صبحج الله بالخير..بالليل;p

اليوم كان جدا ممتع
ترا بدت تعجبني البطاله خلاص مابي اداوم
;p

باجر عندي مقابله عمل
كاااشخه سنعه تروح مقابلات بعد

قمت اليوم صباحا لاني معزومه على ريوق ب Dean and Deluca
جان شنو اكل

طبعا دندرمه بدعت فيني شويه بريوق دين اند ديلوكا بالصور القاتله
http://danderma.wordpress.com/2009/07/06/the-yummiest-breakfast-in-q8-so-far/
ومايلي هو افطاري اللذيذ

احم احم

حبيت الوافل وايد ,علي بالف عافيه

واختي كلت بان كيك

وتمشينا بالافنيوز وكانت رحله ممتعه ورديت البيت

وانا للحين بخاطري شي:(

بخاطريUP

جان بالغلط ادش سايت السينما اختي قالت جربي وجان ما اشوف الجمله المعهوده Seat:0

شفت ان في كراسي تنطرني

وين؟

ب 360

ورحنا , صراحه حلو المجمع صج مابطلو الا جم محل بس له مستقبل واعد

لاتشوفوني شلون مستانسه لما سحبت التكتس

والله يهبلللل, اشوه اني رحت حدي حبيت الفلم صج صج حلو شكلي اخر وحده شفته بالكويت

اشوه اني رحتله ولا جان صار فيني شي;p

ولفت نظري مطعم زهر الليمون يبيله تجربه ان شاءالله عن قريب

وبعدين جان انزل جيان الجمعيه العوده;p

ولقيت كاكاو بو فلفل اللي قريت عنه ببلوق من البلوقات

اهو فلفله مو قوي بس اشوه ماحطيت بخاطري وذقته

واخر شي رحت بيت عمتي

كان يوم جميل وممتع وانختم بخبر حلوووووو الحمدلله

ربي يرزقكم احلى الايام ان شاءالله

تجربه

بعد الفراق
اشتقت لشعوري حين اراك .. او حين اسمع صوتك يجري عبر الهاتف
شعور غريب .. كطفل نادته امه حين وجدت تحفة كان قد حطمها وخبأ شظاياها..
ربما احاطت شباك الحب بصيرتي ولم اعي اني لا اشعر سوى بالخوف منك كخوف ذاك الطفل
الخوف مما ستقدم عليه.. مما سبق واقدمت عليه.. الخوف مما تضمره لي

غلبني الحنين لاحاسيس طفله .. لكم عشقت ان اكون طفله معك.. ساذجه لاتعي الغد ولا تفكر فيه
تكاد تصل ابتسامتها الى اذنيها حين تجاورها , ذات دمعات مدللة تزور وجنتاها بسبب او بدونه
ولست هنا .. ففكرت ..كيف احي الطفلة؟
فاشبعت ذات الشعور بتجعيد خصلات شعري وبحرمان الكحل من عيني حتى ازيل بعض السنين من مشاعري وأسرت غرتي بتاج زهري و .. مفاجأة ! عادت الطفله الي ولم احتاجك لتعود!

لربما اوحى اليك منظري النضر حين لقائنا الاول.. ان لي قلبا يافعا يملك هواك ان يشعله
الا انك لم توسع نطاق بصرك لترى ظلي المتهشم حينها
فحين احببتك.. كانت اشلائي انانيه لا تحب ان تتعاون او تلين
تعاندني يدي لتعزف ارقام هاتفك
فيكون لساني اكثر عنادا.. فلا ينطق حين تجيب
يسجل قلبي هدفا بمرمى الشوق
وهناك ينظر لي عقلي.. آسفا لحالي
الا ان حطام علاقتنا جمعني بذاتي فاصبحت اقوى وهجرت المراهقه وكسرت لافتة العوده

