Wednesday, 10 June 2009

طيب..وبعدين!




ملل

والله الدراسه نعمه

عالاقل الواحد يحس ان قاعد ينجز

قاعد يتعب

مو عاله عالمجتمع


المشكله انا حتى هوايه مثل العالم والناس ماعندي

ياتني فتره كنت اوبسسد بسوالف الدايت واقرا تجارب وكتب ومنتجات

الحين خلصت

ابي شي جديد في جديد



من فتره رحت فيرجن خذيتلي كتابين

قبل

كان الكتاب مايطول عندي يومين

لان اموت بشي اسمه قراءه

الحين كتاب ماكملته والثاني ماجسته

مع اني كنت احب القصص الرومنسيه قمت اكرها

صرت احذف اي روايه من اقرى وغرقت في بحر عيناها

ولا لم ارى مثل بياض معصمها

او لما اقرى اني اعلم انها ليست لي

عساها ماتكون لك احنا شكو تصدع راسنا


جان اهب بكتب بناء الذات

اللي يعرفني من زمان يدري اني حدي تغيرت

يعني قبل كنت ماحب اقول لا واي امشي مع راي الاغلبيه لاني مابي مشاكل

الحين لحد يجرب يقول لا لما اقول اي;p

بس قلت ليمتى صايره جني المعلمه توحه خل شوي الين شخصيتي

لاني اعرف عيوبي ومو من النوع اللي احب اعاند على الغلط

شريت ذاك الكتاب الحلو

لما شريته ولا يطلع نفسه اللي احمد حلمي قراه بمادري اي فلم وقال انا غني انا غني

قلت ماعليه

للحين باقي ثلث الكتاب ماخلصته واصلا زهقت منه لان اغلبه اشيا احنا نعرفها بس نستعبط ومانسويها


وبنت خالتي تدرس علم نفس وانا استمتع بسوالف علم النفس بس ماحب احد يحلل شخصيتي

عطتني كتاب حتى والله ماني ذاكره اسمه بس فكرته شلون نعرف موقف الناس وارائهم من خلال تصرفاتهم وحركاتهم

هم ماكملته



زين مانبي نقرا..بطلنا

ابطل البلوق

ابي اكتب

كل ما اكتب قصيصونه بالوورد

اخلصها وايي ابطل بلوقي

امسحها اقول خلاص كبرتي غيري اسلوبج

كل ما بعلق على خبر بالجريده مثلا

اقول سنعه يعني اكيد كلمن قرا الخبر واكيد لما بتعلقين ماراح يتعدل الوضع



لاجد مليت

اشوه ان بنت خالتي ولدت بالسلامه فصار عندنا شوي اكشن


الله وكيلكم قمت اروح عروس:(

شفتو حاله اليأس

انا اللي عروس عيال العمومه والخوال والعمات والخالات ماروحلهم الا نادرا

قمت اروح عروس

اشبع من شوفه الاكستشن والمكياج والرموش الصناعيه والاظافر الصناعيه والمجاملات السخيفه

يعني اشكره جدامي اشوف بنتين مايواطنون بعض

هلا حبيبتي شلونج عاش من شافج

والثانيه هلا والله امبيه محلوة ظعفانه متغيره

ولما كل وحده تلتف الصوب الثاني تقلب ويها جنها ماره بزفره سوق السمج

زين مو غصب سلمي وامشي

اقعد ساعه بالعرس وامل

واحن على الفقيره المسكينه امي يلا نقوم ومتى نمشي




وان سولفت ويا الناس

يقولون قثيتينا بالشي الفلاني

ولا عليتي قلبنا بالشي العلاني

وان سكت

سنعه ليش منفسه

سنعه خو كلنا ناطرين وظايف

سنعه خو احنا هم مو مرتاحين بحياتنا

وان جاملت

انتي مو على بعضج فضفضيلنا

وهلم جرا
مسويتلي قطوة بالفيس بوك ومجابلتها
حسبي الله عليكم يالنواب انتو تتناجرون وتوقفون الديره على شفا حفره و انا اقعد اجابل قطوة



