دعــــواتكم

السلام عليكم

انا حاليا بكورس التخرج من الجامعه - ان شاء الله- والوقت مو لي فما لي مود اكتب بوست بس بصراحه ماقدر ابعد عن بلوقاتكم

ادعولي بالتوفيق

وان الله ايسر اموري ويعدي هالكورس ومشروع التخرج على خير

كنت احب الكمبيوتر والنت

suddenly Sir google is not that nice any more:)

and it turns out that the internet itself is not that fun!

-تحديث-الهندسيه

هندسيه...هندسيه

هي كلمه

هي همه

هي عزم لا يلين!

الصوت الوطني

الذي ولد من ارض الكويت قبل 30 سنه

ونجح باول نزول له لساحه الانتخابات

تسيد المنافسه ...المنافسه الشريفه

وحظي بثقه الطلبه لسنين عديده متصله ومنفصله

قائمه تتخذ شعارا يلخص هدفها..فكرها..وتحدياتها

خدمه الجميع بعيدا عن التعصب والطائفيه

ماتدرون شكثر احب هالقائمه

اشوف فيها مستقبلي

امل اجدادي

وامان عيالي

جايز الناس يشوفونها انتخابات والسلام

هذيل الشباب اهم اللي بيبنون البلد

ولازم نحرص عليهم نحط ايدنا بايدهم ونساعدهم

هذيل باجر بيقولون للحرامي انت حرامي وبيحاسبونه

بيقولون للمقصر انت مقصر ويحاسبونه

بيقولون للوطن انت وطنا ويبنونه

اهم من مسك الدستور

واهم اللي بيحمونه

لاتشوفونه صوت!

شوفوه وطن

اول صوره اهيا صورة المهرجان الخطابي للقائمه الهندسيه واللي كان اليوم من الساعه 11 الى الساعه 1 الظهر

تدرون منو ماسك المايك

مهندس

مرشح من القائمه المستقله سابقا

تدرون شيقول

الهندسيه فادتني

شلون فادته؟

ببساطه اقولكم : توفير الدورات العلميه لطلبه كليه الهندسه والبترول على اختلاف المواد هذي ابسطها

لكن الشي اللي ماذكر

حمله القائمه الهندسيه لاقرار كادر المهندسين , الحمله اللي كانت تكلفتها 67 دينار فقط واخوانا بالقائمه المنافسه قالو ان هالحمله كلفت فوق الالف دينار وتالي نسبو الانجاز لنفسهم .. لهم رب يحاسبهم اهو بيعلمهم الدين مو شعار لجذب عقول الطلبه وضمان اصواتهم والدين لا يعني التشكيك بالذمه الماليه لاي احد لاي سبب واكيد الدين مايعني نسب خدمات غيرك لك بدون وجه حق

يوم الخميس

ادعو ان الكليه ترجع بيد اللي يحافظ عليها ويخدم ابنائها

تحديث:

1321 شكرا

لكل طالب وطالبه صوتو للصوت الوطني في كليه الهندسيه والبترول واعادوه الى مكانه الطبيعي في المقدمه

ربي يكتبلكم عام سعيد مليئ بالخدمات التي ترضيكم

والجمعيه؟

هندســــــــــــــــــــــــــــــــــــــــــــــيه

الوسط الديمقراطي

الائتلافيه

المستقله

الوسط

الاسلاميه

وناسه

صعدنا الثالث!

هذي هديه عيدميلادي

نور لن يموت

بصير كبـــــــــــــــــــــــــــــــــــــــــــــــــــيره!

احم احم
12-10-1986
يوم اشرقت فيه الدنيا
وشادت به العصافير
واصبح لكل شيء معنى جديد وجميل

Sn3a..عالم جميل



صرت كبيره

والشاطر يقول جم!