لا املك ان تعود .. لا املك ان نعود
هي تجربه مررت بها لاعلم ماهو الحب الطفولي ولست نادمه
فلربما قسوتك وعدم مبالاتك ستجعلني احسن الاختيار حين يختار قلبي ان يعشق بدل ان يحب
لست سوى تجربه .. مرحله .. مررت بها لانتقل لسواها ..فلم اهو العجلة في حياتي

ثقتي بنفسي.. وعلمي بمقامها لن تكسره حقيقه انك انت من ختم تلك المرحله
فإيماني يخبرني ان لكل طعنه جانب جميل لربما تعجز عقول البشر ان تتفهمه حين تكون السكين دافئة

جمعيه المهندسين الكويتيه

تقيم جمعيه المهندسين الكويتيه حفل لتكريم المهندسين المشاركين
في معرض مشاريع التخرج الاخير للفصل الدراسي Spring 2008-2009
مابي اترجم الفصل لان كلش مايلوق;p

وذلك في تمام الساعه السابعه والنصف من مساء هذا اليوم , السبت 27 يونيو 2009



الف مبروك للمهندسين وتستاهلون كل خير

وان شاءالله منها للاعلى

وربي يوفقكم بحياتكم العمليه



هذا لنك الخبر

http://www.kse.org.kw/newsDetailsar.aspx?news=119

-Update-أين تذهب هذا المساء

بما اني مازلت اعيش البطاله

حبيت افيد الاقتصاد وبالاخص السينما
انا كنت اكره السينما

ماحب ريحه اكلهم

ماكنت احب النفيش وماخلي احد يطلب ناتشوز لان اتنرفز منه
ومو فاهمه ليش الناس يطلعون من البيت عشان يشوفون فلم ويا ناس مايعرفونهم !

اوكي شفيه الدي في دي

جايز نفس السبب اللي يخلينا نقعد بكوفي شوب نشرب قهوه بدينارين وبالبيت نقدر نسوي احلى منها;p

غير جذيه التقصص بالافلام

يعني اوكي مقطع هذا شي لازم يقصونه

كلمه يقصون اخر حرف بالله ليش؟

استغفرالله جني عيوز ماني عارفه اكتب بوست بدون تحلطم

اني وي

وفجأه قمت اروح افلام من عقب ماكنت ما ادش السينما الا مرتين بالسنه

وفجأه قمت اكل بوب كورن مكس كراميل وعادي;p
خلال هالشهر دشيت 3 مرات

الاول The Night At The Museum 2:Battle of the Smithsonian

من بطوله Ben Stiller, Owen Wilson

صج اني موشايفه الاول لكن فهمت القصه

يقولون الاول احلى

انا المهم كان بخاطري سينما دشيت حجزت اونلاين ورحت

حتى ماكنت ادري منو يمثل فيه

بس الفلم جيد والله يونس

اهو باختصار عن لوحه معينه تبث الحياه بالتماثيل والمجسمات وعاد شوفو المغمرات

احلى شي الميني اينشتاين

والثاني The Proposal

انا وايد احب Sandra Bullock

ماكنت مقتنعه ب Rayan Reynolds

بس حبيته بالفلم , الفلم قصته عااديه جدا وباختصار اثنين واحد منهم يكره الثاني وبعدين لما يعرفون بعض يحبون بعض,عاد شلون يعرفون بعض عدل هذي حبكه الفلم

حبيته لان بنو احداث حلوة من قصه جايز مرت علينا مليون مره وحبيت هدوم ساندرا بولوك بالفلم;p

واخيرا وليس اخرا
اليوم رحت الكليه معرض مشاريع التخرج بعد شوي تلقوني اتحلطم بس خل اكملكم ريفيو السينما

رحت اليوم Taking of Pelham 123

طبعا الفلم من بطوله فارس احلام مراهقات اخر السبعينات اول الثمانينات John Travolta

والمبدع Denzel Washington

الفلم واايد حلو من صج حبيته مع ان مو نوعي سوالف جذي ,حبيته هم القصه عاديه قطار ينخطف ويبون فلوس اوكي شالجديد
يايكم الحجي

روحو شوفو الجديد ترا كلها 3 دنانير التذكره!