اي

وابي اروح امريكا او بريطانيا شلون:(

ابي اروح هناك واشتغل واركب قطار حق دوامي وامشي لين الجمعيه اشتريلي اغراض وامسكهم واقرا مكوناتهم

واسولف سوالف سخيفه مع اللي يبيعون وارجع شقتي واكتب ببلوقي اللي ابيه بدون ما احاتي شتقول عني فلانه وفشله ان قرت علانه

اي

واكره الروتين السخيف للوظايف بالكويت اكرهاااااا
لا والناس لين حصلو وظيفه حتى معاش سنع ماكو اللهم لك الحمد بس وين رايحه فلوس الديره مايندرا
لا واحلى شي خبر بالجامعه وبنص الخبر جمله ضعف ميزانيه الجامعه
مو حرام
جامعه حكوميه باسم الكويت مالها ميزانيه مثل الاوادم
وتبنونلي جامعات بره ها
وين تروحون من الله يللي موقفين التنميه ومانعين اهل الديره من خيرها

وصايره كل يوم لازم اكل ايس كريم سواء كان كي دي دي , ماربل سلاب, هجن دز, قولد ستون, صمدي عالم المانقو

المهم ايس كريم


وماقمت اطلع اتسوق ولا اتغدا بمطعم ولا اقعد بكوفي شوب نفس قبل

قمت لما اروح السوق اشوف اشيا ييديده بطلوها من وراي:(


بس خلصت اليوم:)

46 comments:

thespanian said...

لا لا لا .. حالتج صعبه وميؤوووووووس منها !!

بس اقولج شي .. هذي حالة اغلب اللي يتخرجون من الجامعه وينطرون الوظيفه !!

انا صراحه معاج من قلب بسالفة السفر حق امريكا او بريطانيا .. وانا بضيف سويسرا .. مو عشان شي .. بس تحسين ببساطه الحياة هناك .. الكل ماله شغل بحد .. صج هذي زينه ومو زينه .. بس عالاقل ماكو حقد وغيره وناس ماعندها شغل الا مطالع الاوادم !!

مممممم .. دشي منتديات!! .. الديره ولا ابواب :p
ولا مالج فيهم؟!

اقولج شي ثاني .. الناس هابه الحين بالتويتر .. جنج قاعده تطالعين ستار اكاديمي بس بالنت .. بس اتجابلين الناس شسسو اليوم و وين راحوا!!

وصج من تقطين عن المجمعات شوي خاصه الافنيوز تلقين ٣ او ٤ محلات يدد فتحوا !!!!

الله يوفقج ان شاءالله وتحصلين وظيفه زينه اذا ماحصلتي بعدج!!

Sn3a said...

thespanian

ايي انا ادري انها حاله الكل
المشكله حتى بارت تايم مو كل مكان يناسبني

انا عرفت البلوقرز من المنتديات
ابواب وسط والديره
الا ابواب بطلوه ولا للحين مسكر؟

تويتر ماني عارفه شقصته محد راضي يعلمني
المشكله لما اسال اقول شنو يعني تويتر
يقولون تويتر
شكلهم الناس مثلي مايدرون شسالفته;p
لا وانا عبالي تويتر بس حق اللي عندهم بلاك بيري


ان شاءالله احصل وظيفه زينه

ثاانكس

RoOra said...

wai 7da ary7lech now
! ana now 7ysa m3a alfinal ;/ t3rfen sh3or 5ays ale a3de or ma a3de hal mada!
7dch bn3ma :@
safraii 3w'9ai ng9 al9efe ale kentai ta5thena ;P or shaleh '3yrai jaw :D

طموحة مملوحة said...

لووووووووووووووول صرتي تتحلطمين مثثلي



انا الجامعة غاسلة ايدي منها والله

thespanian said...

والله مادري عنهم ابواب .. خبري فيهم عتيج حييييييييل .. وحتى الديره مادري اذا بعدهم موجودين ولا عزلوا !!!!

زين انتي مهندسه والا انا غلطان؟! .. الحين دام شكلوا حكومه راح يردون يوظفون مره ثانيه .. والمهندسين حظوظهم زينه بهالسوالف !!

thespanian said...