والشاطر مايجيك عالبروفايل ;p

Hint:2x11 ;p

صفحات من مذكراتها 10

اكيد هدت
وشلون ماتهدى
اهو البحر
اهو موجه الغاضب
واهو موجه الهادي
واهو حزن صامت
واهو طير شادي

بدر.. منه ياعللي مانحرم
من دنيتي ..ولاانحرم
من حلمي برقادي

بدر
عيونه
من زين عيونه من تضحك يصيرون خط
تدرين مو كلمن ربي رزقه بعيون وساع..لبيه يابو عيون وساع , ماغيرك احد البيله يالرغدي
من زمان ماقلتلي يالرغدي.. قولي شسوي
شوفي بابا.. الحين انزل اييبلج قهوه زين تروحين دوامج وتخلصين محاضرتج وتردين البيت صار ماصار قولي حق امج انا اشوف شي ماتشوفونه .. وانا مردي بتزوج بس بالوقت المناسب ولو ربي قاسملي جان صار كلشي
امج صحيح بتعصب لكنها تبي تشوفج عروس.. وبتشوفج عروس,عروستي... بس خلج بدراستج وانا بكلم احمد
لا .. احمد ماتكلمه, احمد دواه عندي انا
ترا انتي تخرعين الله يعين اللي تحقدين عليه
الله يعينه

وبعد ماهدت الامور بالبيت

بوقت اليمعه العائليه يوصل احمد ومرته كالعاده متناجرين , يمثلون السعاده
يتسلل احمد للمطبخ وقت ما البنات يضبطون الغدا والسلطات وينجبون , ليش فليتو؟ يسأل رغد بلهجه فرحانه
تدري ماحبيت اكسر بكلمتك
كلمتي؟
ايه مابي اطلعك مو ريال جدام بدر

نور تهد الصحون وتخز رغد
وبدر شكو الحين لايكون النذل اذاج .. وبرتباك يكمل ,
وشنو مألف عليج الحين
انا مادري عنه الحين ليش اهو متى اخر مره كلمته
من زمان .. قوليلي شياب طاري بدر
قلتلك انت عطيت الريال كلمه وانا ماحب اكسر كلمه رياييل
وانتي شدراج
الوقت اللي كلمت فيه بدر انا كنت قاعده اسمع .. كان شابكني , عشان اصدقه
اي شي
شفيك خو اهو وعدك مايكلمني ومن يومها مادري عنه .. صحيح اشوفه صدفه بس مايكلمني وانا بنطره
هذا مو كفو ياخذج
عسى عاد انت الكفو! وشفيها مرتك ماده البوز شمسويلها
مالج شغل بمرتي

ويطلع من المطبخ معصب
ووتعمد بهالدقيقه تضحك بصوت يسمعه

مادق عليك احمد؟
مسج ارسلته رغد لبدر
لا شسويتي ؟ انتي ينخاف منج
ماسويت شي انا بريئه :P
ديري بالج لا ينقلب كل شي ضدج
خل اهو يدير باله مو انا اهو اللي بدا


وفي هذه المسجات تعمدت الا تضع خاصيه سايلنت , بل كان صوت (حبيتك تنسيت النوم) يكاد ينسي احمد حواره مع اخاه فرمقها بنظره غضبت

وفي اثناء خروجها من البيت لحقها وقبض على يدها
تعالي!
هد ايدي شفيك ينيت
يبي تلفونج
شتبي فيه
ييبيه
هاك
وين المسجات اللي كانت توصلج
شوف اخر المسجات وشوف الوقت
يعني بتقنعيني كل هالمسجات من ساره
دق جرب
رغد هالحركات مو علي وقسما بالله ان طلعتي تكلمينه ترا ...
شوف انت انا ماكلمه وحتى لو بكلمه ترا اقدر اكلمه بمليون طريقه حضره جنابك ماراح تعرفها انزين وصدقيني ان حاولت بس بس حاولت تسويله شي صدقيني لخرب بيتك واشوف ان مرتك قعدتلك دقيقه لا وغير جذيه كل ماتخطب راح اسويلك مليون سالفه وسالفه
انا كنت غبيه قبل .. مو طيبه لا غبيه , كلمن ياكل حقي ويمشي وانا ساكته لا وابتسم بس الحين انسى
شوف انا ماراح اخذ غير بدر وان مجرد حاولت انك تخرب علي ترا ماراح تشوف مني خير!

