Sunday 29 June 2008

اشتقت الى ان احب

ونحن في غمره استمتاعنا بهندسه الحروف التي تراقصت على لحن مميز وخرجت لنا باغنيه ترنم بها جيلين وهي لاخطاوينا
-لا لاتخاف..حاول حبيبي
حاول حبيبي..ولا تخاف
-مابقى بحبنا بعد..شي عليه ينخاف

تغلق الرادو على نحو مفاجئ وترمي بسؤال مفاجئ اكثر
ماودج تغنينها من قلب؟
بخبث البنات اتساؤل؟ كيف.. لمن؟ ماكو شغل
تضحك
انا ودي احب
فانثر بذور احلامها الاولى باستفساري غبي.. لكن لم يدر بخلد احد ربما من قبل: شلون ودج؟ شنو اللي ودج تسوينه.. او شنو اللي ودج تعيشين فيه
فترمي بخصلاتها التي قد لاعبت اهداب عينيها العسليتين وتسند ظهرها على باب السياره
وتقول : انا راح اقولج
فارمقها بنصف عين مستصغره ماتقول واخرى مترقبه القادم وعين تناظر الشارع الذي امتلأ بمركبات جميله واخرى غريبه مما يبدو ان وجودنا في (شارع الحب) اثار لديها الشوق لشي قد عاهدنا انفسنا على هجرانه بعدما رأينا فيه نيه لتركنا هو الاخر
تقول:
بالبدايه.. اتمنى ان اعيش شعور ان اكون في مكان..وليس اي مكان..بل مكان مكتظ بالناس وان تجذب عيناه عيني واكون وحدي..من اراه بطريقه اخرى, ان انظر الى بخجل حينا وان اوجه نظري من ذات الخجل الى شيئ اخر ..وان اراه بفضول حينا اخر, اود ان اشعر ببروده المكان وحراره قلبي الذي اضعفته دقاته حتى انه يعد الثواني للرحيل الى جوف اخر .. ارغب بان يراني وحدي.. وان يثير غيرتي برؤيه اخرى وينصب عينيه ليرى رده فعلي الغاضب الذي اعجز ان اغلفه بشعور اللامبالاة
اتعلمين..حينها سيكون ذات المكان المكتظ لا يحوي سوا كلينا وان نسمع بوضوح نبضاتنا المتبادله
من الغريب انني متلهفه لاشعر بقلقي حينما يهم بالرحيل فاسعد بخطواته المتثاقله والتفاته يريد ان يضفي عليها طابع اخر .. انه التفت لظنه نسى شيئا ما.. بل انه بالداخل علم تماما انه للتو وجد ماكان مفقودا فاتعذر برغبه للدخول الى دوره المياه القريبه حتى ارتب اهدابي التي جذبها ماتجهله فيه
وحينها اعد تلك العيون منها من هو واضح في طيات الوجه ومنها التي انتصفت في القلب انها ستروى من حضوره يوما ما


فتتنهد وتراني ضائعه ابحث عن حلمي في حلمها وتقول
توقعتج تضحكين
جهلت اني في تلك اللحظات كنت ابحث عن حلمي في حلمها واراه متشابه..ربما جميعنا البنات نتشابه باحلامنا لكننا نختلف في الوانها وتزيينها فقط
واقول: لم اجد حبا يطفو بتلك الامواج المتراطمه
فتجيب بابتسامه: جمال الاشياء يكمن بانها موجوده ولكن علينا استخراجها
فاحسست بغبار تلك المشاعر التي نفضتها في داخلي لما المكابره فمن لا يشتاق للحب او مايشابهه
فاقول: اكملي

فتقول فما يلي تلك اللحظات ربما يمتد لايام وربما تبقى مجرد لحظات فان كتب لها الاستمرار
فاني اريد ان اراه في ذات المكان يوما اخر
وان تعتريني رياح التساؤل عن الخطوة التاليه.. او النبضه التاليه ان صح القول.. حينها اريد ان اتظاهر باني نسيت من يكون.. واريده ان يتظاهر بالمثل حتى انه يحاول ان يخفي نظراته المصوبه باتجاهي بدخان لفافه التبغ التي تراقصها اصابعه
وتضيف
واصل تدخينكَ .. يغريني
رجلٌ .. في لحظةتدخينِ
ما أشهى تبغكَ .. والدنيا
تستقبلُ أوّل تشرينِ
والقهوةُ .. والصحفُ الكسلى
ورؤىً .. وحطامُ فناجينِ
دخّنْ .. لا أروعَ من رجلٍ
يفنى في الركن .. ويُفنيني ..
رحم الله نزارا..فقد قال كل ماودت انثى قوله في كل لحظاتها

فتكسر الهدوء بقولها: ترا الاشاره خضره ..وين رحتي
ابخل بالحقيقه واقول: مادري شلبس حق الدوام
لاتصدقني..فهي تعلم ان لدي اقسى قناع يخفي اضعف امرأه في الدنيا
فتزيد:
ساعه اريده ان يتقدم الي ويكسر كل جزيئات الهواء التي تفصلنا ويكلمني واخرى..اريده برزانته جالسا هناك..بعيدا يتسائل عن الخاتم الذي يزين خنصري والذي لربما يحدد اتجاه خطوته القادمه .. اتعلمين.. ساترك تلك الخطوة له فقد بالغت باحلامي التي شملت استراتيجيه الرجل وذاته

فماعلى الانثى الا ان تملك كل الادوات وتترك هذه.. فخطوته هي من ستحدد استجابتها

فترفع من صوت اذاعه خجوله بما لديها من اغنيات ربما تحمل من المشاعر بعضها.. فصديقتي هذه قضت على كل محاوله اخرى لترجمه ماهيه الحب

فيحين دور الست بالحديث وتقول:
رجعوني عينيك لايامي اللي راحو..
علموني اندم,على الماضي وجراحو
اللي شفته..ابل ماتشوفك عينيا
عمر..ضايع..يحسبوه ازاي عليا؟
فهي تحلم بلحظات..وتحلم حتى بشخصيه من سياعيشها تلك اللحظات
اما انا فارقب مركبه تسير بجانبنا وكان هو فيها هو من ملك ماضيي وتوسد احلامي القادمه يعيش حلم فتاة غيري بنفس الدور الذي كان مرسوما له بمخيلتي الا انها زينت حلمها بابن منه يداعبه حينما يصل كل اشاره حمراء في شارع الحب
فمن الخطأ ان نبني احلام تشمل غيرنا ونحزن حين يكون لهم احلامهم الخاصه

Saturday 28 June 2008

احـــــــنا..واهم!

