Thursday 24 May 2007

بطيب ولا بقوة!

بطيب
وحتى بقوه
بترجع لقلبي
لأني عشانك
يالغلا
غيرت دربي
ضعت في عالم جديد
وعشت بين نفوس غريبه
لجل اشوفك بس سعيد
وابقى عشانك ام,اخت.. وحبيبه
زهقت اعيش على الهامش
وانتظر كم دقيقه عشاني
رغم هذا متحمل
وتقابلني
بصوت مستاحش
اخيــه..
ربي يعينني
مليت
ولكني ابيك
لأني عجزت اعيش وانا متجاهلك
لأني عجزت اعرف كيف اصير استاهلك
يوم اني معك طيبه
تصير معي فرعون
ولين اصبحت متغيره
تضيعني بأحلا عيون
جانك تبيني
مثل ما انا شريتك
حاول انت تفكر
حاول وجايز تتغير
واعرف كيف ترد لعيوني
لأنك هاجرها من فتره
وبكيفي بترد فيها
وبكيفي اللي ابي يمشي
لأني مليت العابك
وتراني بأسبابك
عرفت شلون اتكلم
وعرفت اقول مابقلبي
سوا قلبي
ولأنك انت يالغلا قلبي
عارف عن شنو اتشره
وجايز انا اتبرا
لكن هالشي مو ودي
ولاني حتى سايرله
لكن ان جبرني الهم
بتبرا
ولكن عقب ماخليك
ضايع بدنيتي انا
انسى الطيب
بقوة
تراك بترجع لقلبي

Wednesday 23 May 2007

اخر المشوار

جميل ان يحلم الانسان بشيء
الاجمل,
ان يسعى عليه
جميل ان يحصل الانسان على مبتغاه
الاجمل,
ان يحافظ عليه بالجهد والعمل
اما الاجمل
ان يلقى التقدير المناسب
هالكورس مو مثل غيره
التعب مضاعف
الجهد مضاعف
المسئوليه جد مضاعفه
المشاكل بالتأكيد مضاعفه
النتائج لحد الان مطمئنه ماعدا ماده واحد
دعواتكم..
وبالتوفيق للجميع

Wednesday 9 May 2007

Bad بخت

جم فرصه طافتنا؟
شخصيا, كانت الفرص جدامي
انا اللي ضيعتها بتجاهلي لها
وتالي اقول حضي وقرادتي..
الدنيا بكبرها فرصه
والانسان لازم يقتنصها
نادرا نلقى هالفرصه تتكرر
وان تكررت تكون الدنيا غير الدنيا
والروح غير الروح
يعني كل مفاهيمنا تختلف
مثلا,عند النجاة من حادث مميت!
او الشفاء من مرض عضال لا سمح الله
او حتى لما اقرب الناس يسامحون البلاوي المتلتله اللي سويتها بحقهم
او حتى
لما انت تنسى بلاويهم
اذا كابرت
او كابرو
معناته الفرصه ماتت ما ضاعت
غالبا الفرصه اللي تعرضها لك الدنيا
مرها حلو
وحلوها احلى
لكن الاعاقه تكمن بخوفنا منها
والشطاره لما الانسان نفسه يهيئله فرص تناسبه
ويتعب وراها
لين يوصلها
وهالانسان يقدر ياخذ من هالدنيا اكثر من اللي تعطيه
لكن القهر لما تلقى ناس حاصلتلهم هالفرص ولكن متعيزين يستغلونها
واخرتها ينقال, حضي نحس!
الا انا اللي حضي نحس هاده مشاغلي و شاغله نفسي بفرص العالم
لما يكون الامتحان سهل
وتدشله مو دارس
مو حضك نحس
انت منحس دنيتك
لما تنعرض عليك فرصه وظيفيه
وماتجهز نفسك للمقابله
مو المدير حاطك براسه
انت ماتعبت على نفسك
لما تمشي لي ورا
وتعاند اللي يمشون جدام
ماغشوك!
انت غشيت نفسك
لما تسكت على حقك
بالتالي محد كلا حقك غيرك!
الحظ بالايد
مو بالسما
والفرصه اللي ماجازتلك اعتبرها مو لك
واشغل نفسك بحياتك, بإمكانياتك وبالفرص اللي جدامك
لاتطالع لقمه غيرك
بتشبع نظر وتظل يوعان!