بس حلو لايطوفكم

***

قبل الفلم مثل ماقلتلكم رحت المعرض والمعرض مسوينه بخيمه!

الله يهداكم

ديره فلوس وخير عندها,وجامعات تنبني بره على حساب الديره

خو جان اجرتو صاله ولا فندق حق هالمساكين!

حررر والمشاريع مظلومه بالتقسيمه صراحه

فوق هذا مو مرتبيين حلاته كل قسم مشاريعهم يم بعض

صاير كيميكال جدامه مدني وصوبه كمبيوتر

يعني جد الطلبه تعبانين على شغلهم جذيه تسوون فيهم!

هذا غير المبالغ اللي انقطت عالمشاريع

صح ان هالخيمه اكبر من قاعه فاروق البرغش اللي كانو يسوون فيها المعرض

بس عالاقل قاعه فاروق البرغش اهيا بمبنى 14 خ
يعني الطلبه والمهندسين يقدرون يطلعون من المعرض يقعدون بالبراد

لا جد الكليه قاعده تصير مادري شلون! للأسوأ!

صج اني احبها وبالنسبه لي تظل احلى مكان عشت فيه احلا ايام بس الحق ينقال

لامبلغ سنع حق الرعايه

ولا حتى مبلغ الرعايه النتفه يستلمونه الطلبه مبجر

يستلمونه عقب مايخلصوووون

شدعوة عليكم

يعني الشركات معطتكم المبلغ للطلبه

عطوهم بدايه الكورس

سواء المبلغ انصرف كله ربعه نصه هالشي راجع للطلبه

مع انهم يدروووون ان المبلغ مايوصل نص اي مبلغ ينقط على اي مشروع

المهم خلونا من هالجامعه ومؤسسات الدوله اللي تييب الهم

الطلبه ..سوري سوري..المهندسين

ماشاءالله بدعو

المشاريع تينن وايد حلوة وللاسف من الحررر مامريت عليهم كلهم باجر بروح امر مره ثانيه

نصيحه روحو منها تشجيع للمهندسين ومنها تاخذون فكره عن معرض مشاريع التخرج ومنها جايز تتعلمون شغلات ييديده

المعرض مقام بخيمه تشوفونها على يساركم اول ماتدخلون بوابه -1- بكليه الهندسيه والبترولباجر الخميس اخر يوم والمعرض من 10 الصبح لين الساعه 4 ونص العصر

ولاتاخذون كاكاو وايد اخذو وعلطول اكلو لان اليوم الكاكاو ذاب وخرب جنطتي:(

-Update-:

احم احم

اليوم رحت

The Accidently Husband

بطوله Uma Thurman, Colin Firth and Jeffrey Dean Morgan

طبعا الفلم سخيف ومليق وثقييل عالجبد

بعدين صج اوما ثرمن ليمتى تمثل؟ جد والله خلاص جم مليون دافعين على راسها عشان هالدور السخيف

وعلقوله بمسلسل Paul Reiser Mad About You

يقول شنو يعني اسم وحده اوماا

وبعدين يعني

انا رحت الفلم لاني مالي خلق اقعد بالبيت بس المهم قلت اقولكم عشان لاتروحوله

القصه عن الحب الحقيقي وهالخرابيط

بس عجبتني جمله بالمسلسل

You Don't Have To Be So Right Every Time

جد الواحد لايكون متمسك بحقائق وافكار ولا يحاول كل شوي يصحح معلومه غلط ويعدل اخطاء غيره

التزمت شي منفر ويخلينا نشوف الدنيا بدون الوان

باجر وين اروح مممم;p

طيب..وبعدين!