قريتلج شعر حلو كاتبته بمجله
صج؟ اي انا احب الادب واحاول اكتب اشعار او ابيات حلوة بس قلت اخليها هوايه وادخل كليه العلوم الاداريه حسب كلام صديقاتي اضمن لمستقبلي
نو , غلط.. انتي سوي مستبقلج..مو تخلين احد يحددلج شنو الاضمن وشنو لا
عدل.. بس انا اقتنعت برايهم
قود..
انزين توعدني ماتردني ؟
امري
تقولي شنو اللي قريته لي على فنجان ساخن من الشوكالاته اللي تطالبني اياها
بيه..متذكره
اي مانسيت
توقعتج نسيتي.. او يمكن نقول تناسيتي؟
يلا نروح؟
ورفيجتج
اكيد شافتني اكلمك وراحت كملت حوستها لما تبيني تدق

بالكوفي شوب

كل شي تغير
شكثر صايرلك مو ياي الديره
سنتين
تصدق..مع انهم مو وايد لو حسبناهم..بس الديره باللي فيها بتغير مستمر وسريع
يعني كل يوم تشوف شي ييديد..تسمع افكار ييديده..تشوف اشكال غريبه..

اي والله اشكال غريبه صدقتي
بالله هذا شنو اللي فوق راس هالبنات..خلينا صريحين..كلا الجنسين يتجملون للاخر.. وفي منهم للمنافسه
فكري فيها,اذا الشباب نفسهم لايعه جبودهم من هالمنظر.. فمعناته نروح حق الاختيار الثاني
ان البنت قاعده تسوي بعمرها جذيه عشان تنافس غيرها من البنات
معناته في وحده خبله قالتلهم ان هذا حلو وقصت عليهم..واهم قاعدين يتبارون بالحجم واحنا نضحك
انتي لي تحجبتي مو تسويلي هالسوالف

(تضحك)..اي الله كريم

اي الله كريم عدل ماكو اكرم منه .. بس حضرتج ليمتى مطلعه هالكشه وهالسيقان مو عيب عليج

اقول حسين

خلاص اسف ماتدخل

اي عفيه عالشاطر.. حسين بقولك شي

ادري شبتقولين..ماعليه انا مو زعلان,بعدين انا طلبت منج تدزينلي ايميل ان وافقتي .. وان لا ماله داعي تكسرين وانتي سويتي اللي طلبته

مادري.. ترا مو لعيب فيك ولا شي لكن انا الحين..
يقاطعها
فاطمه, لاتبررين من حقج تسوين اللي تبينه.. وانا كنت متسرع يمكن بس ماحبيت تروحين بدون ما اقولك اللي بقلبي ..فاطمه انا مو صغير.. انا فاهم موقفج وفاهم ان هالخطوة كبيره

اوكي.. بس بغيت اقولك انها كانت فتره حلوة وايد وحبيت كل شي فيها.. صحيح اني درست لغه لكن تعلمت اشيا وايد غير هاللغه, وعمري ماراح انسى اي مكان كنا فيه او اي شي قلتلياه.. حسين انا عزيتك وايد..مانكر اني انعجبت فيك وقتها .. بس بصراحه خفت..خفت اني اظلمك باني اخليك علاج من شخص ثاني.. والعلاج فتره وينتهى وانا مو استغلاليه.. انا سافرت بقلب مكسور.. ورديت بقلب قوي خلاني اكسر غيره, انا كتبتلك الرساله بس مادزيتها
كنت كل يوم من وصلت اكتبلك فيها شي ييديد وقبل لايعدون الاسبوعين بيومين قريتها.. شفت كلام انسانه ثانيه.. شفت كلام وايد.. خفت ومادزيت الرساله مادري شالسبب.. انا اخاف من الشي اللي ماعرفه..و اخاف اكثر من اني افقد شي اعرفه.. خفت ادزها .. لاني خفت افقدك بعدين

فاطمه بس, انا ماقلتلج برري
.. رديتيني اشهر ورا
ذكرتيني بحالتي وانا مثل الياهل اللي يوقف عند الباب ينطر وصول امه وابوه
كنت امسك اللاب توب كل مكان يافاطمه كل مكان.. قمت اسمع رويشد يقول وينك, ماوحشتك عيني وحنيت؟ ومثل المينون ارددها وراه , حتى اغنيه ردي الزياره يتروالي الاي بود مل منها
تدرين فاطمه.. انا مادشيت الجيم عشان اظعف ولا عشان صحتي
انا دشيت لاني كرهت حسين الضعيف اللي عاش عمره قوي واخرتها قلبه يخليه ضعيف كنت بغير هالحسين.. بخليه شخص ثاني,ببنيله شخصيه ثانيه .. بس اليوم..الحين دريت انا لو شنو اسوي ماراح انسى شي انا شخصيا مابي انساه
واشوفج الحين جدامي صحيح انتي تغيرتي لكن بكل بساطه انتي كبرتي .. نظرتج توسعت للدنيا
بس فاطمه انا مابي اكون ضعيف.. خصوصا جدامج
انا لما كنت بالطياره كنت ادعي اني ما اشوفج وبنفس الوقت ادعي تكون رده فعلج حلوه ان شفتيني
بذمتج شفتي مثل هالتناقض

حسين
هلا
سوري
قلتلج لاتأسفين
بس منتي هينه ها
شلون؟
تسإلين ان كنت بيي ويا الشباب يالنتفه
شدراك؟
قالي وهابو.. عاد بيني وبينج..انفرجت اساريري

