Monday, 6 October 2008

صفحات من مذكراتها 10




اكيد هدت
وشلون ماتهدى
اهو البحر
اهو موجه الغاضب
واهو موجه الهادي
واهو حزن صامت
واهو طير شادي

بدر.. منه ياعللي مانحرم
من دنيتي ..ولاانحرم
من حلمي برقادي

بدر
عيونه
من زين عيونه من تضحك يصيرون خط
تدرين مو كلمن ربي رزقه بعيون وساع..لبيه يابو عيون وساع , ماغيرك احد البيله يالرغدي
من زمان ماقلتلي يالرغدي.. قولي شسوي
شوفي بابا.. الحين انزل اييبلج قهوه زين تروحين دوامج وتخلصين محاضرتج وتردين البيت صار ماصار قولي حق امج انا اشوف شي ماتشوفونه .. وانا مردي بتزوج بس بالوقت المناسب ولو ربي قاسملي جان صار كلشي
امج صحيح بتعصب لكنها تبي تشوفج عروس.. وبتشوفج عروس,عروستي... بس خلج بدراستج وانا بكلم احمد

لا .. احمد ماتكلمه, احمد دواه عندي انا
ترا انتي تخرعين الله يعين اللي تحقدين عليه
الله يعينه





وبعد ماهدت الامور بالبيت






بوقت اليمعه العائليه يوصل احمد ومرته كالعاده متناجرين , يمثلون السعاده
يتسلل احمد للمطبخ وقت ما البنات يضبطون الغدا والسلطات وينجبون , ليش فليتو؟ يسأل رغد بلهجه فرحانه
تدري ماحبيت اكسر بكلمتك
كلمتي؟
ايه مابي اطلعك مو ريال جدام بدر

نور تهد الصحون وتخز رغد
وبدر شكو الحين لايكون النذل اذاج .. وبرتباك يكمل ,
وشنو مألف عليج الحين

انا مادري عنه الحين ليش اهو متى اخر مره كلمته
من زمان .. قوليلي شياب طاري بدر
قلتلك انت عطيت الريال كلمه وانا ماحب اكسر كلمه رياييل
وانتي شدراج
الوقت اللي كلمت فيه بدر انا كنت قاعده اسمع .. كان شابكني , عشان اصدقه
اي شي
شفيك خو اهو وعدك مايكلمني ومن يومها مادري عنه .. صحيح اشوفه صدفه بس مايكلمني وانا بنطره
هذا مو كفو ياخذج
عسى عاد انت الكفو! وشفيها مرتك ماده البوز شمسويلها
مالج شغل بمرتي

ويطلع من المطبخ معصب
ووتعمد بهالدقيقه تضحك بصوت يسمعه

مادق عليك احمد؟
مسج ارسلته رغد لبدر
لا شسويتي ؟ انتي ينخاف منج
ماسويت شي انا بريئه :P
ديري بالج لا ينقلب كل شي ضدج
خل اهو يدير باله مو انا اهو اللي بدا


وفي هذه المسجات تعمدت الا تضع خاصيه سايلنت , بل كان صوت (حبيتك تنسيت النوم) يكاد ينسي احمد حواره مع اخاه فرمقها بنظره غضبت

وفي اثناء خروجها من البيت لحقها وقبض على يدها
تعالي!
هد ايدي شفيك ينيت
يبي تلفونج
شتبي فيه
ييبيه
هاك
وين المسجات اللي كانت توصلج
شوف اخر المسجات وشوف الوقت
يعني بتقنعيني كل هالمسجات من ساره
دق جرب
رغد هالحركات مو علي وقسما بالله ان طلعتي تكلمينه ترا ...
شوف انت انا ماكلمه وحتى لو بكلمه ترا اقدر اكلمه بمليون طريقه حضره جنابك ماراح تعرفها انزين وصدقيني ان حاولت بس بس حاولت تسويله شي صدقيني لخرب بيتك واشوف ان مرتك قعدتلك دقيقه لا وغير جذيه كل ماتخطب راح اسويلك مليون سالفه وسالفه
انا كنت غبيه قبل .. مو طيبه لا غبيه , كلمن ياكل حقي ويمشي وانا ساكته لا وابتسم بس الحين انسى
شوف انا ماراح اخذ غير بدر وان مجرد حاولت انك تخرب علي ترا ماراح تشوف مني خير!