والله مادري عنهم ابواب .. خبري فيهم عتيج حييييييييل .. وحتى الديره مادري اذا بعدهم موجودين ولا عزلوا !!!!

زين انتي مهندسه والا انا غلطان؟! .. الحين دام شكلوا حكومه راح يردون يوظفون مره ثانيه .. والمهندسين حظوظهم زينه بهالسوالف !!

وعلى تويتر .. هذا نفس البلوق بس بسيط .. دشي كتبي كلمتين وطلعي .. والناس اتابع صفحتج وتشوف شنو قاعده تكتبين .. ولا حتى ربعج ممكن يدشون ويشوفون شكاتبه !!

الناس اكثر شي يستخدمونه انهم يكتبون عن نفسهم وعن اللي قاعد يسوونه او اللي سووه اليوم !!

دشي على تويتري وشوفي طريقته!!

دشي على سايت تويتر واعتقد لازم اتسجلين وبالبحث دوري thespanian

أبو الدســتور said...

زين بالمبارك على ماياكم
و زين انج حاولتي تكتبين مرة ثانية
و شيلي من بالج انج كبرتي و الاسلوب لازم يتغير

خلي الكيبورد يروح برحه و لا تتدخلين في الابداع

dr-maarafi said...

الله ليش شصاير لو للحين تدرسين جان تقولين ملل لي متى بندرس؟؟!!
انزين الدوام يشغل الوقت و لا ما طيقين الدوام

انا انصحج اللي تشوفين بالتلفزيون عن امريكا و بريطانيا تستانسين منه و تقولين حياتهم حلوة بس صدقيني و اسألي مجرب الساعو 6 تموت الحياة عندهم مافي شي مبطل انا هني متملل !!00

Sn3a said...

بش مهندسه رورا
شعور اني اعدي وبس حاشني بفزكس تو
المشكله السيركت حبيتها بس يبت فيها اقل من فزكس تو ;p

شدو حيلكم احلى ايام هذي
انا سافرت اول ماتخرجت بدعت بس ليمتى الواحد يسافر لول
ماحب الشاليهات وايد
مادري شحب انا

قود لك شدي حيلج وبشرينا بالقريدات الحلوة

Sn3a said...

طموحه مملوحه

قلت اول شي حرام اصدع روس العالم
جان اقول ميخالف صدوعه صغيره;p

شدي حيلج ومثل ماقلت حق بش مهندسه رورا احلى ايام ايام الجامعه

Sn3a said...

the spanian

ابواب يتروالي وقفو المنتدى والمجله للحين تنزل شحلوها
والديره للاسف كان في مشكله بالمجله فمن زمان مانزلوها بس المنتدى موجود

صح انا مهندسه بس تخصصي مجاله شركات نفطيه او بترو كيميكالز
يعني صحيح الديوان بيوظفني بس بوظيفه ماراح تناسبني
ان شاءالله اذا الله كتب شركه خاصه او الكي بي سي

Sn3a said...

the spanian

اها هذي قصه التويتر
والله نايس خل اتعبث فيه عيل

واشوف تويترك واتعلم

ماقصرت

Sn3a said...

ابو الدستور

الله يبارك بعمرك ويسلمك خيو
صح كلامك المفروض ما اتحكم بكتابتي بس ماقمت اقتنع فيها ومستحيل انزل شي انا مو مقتنعه فيه
ان شاءالله تنفرج وارد اكتب لان مايريحني غير الكتابه

Sn3a said...

