كل عام وانتو بالف خير
وربي يتقبل منا ومنكم صالح الاعمال
سؤال محير
تلفوناتكم فيها كاشف؟
اعرف الجواب
بس ليش كل مسج رمضاني او معايده ينختم بــ: فلانه الفلاني او فلان الفلاني
انا استغرب رغم اني مرات اسوي نفس الشي
ولا الحين هابين بسالفه ييديده
المهندسه فلان الفلاني
ولا الدكتوره فلانه الفلاني
زين ليش يعني
الكبر لله ياعالم
وبالمناسبه
تمرية-خرما جارمك- ديا وديا اللي اهيا يدتي الله يطولي بعمرها
تعلن عودتها بقوة
فها هي ديا كعادتها في كل مارمزون-رمضان- تجلس بثقه خلف الدريول الذي يتخطرف في انحاء المناطق القريبه اثناء القايله دون ان يتجرأ بالاعتراض
يمي يمي التمريه
ودلعتنا بخبز التبدون اليوم بعد
مع اني حساويه 50 بالمئه الا اني بديت من جم شهر باكل التمر
وابوي يايبلي انواع مختلفه من مكه شرفها الله والمدينه المنوره احتفالا بعوده الفرع للاصل منها العجوة واللي يذكرني بفوايدها وانها غاليه بالقيمه والسعر;p
وبالاضافه لانواع المعمول
ومع كل هذا
هالرمضان انا صايمه عن هالمغريات
اطالعهم ومبرطمه
ربنا يدييمك ياكورن فلكس فتنس;p
![](http://www.azlina.net/blog/wp-content/gambar/fitness-2002.jpg)
61 comments:
مبااارك عليييج الشهر يا حلوة
وبالعااافية يااارب : )
مبارك عليج الشهر يا سنعة
والتمر لابد منه
:)
الله يتمم عليكم الشهر الفضيل باليمن والخير والبركة وقبول صالح الأعمال
كل عام وأنتم بخير
:)
مبارك عليج الشهر
واحسن ما في الموضوع التمر
ترا شي عظيم والله
احم احم حتى لو احنا 50% ولكن لازم في جانب منك يشدك للتمر
:)
مبارك عليج الشهر اختنا العزيزة
و بعدين سالفة المسجات الناس تحط اسماءها لان بعض المرات الناس مو مخزنة الرقم فعشان تعرف منو اللي داز
بيه مبلشه اكل صحي ,
انا من بعد هالغربة اي شي يطيح جدامي ما طوفه سواء يمتن و لا يضعف !
و بالعافية
fitness :-)
مبارك عليج الشهر :)
ومن صجج من يفكر يسوي ريجيم برموضان .. خلي عنج فتنس وبتنس وهبصي على كيفج .
Shahad
اهليين وسهليين
علينا وعلييج حبيبتي
وربي يعافيج ويخليج
مدام Yin
علينا وعلييج
ايي والله صاجه لابد منه
اجمعيين يارب منا ومنكم
وانتي بالف خير وصحه وسلامه
Ducati
عليينا وعليييك اهليين
اي والله
انا ماكنت احبه لان مادري شلون ينمسك
وشكله مايوحي ان لذيذ
Dr-Maarafi
علينا وعليك دكتورنا هلا والله
صاج والله يمكن هذا سبب من الاسباب
انا بحاول كثر ما اقدر يكون اكلي صحي
شسوي كنت مسويه رجيم ووقفته شهرين ومابي اضيع تعبي
انت مالومك لازم تتمتع بالاكل بعد هالغربه خنت حيلي الله يلوم اللي يلومكم
فاتو
علينا وعليج حبيبتي
مت ضحك على كومنتج
وللحين اضحك
شيخة السنع
عيدج مبارك يالغالية
وعساج تعودينه بكل خير انتي ومن تحبين
المدونة زووزا
:p~~
وعلى فكرة
انا بعد ناويه جذي
لا للمغريات
:")
كل رمضان و انتي بخير
حركاااات
لزوم البرستيج و تماشيا مع الهبات
انا معطيه روحي العافيه
ما ابارك حق أحد
بس اللي يدز لي أرد عليه
:)
و مبراك عليج الشهر و كل سنه و انتي طيبه
شوووووووووش
يمكن ما عندج كاشف بمدونتج و ما يطلع غسمي فوق
:)
مبراك = مبارك
غسمي = إسمي
تصليح بدلياتي اللي فوق
I usually take it easy in Ramadan! Otherwise my tummy wont handle it! I ate dates and soup at iftar... after half an hour I had salad and around 6 tbsp of tashreeba :-) Its better this way ;-)
اتستبدلون الذي هو ادنى بالذي هو خير؟
:)
احد يعاف التمر وعجوة المدينة ويجابل كورن فليكس؟ وبرمضان!