ترك يدها فهو تعرف على رغد لم يألفها من قبل
ولم يعلم بماذا يرد

صج اني جليله حيا ..وتضحك
اول مره اشوف وحده تقول حق ولد خالها انا احب ريال
من زين ولد الخال بس

وكانت على ما عهدها ووعدها تنتظره
مرت الاشهر كسنين احيانا

وعند ولاده ابن احمد ذهبت لزياره زوجته بالمستشفى التي ولحظه البائس مصره على تسميه ابنها بدر كما هو اسم ابيها
احمد شنو سميته
للحين ماسميناه
ويقفز جواب زوجته
بدر
يه يه عاشت الاسامي بدور.. وتكمل رغد
فتحمل الطفل من على حضن امه , والتي بدورها تقول ربي ان شاءالله يكتبلج نصيب رغود وتييبين احلى منه مع ان ماكو احلى من ولدي
عاد تصدقين انا مقرره ان خطبني واحد اسمه بدر اتزوجه , تهقين انطر ولدج
مانزوج ولدي جياكر
يرد احمد
بس بدر يحبني حتى لو جيكره
وتمسك الطفل تسر في اذنيه شوقها لمن هو يشابهه بالاسم وتقول
تدري اني حبيتك وتبوسه على خشمه

ربي يخليه لج
الله يسلمج الفال لج ان شاءالله


اقولك شي يضحك؟
مسج منها لبدر
شنو؟
بو بدر
بو بدر منو
احمد
اي شي
والله

مايصلهما ببعضهما هو امل
انا مابي شي مابي ملابس مابي بيت تكفى بدر
انا ريال يارغد مايصير اعشمج بالحب وماعندي اللي يكفيج انتي تدرين بحاله اهلي تكفين
ان شاءالله .. ان شاءالله قلبي

تتكرر هذه الجمل كل عده شهور الا ان تعيدها حينا اخر كما تعيد من يتقدم لها وكما هو يغض بصره وقلبه عن سواها



هذي اهيا
ممسكا بيد امه ومقبلا نحو رغد التي تشرب قهوتها باحدى المقاهي
الا ان القهوه اهتزت من ربكه رغد
رغد هذي امي

رغد انتي شفيج صايره سايلنت!

هلا .. هلا خالتي
هلا يمه شلونج
الحمدلله
لاتحاتين بدر قالي كل شي

اهيا سألتني منو اللي ماخذه قلبك وانا قلتلها لبسي عبايتج اوريج
رغم علاقتها ببدر .. رغم كل الضغوطات .. وقسوه الشهور على قلبها الا انها تخجل من اي اطراء منها كما كان شعورها حين عرفته لاول مره

تفضلي خالتي
يما شطلبلج؟
لاتطلبلي شي انا بس بقعد اطالع ام حفيدي

وين رايح؟
بييب شغله من السياره

خالتي مادري شقولج
لاتقوليلي شي كافي انج صابره عليه .. صدقيني يمه انا حنيت عليه وقلتله انا مستعده اساعدك بس بدر نفسه عزيزه ولوما ظروف ابوه جان اهو خاطبج من زمان انا عرفت كل القصه بالبدايه عصبت لاني مارضى على بنتي تكلم ريال غريب وتوقف نصيبها بس اهو بدر مو نفس باجي الرياييل ومنه عرفت انج مو مثل باجي البنات
خالتي انا انطره اكثر واكثر مايهمني شي الا اهو
وتنزل رأسها خجلى .. وتراه متعمدا الوقوف بجانب سيارته ويرمقهمها بنظره ممسكا بعدوها الا وهي الزقاره!

