Monday, 31 December 2007

2008 wake up!




كل عام وانتو بالف خير

Happy New Year


الحمدلله على كل شي صار بالسنين اللي طافو وكل طراق بتعلومه

واخرها اطيبها

Sunday, 23 December 2007

اعترافاتي!




اعترف


اني احب الشتا عشان المطر




اعترف




اني احب اشوف المطر يضيع بين طيات البحر




ينزل من الغيوم قاسي




ينصدم باقسى منه




هذا حالنا جميعا!




اعترف




اني احيانا ماحب اسمع الحقيقه ان كانت بتلسعني!




اعترف




اني احيانا استغرب من التغيرات اللي غزتني..واعترف اني استمتع لما يتفاجأ غيري ..بتغيراتي!




اعترف




اني احب صوت اليسا




واني ما اذكر جم مره عدت اغنيه (اواخر الشتا) ومازلت اعيدها




اعترف




اني احب اقعد بالسرير ساعه عقب ما اقوم من النوم..ارتاح من النوم نفسه




ان بدا يصعب علي اكتب بيتين شعر ..يصعب علي اترجم نفسي




ان ماعاد يهمني عدد المسد كولز او المسجات




اعترف




ان الاعداد..التواريخ..الاسعار..الاصدقاء..التنافس..اهيا وسائل احنا خلقناها..وخليناها تتحكم فينا ..وتقيمنا..ونتعب من هالتقييم وايد!









اعترف




اني مليت من الدراسه اللي كنت اعشقها واعشق التعب فيها




واني ماجست ولا كتاب بالايام اللي طافو




واني عشت العيد بكل مايحمله من ضحكات !









ايضا,




اعترف..اني بديت اعشق الانتظار




واني استخدم حساسيه عيوني عذر عشان ابعد الوالد عن التدخين اللي يزوره احيانا!









اعترف




اني حبيت اعتراف رويشد لما قال




اعترفلك..انتي اول حب




وانتي اخر حب




انتي اول حب وانتي اخر حب عشته في حياته!




حبيت الاحساس




ان اهو مازال على قيد الحياة




لكنه حكم بانتهائها لمجرد فراق..محبوبته!




وبهالمناسبه اعترف ان




life DOES depend on someONE









اعترف




اني shopaholic




وفي منتصف طريقي للمعافاة!









اعترف




اني بحتفظ بباجي اعترافاتي لنفسي




:)

Saturday, 8 December 2007

احرف السم..والعسل


بونسوار جميعا..


من زمان ماكتبت عن الاشيا اللي تخصني ويشترك فيها غيري جايز:)


احنا كبشر ننقسم الى نوعين

ذكر وانثى

ولكل نوع طبيعته..تصرفاته..نقاط قوة ونقاط ضعف

بل ان بالنوع نفسه تختلف الافراد بكل شي




انا مثل غيري

عندي عيوب

وعيوبي ماهي قليله !

عندي عيوب مثل العصبيه,سرعه الحكم على الاشيا والناس


عندي عيب غريب الللي اهو اني اخذ اول انطباع عن الناس

واكبر عيوبي الحساسيه!




احنا بشر

جايز نضايق غيرنا بحجي

احنا مانشوفه يضايق

وجايز نتضايق من نفس الكلمه ان انقالت لنا!


طريقه القاء الكلام مهمه


الشخص اللي قال الكلام اكثر اهميه من الكلام نفسه!




مشكلتي بسرعه اعز الناس

ما حب سالفه اني طيبه ومسكينه وهالخبه لا

يعني من يمر وقت على معرفتي باي شخص او شخصه:P

بسرعه اعزهم واسأل عنهم وتصير لهم مكانه لاتتزحزح بسهوله


تختلف عشرتنا مع الناس

في ناس نعاشرهم سنين ومايعرفونا عدل

في ناس باسبوع يعرفون احنا شنو بالضبط

وفي ناس..باختصار مايهمهم الا تعاملك وياهم لين يخلص شغلهم او مصلحتهم






نرجع حق عيبي

اللي اهو الحساسيه

قبل كذا سنه
كنت اكل قهر واسكت!

يعني محد يعرف مني اني متضايقه او فرحانه

بس عشان فلانه ولا علانه لايتضايقون


الحين


ماكو لا فلانه ولا علانه


لأن الناس اللي احاتي زعلهم او مصلحتهم تبين انهم كانو بالكويتي مقزرينها!


بالنسبه لي

كان شي حلو اني اتعرض لخيانه الصداقه

للبيع بزهد

ولكل انواع الالم


لأني بنيت نفسي

وعطيت نفسي حقها

وقمت اقول ابي هالشي وما ابي هالشي



باختصار


قمت اتكلم!


