Wednesday 30 July 2008

دايسه 180..زقرت مو؟

كافي


يتروالي مافيني احد عنده شي اهم من نفسه او اخوه او اخته او امه او ابوه

قبل يوم وصلني خبر عن وفاة احد الشباب بسبب حادث
وهالشاب وحيد امه يعني بظرف دقايق امه انكسرت احلامها
بظرف دقايق الشاب صار بدون مستقبل
وبهالدقايق انتقل الى مكان اخر في امان الله


المشكله ان شنو
ان الدوس صاير فخر للشباب والبنات بعد
ماتقعد بمكان الا وتسمع فلان شاخط 140 ولا علان حياته كلها تبتون بالسيايير
ولا بنت مستانسه انها بغت تسوي حادث (بس) الله حماها .. يعني وناستها ان الله حماها نست انها بغت تروح وبغت تخلي شخص ثاني او ثالث يمكن يروحون


من الوفيات اللي سمعت فيها


-شاب طالع من بيتهم بعمر الزهور للحين ماشاف خير الدنيا من شرها رايح يشتري لامه كيكه بمناسبه عيدميلادها
لا الشاب شرا كيكه
ولا اهو رد حق امه
والام من سنين للحين تشوف صورته وساكته

-بنت توها بتصير عروس..رايحه تشتري جهازها عمرها ماصار 20 ترد لاهلها ميته ليش؟ الام للحين ماشافت بنتها بفستانها الابيض ولا الريال عاش عمر وياها وبنو عايله
-بنت معروف عنها الاخلاق وبر الوالدين تنقلب بجيب على البحر ليش؟ لان شاب مع احترامي حمار كان يتحرش فيها واذاها بالطريج وراحت البنت من اهلها والابو عينه مازالت تدمع بصمت على بنت احسن تربيتها وماشافها تعرس ولا شاف احفاده
-شاب طالع مع ربعه قروب سياكل ومرته بالبيت يدقون عليها المستشفى تعالي..البنت تروح تتمنى ان مافيه شي او ان مجرد اجراء روتيني ..تشوفه والشرشف مليان دم ومغطي عيونه .. البنت حاليا عمرها 45 وللحين تمسك صورته
-شاب توه خاطب ونفس الشي بسيكل رايح بسيكل للنادي.. العمه تدق على اهل الخطيبه ولدنا توفى بحادث والبنت توها شاريتلها نفنوف ملجه لا اهي لبسته ولا امه شافت ولدها يصير معرس

ترا هالقصص غيض من فيض
مو مهم منو اللي دايس
مو مهم
الموت حق وجايز يزور الشخص بكل الحالات ..نايم مريض يسوق بالدوام صايم فاطر مصلي مسمي بديسكو اي مكان واي ظرف
لكن مانكون احنا وسيلته


اللي يدوس مايدري ان وراه ام تنطر.. او زوجه ولهانه عليه..او اخو معتمد عليه.. او ابو يشوف فيه الدنيا..او اخت تستند عليه؟
مايدري ان وراه دنيا للحين ماعاشها وان الشارع مايقدر يتحكم فيه ومايقدر الا ان يدير باله ويسوق عدل
ماهمه كل هذا ماعليه

مايدري ان بالشارع غيره يهتم
ريال راد من دوامه حق عايلته ولهان عليهم
بنت توها خالصه امتحانها بترجع تطمن اهلها
شاب رايح المسيد
او عروس رايحه الصاله
او معرس امس زافينه



ان كانت حياتك مو مهمه كيفك!
بس حياة الناس ماتقدر تعاملها نفس الشي


ماظنتي ان في شي بالدنيا اهم من صحه الشخص وسلامته
ولا ظنتي ان احنا واايد واثقين من اعمالنا وصلاتنا وصيامنا اللي مستعيلين لهدالرجه على الحساب والقبر
يتروالي كلنا مقصرين


اتقو الله بانفسكم واهلكم
واتقو الله بغيركم!





لاتقطعون قلب مثل هالابو!



Tuesday 22 July 2008

الوطن زادت جراحه!




خلنا نبدي بكل صراحه
البلد زادت جراحه
اللي يطعن بالرموز
واللي نسى شنو يعني يجوز
وتغنى باللي مايجوز
والذيول اللي ودها
برضى روس عفنه تفوز

شافوالبلد كيكه كبيره
كلمن يطمع بنصيبه
مافكر بشقى ابوه وجده
وشيطانه مافكر يصده
وادعى ان الحاجه تحده
والبلد صارت نار
والله يعل النار تحرق كلمن
نوى على الكويت يمد يده

وشهي حاجه يامواطن
وانت بارض الخير ساكن
جنب الباب سافط البورش
وحمام سباحه بوسط الحوش
ومنت مقصر بالرتوش
ومن مطعم لقهوه لسينما
حيل تملي هالكروش


اللي طلع بلا دليل
واللي بمرض البوق عليل
واحنا مالنا الا الشكاوي
هذا باوروبا من انفلونزا يداوي
وهذا قول بلا فعل للجذب هاوي
ونقول خير ديرتنا لبره
ردو الديره نظيفه والله ملينا رجاوي

لكويتنا الماضي كلا فينا الحنين
اللي حماها دم بيت القرين
يوم كلمن عارف وطنه ودينه
وتفاخرنا بوجود احدث مدينه
ياللي حاط الكويت بنص عينه
وينك .. ارضك عيت تناديك
بيدك حطم اطماع لعينه