Friday, 2 November 2007

احلى صدفه.. مُره!



شفته
وجوده زين المول كله
مثل ما زين حياتي من 8 سنين

ابتسامته مثلها
غروره نفس الغرور
والقعده نفسها ماتغيرت
احلى ..ايه
وجايز مبين ناضج اكثر
لكن يضل الغالي غالي
وغلاته يوم عن يوم تزيد

تذكرت كل شي صار بينا او تكلمنا عنه بخصوص هالمكان
واخر ذكرياتي كانت بلحظتها صورته واهو ماسك الاسبرسو

سألت البنات شنو يبون
رحت
وعقب ماطلب لهم طلبت لنفسي ماكياتو .. بيبر كب بليز.. ولما استلمته قلت حق الموظف can I have a sleeve
اسمع صوت حلو
صوت صمت لجله عن باجي الاصوات
صوت عشته لجله 4سنين بنفس روتيني معاه رغم اني بدونه
صوت مابغيت التفت واتأكد من صاحبه عشان لا يكون احد ثاني

يقول:
علمناج عال سليف يا بنت الناس
وانا بدون ما التفت

من متى تشرب منتجات امريكا مو هذي حليفه اسرائيل
يضحك

وللحين انا مابي التفت
لأني ان التفت
وكان وراي
راح تكون هذي اقرب مسافه بينا
من اول يوم عرفته فيه
يقول

شدعوة ماتلفين ويهج الحين يقولون الناس يتحرش فيها
قاطعني صوت رنه موبايلي
وانا بداخلي اقول انت كله ساكت حبكت الحين
ماشفت من داق كنت منشغله بالتفكير اني التفت او لا

خليت العقل off شوي
تعبت من عقلي وسوالفه
عقلي بعدني عنه قبل
عقلي شغلني فيه واهو بعيد
وعقلي الحين بيحرمني من شوفته واهو خطوتين وراي
التفت
شفته
ماكنت ادري شبقول
كنت احاتي شكلي
اعدل الشيله
اعدل مسكه الجنطه
يقولي شلونج فلانه

اقول تمام
وانت
يقول بخير

وسكتنا

ماقدرت اطالعه اكثر
رغم ان شوفته كانت حلمي بهالسنين اللي طافو
لأني حزتها شفته مرتين
وصدفه
وكل مره بسنه
وكان بعيد
بعيد مكانه
وبعيد عقله

احساس غريب
اني كنت اتمنى وادعي يصير هالشي
ولما يصير
ماعرف اشوفه
اطالع رفيجاتي
يشوفوني..

وكل وحده الف علامه استفهام
يخافون اني اضعف جدامه
مايدرون ان اهو قوتي
واهو ضعفي

يدرون
لكن يتجاهلون

يقولي
شلون الكليه
اقوله تمام
وانت توظفت
يقول اي الحمدلله
يطالعني
يقول
كبرتي
اقوله
انت بعد


مقاطعه ثانيه
لكن هالمره من واحد من ستاف ستار بكس
يقولي ان الطلب خلص
امسك الصينيه يقرب
خليني امسكها عنج
اقوله مو حلوة جدام ربعك
يقول مو حلوة جدام نفسي اخلي مرتي تشيل الصينيه
اطالعه
يقول سوري ترا كنت متعود اسميج ام الغالي

قلتله عادي مسكت الصينيه
ومشيت باسرع ماعندي
واهو واقف هناك
قعدت
محد كلمني من البنات
مايدرون شيقولون
رغم ان بالخمس دقايق اللي طافو كان بينهم اجتماع واصل صوته لي عندي وانا كنت هناك

وحده منهم عقب 10 دقايق صمت
تقولي شيبي هذا الحين
ماسمعت السؤال
جان اقولها احبه
تقول الثانيه:ندري

اهو بطاولته
ربعه يكلمونه
واهو ماسك الكوب ويطالعني
انا اطالعه شوي
وتالي انزل راسي
والف ويهي امسح دمعاتي
لين ماقدرت امسكهم خلاص
مسكت جنطتي
ومفتاحي
وقمت
ماسمعت صوت البنات يسألني شفيني
وصلت سيارتي
ابي ابطلها نسيت شلون امسك الريموت
اسمع صوته
فلانه شفيج!
اقوله ولا شي
يقول زين خليني اشوفج
اقوله شبتشوف؟
يسكت
يقول
ميس يو
اقوله

جذاب
واركب السياره وابجي
يطق الجام
انزلها..يقول ذكري الله
انا لو ادري بتسوين بعمرج جذيه جان ماقمت و..
قاطعته
جان ماقمت وكلمتني


وانا للحين عايشه بنفس العيشه من 4 سنين
واستثقلت الكلمتين اللي توه منيتهم علي
اسوي نفس الروتين
4 سنين انام وانا اذكرك اقوم وانا اذكرك
بطريج الجامعه ببالي
بالمحاضره تلهيني
بالطلعات تدورك عيوني
ادش نفس الويبسايتس اللي تكلمنا عنهم
اشتري نفس المجلات اللي يبنا طاريهم
اذكر كل كلمه
كل حرف
كل اغنيه
كل موقف
وانت تقول لو تدري

صج يافلان لو تدري
ياقو قلبك يافلان


وانا بالطريج
شغلت الاغنيه اللي شاغلتني هاليومين

30 comments:

Don Juan said...