قطها
مسج ارسلته له
فرماها بعيدا حين قرأت عينه حروفها

ايا ولد الذين انا سنين احن عليه يقط هالسم وانتي بكلمه يحذفها
فتضحك رغد على كلام ام بدر وتضيف
امري شنو تبينه يسوي انا اقوله


كان لقائها بوالدته هو ماحتاجت اليه, لم تعلم مسبقا انها تحتاج لذلك
الا ان بدر يعلم عنها مالاتعرفه هي بنفسها

وبعد تخرجها من الجامعه

بداوم عندك
لا
ليش؟
رغد انتي مينونه
لا والله الله هداني من صج الله هداني عفيا
رغد انا مالي خلق تسوين غزو علي كل مايات موظفه تبي شي او عميله لا يبا روحي اشتغلي بعيد
بدر عفيا


ويلف ويها لان عارف ان بس يشوفها بيرضى
بدر طالعني
مابي مابي انتي ابليسه تخرعين وانا اللي باكلها وبنطرد ان اشتغلتي معاي ماكو انسي
ان شاءالله اشتغل بفرع كل موظفين حلوين زين
ان شاءالله
اكرهك

يضحك.. يمكن يشوفونج موظفه .. يمكن يشوفونج كبيره بس انتي ياهل بعيني
انت ياهل بعيني
استحي على ويهج!
زين اسفه

وبعد فتره بسيطه

ترضين؟
بشنو؟
ابنيلج دور فوق بيتنا ولج باب بروحج واصانصير وكل شي
المفروض تعرف جوابي
مابيج تجاوبين لانج تحبيني انا بسألج لو احد خطبج وبتسكنين بدور فوق اهله ترضين
اي ارضى
وغلاتي
وغلاتك بدر.. انا سكنت ببيت يدي 15 سنه وامي عمرها ماشتكت بالعكس مع ان مالها باب منفصل ولا شي ليش ابعدك عن اهلك وانا ادري شكثر يحتاجونك
بس انا وعدتج اني اسكنج باحسن مكان والحين جني بكسر بكلمتي جدامج
المكان اللي رباك وكبرت فيه اهو احسن مكان
وبعدين ليش كل هالاسئله
بس جذيه بعرف رايج


اهو ماكان بيعرف رايها
اهو خذا منها اوكي وبدا يبني الدور
كان يوقف بالحر لما العمال يشتغلون يشوف ويتخيل المكان اللي بيجمعه وياها اللي بيجمع سعادتهم ... نجرتهم... المكان اللي بيركض فيه ورا ولده او بنته... المكان اللي بتصارخ عليه رغد وتبجي للحين مايدري اهيا ليش لما تصارخ لما تستانس لما تزعل لازم تبجي


وكان يسألها بشكل عرضي بين سوالفهم عن عدد الغرف اللي تبيها ولان يدري انها مو كفو مطبخ ماسوالها مطبخ كبير

كان يوقف البنا اوقات لان ماكان ياخذ فلس من ابوه كان معتمد على الفلوس اللي كان ايمعها من بدايته بالوظيفه عزيز نفس مايبي يكون لاحد غير ربه فضل ان ياخذ رغد ويسكنها بالمكان اللي يستاهلها
ويقول
ماكو مكان يستاهلج قلبي بس ان شاءالله ربي يقدرني اسكنج باحلى القصور
انا ساكنه بقلبك واهو قصر محد يملك ان يسكنه



مرت فتره طويله قريب السنه وقالها مري بيتنا


ليش؟
بس من بره ابيج تشوفين لون السيجما اللي صبغناه هالمره
مرت واستانست عاللون ومالاحظت الدور الجديد
حلو
اي حلو
بس اللون
اي مغيرين لون الشتر
بس الشتر
شفيك؟
شوفي بيتج
بدر هذا.. هذا
اي
ماقلتلي متى شلون؟ بدر من صج
اي والله وانا صبغت البيت كله عشان لايكون شكل الدور غلط ولونه مختلف وسويتلج بلكونه زجاجيه مثل ماتبين مادري شبتشوفين بالفريج اللي تموتين عالبلكونات