ترك يدها فهو تعرف على رغد لم يألفها من قبل
ولم يعلم بماذا يرد






صج اني جليله حيا ..وتضحك
اول مره اشوف وحده تقول حق ولد خالها انا احب ريال
من زين ولد الخال بس

وكانت على ما عهدها ووعدها تنتظره
مرت الاشهر كسنين احيانا

وعند ولاده ابن احمد ذهبت لزياره زوجته بالمستشفى التي ولحظه البائس مصره على تسميه ابنها بدر كما هو اسم ابيها
احمد شنو سميته
للحين ماسميناه
ويقفز جواب زوجته
بدر
يه يه عاشت الاسامي بدور.. وتكمل رغد
فتحمل الطفل من على حضن امه , والتي بدورها تقول ربي ان شاءالله يكتبلج نصيب رغود وتييبين احلى منه مع ان ماكو احلى من ولدي
عاد تصدقين انا مقرره ان خطبني واحد اسمه بدر اتزوجه , تهقين انطر ولدج
مانزوج ولدي جياكر
يرد احمد
بس بدر يحبني حتى لو جيكره
وتمسك الطفل تسر في اذنيه شوقها لمن هو يشابهه بالاسم وتقول
تدري اني حبيتك وتبوسه على خشمه

ربي يخليه لج
الله يسلمج الفال لج ان شاءالله


اقولك شي يضحك؟
مسج منها لبدر
شنو؟
بو بدر
بو بدر منو
احمد
اي شي
والله

مايصلهما ببعضهما هو امل
انا مابي شي مابي ملابس مابي بيت تكفى بدر
انا ريال يارغد مايصير اعشمج بالحب وماعندي اللي يكفيج انتي تدرين بحاله اهلي تكفين
ان شاءالله .. ان شاءالله قلبي

تتكرر هذه الجمل كل عده شهور الا ان تعيدها حينا اخر كما تعيد من يتقدم لها وكما هو يغض بصره وقلبه عن سواها



هذي اهيا
ممسكا بيد امه ومقبلا نحو رغد التي تشرب قهوتها باحدى المقاهي
الا ان القهوه اهتزت من ربكه رغد
رغد هذي امي

رغد انتي شفيج صايره سايلنت!

هلا .. هلا خالتي
هلا يمه شلونج
الحمدلله
لاتحاتين بدر قالي كل شي

اهيا سألتني منو اللي ماخذه قلبك وانا قلتلها لبسي عبايتج اوريج
رغم علاقتها ببدر .. رغم كل الضغوطات .. وقسوه الشهور على قلبها الا انها تخجل من اي اطراء منها كما كان شعورها حين عرفته لاول مره

تفضلي خالتي
يما شطلبلج؟
لاتطلبلي شي انا بس بقعد اطالع ام حفيدي

وين رايح؟
بييب شغله من السياره

خالتي مادري شقولج
لاتقوليلي شي كافي انج صابره عليه .. صدقيني يمه انا حنيت عليه وقلتله انا مستعده اساعدك بس بدر نفسه عزيزه ولوما ظروف ابوه جان اهو خاطبج من زمان انا عرفت كل القصه بالبدايه عصبت لاني مارضى على بنتي تكلم ريال غريب وتوقف نصيبها بس اهو بدر مو نفس باجي الرياييل ومنه عرفت انج مو مثل باجي البنات
خالتي انا انطره اكثر واكثر مايهمني شي الا اهو
وتنزل رأسها خجلى .. وتراه متعمدا الوقوف بجانب سيارته ويرمقهمها بنظره ممسكا بعدوها الا وهي الزقاره!

قطها
مسج ارسلته له
فرماها بعيدا حين قرأت عينه حروفها

ايا ولد الذين انا سنين احن عليه يقط هالسم وانتي بكلمه يحذفها
فتضحك رغد على كلام ام بدر وتضيف
امري شنو تبينه يسوي انا اقوله


كان لقائها بوالدته هو ماحتاجت اليه, لم تعلم مسبقا انها تحتاج لذلك
الا ان بدر يعلم عنها مالاتعرفه هي بنفسها




وبعد تخرجها من الجامعه




بداوم عندك
لا
ليش؟
رغد انتي مينونه
لا والله الله هداني من صج الله هداني عفيا
رغد انا مالي خلق تسوين غزو علي كل مايات موظفه تبي شي او عميله لا يبا روحي اشتغلي بعيد
بدر عفيا