Dr.Maarafi

انا احب الدراسه بطريقه غريبه
احب اسولف ويا الكتاب
مثلا
لو قريت شي صعب
اقوله يا انا يا انت خو انا ماوراي شي;p
صج نفسيا اتعب وقت الامتحانات وببعض المواد لكن بشكل عام لو اظل عمري كله ادرس واخذ بريك صغيرون ما امل

انا ابي اداوم
قدمت كذا مكان بس لما وقفو مجلس الامه حتى الشركات الخاصه وقف تقديمها
وبعضها مايوظف الا ان كان في فيكنسي او بواسطه
وانا بيني وبينك مابي واسطات للان احس شهادتي من بعد الله واسطتي

كلمن قالي نفس كلامك خصوصا اللي يدرسون بره مثلك الله يوفقكم وتردون بشهايدكم ان شاءالله
بس انا اقصد تجربه الحياه الاستقلاليه خصوصا ان هالشي ببالي من الثانويه ومحد عارضني من الاهل بس من تخرجت هونو:(

Don Juan said...

you want something different ?
Read some of Marquis de Sade's novels ;Pp
learn guitar playing ,, be the new Hyndrix ;D ,, no guitar is not for cute girls ,, ummmmmmmmmmmmmmmmmmmmm

Cooking is good and funny also ;D take some make-up courses ,, still ,, no ?

Ok then ,, i give up ,, i'm just tired of studying toooo much and understanding nothing ,, help me Sn3a am losing my mind :'(

Sn3a said...

don juan

زين اشوه خليتك تكتب;p
ان شاءالله بدور الروايات لهالكاتب ويمكن يجذبوني

تخيل ماسكه جيتار
احس كلش مو انثوي لووول


اي مفكره كل يوم اسوي كيكه عشان امتن اخواني واصير الرشيقه بينهم;p
كلش كلش الكيكه مو لذيذه انزلها الديوانيه مايقولون لا

اتعلم ميك اب
مادري انا بروحي احاول اقلل فمابي اتعلم عشان لا يصير ضروري اكثر وانجبر احط مليون كريم وبودر فوق ويهي


دون
كلنا نمر بمرحله خلاص مخنا مايستوعب
انا عشان اعالج هالشي
تشوفني يوم كامل ما ابطل كتاب
اطلع اروح سينما مع اني مو ربع السينمات
مثل ما اهو يعاندني اعانده
واليوم اللي عقب اكون رفرش
اقراه
بس مو ادرسه
مجرد اني اقراه كتضيعه وقت
فاشوفه بطريقه ثانيه ان شي مو مجبوره عليه

ترا الدراسه مو بالغصب دون
لازم ترتاح
لازم ان مافهمت بطريقه تغير طريقتك
اقراه جنك بتشرحه حق شخص عزيز عليك بعدين
ما اعز من ورقه الامتحان احد;p

عثماني said...

سنعة

ليش ما تتعلمين العزف على المرواس ؟؟

ترى خوش هواية

و عندج بعد العزف على الناي .. ترى زين الناي

ليش ما تسوين دورات لتعليم الطبخ ؟؟

خابرج زينه بالطبخ ... و معروف عنج انج فنانة بعمل الشاورما

صيري معلمة شاورما

مو غلط

:)

ترى اتغشمر وياج .. مو تسمعين كلامي

:)

esTeKaNa said...

يا صباح الكسل على السنع اللي نايم وعاظ المخده الحين
:)
بخاطري اجمع بعض بوستاتي في فتره البطاله واخليج تقرينهم
:)
انا قعدت فتره طويلة جدا
وانتي تذكريني بنفسي،صديقاتي قعدو سنه كسل،انا كنت ما اقدر ما تحملت والنتيجة :
أولا:
فكرت اول شي بعد الدراسه اني مابي اقرا كتاب
ابي اتحرك،اشتركت بنادي:
يوجا
حمام سباحة
كل اللي يطري بالج بس حسيت جسمي اللي اربع سنين قاعد بس على مكتب ويدرس قالي اشفيج استخفيني فجأة تطامرين
:)
واكتشفت اجمل متعه ترد الروح السباحة

ثانيا:
قد نكون مثقفين جدا في تخصصاتنا الدراسيه،ولكن في جوانب ثانيه نكون قد قصرنا فيها مثل حفظ القرآان وبعض العلوم الشرعيه،فتقدرين بطريقتج تغذيه هذه الامور باسلوبج الخاص