(تضحك) انفرجت اساريريك ها
لاتخليني اعيدها ترا قعدت احفظها شهر

فطوم
يس
ميس يو
مي تو

بس بليز ابي تلفونج..تلفوني طافي ومادري وين الشباب

اوكي

كاهو تلفونك يرن
..
اي ادري انا دقيت عليه عشان اسيف رقمج خفت تدلعين وماتعطيني اياه وبصراحه مو كيفج غصبن عليك بكلمج كل يوم سواء تبيني ولا لا
والحين يلا قومي جدامي روحي حق رفيجتج ماله داعي احد يشوف قاعده مع مزيون وبعدين يسيء الظن فيج ولا شي
مزيون
ليش انتي شايفه شي ثاني
لا حشا يلا جاو جاو
جاو يالغاليه

جود وينج؟
اشرب هوت جوكليت بالكوفي شوب شفييج
يالعياره.. تتطنزين وينج
يم اول محل دخلناه

بالسياره
جود:يه وانا بضطر منج الحجي
شتبين تعرفين
كل شي وصولا الى العطر اللي حاطه
اوكي .. كان يقول
يقاطعهم صوت المسج
ترا بغيت اتكن وما ادزلج شي الا عقب جم ساعه.. بس ماكو فايده فيني المهم ان فضيتي عطيني خبر

اولا بدينا مسجات .. بعد
وانتي شفيج يه مستعيله خو نطري اقولج
اقول فاطمه
هلا
عسى دوم
شنو اهو
اني اشوفج جذيه فريش وماكو هموم على قلبج,شبتسوين
بعطي نفسي.. او بعطي نفسنا فرصه نشوف

اوكي.. بس ديريبالج مابي اشوفج منكسره.. او مهمومه.. فاطمه انا اقربلج من اخوانج واعزج وايد صحيح فهد اخوي بس ماعرف قدرج عدل او يمكن مكابرته خلته يفقدج لكن مابي اسمح لاحد يردج للحاله مثل قبل

انشالله

بالليل

ماعدت اخشى من هجر شمس النهار
دامك معي اللي تشوفه يبتعد
ولا همني ليلن نوا يعلن قرب الانكسار
بجنبك يحلالي اشوفه للنهايه يستعد

تكتب ابيات وتمسحها وتعدل بغيرها وتضيف لغيرها كلمات
غريبه
لما تحس بوحده تكتب عن احساسها باقوى الكلمات ويكون بامكانها تكتب حتى عن حب ماعاشته.. او شوق ما ارتوى.. او حب مانفذ
لكن .. لما تكون احاسيسها مختلطه.. تكون سعيده.. ماتقدر تترجم هالمشاعر بقصيده او بيت شعر

الو
مسا الورد فاطمه
مسا النور هلا والله
شلونج؟
بخير
انت شخبارك
الحمدلله
مشغوله؟

لا ابد توني بتصل
عياره محاتيه رصيدج
يوز عني انا فواتير
عيل لو ادري ناطر
خلاص راحت عليك.. سولفلي وين رحت وشسويت
الله يسلمج رحت بيت يدي وتالي ديوانيه الاهل وسوالف وعشى وشفت يهال ماكنت ادري بوجودهم
الله يهداك بعد غايب سنتين ماتدري عنهم

مرو ساعات
وظل حسين يقول كل شي وماينسى اي تفصيل
فطوم يلا نماز تايم صلي ونامي غثيتينا بهالسوالف الي ماتخلص
(ونماز لغير المتحديث بالهجه العيميه المتفرعه من اللغه الفارسيه فهي تعني الصلاه)
انا غثيتك ماجنك مبطلي الرادو بل ماتسكت حتى لون هدوم دكاترتك بالكليه قلتهم
يلا لاتطولين حجي خنصلي وننام
تصبح على خير
فاطمه
هلا
ثانكس جد حبيت كل شي صار بهاليوم
مي تو, سويت دريمز باي حسين
باي عيونه انتي

صلت .. بس مانامت كانت تبتسم واهيا تذكر كل كلمه او كل موقف قاله لها
غريبه بيوم وليله تشوف كل شي بطريقه مختلفه
بس مابي اتفائل وايد
ليش ما اتفائل؟
نشوف شيصير؟

يصيحها صوت التلفون
بونجور
اهلا بونجورين شلونك
صح النوم يلا وين النشاط والحيويه
الله يهداك امس نايمه عال 6 مقومني 11 تبي نشاط وحيويه
6؟ شمقعدج؟
مادري مانمت علطول
فكرتي بشنو؟
وايد اشيا
فاطمه فكري بالاشيا الحلوة
فكري بالاشيا اللي تبينها تصير
مو تفكرين باشيا سلبيه
واو اشيا ماتبين تمرين فيها

ان شاء الله .. شنو بتسوي اليوم

والله مادري.. عطيني اقتراحات.. بس من هالاقتراحات اني اشوفج

ولليه ضروري يعني؟

نعم؟؟ شنو ولليه.. خلاص يبا مابي اشوفج زين .. بسألج سؤال
تفضل؟
شنو اللي فكرتي فيه؟ بتعطينا فرصه؟
نستاهل هالفرصه

النهايه

Sunday 22 June 2008

احـــ 6 ـــنا..واهم!