وحساسيتي زادت!


اكره الكلمات العدوانيه


اكره احد يقولي طاف!


اكره كلمه بالطقاق!


اكره واكره واكره لما اكون اتكلم ينقالي:انتهى الموضوع


وجد ماحب كلمه خلاص!




جايز ماكنت اوصل هالاحاسيس للشخص الي جدامي

او ماكنت اعرف شلون اوصلهم


في ناس

مايتقبلون منك انك تحط حدود لنفسك في المواضيع

وفي ناس يحترمون فيك هالشغله

في ناس

حتى لو بينتلهم ستعش مره يردون ويتكلمون بالمواضيع اللي انت ماتحب تتكلم فيها




المشكله

ان الكلام عندي

مو ينقال والسلام

المشكله اني اقعد اقولب الكلام لاني قادره انام ولاني قادره اطوف

وبس:)

Friday, 7 December 2007

happy late birthday


بلوقي اتم السنه و6 ايام من عمره

حبيت البلوق

حبيت اني اكتب كل شي



اكثر شي حبيته

اني اكتب كل شي ببالي

بدون اي مقاطعه

عالم البلوقرز ممتع من امتع عوالم النت

مثل الجرايد

في اخبار

كاركتير

قصص

اشعار

مقابلات

تحليل

ونقد

وصور حلوة

ولقطات





ثانكس لكل من مر بيوم عالبلوق وخذا من وقته لو ثواني

ثانكس لكل من كلف على نفسه ورد علي

والف شكر لكل بلوق استفدت منه





Monday, 26 November 2007

بثــينه



لجل رضاك قدمتلك ماي عيني
اخذته وارضيت بالماي عينه

تقول ماعاد احساسك يبيني
لكنك بحاجه بكل فتره تجينا

تقول حبه اعاد الدنيا فيني
اجل شسمه اللي كان بينا؟

تقول هذا نصيبي..اعذريني
لين كلامك ماتشوف عيوني حزينه

انا مليت وذابت باسبابك سنيني
روح اشرب من هواه ومن حنينه

وبابي بسكره لاتفكر تجيني
لما تعرف الفرق بين طفله وبثينه!


*بثينه:معشوقه جميل
شاعر من شعراء العرب
ومثل باجي قصص الحب ماخذا بثينه وتزوجت غيره مجبوره!

Tuesday, 13 November 2007

he was a friend!


كان مثل الوساده
تريحني
تشيل الدمع من خدي
تسندي..

كان ملجأي
كان يمثل كل معاني الصداقه بالنسبه لي بدون حتى ما اشوف شكله
عرفته من سنين
وبصراحه
كان قبي wrong way!

يرسم الضحكه باي ويه
ماكو شي صعب عليه
ان كان الشخص واصله نفسيته لين تحت القاع
يصعدها اخر سما
بشوش
ومايبي يخلي احد حواليه يعيش بحزن
كنت كل ما اكلمه
يسردلي يومه بالتفصل
وكان كل مايسالني شلون كان يومي
كنت اقول ان يومي ماكتمل لأني ماكلمتك..اهو متى اكتمل يومي وانت معاي!
كان بحر ياكل بهمي
بمشاكلي
عمره ماشكا
كان يقولي مشتاقلج
كنت ارد
مشتاقتله!
كان يقولي ذكرتج وانا بالمكان الفلاني
كنت ارد
انا اذكره بكل مكان

يقمت كل شي بقلبه
ماقالي انك مو كفو
ماقالي فكري بغيره
قالي ربي يسعدج مثل مانورتي حياتي
كنت اقوله
اهو نور حياتي
مايرد بشي غير ربي يهديه لج

لما تعرضت لخيانتك
كان يهديني
يبررلي وضعك
يقول جايز
ويمكن
ماستغل الفرصه
وحاول يبعدني عنك
لأني مثل ماكنت دقه قلبه
كنت لي دقه قلبي
!