ثالثا:
انظري للجانب الايجابي في تلبيه الدعوة في عرس،انتي رجعتي تتواصلين مع الناس بس بطريقه اخرى،اليوم انتي انضج واقدر على تقيم العلاقات والاشخاص،وهذه متعه تعطيك شئ جميل
انا احب الناس
علاقاتي يا السنعه كثيره
تأملي تأملي وانتي ذكيه ما شاء الله
ستجدين في كل شخصيه وفي كل علاقة شئ يضاف لك وشئ يغيرك فيك

رابعا:
انتي تدرين انا ما اراجع شئ اكتبه؟
نادر جدا ان اراجعه
اكتبي لسنعه
قصص تناغي افكارك
تحاكي احساسك
اكتبي ولا تمسحين ،واقرأي كيف تكبرين وتتغيرين عبر السنين
أنا كتبت موضوعات يا سنعه لما اقراها اخجل اقول اشلون نشرتها؟
ومواضيع اقول واو هذا انا كتبته؟
:)
انتي مبدعه
فاطلقي العنان لروحك


خامسا:
لما نشعر بالفراغ نفكر بكل شئ سلبي حولنا،وهذا الشئ يسحبنا ويظل يسحبنا الى ان نصل للارض
!!
اوقفي على الارض
وطالعي السما
ومالج شغل بميزانيه الجامعه
:Pp~
بمعنى لا تفكرين بكل الامور السلبيه،فكري بالايجابيه ،انتي مهندسه،انسانه نشيطة مبدعه،عندك فراغ والانسان محسود على الفراغ،وعندك صحة وجمال وشباب وشهاده
انتي انسانه لا ينقصها شئ
والمسأله مسأله وقت وراح تتعينين والواقع راح يغير امور كثيرة
سابقا:
كنت اكتب بوستات تنحصر في حياتي ودراستي
حاليا:
تغيرت مع العمل والواقع،الحياه تغيرنا ولكن بطريقه متتابعه بسيطة لا نكاد نلاحظها
:))))
كتبت بوست
بس لاني فعلا حاسه فيج
الله يحفظج يارب
:*

Sn3a said...

عثماني
يغربل ابليسك

امس طلبو الاهل عشا من الغدير اللي بسلوى
لما قريت كلامك اني اصير معلم شاورما
تخيلت نفسي مجابل الواهي واقول انت جم سمووونه يبي
لووول

الله كريم ان شاءالله

Sn3a said...

استكانه
هلا باخيتي الغاليه
صباااح الورد والنوير

المشكله ان القعده الطويله بريدتني
يعني قمت اتعيز اتحرك
كنت حاسبه حسابي ماكسمم 3 اشهر واتوظف
بس لما صارت بلوة المجلس توهقنا

انا ودي بنادي خصوصا السباحه
بس الكلور يبدع بجسمي ماقدر عليه
والنادي الوحيد اللي مافيه كلور فيه اوزون يتروالي ايليزيوم وسكروه جنه مادري بيعدلونه

بالنسبه للثقافه الدينيه ففعلا انا ماقولج اني قريت مليون كتاب
لكن تعلمت اشيا وقريت اشيا ييديده
استغربت انها ييديده وانا بهالعمر
لكن مو عيب الواحد يتعلم واهو كبير العيب يظل على جهله
بس هم هالشي مايشغل الا ساعه باليوم

بس تصدقين مامر على بالي اني احفظ القرآن
اقراه واقرا بعض التفاسير اي
بس حفظ مايا ببالي ان شاءالله ببدي وبحاول



بالنسبه للعروس والمناسبات صح كلامج
الناس قام يستغربون لول استكانه
يقولون حق امي اخيرا شفنا وكريمتها;p
يعني انا الكريمه
وصح كلامج العلاقات الاجتماعيه مفيده بس بيني وبينج احب كل علاقاتي بالناس تكون من بعيد لي بعيد



تصدقين اختي انا ماكنت اراجع شي الا الاخطاء الاملائيه مرات بعد مو دايما
بس صايره مو مقتنعه
السالفه مو سالفه خجل من سالفه مثلا او مستوى او هدف البوست
كثر ما اهو اقتناع
احس مخي متقدم خطوتين عن قلبي فماني عارفه ارجع شلون او اجدم قلبي شلون
ماقمت اقتنع بوايد اشيا كنت اايدها


صدقتي بكل كلمه كتبتيها
بعد عمري جد احب اقرا تجارب ناس مرو بنفس الشي اللي مريت فيه
وان شاءالله بستغل وقتي بطريقه تفيدني مو تقنع غيري بس
ماقصرتي استكانه

الزين said...