خلال هالاسبوعين
شافت فاطمه ان للدنيا مفتاح
لكن هالمفتاح يبطل ابواب وايد
عليها تختار اي باب تبي
وتمشي فيه
تعرف شنو حقوقها وشنو واجباتها
وتحمل مسئوليه اختياراتها

من الاشيا اللي سوتها انها انهت كل شي ويا فهد
صعب
بس الحياة وياه اصعب
وبدونه..بتجربها الحين بدونه
تبدا حياة ييديده
صاله القبول والتسجيل

جود:شحطيتي الرغبات
مادري
بخاطري اداريه
مفكره باجتماعيه
وهم احب ادب انجليزي

في:اولااا
يبا روحي تربيه عطله شطولها

لا حرام بالي مو طويل على الناس التلاميذ شذنبهم برمضان ان ماشربت قهوتي
انتي شحطيتي جود

طبعا اداريه احس هالكليه صارت جزء من العادات والتقاليد
يلا فطوم معانا انا وفي

لولوة وين؟
لولوة قدمت بزنس بامريكا

اوكي
CBA is the way to go


مبروك القبول
الله يبارك فيك
شدعوة صرتي جامعيه ونفستي
فهد بليز باركتلي وخلاص عن اذنك
انا الغلطان.. انتي انسانه لاتطاق
You're free now
الف الحمدلله
باي فهد
انا غلطت والله غلطت اللي جم مره اتناجر ويا امي عشانج..شكثر قالتي احنا وين واهم وين
انتي جليله اصل ماقدرتي اللي بينا خليتيني عشان اسباب سخيفه
اقول فهد
خير؟
جاو جاو
يصير خير فاطمه.. اني وي باخذ بريك من الديره باللي فيها عطوج خبر اني بدرس بره
Mmm .. not interested
كلام ييديد فطيم..باي




بنص السمستر
في:
بقولكم خبر

جود:سلمي بالاول
جود بعدين اسلم
سألوني شنو الخبر

فاطمه:اي جود شصار على الهوموورك
والله مادري فطيم نسأل الدكتور عن السؤال اللي متوهقين فيه
في:خلصتو يالمليقين؟
سألونيييي

هلا شنو الخبر
انخطبت
وترمي جود بباقه اسئله
شنو؟
منو خاطبج

من متى ليش ماقلتي
مو انا بنت عمج

بسم الله
توه امي دقت علي قالتلي الناس بيوون بعد 3 ايام

بفضول شديد من جود:منو الناس
Guess whoفي:

عبدالوهاب
بل فطوم,معلوم انتي اذكانا
توقعت

جود:في انتي شكان بينج وبينه

ماكو شي والله كله مسنجر ومرات مسجات
بس اصلا ماقالي عن هالخطوة
انا اللي عرفته ان خلص كل شي بباريس وبيرجع
بس اهو مسويلي سبرايز يعني

تحبينه؟
اي فاطمه.. احس جد غير فيني وايد اشيا
شلون عرفتي؟
قبل كانت اهتماماتي محدوده..ما اقرا الا الابراج ,ما ادل الا السوق,ما اعرف الا اخر كولكشن حق المصمم الفلاني
بس اهو خلاني اعرف ان الدنيا فيها سياسه فيها علم فيها شي اسمه ثقافه
مادري
حبيته طريقته اللي غيرني فيها
ماحسسني باللي ناقصني
بس عطاني اللي يكملني


نايس فيون
ثانكس جود
شرايج فاطمه
ربي يتمم على خير
اهو كان مبين عليه خوش واحد
رجعو كلهم؟

مادري

فاطمه :سأليه ان كان حسين معاهم

حسين رفيجهم؟
اي في

قامو يسمونه الرشيق
ليش؟ يموتون عالطنازة

لا من صج,داش نادي وصاير ظعيف شفت مره صورة جماعيه لهم وكان شكله غييير بس كله مبرطم بالصور
اها good for him

فاطمه
هلا جود
ولهتي عليه؟
شدعوة عرفته شهر مامداني اعرفه عدل عشان اوله عليه, وبعدين ماله داعي هالسؤال
انا كل اللي صار قبل مسحته خلاص بما فيهم اخوج
جود:
فهد خوش واحد
عيبه لسانه وعصبيته وان متسرع بالحكم مرات
بس جد كان يحبج
وعلى فكره كله يحاول يسال عنج لما يدق

تسأل عنه العافيه
واني وي
شالمستقبل اللي بيجمعني فيه؟
قبل ماكانت اشوف هالفرق
بس الحين لازم اشوفه

اي فرق..فاطمه الله يهداج هالسوالف مو لنا
مو قصدي العوايل
عيل؟
المذهب

تدرين, انا ماعرفت هالفروقات الوايد الا بالجامعه
مي تو
كنت ادري بالاختلاف
بس بالكليه عرفت شلون يكون
الخلاف

قبل كنت اشوف ان فهد يفصلني عنه شارع يفصل قلبي عن نبضه
الحين
هالشارع صار اصله وفصله مثل مايقول
صار مذهبه
الشارع صار دنيا بحد ذاتها

حسبت ان قرب عوايلنا من بعض
يدي وحبه لفهد
ابوي وصداقته لابوج
بتكسر كل هالاشيا
لكن ماعرفت
ان هالاشيا تكسرنا
تطحنا
بس ماعمرنا بنقدر نوقف بويها
الا ان فقدنا اشيا ثانيه..جايز تكون اهم منا ومنها

وبعدين
انا فكرت ان يمكن يتغير
يمكن على الاقل يتغير معاي
بس كل ماله ويقط حجي اكبر
يعاملني كاني اكسسوار يحبه ,يمل منه,بس مو لغيره

بلويه حفله في
والتسوق المستمر
فاطمه تنادي :جوود
هلا
انت مو جود
يمكن اخلي اسمي جواد اذا بخاطرج
الحمدلله على السلامه

الله يسلمج
شلونج فاتو
زينه
قالولي ظعفان:)


اي شفتي النيو لوك..كلها يومين اكل من طباخ ام حسين وارد لحالتي الطبيعيه

حسين شلونك
زين الحمدلله
ممم عن اذنج
بتم بالديره
ماتوقع

يتبع

Thursday 19 June 2008

احـــ 5 ـــنا..واهم!