تبجي
شفيج يابابا
بدر هذا بيتنا
اي بيتج ليش تبجين لاتخليني ابجي ريال طول بعرض مو وقته
يعني انا عندي بيت
اهو دور عاد لاتطمعين ببيت ابوي يه داشه على طمع
يوز عني
يلا روحي بيتكم مو وقته تسويلي سمعه بين بنات الفريج ام خليل و ام عبدالله باجر حتى لو بتقدملهم مايرضون
اوهو انت كله غشمره .. مشكور بدر
مشكور على شنو هذا وعدي او جزء من وعدي



ويسافر دوره مع البنك واهيا زهقانه شهر كامل مايكلمها الا بين فتره وفتره لكن يحاول يدزلها مسجات من يقدر


وامها تقولها متى بتقومين تبدلين؟
وتقطع كل هالذكريات والاحداث اللي ببالها

وعقب ماتطلع امها بفتره بسيطه يدق من رقمه بالكويت
انا بالمطار وباجر انا ببيتكم والحين امي بتدق وانا احبج رغد احبج وعمري ماراح احب غيرج لان انتي الحب كله
يابعد كل المسجات والمكالمات والله لو يوصلني هالمسج عقب سنين قطاعه انا برضى وبستانس يكفيني عن كل شي

توني ادري ان صوتج حلو جذيه
خل امك تدق الحين
وانا قاعد اكلمج اهيا قاعده تدق
عيل باي
ليش؟
انا انخطبت مايصير اكلمك
حتى انا خطبت مايصير اكلمج


النهايه
لا
البدايه!
Every sweet love story has to know the taste of sourness

صفحات من مذكراتها 9

تبجي..و تبجي
لان بهالمواقف الوقت اللي تبجي فيه لازم تفكر شنو لازم تسوي
شتقول حق امها
حق رفيجتها
شلون اهلها بيعرفون
منو بيتشمت

يوصلها مسج( لقيتلج نفنوف عجيب بس لونه مو اخصر اخضر ..قريب من الليموني..لما تفضين خل امرج تشوفينه)

وقته .. بقى فيها اخضر ولا ليموني

وامها تدق.. امي ماعمرها استانست على شي سويته.. ماعمرها قدرت جهدي وتعبي .. ماعمري رضيتها بشي .. شبقولها؟ اقولها مابيه؟ اقولها اهو مايبيني؟ اقولها شنو! ان قلتلها مايبيني اكيد بتعصب وبتزف امه! ان قلتلها مابيه.. بتعديلي الاسطوانه
وبين هالافكار يقاطعها فاصل جديد من البكاء

الله يسامحك يابدر
بدر شكو رغد شفيج!
اخ لو حبيتني مثل ما عبدالرحمن يحبها
جان مو هذا حالي الحين.. جان ماخليت احد يطالعني ويطلع الاخطاء السبعه ويشوفني اصلح ولا ما اصلح
وينك ابيك الحين .. حقي عليك تكون معاي وينك بدر وينك!

وتركب السياره لما زادت الزحمه لان الناس يحبون يمشون بهالمكان

وتسند راسها على السكان.. ودموعها مازالت تتسابق على وجنتيها
ويقاطعها في هذه المره ضربات على زجاج السياره

اختي في شي؟
(شرطي يسألها )
لا ماكو شي
عيل ليش واقفه هني؟
ليش ممنوع نوقف ؟
مو ممنوع بس اذا في شي نوديج المستشفى او ندق على احد يمر ياخذج مشكور مابي شي
في احد مأذيج قوليلي مستعد اساعد
انت مو سألتني فيني شي وابي شي قلتلك مابي خلاص ياخي روح