ييب بعلق

لقيت استكانتنا قالت كل شي اسم الله عليها و ما خلت


ما عندي تعقيب على كلامها لأن عين العقل


واول شي تسوينه غيري لوك مدونتج


من زمان ودي اقول لج الألوان وايد متقاربه ومتداخلة ببعض وتسوي لي زغللة كل ما دشيت عندج

:)))


اتغشمر ترى

غيرى اللوك وجربي شنو تأثيره على مودج بالكتابه


واذا تذكرت شي ثاني برجع لج تالي


:**

Sn3a said...

الزين

اهلييين وسهلييين
تصدقين انا حتى قبل ايام النوكيا
لما اغير كفره استاانس
ان شاءالله بدورلي نيو لووك حق البلوق الحين


يسلمو عالمرور زيوونه

Anonymous said...

اذا انت حابة تجربين الاستقلالية في امريكا و بريطانيا ما فكرتي تكملين ماستر هناك ؟؟؟

و الله يوفقج :)

مطعم باكه said...

بسرعة مليتي :)

العاده الطلبة المتخرجين حديثا يقولون نبي على القليل سنة من الراحة .. :)

قدمتي طلب توظيف بالقطاع الخاص ؟
اذا تخصصكم هندسة كيميائية , انصحكم تجربون بشركة إيكويت للبتروكيماويات , يمدحونها حيل ..

وبالنسبة للقصص الي تكتبينها , ترى جدا ممتعه ومتقنه , يمكن لو تغيرين المواضيع , جربي تكتبين قصة عن سفرة سافرتيها او مغامرة , مو لازم قصة رومانسية :) ..

بالتوفيق اختي .. ترى هالفترة من الراحة راح تشتاقين لها حيل حيل ..

اسألي مجرب .. انا بعد تخرجي قعدت بس شهرين بالبيت , بعدين داومت بدوامي , وبهالشهرين كنت ما اقدر اسافر لأني كنت ناطر اتصال من الشركة :) ..

استمتعي بهالفترة .. حتى النوم راح تشتاقين له .. :)

دمتم بخير اختي وتمنياتي لكم بالتوفيق

Sn3a said...

Any.
مفكره

بس حاليا ماعندي مقدره ماليه على ماستر بره
وشروط معيد البعثه بجامعه الكويت تنطبق علي لكن مو طموحي ارجع اصير دكتوره جامعه ماحب التدريس ولا مسئوليته

Sn3a said...

مطعم باكه

لا من صج مليييت
اول ماتخرجت سافرت فضاع شهر تقريبا
بس من رديت من السفر خلاص مالي خلق شي ابي ادرس
انا صج احب الدراسه هذي اطول فتره تميت فيها من غير دراسه يتروالي

قدمت ايكويت من زماان
وقالو احنا مانقبل الا ان صار في فيكنسي
والحين بيبطلون مشروع قريبا فاتوقع يدقون بعد سنه يتروالي هذي القريبا بالكويت
;p


كلمن يقولي ارتاحي وجذيه
بس ارتحت كافي من شهر 2 وانا مرتاحه
وخوفي اتعلم عالقعده لاشغل ولا مشغله واتعب من الدوام

Shather said...

ههههه

اظن هالشعور طبيعي لكل كويتي متخرج و ينتظر الوظيفه

ساليني انا

لو كانت عندج هوايات تنسين كل هواياتج بعد التخرج

لو كان عندج خطط تستسخفينها و تغيرين كل برنامجج

لو كنتي رايئه تصيريين انتي و ابليس اخوان :P



تحسين انج متشوشه و ما تدرين شنو تبين

=\

ربنا يكون بالعون

Makintosh said...