راح تكون معاي؟
جاوبني
راح تسامحني ان خطيت
بتعتذرلي ان غلطت؟
بتكون يمي لو شنو صار؟
قولي

فاطمه,الساعه 4 الفير شفيج حلمانه بشنو داقه هالحزة
مو حلمانه بشي
جاوبني يلا

انشالله محد بيزعل الثاني

مو هذا الجواب اللي ابيه

عيل شنو تبين

انت المفروض تعرف
كمل نومك
باي

فطامي شفيج؟
ماكو شي لولوة
متى بنروح نستلم الشهاده؟
مادري جود بتدق نشوف شسالفه

في وينها

تقول بتروح تفرغ الكردت

امي تقول طولنا وايد
واصلا ابوي يقول خلوهم يطرشولكم الشهايد لما تردون

بيه شدعوة ماينطرون اسبوع

اهيا تعد الثواني شفيج
وترد لولوة:
يامعوده على الاقل في احد مهتم

الله وكيلج بس يدتي داقه علي واهم دقو اول ماوصلت بس

(هاي شلونج فاتو,اليوم ترا غداكم معانا وباجي الطالبات هني..الا صج,انتي وينج مختفيه )

حزة الغدى..
عبدالوهاب:متى تستلمون الشهاده؟
في:وهاب ماسمعت سؤالك,متى بترتاحون منا ؟

عبدالوهاب:بيه في شدعوة
عادي كلها يومين ونرتاح حاسبينها احنا
بس شصار عالشهاده لانج يومين مو حاضره
حسين بتردد:
دزيتلج مسج الصبح,كنتي نايمه؟
لا بس كنت لاهيه شوي
عطيني ايميلج
ليش
ليش؟ يعني علقولتهم عشان نكون على اتصال..اذا ماتبين عادي اسف عالسؤال
لا عادي حسين الحين ادزلك اياه مسج

ظعفان
صج؟
اي شسالفتك
ماكو سالفه يه..الواحد لازم يصير رشيق وانيق
اها عدل عدل

راح اشتاقلج
مي تو
لا
انا اقصد راح اشتاقلج
الصمت في حرم الجمال..جمال

تسمع لكاظم
واسمع جاكسون بعد
ماتيوز حسين
لا مايوز
تهمسلها جود:
فاطمه شفيج؟ فهد يقول البنت مادري شسالفتها داقه علي الفير
ماكو شي بس كنت تعبانه شوي
بس هذا اللي قالج
اي
اها ..قود:)
بالمطار
ديري بالج
وتروحين وتردين بالسلامه
الله يسلمك
تو الناس باقيلنا ساعه

عندي ..عندي شوي شغل

اوكي
ماني رايح شغلي

لاتروح
وليش ماقلتيلي لاتروح من الاول

كل واحد له اولوياته
انتي اولوياتي
مادري وين البنات
فاطمه
هلا
انتي اولوياتي
راح افقدج وايد
وباريس اللي عشت فيها اخر هالسنين
شفتها بطريقه ثانيه وانتي معاي
تدرين
اول مره اصدق الناس لما يقولون هالمدينه رومانسيه
بس هالشي يعتمد على الكومباني
ومابي اوعدج باشيا
او حتى اجبرج على شي

بس ابيج تفكرين
حتى لو اسبوع
راضي
وان وافقتي اكون جزء من حياتج
ابي تدزيلي ايميل انج وصلتي
وان ماوافقتي
بتمين احلى ذكرى لي واتشرف ان كان لي بعض من وقتج

حسين

ادري ماتدرين شبتقولين
انا يمكن كان المفروض اقولج هالكلام من قبل

لكن ان ماقلته الحين
ماراح القى فرصه اقوله بوقت ثاني
انا عارف تربيتج
وبالبدايه مانكر
رغم اني انا عايش هني
الا اني ماكنت احب ان البنات يسافرون بروحهم..يمكن انا موديلي قديم..بس انتي اثبتي ان كل شي ممكن يتغير ان كنتي طرف فيه..
بس راح اشتاقلج
يكفيني اني اشم عطرج بهالشوارع
او اني اشوف لحظاتنا بالزوايا والمقاهي

يكفيني منج هالشي
لكن
الانسان طماع..طماع بوقت اكثر ..طماع بدنيا احلى ..وماينلام

تناديها جود
يلا فطوم
كاني الحين ايي

لاتنسين
ماراح انسى

Take care
I will,bye
باي حسون

بمطار الكويت

الحمدلله على السلامه
يما لاتسافرين مره ثانيه والله فقدتج حتى ابوج يتضايق لما يدش البيت مايشوفج
يدج ولهان عليج وايد ترا بوديج له بعدين نرجع
الله يسلمج ماما
صج فقدتوني
وايد حبيبتي
اليد:
يه
بنتي بدت تسافر بروحها
هدى..شلون تخلينها مايصير فرضا طلعت من الشقه مو مشطه شعرها ..شبيقولون عنها الباريسيات

ويه عمي لاتطفرني
يدي..دورتلك مره هناك

اي ويسألوني ليش احب هالحفيده..تعرف يدها عدل
فطيم استحي على ويهج
يما شدعوة ترا غشمره

واهم طالعين من البيت
فهد بره يسولف مع رفيجه
يطالعها
يبتسم
ويكمل السوالف
واهيا
تعودت..فمانطرت منه مسج يتحمدلها بالسلامه..او ان يجاملها ويقول ميس يو

طول الطريج تفكر
وغير تفكيرها بالطياره

انا يمكن مشوشه حاليا
يمكن مزاج فهد يخليني ادور احد ثاني
يمكن انا استاهل احد ثاني
حسين مافيه شي
بس انا شدراني مافيه شي
الانسان يقدر يمثل شهر
مو صعبه
ليش بيمثل
ليش لا

بصراحه
فقدته..
وبصراحه اكثر
مادري شنو ابي

انا توني صغيره
يمكن المفروض الحين ااجل هالاشيا لبعدين
كافي تجربه وحده وماعرفت انا شنو مكاني فيها
ليش اضيع نفسي

امي ان درت
ابوي لو عرف بتنكسر صورتي جدامه.. بنته راحت تاخذ دورة..ماراح تدور حبيب
ليش؟فهد مو حبيب؟
غريبه..حسين خلاني اشكك حتى بمكانه فهد

مرو اسبوعين
والايميل ماندز

Saturday 14 June 2008

احـــ 4 ـــنا..واهم!