ويلف ويها لان عارف ان بس يشوفها بيرضى
بدر طالعني
مابي مابي انتي ابليسه تخرعين وانا اللي باكلها وبنطرد ان اشتغلتي معاي ماكو انسي
ان شاءالله اشتغل بفرع كل موظفين حلوين زين
ان شاءالله
اكرهك

يضحك.. يمكن يشوفونج موظفه .. يمكن يشوفونج كبيره بس انتي ياهل بعيني
انت ياهل بعيني
استحي على ويهج!
زين اسفه



وبعد فتره بسيطه


ترضين؟
بشنو؟
ابنيلج دور فوق بيتنا ولج باب بروحج واصانصير وكل شي
المفروض تعرف جوابي
مابيج تجاوبين لانج تحبيني انا بسألج لو احد خطبج وبتسكنين بدور فوق اهله ترضين
اي ارضى
وغلاتي
وغلاتك بدر.. انا سكنت ببيت يدي 15 سنه وامي عمرها ماشتكت بالعكس مع ان مالها باب منفصل ولا شي ليش ابعدك عن اهلك وانا ادري شكثر يحتاجونك
بس انا وعدتج اني اسكنج باحسن مكان والحين جني بكسر بكلمتي جدامج
المكان اللي رباك وكبرت فيه اهو احسن مكان
وبعدين ليش كل هالاسئله
بس جذيه بعرف رايج


اهو ماكان بيعرف رايها
اهو خذا منها اوكي وبدا يبني الدور
كان يوقف بالحر لما العمال يشتغلون يشوف ويتخيل المكان اللي بيجمعه وياها اللي بيجمع سعادتهم ... نجرتهم... المكان اللي بيركض فيه ورا ولده او بنته... المكان اللي بتصارخ عليه رغد وتبجي للحين مايدري اهيا ليش لما تصارخ لما تستانس لما تزعل لازم تبجي


وكان يسألها بشكل عرضي بين سوالفهم عن عدد الغرف اللي تبيها ولان يدري انها مو كفو مطبخ ماسوالها مطبخ كبير

كان يوقف البنا اوقات لان ماكان ياخذ فلس من ابوه كان معتمد على الفلوس اللي كان ايمعها من بدايته بالوظيفه عزيز نفس مايبي يكون لاحد غير ربه فضل ان ياخذ رغد ويسكنها بالمكان اللي يستاهلها
ويقول
ماكو مكان يستاهلج قلبي بس ان شاءالله ربي يقدرني اسكنج باحلى القصور
انا ساكنه بقلبك واهو قصر محد يملك ان يسكنه



مرت فتره طويله قريب السنه وقالها مري بيتنا


ليش؟
بس من بره ابيج تشوفين لون السيجما اللي صبغناه هالمره
مرت واستانست عاللون ومالاحظت الدور الجديد
حلو
اي حلو
بس اللون
اي مغيرين لون الشتر
بس الشتر
شفيك؟
شوفي بيتج
بدر هذا.. هذا
اي
ماقلتلي متى شلون؟ بدر من صج
اي والله وانا صبغت البيت كله عشان لايكون شكل الدور غلط ولونه مختلف وسويتلج بلكونه زجاجيه مثل ماتبين مادري شبتشوفين بالفريج اللي تموتين عالبلكونات


تبجي
شفيج يابابا
بدر هذا بيتنا
اي بيتج ليش تبجين لاتخليني ابجي ريال طول بعرض مو وقته
يعني انا عندي بيت
اهو دور عاد لاتطمعين ببيت ابوي يه داشه على طمع
يوز عني
يلا روحي بيتكم مو وقته تسويلي سمعه بين بنات الفريج ام خليل و ام عبدالله باجر حتى لو بتقدملهم مايرضون
اوهو انت كله غشمره .. مشكور بدر
مشكور على شنو هذا وعدي او جزء من وعدي



ويسافر دوره مع البنك واهيا زهقانه شهر كامل مايكلمها الا بين فتره وفتره لكن يحاول يدزلها مسجات من يقدر


وامها تقولها متى بتقومين تبدلين؟
وتقطع كل هالذكريات والاحداث اللي ببالها

وعقب ماتطلع امها بفتره بسيطه يدق من رقمه بالكويت
انا بالمطار وباجر انا ببيتكم والحين امي بتدق وانا احبج رغد احبج وعمري ماراح احب غيرج لان انتي الحب كله
يابعد كل المسجات والمكالمات والله لو يوصلني هالمسج عقب سنين قطاعه انا برضى وبستانس يكفيني عن كل شي

توني ادري ان صوتج حلو جذيه
خل امك تدق الحين
وانا قاعد اكلمج اهيا قاعده تدق
عيل باي
ليش؟
انا انخطبت مايصير اكلمك
حتى انا خطبت مايصير اكلمج


النهايه
لا
البدايه!
Every sweet love story has to know the taste of sourness












43 comments:

أتيت متاخرة said...

