تقول..
كان يرددلي :
تصور لو خلت هالديره من غيري ولا اعود..
بغرور يكررها ,بغرور!
يلعب بكلماتها
يلعب باعصابي
من بعده حاولت اتجب هالاغنيه
جايز كنت ابي اتجنب ذكراه..او اتجنب شعور انهزامي من شوقي له
من عدم مقدرتي على نسيانه بعد مرور كل هالسنين,
جايز تزوج..جايز عنده طفل او اكثر,
"شو بدي بالبلاد..الله يخلي الولاد"
كررتلي هالمقطع وانا ابصم انها كررته بنفس العدد اللي كررلها مقطع تصور,
تقول:
تدرين شنو اصعب من انج ماتشوفينه
ماتشبعين نظرج..ماتروين ظمأج
قلت: شنو؟
تقول:
انج تشوفينه ومايعرفج..
تكمل..
جايز عرفني وتجاهلني,
لكني اقنع نفسي ان ماشافني بزحمه هالبشر
تدرين ويك اند
تدرين..
قبل كنت اشوف قصتنا بكل اغنيه
كنت اعيش تجربتنا بأجمل قصايد الشعر
شبعني رويشد
نومني على راشد
وصحاني بنوال
ولما يكون فرحان
يغنيلي..تصدق ولا احلفلك عجزت بلساني اوصفلك,نعيم الحب..نعيم العمر؟!؟
بجت..
فلانه نسيت الكلمه!
انا استغربت!تبجي من كلمه من وسط اغنيه قديمه
قلتلها:كلنا ننسى الكلمات ننسى اسامي الناس ننسى وين سفطنا حتى سياييرنا
قالتلي:اول مره انسى شي نطقت فيه شفايفه
ماعرفت اواسيها..او بشنو اواسيها,
بجت..بجتني معاها..
كملت وقالت:
فراغ ..والله فراغ!
ماقمت احس بأي شي حلو
نجاحي..قرب تخرجي..ولا شي
ماعادت بيوت الشعر تحركني
تدرين يعني شنو ماتحسين بشي؟
تدرين يعني شنو ماتحسين بشي؟
يريت حتى اقدر اقول اني احبه..
مادري شاللي قاعده احس فيه تجاهه..شعور واحد..واحد بداخلي وماقدر افسره ماقدر اتجاهله ولا اقدر اتعايش وياه
اسمه اهو الوحيد اللي يحرك فيني كل شي,
احبه؟
تسألني..
قبل لا اتكلم
تقول: لا الظاهر تعودت اذكر نفسي فيه
اذكر نفسي؟..؟
انا خل انسى بالاول عشان اتذكر!
...
تعدل قعدتها,ترسم ابتسامه شاحبه وتفاجئني:
لقيتي شي بالسوق؟
وتشغل الرادو.. يطلع صوت ديانا حداد..
تسكره بسرعه!
اسألها ليش؟
تقول:كان يطفرني فيها اصلا مادري شكان يحب فيها..اي ماقلتيلي شريتي شي؟
اقولها:لا
تقول: إيه السوق يلوع الجبد
وتضحك بصوت مبحوح
ضحكه..تعور القلب
16 comments:
.
لو المدونات فيها كومنتات صوتيه كنتي سمعتيني اعلق بصوت مبحوح و متحشرج
مابي اعلق اكثر لانه بوستج رجع بذاكرتي للخلف
و قطـّع نياط قلــبي
ماقدر اقول الا اني مااتمنى لبطله بوستج الا كل خير و سعاده
و اتمنالج المثل عزيزتي
الغاليه شذر
اول شي احب اشكرج على هالتواصل الحلو ماتدرين شكثر مستانسه من وجودج وتعليقج
ثاني شي
احلا شي الذكريات
حتى لو كانت مره المهم عشناها
بكل شي مر تلقين قطرات العسل
تمنياتي لج بالتوفيق وتسلمين يالغاليه
نورتي
الله عليج على هل البوست .. يعطيج العافية ...
مشكلة لمن نعيش الماضي في المستقبل لا قادرين نرجع لماضي جميل و لا عارفين نعيش المستقبل بدون من نحب نتمسك بتلاتيب الماضي وهي توهن كل يوم عن يوم ونشوفها تضعف و نحزن اكثر .... دائرة لازم نطلع منها علشان نعيش ... بس ... ليش نعيش وسبب حياتنا مو موجود
يعطيج العافية ... بوست رهيب ...