ملل

والله الدراسه نعمه

عالاقل الواحد يحس ان قاعد ينجز

قاعد يتعب

مو عاله عالمجتمع

المشكله انا حتى هوايه مثل العالم والناس ماعندي

ياتني فتره كنت اوبسسد بسوالف الدايت واقرا تجارب وكتب ومنتجات

الحين خلصت

ابي شي جديد في جديد

من فتره رحت فيرجن خذيتلي كتابين

قبل

كان الكتاب مايطول عندي يومين

لان اموت بشي اسمه قراءه

الحين كتاب ماكملته والثاني ماجسته

مع اني كنت احب القصص الرومنسيه قمت اكرها

صرت احذف اي روايه من اقرى وغرقت في بحر عيناها

ولا لم ارى مثل بياض معصمها

او لما اقرى اني اعلم انها ليست لي

عساها ماتكون لك احنا شكو تصدع راسنا

جان اهب بكتب بناء الذات

اللي يعرفني من زمان يدري اني حدي تغيرت

يعني قبل كنت ماحب اقول لا واي امشي مع راي الاغلبيه لاني مابي مشاكل

الحين لحد يجرب يقول لا لما اقول اي;p

بس قلت ليمتى صايره جني المعلمه توحه خل شوي الين شخصيتي

لاني اعرف عيوبي ومو من النوع اللي احب اعاند على الغلط

شريت ذاك الكتاب الحلو

لما شريته ولا يطلع نفسه اللي احمد حلمي قراه بمادري اي فلم وقال انا غني انا غني

قلت ماعليه

للحين باقي ثلث الكتاب ماخلصته واصلا زهقت منه لان اغلبه اشيا احنا نعرفها بس نستعبط ومانسويها

وبنت خالتي تدرس علم نفس وانا استمتع بسوالف علم النفس بس ماحب احد يحلل شخصيتي

عطتني كتاب حتى والله ماني ذاكره اسمه بس فكرته شلون نعرف موقف الناس وارائهم من خلال تصرفاتهم وحركاتهم

هم ماكملته

زين مانبي نقرا..بطلنا

ابطل البلوق

ابي اكتب

كل ما اكتب قصيصونه بالوورد

اخلصها وايي ابطل بلوقي

امسحها اقول خلاص كبرتي غيري اسلوبج

كل ما بعلق على خبر بالجريده مثلا

اقول سنعه يعني اكيد كلمن قرا الخبر واكيد لما بتعلقين ماراح يتعدل الوضع

لاجد مليت

اشوه ان بنت خالتي ولدت بالسلامه فصار عندنا شوي اكشن

الله وكيلكم قمت اروح عروس:(

شفتو حاله اليأس

انا اللي عروس عيال العمومه والخوال والعمات والخالات ماروحلهم الا نادرا

قمت اروح عروس

اشبع من شوفه الاكستشن والمكياج والرموش الصناعيه والاظافر الصناعيه والمجاملات السخيفه

يعني اشكره جدامي اشوف بنتين مايواطنون بعض

هلا حبيبتي شلونج عاش من شافج

والثانيه هلا والله امبيه محلوة ظعفانه متغيره

ولما كل وحده تلتف الصوب الثاني تقلب ويها جنها ماره بزفره سوق السمج

زين مو غصب سلمي وامشي

اقعد ساعه بالعرس وامل

واحن على الفقيره المسكينه امي يلا نقوم ومتى نمشي

وان سولفت ويا الناس

يقولون قثيتينا بالشي الفلاني

ولا عليتي قلبنا بالشي العلاني

وان سكت

سنعه ليش منفسه

سنعه خو كلنا ناطرين وظايف

سنعه خو احنا هم مو مرتاحين بحياتنا

وان جاملت

انتي مو على بعضج فضفضيلنا

وهلم جرا

مسويتلي قطوة بالفيس بوك ومجابلتها

حسبي الله عليكم يالنواب انتو تتناجرون وتوقفون الديره على شفا حفره و انا اقعد اجابل قطوة

اي

وابي اروح امريكا او بريطانيا شلون:(

ابي اروح هناك واشتغل واركب قطار حق دوامي وامشي لين الجمعيه اشتريلي اغراض وامسكهم واقرا مكوناتهم

