Saturday 31 May 2008

احـــ 1 ـــنا..واهم!






يصلح جدها برواز لوحتها
فهي رغم عدم المامها بابجديات اللون وهندسه الفرشاه
الا انها تمثل اعظم فنانه عند جدها العزيز
فتسمع الصوت الساحر
الذي كان يستقطب قلوب الاطفال وجيوب ابائهم
برييد
برييد
فتسرع الى حصالتها
تقلبها
وتحاول ادخال اناملها
فيسارع جدها باعطائها ربع دينار ورقي
ثروة لها فتركض مسرعه
وتصرخ امها من بعيد
فاطمه لاتفشلينا لبسي جوتي قبل لاتروحين
لكن فاطمه تلبس صندل ابيها فتجره
يعيقها
تخلعه وتركض
يكون هناك واقفا
فهد
فهووود شوف بابا عود عطاني ربع يكفي حقي وحقك
يقول
ويه مسكيينه انا امي عطتني دينار
وينهرها
البنات مايصعدون عالتاير
انا انقيلج برد وخلي الربع حق الفرع بعدين

فترجع الى بيتها بعد وجبتها البارده

والتي يسهل على الجميع معرفه ماختارها لها فهد من البرد من الوانه على فستانها
فتنهرها امها مره اخرى
حافيه وهدومج وصخه شتبين الجيران يقولون
طفله هيا لكنها تحاسب كناضجه بعيني والدتها
ولاتهتم

بابا عود ترا ماشريت بربعك فهود شرالي
فيضحك بابا عود
لان فهود هذا حفيد صديقه العزيز المرحوم فهد والذي كان والده عبدالرحمن من نواخذ الكويت المشهورين
وكان ابو عيسى جدها لفاطمه ابنا لعبدالله بحار عند النوخذه عبدالرحمن

بسج لعب مع فهد كبرتي
فتجاوب على امها
ماما للحين انا هالطول
ماكبرت
انتي قلتي لما توصلين حق يده الباب تصيرين كبيره


يتبع

!

Tuesday 13 May 2008

ربي يرحمك ويغفرلك ابونا سعد!









عظم الله اجر الكويت


ربي يرحمه ويغفرله


بسم الله الرحمن الرحيم


الحمدلله رب العالمين,الرحمن الرحيم,مالك يوم الدين,اياك نعبد واياك نستعين,اهدنا السراط المستقيم,سراط الذين انعمت عليهم,غير المغضوب عليهم,ولا الضالين


صدق الله العلي العظيم


Saturday 10 May 2008

is she ME?-1- (A Story)




excellent sara ,well done

قالها الدكتور لما جاوبت على سؤال بالكلاس

ليش ماقمت افرح بهالكلام

قبل كنت احس اني ملكت الدنيا لما احد يمدح شغلي

دراستي

او طبعي

الحين

ابد!

wait ساره

هل هذا اللي تبينه

هذي الدنيا اللي تبين تعيشينها لين ربج ياخذ امانته؟

انتي شنو تحبين؟

تذكري

(كلمات اقولها لنفسي بعد كل شي يصير لي)

وانا صغيره

خل اذكر شنو كنت احب

مممم ..ادري اني ماكنت احب يعاملوني كياهل او يحملوني مسئوليه كبار

اني وي

كنت احب... العب باربي ,

واليهال يتروالي يحبون يطبقون احلامهم على العابهم

كانت باربيتي غالبا مديره بنك او مصممه ازياء

الحين انا شنو؟

ادرس هندسه

wait a minute..am i in the right place

ابطل عيني على صوت رفيجتي:

ساره .. وين وصلتي بيه خلصت المحاضره وانتي بعالم ثاني

ابتسم.. كاني قريبه ماوخرت بعيد

اشيل ملفي وامشي بالكليه

اوكي انا احب الدراسه

بس هل انا احب اكون مهندسه؟

اقعد بالكافيتيريا

اضيع بسوالف البنات

سبحان الله كل شخصيه مختلفه عن غيرها

يتروالي حتى الشخصيات اللي لهم مليون نقطه تشابه

تلقى نقطه اختلاف وحده تفرق بينهم

يسألوني: سوير..بالذمه شفتي نفنوف نانسي بهلا فبراير من صجها اموت واعرف ليش الشريطه السوده