Saturday 5 May 2007

25 hours/day

غالبا اشتكي من الوقت
والقي بكافه المسئوليات عليه
واللي من المفترض تكون مسئولياتي وواجباتي الخاصه
في يومي القى ساعات ضايعه
غالبا بالنت
او بالتلفون
او بإدماني الاكبر اهو التلفزيون
واستمتع لما اشوف اي شي حتى لو حلقه معاده
او فلم صارله مليوون سنه
والغريب
ان بإيدي اليمين الريموت
وايدي اليسار كتاب!
احس بالذنب لما اشوف التي في
لاني قادره استمتع بالحلقه المعاده
ولا حتى قاعده اقرا الكتاب اللي جدامي
تعودت ادرس بالزحمه
لأني ساكنه ببيت في حس اخوان وحس زوار مشالله ماينقطعون عن البيت
اني وي
تعدي سنين وببال الانسان شغله وده يسويها
والشغله يمكن ماتتعدى ساعتين الى 6 ساعات
كهوايه معينه
او تجربه جديده
بالنسبه لي
عدت سنه او اكثر على اخر مره قريت فيها كتاب
وللحين الكتاب ماخلصته
العيب مو بالوقت
اليوم فيه 24 ساعه
صحيح دوام الجامعه يستهلك الوقت الى جانب الدراسه وعدم اغفال الوناسه!
لكن في ساعه او اكثر اقدر اعيش فيها لنفسي باليوم
لكن انا ضيعت على نفسي ايام او حتى شهور مو بس ساعات بإني اشغل وقتي بشي ماستمتعت فيها لأن بوقتها كنت افكر بشي ثاني
الاشيا اللي ودي اسويها بسيطه موصعبه
لكني كبشر نخاف من اي شي نجهله
فبالي العمل الصحفي
كاستطلاعات ومقالات
وفبالي تصميم الاكسسوارات
وفبالي اني اشارك بورشه عمل او دورة بورصه!
وطرا على بالي كذا مره اشتغل بارت تايم
في ناس ببالهم شغلات احلى
وافكار محد سبقهم فيها
ويمر العمر
واحنا ماستمتعنا بحالنا
ولا حققنا اللي ببالنا
يمر الوقت
واحنا نستهل عقلنا
نستهلك وقتنا
نستهلك نفسنا باللي مايسعدنا
نخضع لقيود الخجل والواجب
نرمي المسئوليه على كاهل الوقت, الواجبات الاجتماعيه
مثل مايختار شخص الطب
واهو بالواقع ذو اتجاه ادبي بحت
لا اهو بيستمتع بمهنته
ولا حتى المريض بيرتاح له
ليش؟
اما لدافع مادي بحت
او للخجل من هوايته
بالنسبه لي رغبتي بدراسه الهندسه فاقت كل الرغبات
ما انكر اني كنت احب السياسه بشكل كبير
ولا انكر ميلي بشكل كامل تقريبا للأدب كشعر
ولا اقدر على نكران حبي للتاريخ
لكن
حبي للهندسه فاز باكتساح
وانشالله بشبع باقي الميول من خلال دراسات جانبيه
صراحه حبيت المواد الاختياريه بالكليه
على الرغم من تذمر غالب اللي اعرفهم
لكن مو حلو ان احنا ندرس الجوانب العلميه او التطبيقيه البحته
بدون مانعرف مثلا شنو تاريخنا
او نكتشف جزء من ادبنا العربي
اهيا اشيا حلوة ان خذيناها كمتعه او معرفه
اكيد بنتعب منها ان شفناها كمجرد grade!
واكيد
مانحتاج اكثر من 24 ساعه باليوم:)