الله يعطيها الصحة والعافية... ومبارك عليكم الشهر
:)
مبارك عليج الشهر
وتقبل الله اعمالج وقيامج
ممنوع منعا باتا التشويق بالبوستات ;p
هذي عليها مخالفه
يا انج تعزمينا كلنا بمطعم على فطور او سحور لوول
يعطيج الف عافيه
مبارك عليج الشهر يا سنعة
تدرين انا ماني صوب التمر ولا الخلال ولا الرطب .. بس برمضان التمرية الناطعة ما استغني عنها ابد ابد
شوقتيني الله يغربل بليسج
:P
************************
مبارك عليج الشهر اول شي مهندزه
ثاني شي .. انا صراحه من اللي يشجعون ان الواحد لما يدز مسج يبارك بالشهر او عيد يكتب اسمه تحت .. لأن مو سالفة اكو كاشف او لأ .. بس ساعات اتدزين حق ناس عندج بالكونتاكت لست وانتي من زمان عنهم ويمكن ماعندهم رقمج اليديد ان كنتي غيرتيه .. فا عالاقل الواحد يعرف من وين المسج!!
وعلى الهبه .. انا هم اشجع وما اشوف فيها كبر .. يعني لما اكتب جدام اسمي مهندس اصير تكبرت؟! .. هذا حق لي اصلا تعبت وكرفت عشان احصله فا مو عيب افتخر اني حققت هالانجاز :)
اول شي كل عام وانتي بخير ومبارك عليج الشهر يا سعادة المهندسه
;p
والله يطول بعمر يدتج يارب
اولا علينا و عليج
ثانيا لازم يحطون الاسم
في ارقام مومخزنة عندي
بس سالفة يحطون اللقب قبل الاسم
يعانون من نقص مو طبيعي
قبل كنت اقول نفس الحجي
واقول شنو هالتفلسف
الى ان شاء الله
وغيرت تلفوني ونص الارقام اللي كانت مخزنة عندي ما انتقلت الى الجديد
فاصبح وجود مثل هالمسجات فرصة لتعديل قائمتي لووول
واصبح التفلسف ضرورة وحاجة
مبارك عليج الشهر ..واخليلج ديا يارب
عاش فتنس عاش... زميلي في السحور من شعبان
حطي فوقه موزاية و شوفي شلون الزواج ناجح جدا بيناتهم
شدعوه يا حافظ ماكو نقصة تبدون مني مناك؟
و على المسج... دازيت حق الأوادم مبارك عليكم الشهر حاف
زفني أخوي... ليش ما تكتبين أسمك..
ليش يعني ما دريت أنا منو؟
الله يعينج .. رجيم برمضان ^__^
ترى تعب صراحه ..
وبعدين بسألج هل هذا الكورن فلكس صج
خوش رجيم ؟؟ يعني مجربته ولا توج تجربينه ؟؟
ومبارك عليج الشهر حبيبتي ^__^"
كل عام وانتم بخير اختنا الكريمة
واعادكم الله عليه في كل عام بأمن وأمان ورضا من الرحمن ..
انا هالسنة مقاطع التشريبة ;Pp
زوزااا
هلا والله الغاليه
لول ترا من كومنت البلوقرز عرفت ان في فايده لكتابه الاسم بعد المسج
ومنكم نستفيد
زين تسوين
SHooSh
لوول فهمت البدليات لاتحاتين
والله انا ادز للي يواصلني
ما ادور ناس مادري عنهم من سنين
بس في ناس لا والله بكل المناسبات يدزون فواجبي ادزلهم بالمقابل
Ansam
ماشاءالله عليج
اهو هذا المفروض
نظامج صح
رغم ان وزني يقل برمضان
الا اني دايما احس بثقل وكسل
جندل
لول انا خو اكل شوي من هذا وشوي من ذاك
الله يعافيج ويخليج حبيبتي
المباركيه
منا ومنكم صالح الاعمال يارب
الحين انا رفقا فيكم ماحطيت الصور
لا وديا يايبتنا اليوم كبابها السبشل الله يعيني:(
يعافيك ويخليك خيو
al-NooR
علينا وعليييج تسلمين
انتي طافج
انا كل ما ادخل المطبخ اكلي شوي
عشان لا احس بالذنب
the spanian
علينا وعليييك اهليين
هم صح كلامك
انا منكم دريت فايده لكتابه الاسم
بالنسبه للقلب
انا احس المعايدات خصوصا برمضان شي فيه وديه وحميميه مايحتاج للالقاب
يعني انا لما اسلم على بنت خالي اقولها هلا دكتوره بس كميانه
