صفحات من مذكراتها 4

انا اسف ماكان المفروض اعاملج جذيه على الاقل قبل لا اعرف ظروفج, انا عارف ان جزء من الاسباب كان شعورج بالذنب وهالشعور منتي غلطانه فيه لان بكل صراحه مريت فيه انتي تدرين اني ملتزم ومماشي ناس ملتزمين بس بنفس الوقت مالقيت فيهم اللي ارتاح اكلمه مثل ما انتي ما ارتحتي الا لي على العموم انا عند كلمتي يارغد انا موجود متى ماودج تكلميني او متى مافقدتيني مايردج الا لسانج


هذا كان الايميل اللي وصل لرغد من بدر الصبح, اهيا عارف شنو تبي وعارفه شنو المفروض تسوي لكن كلماته عزفت على اوتار قلبها لحن الماضي فهو بالنسبه لها اذن واكثر.. اهو اول ريال غريب تعرفه!

ارد؟
اي اكيد بتردين لاتصيرين بدون احساس
بس ياساره انا ان رديت ماراح اقدر اقطع وان مارديت بظل احس بالذنب اهم ذنبين بقلبي ودي احلهم اثنينهم بوقت واحد بس انتي عارفه ان هالشي صعب
شوفي انا ماعرف بهالفلسفيات انا اللي عارفته امشي مع قلبج دام انتي من الاول كلمتيه اهو من بد كل هالعالم ودام ان اهو الوحيد اللي سمعلج بالطريقه اللي تبينها اكيد بيمر يوم ثاني وبتحسين بوحده وان كلمتيه يوم وهديتيه عشر بتلعبين فيه عاد تحملي قرارج مهما كان
صدقتي

مرت شهور السنه بخفه صاحبها ثقل ببعض الاحيان وبدت علاقه رغد بدر تكبر عن الحدود اللي اهم بنفسهم وضعوها, بظني ان اي علاقه لازم ماتبدا بشروط بل ان التعامل او المواقف اللي تمر فيها اهيا اللي بتحدد مسار هالعلاقه فالنفس البشريه تميل لكل ماهو ممنوع وتحب كل خط تلون بالاحمر وتتحدا نفسها تتعداه

ليش ماعدت تخصصلي وقت اتطمن عليك فيه مره لاهي مره دراسه مره ديوانيه زين ماني طالبه غير ساعه باليوم
رغد يعني مو حلوة ربعي عندي بشبك ولا انعزم على مطعم اكنسل يعني هم هذيل ربي واهلي لازم اوجبهم وانتي بصراحه طلبج مو معقول
ساعه مو معقول؟ لو طالبه منك يوم جان شقلت
رغد احنا بتمر سنه على معرفتنا لبعض ماحسيتي ان كبرنا على النت يعني انا عرفت قصه حياتج حتى رقم بطاقتج المدنيه حافظه شالمشكله لين كلمتج بالتلفون
شنو؟ لا انسى..
انسى ليش ؟ هذا اللي عندي وانا اكثر من مره عطيتج رقمي انا مو قاعد اوخر عنج عشان اجبرج تكلميني بالتلفون بس بنفس الوقت انا ريال لي التزاماتي الساعه معاج حق فيها مو وايد لكن ساعه بنص اليوم تكون صعبه احيانا فليش اوعدج فيها وانا عارف ان جايز ما التزم
نطري دقيقه سمعت حس تلفوني
شيقول التلفون؟
احلى مسج وصلي هذا
من منو
من وحده ماردتني بعمرها وربي يقدرني ماردها طول ماراسي يشم الهوا
زين عساك تقدر
اقدر واقدر واقدر يبا انا ماطلبت هالشي الا عشان نمشي جدام
بس يابدر انت تدري هالشي صعب على اي بنت مابيك تزعل بس ابيك تقتنع بهالشي ان مو كل شي تطلبه مني جايز اقدر انفذه بالنهايه البنت مالها مساحه الحريه نفس الولد

(حاظر) كلمه توصلها بمسج من خط بدر ترسم خط جديد بدرب جمعهم
يوز عن هالحركات
زين بيوز


وبجمعه العايله
عمه الا احمد وينه؟
احمد سافر يمه صارله 3 ايام ليش؟
لا بس اسأل

تضحك عمه رغد وتساسر امها خلاص انحجزت
منو اللي انحجزت .. تسألها ام رغد باستغراب
بنتج خلاص نبيها لولدنا دامها سألت عنه معناته فقدته ودامها فقدته معناته دورته
ويه ام احمد لين تخرجت يصير خير باقيلها هالسنتين بالثانويه وعقبهم اخذيها بخلاجينها مانبي منكم شي

نور تسمع هالحوار وتروح لرغد

رغود جيكي ضبطوج حق احمدو
شنو
اي بل عليج من حظ يبونج حق المدلل الحلو اللي يدرس بره وانا غنوم السحت لازق فيني ويقول البنت لولد عمها
اخذي احمد حلال عليج مابيه عندي اللي تارس عيني
وي عشتو