سالفه امريكا هذي نص الشعب الكويتي يمكن يبيها

ولاتقولين ترى هم الدراسه مامثله هم الحمدلله انج افتكيتي

سنعه جربي تتعلمين الطبخ .. تشترين افلام اجنبيه واذا تبين انا ارشح لج افلام حلوه
صوري وسويلج البومات صور .. او رتبي الصور الي عندج ابتكري

صممي ملابسج بروحج او اكسسواراتج
اشتركي بمنتدى كويتيات كل شي فيه يضيع الوقت

الجـــوري..كـــلام الصمــــت said...

سنعه !!!


ضيقتي خلقي :(

والمصيبه الكل جذي

معقوله بتكون هذي حالتي بعد شهرين !!

انزين الكمبيوتر زهقنا منه بايام الدراسه مستخدمينه بالويك اند مستخدمينا,,

الكتب لايعه جبودنا منها !!!

شنسوووي انزيين؟؟؟


تصدقين انا بجرب التويتر من الحين قبل ماتخررج لوول الكل يتكلم عنه :)

جربيه يمكن يصير لج نوع من التغيير :]

مشكووره حبيبتي

Sn3a said...

شذر
هلااا والله هلا بالغاليه تو مانور البلوق ولكم باك

الغريبه اني كنت ابليسه وصايره هاديه
الله يغربل البطاله ;p

انا المشكله ماعندي هوايات عشان انساها كانت هوايتي الدراسه والتسوق فقط لاغير

حتى توه اقول حق امي خنروح السوق
تقول بتشترين
اقولها لا بس ودي اطالع واقايس
;p

بس صج صج مادري شنو ابي

Sn3a said...

ماكنتوش

يتروالي نص الشعب اليوم هون عقب اصابه 4 بانفلونزا الخنازير الله يشافيهم ويطلعهم من المستشفى بالسلامه ياارب

انا ماحب امسك لحم ودياي ني مو مطبوخ وقطعت المجابيس لاني شفت امي تطبخها
اسوي سلطات حلو ممكن فالطبخ بس حق نفس والله يخلي القواطي المثلجه مالت الدياي واللحم اللي اوريدي نص مطبوخه ;p


شريت مليون فلم
بس انا نوعي ماحب الافلام احب المسلسلات
خلصت كل السيزنات من المسلسلات اللي احبهم

لما قلتيلي صممي بغيت اصورلج الاقمشه اللي شاريتهم من هني ومن بره يعني بخيطهم
مقططين بالكبت
ترا انا كسوله صرت

منتدى كويتيات حست فيه وايد بس ماتشجعت اني اسجل فيه

Sn3a said...

الجوري

مو الكل
بس انا
لاني بصراحه كنت اعطي الاولويه للدراسه
فاي وقت اكون فيه فاضيه ارتاح بس جذيه لاهوايه ولا هم يحزنون

في ناس يتخرجون بالعكس يستانسون
ينمون هواياتهم
يشتركون باعمال تطوعيه
بارت تايم وغيره

بس في ناس مثلي
تعودو عالتعب فلما يتخرجون يحسون بشي غريب اول مره يحسون فيه لول
الا وهو الكسل
انا حتى العطل ايام الدراسه كنت يا ادرس يا اسافر يعني ما اكون قاعده جذيه اقرا ستعش جريده باليوم واطالع كل برامج التلفزيون

Salah said...

أحسن هواية الطبخ

مسلية ومفيدة لكل العائلة

:)

بالتوفيق

والصبر زين

:)

Fereej said...

 
You must try new ideas and watching your old family photo, try to walk!

The.One said...

معاج حـق .. وانا beside you ;)
الناس غريبه عجيبـه

ساعات افكر اقول هالناس هذول شنو حياتهم ؟
دايمــا قرض بالأوادم وتعليقـات مالها اول
ونفاااااااااق لـي هني ^


وصج الحياه so simple بأمريكـا
وهاديه حيل.
وساعات تحسين جنج قاعده بفلم بمقطع الــ" بكوفي شوب وتشربين قهوة حاره وتتأملين من الدريشه"

ولمـا عيوزه تمر وتعطيج ذيـج الابتسامه تقولين الدنيا كلها بخير لوووول


ومع كل هذا تظل الغربـة مثل الشوكه بالبلعوم وتنسين كل هالايجابيات والاحلام تجاه امريكا او غيرهاوتقولين مالج غير ديرتـج ..