والثانيه: انتي خلي الشريطه...ماشفتي فاطمه شلابسه بالكلاس ..مهوله بعمرها منو يلبس وردي ببنفسجي الحين

وانا ارد : تهقون مع كل هالاصوات اللي ماتبي النواب, خصوصا ربع الفرعيات وجماعه الرشاوي..اخرتها بيوصلون صح..

-ليش ماقمتي ياساره تتكلمين مثل باجي البنات..مو حزه تفلسف-

يطالعوني: ويه احنا شكو,

تنط لي وحده:

انا لو مقيده جان عطيت هيثم واي حده كيوت

اطالعها , ابتسم, بيني وبينكم ضحكت بداخلي حيل

والثانيه تساسرني

شفتي شيخه,تراها تشتري اصوات لولد عمها...وتقول مستعده توصل المبلغ لي البيت,ماعندج احد بدائرتهم

قلتلها: لا

يوصلني مسج من الغاليه:يما شتبين اسويلج غدا

نخلص دوام

وارجع البيت

وانا بالسياره

القى نفسي بدوامه الاسأله

ساره ليش صايره تافهه, ليش تبين سياره حلوة,ليش ماتحبين الناس يشوفونج بنفس اللبس مرتين , ليش هاميينج الناس

هل انتي من زمان جذيه؟

لا ساره ماكنتي جذيه

كنتي جدا قنوعه..بس شاللي غيرج؟

شاللي فقدتيه وخلاج تدورين على توافه لاتسمن ولا تغني من جوع

ابطل الرادو

ينساب صوت رويشد:وينك,ماوحشتك عيني وحنيت

وينه ياساره

وش يبي بعيونج

راحت عليج:)

مادري شلون لقيت نفسي سافطه ببيتنا

سبحان الله.لما الواحد يتعود على روتين على كلام على طريج معين يسوويه ومايحس بعمره

ضيعت 10 دقايق بعمري وانا اكلم نفسي

هل فعلا انا ضيعت 10 دقايق

او اني عشت 10 دقايق بعد ماضيعت سنين

ليش ماقمت اعرف نفسي؟

ماقمت اعرف اتعامل مع نفسي؟


ضعت بحروف الاسئله

ياترا سهل الجواب؟

بين الحكي والامثله

اقسي على نفسي بالحساب



يتبع

يمكن الموضوع غريب

لكن ساره فيها شي مني

وابي اعرف علاجه

Friday 2 May 2008

ثقيل طينه




لين وصفت حالك والظروف

صرت اناني الطبع وثقيل طينه

ماهو بطبعك تشتكي من اللي تشوف

لكن تحسبه الحبيب اللي يحاتيك وتعينه

صارت همومك ثرى

وحرقه قليبك دلع

والاه مالها قلب يستمع

***
ماقلنالك من الاول تجنبها حسوف

خل همك لك.. غيرك يستهينه

خلك قلبك لك.. لاتبيعه بالوف

وحلو المشاعر ختامها جروح.. حزينه

وتتساءل حينها وش جرى!

وينكسر خاطرك من ما سمع

وحرقه قليبك

!يحسبها دلع

***

يوم رتبت الهموم واخفيتها بين الرفوف

عشان توفر لخاطره السكينه

وحملت شوقك اللي كان يثقل هالكتوف

صرت بعينه تمثل كسره النفس اللعينه

وهو بجرحك مابرى

ولا اهتز لصرخه وجع

وحرقه قليبك

يحسبها دلع!
______________________
دعواتكم
توني سويت جراحه لورمه بحلجي
العوار بدا يطلع لان البنج بدا يخف