سنعة
بجيتيني
وربي وربي
بجيت

:
رغد عليها بالعافية
ويا ريت كل قصة حب تنتهي بهالشكل
يا ريت

wa7ed-shad-7ailah said...

اوووووف ما بغينا



اشوة انة خذاها ما خذاها الصيدة ولد خالها :P


صج صج قوية ماشاءالله


Keep up the Good Work san3a, You're Making a Difference ..

alsaronah said...

وأنا أقرا الكلام الحلو أقول على الله ما تموته بالاخير لوووول


خوش قصة والله ...

انتي صج سنعة وسنعتي النهاية ... قصدي البداية :)

Don Juan said...

The Bitter-Sweet End :)

Najmah said...

آخ عليج
شسوي بدموعي الحين
:")

النهاية عجييييبة
تسلمين يالسنعة

ونبي بعد قصص
:))

الزين said...

ليش حسيت اند بتقتلينه اخر شي

مت من الخوف

اشوة يعني بدر مامات

ورغد ما عنست

وامها ماماتت حسرة عليها

واحمد ما انتحر

وزوجته يابت ولد مو بنت



تلاحظين الدراما

:)))

وايد حلوة القصة

:**

terkwaz said...

توقعت نهايه عاصفه :)
بس نهـــايتج احلى
اقصد بدايه :)

له له له ماتوقعتها من احمد
ياعيب الشوم!!

عاشت رغد زين سوت فيه

نهايه اتهـــبل

ننطر يديدج

ShLaLaT said...

وااااااااااااااي تييييييييينن تييييييييييينن


بتكملينها ؟؟؟

تكفين كملي بس خلي النهايات سعيده
:)

السعاده حلوه وانا اختج

Om MoD said...

وااااااي أشوه إنه النهاية سعيدة قصدي البداية سعيدة ...

قاعده اقرى وميتة من الخوف لا يصير في شي وأهو راد :)

الله يهنيهم مع بعض وسامح كل من يبي يفرق بين أي محبين ...وتسلم إيدج وقلمج :)

ضـاد said...

الله يريح بالج وقلبج دنيا و آخره

سمعينا الـ آمين


:)

Sn3a said...

أتيت متأخره
يايه اول وحده هالمره


عساج ماتبجين الا بدموع الفرح
ان شاءالله

Sn3a said...

واحد شاد حيله

ضحكتني بالصيده
اشوه انها عجبتكم
يسلموو

Sn3a said...

السارونه

حرام عليج انا مو مجرمه
يمكن يموت عقب العرس شدراني انا
لول

بعد عمري تسلمين

Sn3a said...

دون هوان

السويت اهو يور كومنت طال عمرك

Sn3a said...

نجمه
عساج ماتبجين الا من الفرحه

لول احس مافيني قصص خلاص سويته مسلسل مدبلج مليون جزء

نبي نقرا قصص من ابداعاتج

Sn3a said...

الزين

لووول ماني قاتلته
انتو شايفين فيني حس اجرامي

عيونج الحلوة
ومتابعتج اهيا الحلوة تسلمين

Sn3a said...

تركواز
يسلمو عالتواصل الحلو
اي والله ياعيب الشوم

نورتي البلوق

Sn3a said...

شلالات

تسلميييين حبيبتي عالتواصل
زهقتكم بالاجزاء ادري

شكمل بعد
فنيتو خلاص اهم يتفاهمون بروحهم لول

Sn3a said...

ام مود الكتكوت
يسلمو عالمتابعه قلبي
الله يسمع منج ويهني كل اثنين نيتهم صافيه

Sn3a said...

ضاد


اميييين واجمعييين
يسلمو عالتواصل الحلو

3washy said...

آه يا قلبي .. والله اني قاعده اقرا و انا بالدوام كل اشوي انش من مكاني و ارد بسرعة اكل القرايه ..

يا ربييييييييييييييييه حتى انا بعد ابي حد يحبني مثل بدر لول ..