اقول
هلا
ليش انخطف لونج لما قلت في
عبالج بقول اسمج
ترا اطفرج مو تعصبين

اكرهك حسين

ادري
هاهاها
تصعد الشقه
فيووووووون
شتبين
شقاعده تسوين
افكر فيج وبحبي لج وشلون اوضحلج هالمشاعر

ششش شت اب
وهاب


وي فز قلبي من الاسم
شفيه

ثقلي ثقلي
تصرخ جود


ويه شتبين كملي فطيم شفيه
He has some feelings for you

ماينلام

لولوة باستهزاء
اخاف صج ماينلام ماجنج بغيتي تحذفين عمرج من الدريشه

لولوة..شت اب يو تو

شدراج ؟

حسين قالي توة

وهاب قايل حق البطه عشان تقوليلي

لاتقولين بطه مسكين مافيه شي

اي صح مافيه شي بعيونج

وترد فاطمه:
لحظه خل ابتسم ابتسامه حيا واحراج
يرن تلفون جود
الو هلاا فهيدان

الغرفه كلها سايلنت
فهد داق على جود
والانظار اتجهت لفاطمه

تكسر هالصمت :
بروح اخذلي شور وانام
فهد بيسلم عليج
الله يسلمه
تصبحون على خير
الصبح...
فطوم
ها..خلوني انام

شوبنج تايم

نوم تايم
طلعوووو رووحوو خلصو كردت اهاليكم وردو
خلوني اناااام


تطفرها في
اسمع حسين صوتها واهيا تزف

اي حسين
فجأه تقوم وتكح عشان الصوت يتعدل

لولوة باستهزاء
انا بفهم
اهيا قالت حسين
معناته تلفون
يعني مايحتاي تعدلين شعرج
وبعدين ويت يعني مبين البنت تستعبط
تبينها من الله

باستعباط تقولهم لولوة:
شفيكم شفيييكم متعطشييين للحب
يايين ناخذ دورة احنا


يايين حق شنو ياعيوني
وتكمل في
انتي يايه مفتكه من سليمان وحنته وديانته الزايده

انا يايه عشان اتسوق

جود مادري ليش يايه بس اهي مع الخيل ياشقرا

وفاطمه
يايه عشان تجرب تكون مستقله..

لا وسط هي هي هي
تحذف في المخده على فاطمه
اقول فطوم كملي نومتج بلا القطات اللي مالها طعم

بعد ساعتين
تقوم فاطمه
تلبس تريننج
وتمشي بشوارع باريس
تمسك تلفونها

بونجور
ميس يو
زينه الحمدلله
لا طلعو يتسوقون انا قاعده اتمشى بروحي
بس الجو روعه
فهد شنو الحل
شوف وانا بقاره وانت بقاره حنون وتسأل
بس لما اكون معاك بالديره
جاف معاي..ادري يوسف قبل فتره سوالك مشاكل
بس مايمنع تسأل
على الاقل ان ماتبيني لاتسأل موليه بس مو تسأل وتقطع وتعلقني

فهد:
اوهوو
وانتي هالباريسيات ماعلموج تقللين هالحنه

اوكي فهد عن اذنك

بقولج شي

اح..
لاتقول
باي


تيااا
بسم الله الرحمن الرحيم
حسين من وين طلعت
الله يهداك خرعتني


شلونج بابا
شفيج تتمشين بروحج مسويتلي فيديو كليب

مافيني شي
البنات راحو السوق

وانت شيايبك هني
ماعندك دوام

لا طبعا ماعندي احنا بالصيف شفيج

وليش مارديت الديره

ارد؟
حق شنو
يضحك
او السؤال الاهم
حق منو

حق اهلك
ايه يا فاطمه..خليني ساكت بس
وين تبين تعزميني اليوم
وليش اعزمك
امس انا عزمتج على هوت جوكليت كسرتي الميزانيه
دورج
اوكي يلا اعزمك

يوصل لفاطمه مسج: سوري بس انتي تدرين فيني لازم اخرب كلشي ..بس حبيت اقول ميس يو اكثر..ديريبالج على نفسج لايخطفونج..تدرين باريس ماعندهم هالجمال العربي بس لاتكثرين كرواسون لاتمتنين ونبتلش فيج

تتردد
ترد عليه ولا لا

يقاطع حسين هالتساؤلات
يلا يبا يعنى

شنو يعت توها 1 مو متريق
ايي قولي اني بطه
لا قولي اني متين
لا خلاص
ليش خاشتها بقلبج
اني بطيني وامشي واكل

اوكي انت بطه
انزين يلا ان ماخليتج دبلي بظرف شهر

وي سمالله علي
وي عشتو

يلا مسويتلي فيها اتيكيت وانتي بالديره مقزرتها بدر البدور
شنو هذا بعد

اعلمج بعدين

بعد الغدا..
في مول قريب
تبين نروح

اي
ولا اقولك
لا

شفيج؟
ممم
ماكو شي برد الشقه
باي

تعالي خل اوصلج

لا حسين
برجع بروحي
عادي
باي


Tuesday 10 June 2008

احـــ 3 ـــنا..واهم!






غالبا كل شي تغير ..لازم كلشي يتغير
حتى المدرسه حسب شروط اخوها لازم تتغير
معناته بيئه ييديده
زماله ييديده
ودراسه مختلفه

من متى كانو ياخذون رايي بشي
حتى حياتي ماياخذون رايي فيها
احب مدرستي
صح فيها ناس سخيفين
بس احبها
فهد قاعد تسمعني


اي..