بس مادري بالنسبه لي ماشوفها حلوة ان ينكتب دكتوره او مهندسه بالمسج
بالعكس رايك احترمه وصح كلامك الواحد تعب على هالشي لكن تعب عشان وظيفه يحبها مو لقب
فاير فايتر كويتاوي
وانت بالف خير وصحه وسلامه
وعلينا وعليك لول
الله يخليك ويطول بعمر غاليك ان شاءالله
ابو الدستور
هلا والله علينا وعليك
صح كلامك فطنتوني على هالنقطه
اما بالنسبه للالقاب انا ماحبها
تقبل الله صيامكم وقيامكم
رزنامه
اي صاجين
انا مانتبهت لهالشي الا منكم
وتقبل الله صيامكم وقيامكم
Shaymona
علينا وعليج
وربي يحفظلج كل غالي ياارب
Daddy's Girl
لول اي والله عاش فتنس
ماحب المووز كلش
وبالنسبه للتبدون يه من عيوني لكن للاسف مايوصل الطعم بالايميل
انا رغم اني استغربت من الاسم لكن هم حطيت اسمي بالمسجات;p
Desserts
شوفي اهو مو رجيم بحد ذاته
بس يشبع
بس بصراحه انا اخلط فتنس ويا نوع ثاني
والسحور امس كليت سلطه
مادري شاكل اليوم
اهو هالنظام ماينفعلج ان كنتي تداومين بس انا بطاليه فما اتحرك ما ايوع
مطعم باكه
وانت بالف خير وصحه وسلامه
اجمعين عساك من العايدين
وربي يتقبل منا ومنكم صالح الاعمال اخوي
Don Juan
ايي لكن المقاطعه مؤلمه اخيه;p
عساج من عوادة ..
و الشاطر اللي ما يزيد وزنه برمضان .. :)
وانتي بخير وصحة وسلامة
:)
على طاري الدكتور .. هذا واحد من الربع توا صاير دكتور ما مداه, سيدة حط دال ونقطة .. اي والله اشدعوة يبا, الكبر لله
شوقتيني على التمرية وبالعافية عليكم تمر المدينة .. والكورن فليكس ماعندك سالفة
;p
هني وعافيه :) ومبارك عليج الشهر
مبارك عليج الشهر
:)
بالعافية يارب
مبارك عليج الشهر
و تقبل الله منا و منج صالح الاعمال
و سلامي لج :)
يا ستي لا تتحججين !!
اصلا تصير احيانا انا توصلني مسجات من ناس مو مخزن عندي رقمهم واتحير مادري منو هذا فانقهر اقول ليش هالانسان ما كتب اسمه شنو يضره !!
كل عام وانتي بخير
سلام بر ديا
وسلام بر خرميييييي
مبارك عليج الشهر
وربي يعودج
كورن فليكس برمضان @@
شلون ركبتيها هذي ؟
ربي يخليلج يدتج يابنت عمي :)
التمر بالدم يمشي
مبارك عليج حبيبتي ..ما تبقى من الشهر ..,ينعاد عليج ..
أكو أحد ما يحب التمر ما عندج سالفه ....
زين انج جربتيه ولا جان طافج نص عمرج ....التمر لذيذ :) ومفيد
بيض الصعو
عساكم من العايدين والفايزين
اشوه اني شاطره;p
mate
تلاقيه مزهب المسج من اول سنه جامعه;p
يعافيك ويخليك
والله لذيذ الكورن فلكس;p
Q8 teacher
يعافيج ويخليج
علينا وعليج وعساج من العايدين
Bahrain Fashion
علينا وعليج
نورتينا يابنت المملكه الغاليه
q8 7obbi
الله يعافيكم ويخليييكم
ربي يتقبل منا ومنكم صالح الاعمال
علي الملا
اي منكم والله عرفت فايده الاسم باخر المسج
وانت بالف خير وصحه وسلامه
لول الله يسلمك
كبرياء ورده
علينا وعليج ربي يخليج
جربيه;p
انصح فيه جداا
The One
ويخليلج كلمن يعز عليج ياارب
لول ايي اخيرا رجع الفرع للاصل;p
Om Mod
علينا وعليج يا ام الكتاكييت
ايي انا شكله ماكان يشوقني
بس والله طلع لذيذ لول
واي ليش انا ماحب التمر وماقدر احبه
كل الناس تحبه وتاكله الا انا عاره انا عايلتنا
وهم شتحبين بهالكورن فلكس
وصج يضعف ؟؟
واي ليش انا ماحب التمر وماقدر احبه
كل الناس تحبه وتاكله الا انا عاره انا عايلتنا
وهم شتحبين بهالكورن فلكس
وصج يضعف ؟؟
Post a Comment