ورفعت الجام وطلعت من المسفط والمكان

تدق على ساره

ساره وينج؟
شفيج تبجين شفيه صوتج شفيج؟
وينج قوليلي
انا بشقتي تعالي
ريلج موجود
لا اليوم زامه ليل ماراح ايي تعالي

وبالشقه

من صجه هذا؟ شنو بنات الناس لعبه؟ لاتزعلين رغود ترا والله ماكنت ادري وغلاتج والله...
تقاطعها رغد.. اكيد ماكنتي تدرين يعني من متى ضريتيني؟ بس شسوي قوليلي شسوي انا من الصبح طالعه موراده البيت وامي يننتني مالي خلق مالي خلق
زين كلميها ..طمنيها انج ببيتي على الاقل

رغد لاتبجين قطعتي قلبي
دقي على بدر
رغد شدق عليه انتي مينونه تبينه يتشمت ولا تبين يعطيج رد مثل ويهه انسي ماراح ادق ولا راح اخليج تدقين انسي
ساره .. فهميني..شوي فهميني.. بدر حتى لو اشوفه ومايتكلم ارتاح .. حتى لو يقول الو كل اللي فيني يروح.. انا تعبانه .. مو تعبانه وبس اول مره احس بجذيه
لاتدقين... تعالي وين بتروحين
البيت

وين كنتي؟
انتي للحين ماعرستي مايصير تروحين وتردين بكيفج دوامج خالص الظهر الحين الساعه 10 ليش مادقيتي ...شفيج ماتردين
يما مو وقته
لا وقته ونص مو تروحين تفرفرين بالشوارع والسوقه ويشوفونج الناس تالي الريال يقول مابيها ماتقعد ببيتهم لاتفشليني بين الناس ... شفيج ماتردين ماتقولين وين كنتي
مابي اتزوج
لا مو بكيفج.. عقب ماكلمنا الناس واتفقنا وياهم وزارونا ورضيتي تقولين مابي لا تبين غصبن عليج
مابي.. اتزوج
بتزوجين ترا والله يارغد ان مادشيتي غرفتج الحين ونمتي وباجر رحتي شريتي النفنوف وحجزتي صالون ترا لنتي بنتي ولا انا اعرفج بسج من صغرج عله على قلبي ماعمرج بردتي قلبي بشي ليمتى
انتي تسمعيني؟ انتي قاعده تسمعيني ولا تكلمين بروحج انا ماراح اتزوج خلاص دقي على الناس قوليلهم وقولي اللي بتقولينه يننتيني
حسبي الله عليج من بنت حسبي الله عليج من بنت


تقفل الغرفه وتقعد عند الباب مافيها حيل تمشي لي السرير .. تبجي وتشهق .. وترد تبجي لين نامت
الفير صحت مره وحده.. وتمسك التلفون وتدق
بدر
هلا.. شفيج بابا شفيج؟
نايم؟
لا مو نايم امريني شفيج شاللي مضايقج
تعبانه شوي كلمني
حاظر..
ويسولف وبين كل سالفه يسالها شفيها اما ترد ماكو شي او مافيني شي
وصارت الساعه 7
متى دوامج؟
10 اول محاضره
زين قومي لبسي خل اشوفج قبل دوامج
ماراح اداوم
ليش؟
مالي خلق.. باجر اداوم
رغد من متى تطوفين محاضرتج؟
من اليوم لاتحن بدر ماراح اداوم
قومي لبسي ودقي علي وانتي بالسياره ابيي اشوفج

ويم الكوفي شوب

نزلي من السياره خلنقعد بالكوفي شوب
لا انت تعال اصعد
اصعد السياره! سيارتج! انتي؟
اصعد
حاظر