Sn3a

It's really a heart breaking story , but why torturing yourself ? let it go ( I'm talking as if it's true if it's fictional then it will go to your fictional charachter ) :)

Don Juan

Sn3a said...

don juan
thanx 3al comment

it's fiction
somethings ,some people
can't be let go!

Shather said...

صدق من قال اسال مجرب ولا تسال طبيب
:)
التجارب هذي من تشابه فصولها عندنا تخلينا نعيش نفس الالم و الحزن ..

قوي قلبج يالغاليه ..
واذا بواسيج بكلمه بردد عليج الكلام اللي سمعته من الناس حواليني ..

لي باع انسان في غيره ألف شــرّاي ..
انتي ذهبه و الذهب سعره فيه :)

عالية said...

أصعب اللحظات لما تكون مشتاق لشخص بس وضعك رافضة

وهذي نتيجة التعلق

الله يهون عليج ولاتفكرين وايد فية

Sn3a said...

احب اقول ان هالقصه شخصيتها خياليه
لكن احداثها مرو فيها وايد بنات


الغاليه شذر
التجارب قليله لكن اللي مرو فيها كثار
تتشابه الجروح
وتتشابه الاثار

الف شكر

Sn3a said...

عاليه
عدل كلامج
اصعب شي
كلمه لا
وداخلج يصرخ نعم!


نورتي

ZoZOta said...

وايد

وايد

وايد عجبنى البوست

اكثر مما تتصورين

لا توقفين بليز

Sn3a said...

ZOZOTA

حمدلله ان عجبج اختي
ثانكس وايد على هالكومنت
وان شاء الله ماراح اوقف

5roofa said...

امبي سنعه هذي انتي يعني قصه صجيه؟؟؟

عورتي قلبي والله و بجيتيينيي
ياربييي على الكلمات كلها مشاعر و احساس


صج ابدعتييي

ربي يمسح على قلبج و يصبرج اذا كانت قصتج يالغاليه

salamz sweetee...

Sn3a said...

هلا بسيده الحب والتفائل خروفه هانم
ابلتنا مو قصتي هذي

لكن اهيا احداث جمعتها من قصص بنات سمعتهم والشخصيه الرئيسيه خياليه


نورتي البلوق
وعلى فكره ترا رفيجاتي صارو ادمان بلوقج
لكن مو مسويلهم اكاونت

فريج سعود said...

لاعب بحسبتها الله يغبله
بس اكيد خيالية ؟؟؟
ابي لو مو خيالية جان شكتبتي ؟

kuwaitya_7saweya said...

موقف صعب
افففف وعوار قلب
والاغنيه حدها عجيبه
انتي على راسي لانج تسمعين انغام
صوت الحب

Sn3a said...

فريج سعود

انا كل فتره وفتره اكتب عن قصه مختلفه مو معقوله انا عشتهم كلهم
وصدقني محد يعرف يكتب قصته
صعبه!

نورت خيو

Sn3a said...

كويتيه حساويه

كل المواقف اللي نهايتها طريجين مختلفين صعبه جدا

منو مايسمع لأنغام
ماعنده سالفه!

عاجل said...

اخرج من معطفه الجريدة وعلبة الثقاب

Sn3a said...

عاجل
ودون ان يلاحظ اقترابي
مو
؟

فتى الجبل said...

اللي يبيعج بيعيه

Sn3a said...

فتى الجبل
انا مطبقه هالمثل لاتحاتي

وبيعتي حدها بلاش!

لكن مثل ماقلت
مجرد قصه خياليه


نورت

بيت القرين said...

من أجل الكويت
لتصل الرسالة
مشاركتكم ضرورة
http://beit-elgrain.blogspot.com/2007/11/blog-post_09.html

BeKeFe said...
This comment has been removed by the author.
Najmah said...

اندمجت بالاحداث

وايد عجبتني

تسلمين يالسنعة

Sn3a said...

نجمه

ثانكس حبيبتي
والحمدلله انها اعجبتج


نورتي

5roofa said...

لووول حبيبتي والله مشكوره كلكم ذووق
:D

salamz sweetee...

Sn3a said...

ولو ابلتنا ماقلنا الا الواقع
منورة

ابو شملان said...

نايس

Sn3a said...

بوشملان

مرورك اللي نايس

Fahad Al Askr said...

حبي البوست، وراعيته

Sn3a said...

فهد العسكر
نورتنا
ربي يحيك ويخليك

على فكره في فلم قصير عن فهد العسكر عرضو بنات ببرزنتيشن وايد حلو

Fahad Al Askr said...

ممكن أعرف شلون أتحصل عليه

Sn3a said...

والله ما ادري
خذيت وياهم المقرر من سنتين تقريبا
لكن ان شفتهم بالكليه اسألهم انشالله