الخوف من التجارب اليدد
يخلينا نتمسك بذكرى تجارب قديمه حتى لو كانت ذكريات مره
الله يعافيك
منور البوست خيو
تسلمين حبيبتي سنعه
افرح بتواجدي في مدونه مثل مدونتج :) ونيسه مثل صاحبتها
كلامج اللي قلتيه حلو و صحيح لكن في مشكله.. ان حتى الاشياء الحلوه احزن عليها لانها ما عادت موجوده.. فراقها صعب .. خصوصا لما تتمنينها مع انسان و فجاه هالانسان يروح
احساس ما ينوصف
=(
ملييت من قراق الاحبه يقطع القلب هالشعوور
اي والله عدل كلامج
ماعادت موجوده
الله كريم
وتسلمينلي على هالتواصل الروعه
وايد حلو الكلام
الذيب
مرورك الاحلى
شكرا
ليش جذي....
تدرين سامعة نفس الكلام من قبل ... مو بالضبط بس بنفس المعنى
صج شي يعور القلب :(
دنتل
المشاعر قليله حب كره شوق خوف وغيره
لكن الشعور فيها يختلف
فمن الطبيعي يتكرر الموقف
لكن احساس الافراد مايتشابه
سلامه قلبج
نورتي
كل اللي كتبتيه حلو
واكثر شي عجبني
انها تضحك بصوت مبحوح
مادري ليش البحّه تسوي شغل
:)
اهلين مناف
مو كل ضحكه تكون ضحكه فرح
يسلمو عالمرور
الكلام روعه
وراقى
وممتع
شكرا من كل قلبي على هذا الابداع
بوشملان
ذوقك اروع
تسلم ياخوي
والشكر لك على هالكلام والمرور اللطيف
سنعة..
تمر علينا هذه القصص في كل الأوقات لكن كلماتك الراقية و تعابيرك المملوءة بالحب و الجمال ، هي ما مميزت هذه القصة عن غيرها ...
قال لي احد الأصدقاء مرة أن الخاسر الوحيد في أي علاقة هو الذي يحب الآخر بصدق ، وبقدر ما هو مؤلم هذا الإفتراض بقدر ما يحمل شيئا من الصحة ، فأغلب علاقات الحب في مجتمعنا تنتهي إلى النهايات الغير سعيدة بل و المؤلمة في أغلب الأحيان ، و عندما تفرض هذه النهايات حقيقة الفراق لن يتألم سوى صاحب الحب الحقيقي و هنا يكم الجانب الحقيقي المؤلم لهذه الفرضية !
يقولون لا علاج لحب سابق أفضل من حب جديد !
اعجبني كثيرا دمجج لكلمات الاغاني في المقالة ، فقد أعطت لمحة من شعور تلك الفتاة و ماضي علاقتها ..
ولكن يبدوا أن من تركها لم يعن ما قال عندما ردد كلمات طلال مداح عندما غنى ( وشوف قلبي على يدي ، و هو اغلى ما عندي ، وتبغى زيادة في حبك ؟ أجيب لك قلك تاني منين ؟ )
مشاعر كثيرة وافكار تتضارب في داخلي سنعة أثارت أمواجها كلمتاك !
شكرا لك ..
keep up
na9er
اول شي
شكرا عالكومنت جد انا وايد احب هالبوست وافضله على كل البوستس اللي بماي بلوق لأن اكثر شي واقعي عشته مع احد
شكرا على كلماتك
وتشجعيك الحلو
تدري
شخصيا رغم الالم
ورغم اقوى التجارب اللي اسمع عنها
ترا الحب مافيه خساره
يكفي ان نعيشه
نتذكر احلى مافيه
صحيح نبجي
صحيح نفسيتنا تنهار
وارواحنا تتدمر
لكن فيما مضى
حبينا الحياه بسبته
بنظري
الحب الجديد
يأجج مشاعر الحب السابق
الا اذا كان بعد فتره مو طويله
لو صدق بكلمه جان نهايتهم مو جذيه
الشكر لك على هالزياره الحلوة
نورت
Post a Comment