شفيه ويهج.. شفيج
انا اكرهك
واكره الساعه اللي كلمتك فيها
اكره اللي سوى شي اسمه نت
واكره اللي فكر بشي اسمت تشات
اكرهك بدر اكرهك
ميخالف ميخالف قلبي قوليلي شفيج
شفيني ؟؟؟ اكرهك اكرهك وتبجي
منو مأذيج قوليلي
انت مأذيني انت ماتفهم انت ماتفهم قولي!
حقج علي .. قوليلي شاللي يرضيج اسوي .. شاللي يريحج بس لاتبجين تقطعين قلبي
من وينلك؟
من وينلي شنو؟
من وينلك قلب مثل الناس انت مو كفو يكون لك قلب انت بعتني بعتني
انا مابعتج رغد فهميني خلاص تكفين فهميني انا بس طلبت فتره
فتره شنو!
انا وعدت احمد
اي احمد
احمد ولد خالج! قلتله انا الحين مو بحاله تسمحلي اتزوج قلتله ابي 4 سنين منها اتخرج واتوظف وايمع فلوس اتزوج فيها انا مابي اقعدج بغرفه ولا ابي احكرج بشقه صغيره انا ابي اسكنج بمكان يليق عليج.. ابيج تلبسين مثل ماكنتي تلبسين ببيت اهلج واحسن.. مابيج اقل من غيرج واهو ضمنلي يعطيني خبر اذا انخطبتي رغد هالحجي كله صار وانتي تعرفينه ياقلبي انا مابعتج بس مابغيت اعشمج ولا بغيت اوقف بطريجج انا واحد على قد حالي حتى سيارتي كانت اجار بالكليه لين توظفت خذيتلي سياره عاديه شوفيها حتى مو سياره اللي حلمت فيها عشان منو؟ عشانج عشان لايكون علي مصرف كبير
شنو؟ شقاعد تخربط شقاعد تقول احمد شكو انا ماني فاهمه
رغد لما هدينا بعض مره شقالج احمد ماقالج نطريه ماقالج لاتكلمينه بس نطريه
لا
شنو!
احمد خطبني
خطبج! انتي مرته؟ شلون
اهو متزوج الحين بس خطبني بدر لاتجذب علي الحين.. مو بحاله تسمحلي اني..
اجذب عليج! شلون يخطبج وانا قايله ابيج شلون
ماقالي.. انا .. بدر ملجتي المفروض الاسبوع الياي
منو بعد ؟!؟
واحد .. وامس قالي مايبيني لان يحب!
رغد شلون ترضين تنخطبين وانا؟
انا شدراني انك تبيني انا عبالي تسليت فيني وخلص دوري.. انا شدراني انا نطرتك شدراني شدراني
وهالحمار منو يحب وشلون قالج وليش يخطب دام ان يحب
لان اهو احسن منك ... مو مثلك عشان جذيه اكرهك
لاتبجين
اهو يحب ومحد ترس عينه غير حبيبته مو مثلك
ومن قالج ان في احد ترس عيني غيرج ياقلبي لاتبجين خلاص
احلف ان كلامك صج
وغلاة عيونج كلامي كله صج ومثل ماصار قلتلج اياه .. ليش ماقلتيلي ان خطبج ليش؟ انا اتفاهم وياه ... رغود انا مستعد اخطبج من باجر لكن صدقيني انا محتاج وقت والريال مايقول كلمه محتاج الا لما يكون قاصدها لاتخليني اكررها قلبي
انت عبالك انا بس همني زواج وعيال .. بدر انا مادري شسوي بالمصيبه هذي امبي بصوب واهلي بصوب هذا غير احمدو اللي انا بشوف شقصته وليش سوى جذيه
انزين انتي الحين اهدي وقولي حق امج ان الريال قالج..
تقاطعه
انسى ماراح اقولها ان اهو مايبيني انا وعدته اهو يحب بدر.. اهو مثلي.. يمكن انا بيوم الملجه كنت بدق عليه اقوله مابيك

يتبع