واسولف سوالف سخيفه مع اللي يبيعون وارجع شقتي واكتب ببلوقي اللي ابيه بدون ما احاتي شتقول عني فلانه وفشله ان قرت علانه

اي

واكره الروتين السخيف للوظايف بالكويت اكرهاااااا

لا والناس لين حصلو وظيفه حتى معاش سنع ماكو اللهم لك الحمد بس وين رايحه فلوس الديره مايندرا

لا واحلى شي خبر بالجامعه وبنص الخبر جمله ضعف ميزانيه الجامعه

مو حرام

جامعه حكوميه باسم الكويت مالها ميزانيه مثل الاوادم

وتبنونلي جامعات بره ها

وين تروحون من الله يللي موقفين التنميه ومانعين اهل الديره من خيرها

وصايره كل يوم لازم اكل ايس كريم سواء كان كي دي دي , ماربل سلاب, هجن دز, قولد ستون, صمدي عالم المانقو

المهم ايس كريم

وماقمت اطلع اتسوق ولا اتغدا بمطعم ولا اقعد بكوفي شوب نفس قبل

قمت لما اروح السوق اشوف اشيا ييديده بطلوها من وراي:(

بس خلصت اليوم:)

لما سلمت على الاولــ معصومه ـــى

اليوم كان في استقبال للاولى في الدائره الاولى
اول وزيره
ونقدر نقول اعلى نائبه بعدد الاصوات
واول نائبه عن الدائره الاولى

وان شاءالله اول رئيسه لمجلس الامه



طبعا انا وايد احبها
واتمنى اوصل مواصيلها واكون نفسي واسمي مثلها
فنطرت بالدور وصورت وياها
وطلعت الصوره مشوشه:(
بس لا والف لا
سنعه تخليهم
اخر شي خليتهم يصوروني مره ثانيه ;p

الصوره التاليه يتروالي مكالمه مع تلفزيون الراي!

الاستاذ محمد السنعوسي يهنئها

وتهنئه من يوسف الجاسم

طبعا يا مادري اي شيخ مادري وزير شدراني خو احنا كليوم وزير
والدكتوره موزة المالكي من قطر
وسفيرنا بالعراق علي المؤمن
وممثلين وفنانيين وغيرهم وغيرهم
وماذكر منو بالضبط قالها خليج نائبه لاتقبلين اي منصب وزاري جان تقول اكيد ان شاءالله


ويات المرشحه ذكرى الرشيدي جان سنعه تروحلها مادري من وينلي جرأه مسكينه امي تطالعني احسها تقول وين بنتي لاني لسان
عالفاضي;p
بس لازم اصير جذيه لان لازم ابني نفسي واحجزلي مكان بين هالرموز ان شاءالله
فلازم نتعرف على الزملا النيابيين والسياسيين
المهم مالكم بالطويله
قلتلها الف مبروك وعدد اصوات لايستهان فيه صراحه
جان تقولي الله يبارك فيكم
طبعا سنعه لازم تقطلها قطه واهيا ماشيه
جان اقولها ان شاءالله ارقامج تكون دبلات بالحل الياي
جان تخزني احسها تقول شفيها ناويه عالشر
بعدين قالتلي المجلس في عناصر جيده ومكتمل
طبعا هالكلام مو 100% لاني لما اكلم احد اول مره انسى شنو اكون قايله فاعذريني ذكرى ان في شي نسيته او شي بسيط ضفته

ولما يايت السفيره الامريكيه سلمت علينا بروحها يحليلها جان تقول لنا

future parliament

جان اقول ان شاءالله بحق محمد وال محمد

اهيا مادري فهمت محمد وال محمد

بس ردت قالت ان شاءالله;p

وعقب معصومه رحنا حق رولا بالجابريه
بس للاسف كانت توها طالعه رايحه تبارك لمعصومه
بس خوش حلو عنده مع اني ماذقته بس شكله يوحي;p