رديت لك
وانا اذوق المر
يوم عن يوم
الهم يزيد
مانكر اني عشت معاك
ساعات حلوة
لكن عشت سنين كدر
ماكو شي خلاني اتمسك بالدنيا غير خوفه علي

ولما كنت اهددك اني اكلمه عليك
كنت تقولي انتي قلبج انخلق لي
انا لو اخونج بدال المره الف
مردج بتسامحيني

ابلع الكلمه واسكت
لأنك وقتها
كنت صاج بحرف حرف
عودتني عليك
لين نسيت شلون تكون الدنيا بدونك

حلفتني امسحه من المسنجر
قلتلك حاضر
دورت زله عليه
والمشكله
الموضوع طول
لأن هالانسان بدون زلات

حسيت اني انكسرت
لما مسحته عن حياتي
لأني كنت عارفه شعوره
كان شعوره مثل شعوري
كأن احد اخذك مني غصب

صرت اشكي لنفسي
وادعي على نفسي
وادعيلك..
تقاطعني بالشهور
تقول شغل
وانا بين لحظه ولحظه قلبي يموت

كان مثل البلسم
بعز الهم والانكسار
دزلي ايميل ان تخرج
وبيدش الجيش اختصاص
عشان بس.. يشغل نفسه عني
ودعالي بالتوفيق
وقالي بالحرف ام بدر مو تعرسين من ورانا
بغشمره !
اول مره احس بطعنه
كأن قلبي وانا بكامل وعيي انقص نصين
وانداس
لكن مو اهو اللي داسه
كلامه اللي يخصنا
داس قلبي!

4 سنين
وانا بين الحياة والموت
وانت موج
يوم فرعون.. ويوم مقموت

وبهالسنين مادري وين ارضك..ووين سماك
جربت نص انواع البنات
ويوم عرفت معدني زين
او جايز عرفت طوله البال اللي فيني
رديت؟

بعد سنين فرقا
يفاجئني سؤالك بالتلفون

تتزوجيني؟
ربي خلق فيك جرأة باختصار..قويه
وتضحكلي بخبث كأنك عارف الجواب

عقب فتره


وانا بفرح لويه العرس
واستعداداتي to be a wife
يوصلني مسج غريب
انتي تسوينها وترضين بغيري؟!؟

احتفظت بالرد
لأني مخطوبه واعتبرت نفسي على ذمة ريا ل


لكن هالرد كان ودي يوصله:

اللي كان لي اقرب صديق
شفاني منك
ورد لعيوني البريق








Friday, 2 November 2007

احلى صدفه.. مُره!



شفته
وجوده زين المول كله
مثل ما زين حياتي من 8 سنين

ابتسامته مثلها
غروره نفس الغرور
والقعده نفسها ماتغيرت
احلى ..ايه
وجايز مبين ناضج اكثر
لكن يضل الغالي غالي
وغلاته يوم عن يوم تزيد

تذكرت كل شي صار بينا او تكلمنا عنه بخصوص هالمكان
واخر ذكرياتي كانت بلحظتها صورته واهو ماسك الاسبرسو

سألت البنات شنو يبون
رحت
وعقب ماطلب لهم طلبت لنفسي ماكياتو .. بيبر كب بليز.. ولما استلمته قلت حق الموظف can I have a sleeve
اسمع صوت حلو
صوت صمت لجله عن باجي الاصوات
صوت عشته لجله 4سنين بنفس روتيني معاه رغم اني بدونه
صوت مابغيت التفت واتأكد من صاحبه عشان لا يكون احد ثاني

يقول:
علمناج عال سليف يا بنت الناس
وانا بدون ما التفت

من متى تشرب منتجات امريكا مو هذي حليفه اسرائيل
يضحك

وللحين انا مابي التفت
لأني ان التفت
وكان وراي
راح تكون هذي اقرب مسافه بينا
من اول يوم عرفته فيه
يقول

شدعوة ماتلفين ويهج الحين يقولون الناس يتحرش فيها
قاطعني صوت رنه موبايلي
وانا بداخلي اقول انت كله ساكت حبكت الحين
ماشفت من داق كنت منشغله بالتفكير اني التفت او لا

خليت العقل off شوي
تعبت من عقلي وسوالفه
عقلي بعدني عنه قبل
عقلي شغلني فيه واهو بعيد
وعقلي الحين بيحرمني من شوفته واهو خطوتين وراي
التفت
شفته
ماكنت ادري شبقول
كنت احاتي شكلي
اعدل الشيله
اعدل مسكه الجنطه
يقولي شلونج فلانه

اقول تمام
وانت
يقول بخير

وسكتنا

ماقدرت اطالعه اكثر
رغم ان شوفته كانت حلمي بهالسنين اللي طافو
لأني حزتها شفته مرتين
وصدفه
وكل مره بسنه
وكان بعيد
بعيد مكانه
وبعيد عقله

احساس غريب
اني كنت اتمنى وادعي يصير هالشي
ولما يصير
ماعرف اشوفه
اطالع رفيجاتي
يشوفوني..