سألـي مجرب :)
وانـا عكسج من ناحيه الهوايات ..اخ لو اعطيج نص هواياتي لوووول
جربت هوايات اد الدنيا

Sn3a said...

صلاح

انا صايره ادش المطبخ لاني صرت اسوي غداي بروحي
يعني غداي يا برجر مشوي يا سلطات يا كورن فلكس
فماكو اي ابداع بالطبخ

واصلا ماحب اشوف لحم ولا دياي مو مطبوخ
هالشي ابدا مايناسبني
وان سويت حلو اكيد باكل
هالشي مو لصالحي ابد

Sn3a said...

freej

والله سويت وايد اشيا
حتى عندي جهاز رياضي كان مهجور استخدمته
المشكله حتى افلام شريت بس ماطالعتهم

Sn3a said...

the one

اكيد الغربه مو سهله
حتى اللي يحب الاستقلاليه بيشتاق لاهله وتراب ديرته ومكانه
بس كتجربه حلوة
اتمنى اني امر فيها

يريت عندي هوايه رسم ماحب ارسم كله الون بره الحدود
تصوير ماحب واستحي امسك كامرتي كل مكان
قراءه ماقامت تجذبني
احب السوق والكوفي شوبس..تعتبر هوايه؟

The.One said...

أي أكيـد ومن ناحيه تجربـه حلوةأي , بس صعبه حيـل وزياده عن اللزووم


لووووول بحالتـج أي شي تمسكينه يعتبر هوايـــة:p



ويالله بانتظـار تكمله السلسله ..يالله تشجعي ترى ناطرين

Om MoD said...

بعد عمري والله ..


صار فترة ما أحوس بالبلوقات ...


وهم انتي صار لج مده ما تكتبين شي ...

وتوني تفاجأت انج منزله قصة بخصص لي وقت أقراها ...


وإنشاء الله تتوظفين مع إنه الوظيفة روتين دائم وملل ...لما قريت كلامج شفت نفسي في بعض الأشياء ..

الظاهر هذا شي يمر فيه أغلب الناس :)

Sn3a said...

the one

اي اكيد صعبه
الواحد مرات حياته بديرته وسط اهله صعبه
فشلون لو كان بعيد

لول انا خوفي تصير هوايتي اقشر حب واكل مكسرات عشان ارد كل الوزن اللي نزلته

Sn3a said...

ام الحلويين ام مود

اي منزله قصه ودي اكملها كل ما اكتب جزء اخير مايعجبني فما انزله بالبلوق

الوظيفه روتين كدوام يومي
لكن الواحد يشغل وقته ويطبق دراسته عالاقل جزء منها
ويكون له حيز بالمجتمع
مليت وانا اختج من هالقعده مو متعوده

|:| DUBAI |:| said...

Om Bberry's, leCh w7sha : )

Fishah said...

شوفي انا نصيحتي استانسي بهالفتره طلعيلج اي شي يديد ما هبيتي فيه وغيري روتينج
باجر بييج وقت تقولين وااااي ياحلو الايام اللي كنت فيها فاضيه :)
انا حاسه فيج .. وايد تحوشني حالة "وبعدين؟" هاذي
الله يعينج حبوبه :>

Sn3a said...

الغاليه دبي
انتي اللي لج وحشه حبيبتي
صج صج اتمنى انج تكونين خذيتي بريك وبتردين تكتبين
ترا احنا بالانتظار فديتج

Sn3a said...

Fishah

هذا اللي قاعد يصير
اصلا حتى شكلي تغير
قمت اروح سينمات
يمعات بنات
معارض
عرووس

قمت اسوي كل شي
بس هم الواحد يحتاج مكان يشتغل فيه يتعب فيه
انا وايد احب التعب خصوصا ان كان عشان شي احبه ولي ميول فيه