تعرفين كنت ميته من الخوف قلت اكيد بيستويبه شي في النهايه ..

بس الحمدلله عاشوا في سعاده و هناء لول ..

مشكووورة فديتج ^_^

|:| DUBAI |:| said...

o5aaaaaaaaay Delom

Chan aStaaaaaaaaaaaaaaanSs : D

Ystaahlon Walla Kel Hal 3naaa : )

3gbaal il3waanSs Kelhm ya rab kekekekek !!

Fahad Al Askr said...

السطر الأخير لخص القصة كلها

Funny Q8i said...

ضحكتيني والله

اتذكرت نبيه وصالح

تلك هي البداية وآليكم الحكاااايه

لوووووووووول

Tوتحيّا

elq87obi said...

مساء الغلا

سنعة

ما شاء الله عليج مبدعة

أمبيه أمبيه ما توقعت كل هالإبداع منج القصه عجيبة صج صج عجيبه <<< لووووووول ترى مو قاعد أقلدج لوووووول

سنعة و النهاية أسنع حلوة و سعيدة

مبدعة

واصلي إبداعج

و بانتظار جديدج

يعطيج العافية

سلامي لج :)

ميرامار said...

في انتظار التتمة

:)

Makintosh said...

مبرووووووك اخيراااا

ZooZ "3grbgr" said...

امبيه اقولج شي يخرع
لو بس قايله تزوجوا ويابوا بنت سموها فطومه جان قلت بالضبط هالحلقة قصة اختي
!!!!!!!

لازم اختي وريلها يقرونها
حبيبتي والله
ابدعتي
مو كافي الدنيا عوار قلب
احب النهايات السويييت مثلج
كملي كملي

iSha said...

امبيه اشوه!!
عبالي بيسويها و يموت و يخرب علينا القصة :P
بس ا عجبتيني
Keep it up ;)

Sn3a said...

عواشي
بعد قلبي يسلمو عالمتابعه
ان شاءالله نصيبج يكون احسن من بدر بمليون مره

لول كلكم تحاتون اسوي فيه شي
لا عاش بتبات ونبات

Sn3a said...

فهد العسكر

بصراحه عقب قصتك ويا اطخمك توقعت كبر راسك علينا
انت المفروض تعلمنا شلون نكتب قصص عيني عليك بارده
يسلمو عالمرور

Sn3a said...

فني كويتي
مادري شنو الشي اللي قلته لول
بس جني اعرف الاغنيه

Sn3a said...

الكويت حبي

لوول ابد\ ماغلدتني
شسوي اندمج لين حبيت الشي انا


يسلمو عالتواصل الحلو
شكرا

Sn3a said...

ميرامار

هذي التتمه
يسلمو عالمرور

Sn3a said...

ماكنتوش


لول يبارك فيج
اي اخيرا

Sn3a said...

زوز عقر بقر

ولا يهمممج
يابو بنت اسمها فاطمه

عاد صج قصتي تشابه قصه اختج؟
وناسه

Sn3a said...

عايشه
لول يموت ويخرب علينا

لا مامات
يسلمو عالمرور والكومنت اللطيف

Sn3a said...

دبي

دلم دارد ميكونا :P

لول يسلمو عالتواصل الحلو اميره دبي انتي

salemuae said...

انا ماحب اقرا القصص وايد

بس قريت هل مرة
صج وااااااااااااايد حلوة والي حلاها هو طريقة سردج لها

حلو الحب وحلوة مرارته
بس هل كل نهاية تكون جي !!!؟ اعتقد ان معدل كل 20 قصة حب ممكن تكون نهايته حلوة اما الباقي فتنقلب تعااااسه !!!!؟ لول

تحياني سنعه

Free_Moi said...

وناسه


حبيت بدر

بس يحليلها زين صبرت بدون حنه


مرسي سوسو

القصه جميله جدا

حبيتها :)

Sn3a said...

سالم

هلا والله باهل الامارات
يشرفني ان قصتي جذبتك وقريتها!
صح ماكو قصص وايد تنتهي بسعاده
بس يتروالي لو كلهم انتهو بفرح محد بيحس بطعم هالمشاعر!

نورت البلوق

Sn3a said...

free moi

تصبر وتنول
احسن ما انها تحن وتعيش بامل بعيد


يسلمو عالمتابعه حبيبتي
ونورتي البلوق

تراب الكويت said...

اسلوبج اهو اللي خلى القصه حلوه
إنتي عجيبه