وكل وحده الف علامه استفهام
يخافون اني اضعف جدامه
مايدرون ان اهو قوتي
واهو ضعفي

يدرون
لكن يتجاهلون

يقولي
شلون الكليه
اقوله تمام
وانت توظفت
يقول اي الحمدلله
يطالعني
يقول
كبرتي
اقوله
انت بعد


مقاطعه ثانيه
لكن هالمره من واحد من ستاف ستار بكس
يقولي ان الطلب خلص
امسك الصينيه يقرب
خليني امسكها عنج
اقوله مو حلوة جدام ربعك
يقول مو حلوة جدام نفسي اخلي مرتي تشيل الصينيه
اطالعه
يقول سوري ترا كنت متعود اسميج ام الغالي

قلتله عادي مسكت الصينيه
ومشيت باسرع ماعندي
واهو واقف هناك
قعدت
محد كلمني من البنات
مايدرون شيقولون
رغم ان بالخمس دقايق اللي طافو كان بينهم اجتماع واصل صوته لي عندي وانا كنت هناك

وحده منهم عقب 10 دقايق صمت
تقولي شيبي هذا الحين
ماسمعت السؤال
جان اقولها احبه
تقول الثانيه:ندري

اهو بطاولته
ربعه يكلمونه
واهو ماسك الكوب ويطالعني
انا اطالعه شوي
وتالي انزل راسي
والف ويهي امسح دمعاتي
لين ماقدرت امسكهم خلاص
مسكت جنطتي
ومفتاحي
وقمت
ماسمعت صوت البنات يسألني شفيني
وصلت سيارتي
ابي ابطلها نسيت شلون امسك الريموت
اسمع صوته
فلانه شفيج!
اقوله ولا شي
يقول زين خليني اشوفج
اقوله شبتشوف؟
يسكت
يقول
ميس يو
اقوله

جذاب
واركب السياره وابجي
يطق الجام
انزلها..يقول ذكري الله
انا لو ادري بتسوين بعمرج جذيه جان ماقمت و..
قاطعته
جان ماقمت وكلمتني


وانا للحين عايشه بنفس العيشه من 4 سنين
واستثقلت الكلمتين اللي توه منيتهم علي
اسوي نفس الروتين
4 سنين انام وانا اذكرك اقوم وانا اذكرك
بطريج الجامعه ببالي
بالمحاضره تلهيني
بالطلعات تدورك عيوني
ادش نفس الويبسايتس اللي تكلمنا عنهم
اشتري نفس المجلات اللي يبنا طاريهم
اذكر كل كلمه
كل حرف
كل اغنيه
كل موقف
وانت تقول لو تدري

صج يافلان لو تدري
ياقو قلبك يافلان


وانا بالطريج
شغلت الاغنيه اللي شاغلتني هاليومين

Friday, 19 October 2007

من هون..و هونيك!


هالاعلان صورته بثاني يوم عيد

ابوي مسكين بس قرا اول جمله

وعباله واحد من اليهال ضايع

لما قرا ثاني جمله

قال

بابا زيدو عياديكم جان يوقف السياره ويقولنا دورو كائن يناقز

متنا ضحك

عسى لقو فهد








شغل ايدي

بس مو لذيذ لاني حطيته بالفرن وايد

ثاني فشل بالمطبخ












شنو مكتوب على جنب يم الورقه مالت قسمي








مستشفى الميانين!

نو كومنت!








صورة من الامارات

من محلات هارفي نيكلز على ما اذكر

يشوق مو

ترا ناااعم!

واهم شي فندي


























Saturday, 13 October 2007

عايشه


ابي اغير اسم اللي احبه

حد خذا اسمه بوفيات الجريده



صحيح اسمه متميز مثل قلبه

لكن بالدنيا كثير اسماء جديده



عمره ماساوى حد بوده

ولا وجهه شابه هالوجوه العديده



تخنقني الفين الا مليون عبره

لما يكون الغلا بارض بعيده



يبوني اقول راحت روحه لربه

والروح كاهي قدامكم غرقانه وحيده



رمضان شهر الكرم والمحبه

مابخل علي باخبار ماهي بسعيده



دام الموت جاع وخروه عنه

خذوني بداله, ماطمع باعمار مديده



خذ دمي مابيه لجله روح وده

تحت الثرى حبيبي بارد وريده



شلون قلبي طاوعه يدوم نبضه

والقبر من فتره ناوي على حبي يصيده



شوفو القهر اسمي عايشه وماني بقده

واللي اختاره خافقي عاش بحروف القصيده



ابيه صحه ومرض وابي بالموت قربه

واخبار الجرايد ترا ماهي بالدوم سديده!