شفيك,بشنو لاهي

ممم .. ولا شي انا اكلمج بعدين
تنتهي المكالمه
و

يرن التلفون

فطوم احنا الحين ياييلج

كانت في اللي تتكلم ,اهيا وجود اخت فهد بيزورونها

اول ماتدخل في
مصيبه ماتسوى عليج لسته ترا شدعوة كلها هذره ماكو شي صج كاني كلي انوثه قلبوني ريال لاني لبست نيديه يومين حدهم جيييب ترا موضه هذي
جود تقولها سكتي

فاطمه..ترا يوسف كلم فهد
كلم فهد
شقال ومتى..بشنو تكلمو


مادري,قاله وخر عنها ومن هالحجي

وفهد موعارف يوخر
بليز فاطمه مابي اخوي ينطق او يصير فيه شي تدرين اخوج هوايته النجره لاتكلمينه اوكي
اذا تبين اي شي كلميني انا اقوله

ما اكلمه
اوكي

قبل لاتنام
توخر الستاره عن الدريشه
تشوف غرفته
منورة
وفجأه ليت قوي
فهد يطفرها بالليزر اللي عنده

شلون بخلي جود توصله ان اهو توأمي
الشخص اللي يكملني بدون مايسترخص اي كلمه..اي احساس
او على الاقل كان جذيه
شلون توصله ان مايصير يصيرلي شي وما اقوله

تسكر الستاره
وفهد للحين يطفرها بالليزر
لين مل
وسكره
كان الدموع نطرته يمل وتسابقت على خدها
منها من يجرح الخد بقوته
ومنها من يطفي للخافق حرقته
ومنها
من يزيد النار
ومنها
من الحال احتار


المفروض الحين تتغير بس شلون
بالبدايه
كانت متضطره تأخر طلعتها للمدرسه
ان صادفت فهد
ممنوع تصبح عليه
وبالمدرسه
تروح المكتبه بالبريك
او
تقعد بالكلاس
لين خلصت السنه

واخر مفاجأه ان ابوها شرالهم بيت واثثه

وكلها ايام وتنتقل
تلم يدها وتبوس راسه وايده
باباتي والله مابي اروح هناك
انا هني والبيت دايما فاضي بس القاك..اقعد وياك
هناك شسوي اناجر الخدم يعني

تمسك جنطه اللابتوب وتحطها بالسياره
فهد واقف بره
تبي تودعه
فكرت بالف كلمه
تقوله باي؟
مايصير اقوله باي .. اقوله اشوفه بعدين..متى البعدين
ولا اقوله .. خل اتكلم واللي يطلع يطلع

ف..

تفاجأها هدى
فاطمه
ترا ماصارت جنطه لابتوب
يه حطيها بالسياره لانتأخر

ان شاء الله ماما
وتركب السياره

جايز نظر هالعين محدود بمكان
بس عيون قلبي تبقى دايم تحرسك
وان انكتب و ضاع حبنا عن مينا الامان
لك دموع تضوي بعادنا, اجعلها يافهد منارتك

حتى الزياراه لمنزل الجد ماجادت لها بشوفه فهد
ماتجرأت تكتبله ايميل
ومابادر وكتبلها

تخرجو
وكانت في فكره ببالها
في:اقص ايدي ان امج رضت
جود: ترا كلها شهرين مو اكثر
فاطمه: بقولها ونشوف:..

هدى: فطوم وهالدورة شبتفيدج فيه

يما هالدوره بنفعني وبخاطري اتعلم فرنسي

بس انتي خذيتي فرنسي

يما ومادري شلون عديتها
بس شهرين مو اكثر
عفيا
يما
تكفين

ماكو سفر وين قاعدين تسافرين بروحج

فاطمه تدري شلون تقنع امها

يما تدرين شيوخه بتروح
هدى:بنت ام سليمان؟

ايي
وحتى وجود وفي بيروحون


ايي
عيل زين اكلم ابوج
طبعا ام فاطمه ماتبي باجر ام سليمان ولا ام فهد يتكلمون عن دورة بناتهم
الا واهي مشاركه بالموضوع

حسمت السفره

انا مانسيت فهد
بس كل شي لهاني
زين يعني مايصير اقط عمري عليه
اهو ماسأل
اهو ماحس
يعني انا شناقصني بالله
اكيد مايبي يضايق اهلي

ممم
ولو
المفروض يتطمن علي
اوه
بس مليت تفكير مليت الومه واعذره

بالمطار
تشوفه
قاعد بستاربكس
تستغل انشغال الكل وتروحله

هاي
هلا
شلونك
زين
قالولك بسافر ويا في و..
يقاطعها
اي ادري تفلسف بنات
مم اوكي
باي
باي

شفيه
شهالنفسيه
انا الغلطانه اوكي


سفرتها بروحها كانت مغامره بحد ذاتها
مافكرت بيوم من الايام ان امها بتخليها تسافر بروحها
مو هذي نفس الام اللي عطيتني طراق على ورقه
صج دنيا

يوصلون
يلمسهم هوا باريس
جد لو بيدي
احطه بعلبه وارده معاي الكويت

في:قزريها دورات
يضحكون البنات

حطو اغراضهم بالشقه
وراحو تمشو حتى مارتاحو
جد واو
فاطمه اللي يسمعج يقول مو يايه باريس
يايه .. بس امي ماخلتني اشم ريحه هواها..غثتني بهوا سيفورا
ماتتعب من السوق امي ماتتعب

جود:منو يتعب

كل يوم مغرب يروحون البنات كوفي شوب قريب من الشقه
وفي قروب كويتيين طلبه ماقصرو معاهم

بتروحون؟
مالنا خلق نبي نقعد بالشقه
انا مابي اقعد واللي تبي اييبلها شي تدق

تنزل فاطمه الكوفي شوب
تمسك النوت
تدرس
وتطالع الشارع والناس
يوصلها كوب هوت جوكليت ماطلبته
تقولها الويترس ان في زبون مقدمه لها
منو
تاشرلها عليه

اهو طالب بفرنسا اسمه حسين
اييلها
هاي فاتو
هلا حسين اغا
يقولها بكلمج بموضوع
كان متردد
وشوي يقول الكلمه ويسوي ديسكاونت عليها
شفيك تكلم
اهيا ببالها زين حصلتلي معجب

يقتل تفكيرها
في .. في مرتبطه

تقول ببالها
بل عليج فطوم كليتي الريال واهو المسكين يبي رفيجتج وانتي طاحت عيونج وانتي ترمشين يعني مستحيه

تقوله: حسين مادري شجاوبك يعني ان كان قصدك انها مخطوبه او تحب لا
يقولها ثانكس
تقوله ها خلاص بتشيل الكوب

يضحك
لا بالعافيه
او
pon a petite

صج مفجوعه..هالكثر حاسه بفراغ عاطفي


in Paris..it's all about couples




بس ترا ماسألت عشاني ..ويخلص حسين جملته بسرعه


تضحك بخبث


عشان منوو


عشان وهاب صاحبي ..تعرفينه الابيضاني اللي يدل كل زاويه هني


اي عرفته

يتبع

Wednesday 4 June 2008

احـــ 2 ـــنا..واهم!