تصوير الوالده;p
لما وصل دوري اني اباركلها

قلتلها مبروك علينا احنا مثلج يمثلنا,مع اني ماقيدت بس اعتبرها تمثلني وليش اعتبرها الارقام تثبت انها تمثلني فديتها
وقلتلها ادعيلي اصير مثلج
جان تقول
ليش لا وبتصيرين احسن واحسن

ان شاءالله يادكتوره معصومه
منو مايتمنى

الف شكر للناخبين فرحتوني ووصلتو معصومه

والشكر موصول للمتطوعين اللي يتروالي للحين مانامو تنظيم ممتاز وطولتو بالكم عالكل مع ان في ناس نرفزوني من الحريم اللي ياييين اشوه اني ماشتغلت معاكم جان سكرت ليت الخيمه عناد;p

P.S.; الصوره الثانيه طلعت عجيبه بس مابي احطها لكم

في لحظاتي الاخيرة-5

احببت جميع الصدف التي ارادت جمعنا وكرهت التقدم بالعمر لانه صنع وسيصنع مزيدا من الحواجز التي تثقل جفوننا فلا نقوى على ان نروي عيوننا برؤيه انعكاس عيوننا ..

احببت شهر رمضان لغايه في نفسي, فلكم كنت احب صوت جرس المنزل معلنا عن وجود محمد مع طبق من اطباق والدته واصبحت اغازل المطبخ وكتب الطبخ لاعمل كعكه ما او مجموعه من الفطائر حتى تبعث لمنزل الجيران ويشعر محمد بدفئ اشواقي حين يمسك بفطيره دافئه طازجه كما هو حبي .

حين تأتي والدتي بالشوربه التي تحوي الحروف كنت انتقي حروفنا واتناولها وحدها لاغذي هوانا الشقي ولم اعلم ان كنت ارى ذلك الحب اجمل حين يكون بلا حوار فاصنع الحوارات في مخيلتي او اتركه ليكبر الا ان الامر لن يكون بيدي على اية حال فلربما اصابتني الشراره اولا لكن الحوار لن يبدا مني ولم اهتم لاني كنت احافظ على مشاعري الناميه من ان تخدشها التجارب التي لربما تكون فاشله ..

لمحمد طباع غريبه وجميله في نفس الوقت, كان حينما ينتابه الخجل من أي صدفه تجمعنا او من أي حديث يجمعه مع جدتي في وجودي سواء كان بجمعيه المنطقه او حتى عند باب المنزل يضحك..
وكنت اقرص يدي حتى اتألم ولا اضحك انا ايضا

وهذا ماكان يحدث حين يأتي لديوانيه منزلنا , ولكم شهدت النوافذ قصصا ناعمه ابطالها مثلنا.. فكان حين يرفع رأسه لنافذتي غرفتي لا يرى سوى رقص الستائر من ورائها .. وتنتابه حاله ضحك ايضا
صحيح انه في بعض الاحيان كان لايرفع بصره لنافذتي خجلا من الجيره..اخي .. ومن نفسه, لكني اكاد اقسم ان له عينا اخرى يراني فيها

وفي يوم ما زارنا احد الاقرباء الذين يعيشون في دوله مجاوره كنت اكرهه لخبثه خصوصا في اطلاق سهام نظراته في كل الاتجهات في آن واحد!

وفي كل مره يزورنا ينفث سمومه فتنتهي الزياره بشجار بين اخي وابناء عمي او ابناء خالي او اصدقائه لكن لكونه مضاف قسرا لشجره عائلتنا فلابد ان نقابله بابتسامه وترحيب في كل وقت املا بان النضج يمن عليه بالقليل من المسئوليه . لم يقدر هذا الضيف الثقيل ان يشعل أي شراره بين اخي ومحمد لان محمد غير قابل للاشتعال ويدرك انه سيبقى جارنا الى ان يشاء الله الا ان الضيف ضيف فقط.