الابيات حقيقيه

وكتبتها عن تجربه حديثه جدا مع المرض والموت اللي خطف شاب من حضن امه وقلب حبيبته عايشه

يريت تقرون الفاتحه لما تقرونها

Friday, 12 October 2007

21




happy birthday to me





2 years 1

Saturday, 6 October 2007

اف



ليه دايم نصيبي

اني ادور عليك


اني اتشره من نفسي

لما اتعنا واجيك


اني امشي بدون هدف

وانتظر منة صدف

ليش دايم تفرض شروطك .. لما انا اقولك ابيك


والله مانكر احتياجي

يوم اعلن ابتعادي

لكني احلف وغلاتك

اني دايم انوي ارحل.. قبل لاتكرهني فيك


العناد ماهو جديد

والجفا مو شي بعيد

ولين فاض الشوق فيني

مايسعفني غير حظ سعيد

خل على صوب المكابر

واعتبر اني باجر مسافر

ابسألك يا كل هلي

ماوحشتك؟

.. يابعد كل خاطر وخاطر

Monday, 17 September 2007

SwaleF..



الجزء الاول..دعايه واعلان!

جرايد

كنفاني..كنافه على كيفك اذا هذا اللي بالدعايه له علاقه بالكنافه من قريب او بعيد ..انا اعتزلت عالم الكنافه مانبي!

الخباز

كالعاده يمي يمي صج في حلو على تمر وعلى قمردين وانا ماحب هالشيين لكن الصور تشوق

نيثنز,بوباي,برجر كنج,بيتزا هت

نموت يوع احسن

تلفزيون


سوق السالميه

..ممم يعني من قبل الدعايه مو بالعتهسوو جزء اول لاعت جبدي
الجزء الثاني خلاه بلوك وديليتيعني بفهم منو وضحلهم سالفه ان الدعايه حازت على اعجاب الجمهور؟

الصيداوي...

جد ليش يسوون جذيهضيقه خلق


فيمتو
مممم بما اني ماحبه
فمن بعد الدعايه وايد راح يحوشهم نفس احساسي


زين

(mtc)
خوش دعايه


بالنسبه للدعايه والاعلان في شباب اثنين كانو ينزلون صفحتين بخصوص هالموضوع بمجله ابواب ثم الديره هالشركات ليش ماتستفيد من خبره هالشباب

توصلي فوروردات عجيبه عن طرق الدعايه والاعلان بدول بره

نحتاج نشوف اشيا حلوة!



الجزء الثاني..

تلفزيووون

انا ادمان تلفزيون

لكن عكس الناس..يخف ادماني برمضان

الاشيا اللي حبيتها برمضان
طبعا :فريج

وعند العياييز كل شي يايز
شاب صغير بالعمر سوا هالكارتون الحلو
الاماراتيين سباقين بكل شي الله يوفقهم


ولا كلمه

برنامج محمد طاحون على قناة فنون
وايد حلو ويونس

شفت نص حلقه من الخراز
عجبني لكن نسيت متى يحطونه


فوازير حليمه.. احب حليمه
لكن ماحبيت برنامجها..مولايق عليها رغم ان مبين تعبت فيه


درويش
جنه خوش مسلسل لحد الحين
وداود احسن شي سواه ان وخر عن الكوميديا الماصخه
وبس


ماكو شي حزه الفطور ماكو شي حلو

بعد الفطور ماكو شي حلو

قبل الفطور اسوأ واسوأ

شنو تشوفون برمضان؟



الجزء الثالث..

سوق
اول شي

السياقه ذوق يعني انا قبل رمضان وصيت بالبلوق والتزمت بتوصياتي لكن للأسف الشديد الكل مستعيل بالشارع بغيت اموت بعز شبابي اليوم



الحين

السوق والله خوش جاكيتات شفت اليوم صحيح شتانا مو شتى برد موت لكن شريتلي كذا جاكيت اشترو من الحين ترا حزة الشتى ابد ما تلقون شي


جاري البحث عن كسوة العيدوالنتائج مازالت غير مطمئنه بتاتا



الجزء الاخير..

بناءا على توصيات بديت اقرا مقالات الاستاذ الوشيحي بجريده الراي

ابداع

نصيحه تابعوه



مزاجي صاير اغاني مختلطه قمت اعلق على

استكثرك.. عبدالمجيد عبدالله

سواها قلبي..اصاله معني كنت اكره الاغنيه

هيبه ملك..بصوت انغام

when you're gone..avril

my heart will go on..celine dion

big girls don't cry..fergie

don't wanna miss a thing..aero smith



مود غريب!