مراهقه صعبه
بين ام تبي طفلتها او بالاحرى بنتها تصير امرأ مجتمع
وبين بنت ماتدري شنو تبي
وبين اب يتوقع الكثير ولا يتواجد بتلك الكثره
وصديق غالبا بعيد
هالشي يتكرر لكل مراهق او لاغلبهم!
لكن كل شخص بهالمرحله يحس اهو الوحيد

بالبيت فاطمه عليها تلتزم قوانين الصوت المناسب واللباس المناسب
وان للاخ هيبه حتى لو كان طوله شبرين

بالمدرسه مفهوم الزماله اختلط مع الصداقه
يمكن لعدم وجود هالمفاهيم او معناهم الصحيح بين غالب الطلبه
ورغبه من هدى ان ماتكون اقل من غنيمه بشي
ففاطمه دخلت مدرسه اجنبيه
المشكله قربها من فهد
صده لها احيانا
مساعدتها له بالدراسه
واكتئابها لما توصل هالمعلومات حق امها
لين انتشرت اللسته
هاللسته كانت تطلع كل سنه
مجهوله المصدر
على هيئه ايميلات او اوراق تنطبع وتنحط على الادراج
جايز فيها معلومات صحيحه
ولكن اغلبها تأليف مجرد كلام او اشاعات
من هاللسته
احمد وجنى.. كل شخص يخون الثاني والمصيبه يدري عن الثاني
ساره ومحمد.. مادري شتبي بهالجيكره ..وعلى فكره امها مو بنت اصل
فهد وفاطمه..لاتخلوني ابدي بسندريلا.. انتي اهلج يدرون عن سوالفج
في..خل ابوج يهد الوزاره ويشوف بنته اللي صارت فيصل عندنا
فاطمه
وقفت عند هالجمله اللي فيها اسمها
اي سوالف؟!؟

فهد قريت اللسته ؟
يضحك:اي,فطيم شنو سوالفج شدعوة ماتعلمينا
فهد انت عارف ان وصلت هالورقه حق اهلي شبيصير
فطوم ترا كلها حجي وحده تلاقينها سحته مو لاقيه احد يعطيها ويه بعدين كاهي كتبت عن في بنت عمي انها انحرفت عن الطريق السوي(ويضحك ) و مافيها الا الخير

بس فهد احنا غير
احنا الكلمه تأثر فينا
ليش فاطمه, واحنا فري كويت يعني بناتنا عادي ييبون طاريهم..شنو يعني احنا غير
ماقصدت , بس انا اهلي يتأثرون بالكلمه
اهلج ماعندهم سالفه

توصل البيت تدخل من باب المطبخ
وتصعد دارها
خافت ان احد يكون قاري اللسته
رغم انها اليوم توزعت بالمدرسه
خايفه ان يوسف اخوها يوصله ايميل عنها
او احد من عيال عمها
خوفها مو لانها مسويه شي
لكن لان اللسته اهي ذنب برقبتها عند اهلها

تداوم اليوم الثاني

واليوم الثالث يستقبلها يوسف
بطراق
شفيك
انا اللي شفيني
الشرهه على امج
مو عليج

هدى:شهالصراخ

يوسف:تعالي شوفي بنتج وسوالف بنتج
مو تبين تصيرين مثل غنيمه وربعها
مو تبين بنتج تصير مثل بنات النواخذ اللي خابتنا فيهم
كاهي بنتج الحين الكل يدري انها لازقه بفهد جنها مو شايفه ريال من قبل
اي لان ماشافت ريال يمسكها

هدى:استح على ويهك يدك وابوك مو رياييل كفو بنظرك
انا اتفاهم وياها

طبعا التفاهم ماكان اقل من تفاهم يوسف
لكن الغريبه
ان اول طراق يعور
لكن الباجي
ابد

انا شسويت يمه
وانا شدراني شسويتي فضحتينا باجر خوالج يتشمتون
وانا شيفكني من لسان ابوج

يسمع اليد الصيحه
يدي والله ماسويت شي

كبرت وصارت 15 سنه
لكن يدها يشوفها بنت 5 سنين
ويرفض احد يمسها
بنتي مانطقت ولا بتنطق وبشوف اللي يمد ايده عليها بعد

هدى:بس يا عمي انت ماتدري

اليد:ولا انتي تدرين
انا يويسف الخبل قالي واصلا اهو مايدري شسالفه وانتي فوق جهل ولدج تحاسبينها

يكلمها بهدوء..بحنان

يبا
شسالفه
ليش حاطين اسمج مع فهيدان وكاتبين سندريلا
وشسالفه عيال الناس اللي كاتبين عنهم

بابا, هذي ورقه وحده تكتبها كل سنه
وتطلع فيها حجي عن البنات اللي بالمدرسه
والحجي غالبا مو صج
عارف يابنيتي مو صج لكن الواحد شنو عليه يسوي..يوخر عن كل اللي يسبب هالاشاعات
انتي كبرتي يافاطمه وماعدتي ذيج الياهل اللي ماتحاسب لين قعدت مع فهد بالحديقه
وانا لين وخرتج عن امج هالمطفوقه
ولا عن اخوج اللي يصبح بويه ابليس
باجر منو بيوخرج عنهم لين رحت

واهم ماوثقو ببنتهم وصدقو قرطاس!
يتبع