

ويمها مجمع يلوع الجبد كبير عالطل

الصراحه المدينه المائيه حلوة واايد بس ماتنفعني يعني فالرحله بكبرها ماعجبتني لول

وعقب رحنا جنتنغ

اهي منطقه يبيلها ساعتين بالباص

الحلو فيها انها ابرد من كوالا لامبوور

وكلها طبيعه والجو نظيف

واهيا نوعها مدينه ملاهي وبين الالعاب محلات

هذا ال indoor

اما outdoor

كله العاب

كنا شبعانين من ملاهي استراليا فمو وايد العبو

والاحلى

انكم تنزلون بالمحطه

تصعدون التلفريك بو ربع ساعه عشان توصلون الفندق ومدينه الملاهي

احلى شي

لما تصعدون

تمشون بين الغيوم

شي عجيب سبحان الله

خلصنا الرحله

وابوي وصل من المسيد

وامي خلصت غداها

خنروح ناكل

سي يو

----

كويتاوي خيو

ان شاءالله تلحق على هالتحديث جيك الصورة لول