Thursday, 13 September 2007

مبارك عليكم الشهر


كل عام وانتو بخير جميعا
وعساكم من عواد هالشهر الفضيل
ربي يتقبل صيامنا
الله يحفظكم وتعيشون هالشهر بكل الخير
واهم شي
الابتسامه
كل الناس صيام
شفيها ان بتون عليك واحد بالطريج
شفيها ان لف قبلك
شفيها ان ماطق اشاره
كبر نفسك بعينهم
تتقرب من ربك اكثر واكثر
تقبل الله طاعتكم

Wednesday, 5 September 2007

Make ..O V E R


gonna be 21 Soon..
ابي اتغير
خلال هالسنه مريت بوايد تغييرات
غالبها على الصعيد الاجتماعي والعاطفي
والشكلي غالبا
لكن ابي اكثر
احس اني كبرت
احس اني صرت 21 من زماان
احس ااني مريت بتجارب ال 21 ليما 29 من فتره مو طويله
التاريخ مو مهم
ترتيب الارقام مايرتب العقل
ابي اتغير
مو تغيير شامل
لكن تغيير ملحوظ داخليا وخارجيا
ابي اغير بشكلي اكثر
واغير بتعاملي اكثر
ابي اسوي انجاز لنفسي خصوصا بكل شهر
نفس صور ال calender


كل صورة مختلفه باللون..
بالتصميم..
بالوقت..
وبالاحساس..
any ideas..?

Saturday, 25 August 2007

Going To..



Dubai
بعد 4 ساعات ونص

Monday, 20 August 2007

حــوارها معاي!



تقول..

كان يرددلي :

تصور لو خلت هالديره من غيري ولا اعود..

بغرور يكررها ,بغرور!

يلعب بكلماتها

يلعب باعصابي

من بعده حاولت اتجب هالاغنيه

جايز كنت ابي اتجنب ذكراه..او اتجنب شعور انهزامي من شوقي له

من عدم مقدرتي على نسيانه بعد مرور كل هالسنين,

جايز تزوج..جايز عنده طفل او اكثر,

"شو بدي بالبلاد..الله يخلي الولاد"


كررتلي هالمقطع وانا ابصم انها كررته بنفس العدد اللي كررلها مقطع تصور,

تقول:

تدرين شنو اصعب من انج ماتشوفينه

ماتشبعين نظرج..ماتروين ظمأج


قلت: شنو؟

تقول:

انج تشوفينه ومايعرفج..


تكمل..

جايز عرفني وتجاهلني,

لكني اقنع نفسي ان ماشافني بزحمه هالبشر

تدرين ويك اند

تدرين..

قبل كنت اشوف قصتنا بكل اغنيه

كنت اعيش تجربتنا بأجمل قصايد الشعر

شبعني رويشد

نومني على راشد

وصحاني بنوال

ولما يكون فرحان

يغنيلي..تصدق ولا احلفلك عجزت بلساني اوصفلك,نعيم الحب..نعيم العمر؟!؟

بجت..

فلانه نسيت الكلمه!


انا استغربت!تبجي من كلمه من وسط اغنيه قديمه

قلتلها:كلنا ننسى الكلمات ننسى اسامي الناس ننسى وين سفطنا حتى سياييرنا


قالتلي:اول مره انسى شي نطقت فيه شفايفه

ماعرفت اواسيها..او بشنو اواسيها,

بجت..بجتني معاها..


كملت وقالت:

فراغ ..والله فراغ!

ماقمت احس بأي شي حلو

نجاحي..قرب تخرجي..ولا شي

ماعادت بيوت الشعر تحركني

تدرين يعني شنو ماتحسين بشي؟

تدرين يعني شنو ماتحسين بشي؟

يريت حتى اقدر اقول اني احبه..

مادري شاللي قاعده احس فيه تجاهه..شعور واحد..واحد بداخلي وماقدر افسره ماقدر اتجاهله ولا اقدر اتعايش وياه

اسمه اهو الوحيد اللي يحرك فيني كل شي,

احبه؟

تسألني..

قبل لا اتكلم

تقول: لا الظاهر تعودت اذكر نفسي فيه

اذكر نفسي؟..؟

انا خل انسى بالاول عشان اتذكر!


...

تعدل قعدتها,ترسم ابتسامه شاحبه وتفاجئني:

لقيتي شي بالسوق؟

وتشغل الرادو.. يطلع صوت ديانا حداد..

تسكره بسرعه!

اسألها ليش؟

تقول:كان يطفرني فيها اصلا مادري شكان يحب فيها..اي ماقلتيلي شريتي شي؟

اقولها:لا

تقول: إيه السوق يلوع الجبد

وتضحك بصوت مبحوح

ضحكه..تعور القلب


Saturday, 18 August 2007

غبــــ .. ــــار

دفتري الخاص


الذكريات تضحك

مراهقتي بدايتها اعجاب باللاعب (بشار عبدالله)

وحبي له كبر(لول حبي) لما صدف ان عيدميلاده نفس عيدميلادي


مثل غالب البنات

كان لي دفتر اسرار
دفتري كان فيه مشاعري
ومشاعر غيري

البنات كانو يقولولي فلانه كتبيلي شعر مثلا حبيبي زعلان
ولا حبيبي ولهان
ولا حبيبي مالت عليه
وانا اكتب

الكلمات تضحك والله توني فصلت عليها
بس والله اشيا حلوة
اول صفحه بالنوت اغنيه لديانا حداد
من غبت عيني ماتنام
وان غبت جافني الكلام
وان غبت صارت كل جروحي
شمعه ذوبها الغرام

اخيه حلوة الاغنيه مو..
الصفحات التاليه فلم
كنت كل اسبوع اروح بيت خالي يقرون
ويقولون وااي شحلاته
شدعوة !
كان ايامها البنات هابين بالمريخي بس ليش مادري
فديت بشار عبدالله انا;p


وبعدين هبيت بمجله اليقظه
قمت اكتب فيها باسم مستعار

(شفافيه الروح)
ونشرولي شعر عنونو بالوطن
محد كان يدري
واول مره اتكلم بالموضوع
للأسف ماتذكر متى بديت اكتب هالدفتر
لكن انا اتذكر ان حياتي بدت بسنه 99

فجايز بدايتي كانت 98-99
واتذكر اني رحت مزرعه رفيجتي وخذيت من هناك ورده وحطيتها بالنوت
طبعا ماله داعي اقول اني قطيت الورده عقب ماتلفتني وللحين كل ما ابطل النوت يطيحون اشياء صغار

كنت اكتب بكل وقت
اخذ النوت كل مكان
وحتى ابلات العربي استانسو علي لأن اجوبتي حتى بالامتحانات كانت اغلبها بقافيه

احب الشعر
احب العب بالحروف
احب اخلي الكتابه كأنها موسيقى تعزفها المشاعر
ورقه طاحت من النوت
تاريخها مو بعيد
حبيت اكتب اللي فيها...

تعرض علي الهوى كنه بضاعة

ياجاهل الحب ترا ضيم وملاعيب

كلامك ارفض بكلي سماعه

ماعاد الهوى يشتري بناسه الطيب

تشوهت المشاعر وصارت شماعه

نعلق عليها الكذب والوفا يعيب

بعد ماكان للحب من الاه مناعه

صار غرقان الهوى محتاج تطبيب

تغيب عن محبوبك دقايق ولا ساعه

شيمنعك دام الوله برجالنا يعيب

ظني ان الحب الصادق اشاعه

والحقيقه مالنا من الصدق نصيب

ياسائل عن درب العشق حذرك تواعى!

تالي خفوقك يمرض وبثانيه يشيب

شفافية الروح... 6 فبراير 2004

صحيح الكلمات متكرر وايد
لكن مادري شاللي خلاني اكتب هذا بذاك الوقت
رابعه ثنوي
والسنه اليايه بدخل سنه رابعه جامعه

...


مقاله كتبتها باليقظه
المضحك المبكي
كنت انقد على يمنى شري
مذيعه المستقبل
وعلى حركاته بهلا فبراير الاول
اخ يا يمنى لو تقرين مقالتي الحين وتشوفين قناتين ولا 3 من التي في
شبتسويين فيني؟

مقاله ثانيه بعدد ثاني
فيها كتبت عن مسلسل خطوات على الجليد
بجيت فيه بجي
بطوله جمال الردهان وفرح علي
وبنفس المقاله تحلطمت على اللي نقدو على قطعه 13


والله ايام




Friday, 17 August 2007

حجي فاضي:)

احاول انظف شموع مليانه غبار


ارتب مجلات

احط ال (بونيز) ملوت ماكدونالدز هابي ميل عالمكتبه

!!!

wait ami

ارتب كتب الجامعه!
شسالفه


الملل خراب والله!

صج ان الوقت الزايد يدمر الانسان ويخلق فيه صفه ماكبر عليها


سنعه صارت مرتبه!


...


صايره blogaholic


كل شوي ادور بلوقات يدد


اللي شفته بعظم البلوقات ينقسم نصين


بلوقات بناتيه: خواطر واشعار وحب ومحبه


بلوقات شبابيه:لاعنين خير الحكومه والمجلس بس للحين ماعرفت منو يكيكي اللي يقصدونه


,


لقيت بلوقات ..لقيت نفسي فيها


حلو ان نلقى ناس يشاركونا بالمشاعر
لكن غريب ان نلقى ناس نحسهم نسخه ثانيه منا
اقضي الساعات وانا اقرا بلوقات اتعرف فيها على نفسي
والقى بنات مختارين نفس الكلمات,نفس الحروف نفس الاسلوب
نفس ستايل البلوق!

wierd ha..
صحيح في بعض منها رجعني كذا سنه قبل
لكن حلو ان نمشي جدام ونحاول نلتفت ورا عشان نتشجع ونتقدم اكر واكثر..
من البلوقات اللي عجبتني..


انا سكره


كله مطقوق

عادل القلاف

فري موا


نيبانو

سنعه ولكن


جاي حليب

كويتيه حساويه ..تحيز;p


na9ir

q8swallow


علي خاجه

بيت القرين

وغيرهم الكثير
...


ببالي كذا فكره ومليون بالاميه مالي خلق اسوي اي وحده فيهم
ودي ارجع صحافه الحائط..شدعوة عليج سنعه حائط,المهم برجعها حق الكليه او قسمي خصوصا
بعد اللي قريته بالبلوقات
شفت باخواني وخواتي طاقات ابداعيه حلوة وشي مميز ان ننشرها بالجامعه

بس استحي اقترح!

...

Thursday, 16 August 2007

تحجيم..للحريه!





جدل يدور بالكويت حول الحريه اللي من المفترض ان الكويتيين يتمتعون فيها
انا مو من نوعي اتحلطم على الديره وايد
لكن بنفس الوقت راضيه جزئيا عن سقف الحريات المتاح حاليا
صحيح محنا ب(الهايد بارك) لكن حالنا افضل جذيه
في اشيا بالدين مثلا حلال لكن ان عملنا فيها جايز نقع بالاثم
مثل الزواج بأربع ومفهوميه العدل
مثل الجهاد واللي تحول لتصفيه حسابات او ارهاب
مو كل حلال تطبيقه ينتج عن حلال
يعني الحلقه الناقصه اهيا كيفيه التطبيق!

....
الدستور كيت والدستور منع كيت والحريه تفرض كيت!
جايز بهالكيت الدستور بكبره يروح! يتغير او حتى يتحول القانون لشريعه الغاب
كمثال بسيط الأحزاب, يراها البعض نوع من انواع الحريات
لكن هالحريه ادت لحروب اهليه بدوله مثل لبنان بغض النظر عن حال لبناني السياسي
وهالاحزاب ادت لتمرد بدون أي نتيجه في دوله مثل مصر
مو كل حريه تنفع!
بوجود هالتكتلات اللي تارسه هالديره واللي تتلون بحسب القضيه والمصلحه الشخصيه للتكتل نفسه الديره بحيص بيص!
مجرد قرار ياخذ جلسات كثيره
روتين حكومي
مسابب بالجلسات
نفاق علني
وقضايا محاكم
هذا واحنا ماتعدينا المليون
الاحزاب راح تقطع الكويت اكثر واكثر
والكل بيدري منو بياخذ اكبر قطعه بهالديره
اهو الحزب الاسلامي
واللي البعض يسمونه المتأسلم
المتلون وغيرها من التسميات
اذا هالحزب نفسه ماسك الحكومه
ماسك المجلس
ماسك الجامعه
تبونه يمسك الديره بكبرها

احمد الله الف مره واشكره ان احنا بدوله اماره وراثيه وهالشي ولا اكبر حزب بيقدر يغيره بإذن قادر كريم
مو كل شي يصلحلنا
احنا نحب نتحلطم
نحب نكثر من كلمه ليش
....
هالشي بالنسبه لي نفس الحريات
وبما ان الكلام كثر حول الجدل الداير حول حريه الكتابه بما معناه حريه التفكير
تسقيف كلمه حريه افضله شخصيا خصوصا بهالحاله!
واهو ما يتعارض مع الدستور بأي شكل من الاشكال
كمثال بسيط
الحريه التي يريدها البعض
حريه الكتابه والخوض بالمعتقدات الدينيه
بما معناه ان في يوم او في اخر اسلامنا مقدساتنا ربنا والعياذ بالله راح يمس من احد الكتاب
وجود الرقابه واجب
الدستور يقول دين الدوله الاسلام
والاسلام يفرض منا حمايته
لذلك تحديد الحريه بما لاتمس الاسلام جائز جدا بل هو واجب !
احترام امير الدوله واجب
احترام العلم واجب
احترام الدستور هم واجب

لما نخلي الحريه بدون تحديد لمعناها مايعني بأي حال من الاحوال تحجيمها
بل الحفاظ عليها من افكار هدامه او اقلام تحاول العبث بالدول بقانونها برموزها والاهم بدينها!

بالنهايه هذا رأي شخصي...