ترا انت تارس عيني
مسج دزته رغد لبدر ورد عليها
وانتي تارسه علي الدنيا باللي فيها

بعد فتره طويله
وين كنت اليوم ادق ماترد وحتى المسج ماعبرتني وطمنتني فيه!
كان عندي ميتينج يابنت الناس انا قايلج ماقدر ارد
يابدر مهما كان الميتنج مايطول 4 ساعات
تغدينا وبديناه وتالي شربنا قهوه
شلون تتغدون مع بنات وتشربون قهوه
احنا قروبنا صدف بنات وشباب شسوي اقولهم لو سمحتو مايجوز خلاص زماله وانتهينا لاتسويلي سالفه
انت ليش تصارخ .. اول مره تصارخ اخاف عاجبتك وحده فيهم ولا وحده بالجامعه
حتى لو عاجبتني ما انلام ليش انا الحق اشوفج بالذمه في مره شفتج نفس العالم ياخي ماطلبت شي بس دقيقتين اشوفج وخلج مع كل اهلج ان شاءالله سايقكم بعد معاكم بس خليني اشوفج انا حتى شكلج ناسيه
بدر ترا انت كل ما تبي تطلب مني شي تسوي سالفه عشان تجبرني اسوي اللي براسك
براسي؟ يبا انا مو ياهل انا لين بطلب الشي ماني خايف انا طلبت اشوفج وهالشي عادي مابي حتى اقعد وياج بس اشوفج
يصير خير
يصير اللي يصير انتي صايره شكاكه بطريقه غريبه شفيج ترا انا مو كلوني اللي البنات كل ما امشي يخزوني ولا يحذفوني بورده
بدر خلصنا
خلصنا خلصنا بس لاتأذيني يه!


كان لبدر ما اراده
حبيبه وصديقه لاترد له اي طلب مهما طالت فتره رفضها او دراستها فهي لا بد ان توافق
وكان لرغد ما ارادته ايضا.. اذن تسمع وقلب يحوي كل ماتريد بل انه بدأ يغير فيها اشياء لم تسمح لاحد بالتدخل بها لم تعجبه ثيابها فغيرتها , لم يعجبه كم مساحيق التجميل فلم تضع سوا اقل القليل بل انه خطط لها اين ستدرس وحذرها من مصادقه فتيات الجامعه شيئا فشيئا الى ان اقنعها بان ترتدي الحجاب كما ارتدته اخواته من قبل فهو سيزيدها جمالا .. فارتدته باقتناع واقناع

الا ان ما من جريمه تبقى كامله
تصل لاحمد مجموعه من الرسائل بعضها يحتوي صورا واخرا شعرا وغيرها فيها من المعلومات الدينيه وكانت رغد ترسل بعض الرسائل كما كانت (الهبه) حين ذاك فيرى ايميل بدر فيقع في دائره الحيره
اعتادت رغد ان ترسل لبدر الرسائل منفردا ثم تعيد ارسالها لمن تريد من الاهل والصديقات بمن فيهم احمد

يصنع احمد لنفسه ايميل جديد ويضيف بدر الى قائمه المسنجر ويقوم باستدراجه للكشف عن اسمه الكامل تحت حجه انه قد اضاع ايميل صديقه بدر ولا بد انهم يختلفون برقم او بحرف بالزياده او النقصان
ويكلف صديقه بان يستفسر عن بدر وعن طبعه اخلاقه ومن يكون فيأتيه الرد انه كان صاحب مشاكل بل وشارك في عده مشاجرات بالمنطقه التي يسكن فيها وهو غير ملتزم تماما بدوام الجامعه فلن يتخرج الا بعد دفعته بسنه او بسنه ونصف على الاقل

لم يجد الوقت الكافي لان يصنع اي كذبه او يفكر باي شي فاول مافعله هو الاتصال برغد وسؤالها عن الشخص ومن اين عرفته ومدى العلاقه وحدودها الى اخره من هذه الاسئله فلم يجد منها الا النكران فالقى عليه بكل مايعرفه عن بدر فسكتت الى ان اجبرها ماسمعته من نبره عصبيه احاطت بحروفه فاخبرته القليل فثار بها
انتي يارغد؟ انتي ؟ ابوج المسكين ماحطلج هالكمبيوتر الا عشان يفيدج وانا سبق وقلتلج محتاجه لشي قوليلي ياخي لاتقوليلي اشكي لربج ساعه كلمي رفيجاتج كلمي اهلج بس تكلمين ريال غريب راعي مشاكل وساعه يداوم ساعه لا انا لو كنت نفس باجي الناس جان ترا ماحاجيتج اقربها اكلم ابوج اقوله امسك بنتك بس انا ادري انج كبيره وفاهمه وبتحلين هالشي بروحج
تقاطعه من قالك راعي مشاكل
جب ولا كلمه! انا حشمتج وقلت انج كبيره والحين مو دورج تتكلمين ولا من حقج تتصرفين انا ماني مخليج تخربين مستقبلج بيدج انتي بتهدينه وتلفونج بتعطينه لامج وايميلج بتدزيلي باسوورده وانا اللي بتصرف وان سمعت يارغد انج سويتي ايميل ييديد ولا ان عرفت انج كلمتيه ماتلومين الا نفسج ترا قسما بالله اهد كل شي وارجع والسالفه بتصير جدام كل العايله
احمد تكفا
انتي اللي تكفين .. رغد سمعيني يابابا انتي عطيتيه صورتج؟
لا
قعدتي معاه بمكان
احمد شهالحجي
شهالحجي؟ والله ماستبعد

واسترسل احمد في تحذيراته واوامره ونسي انها زهره يانعه قد تعيدها مجرد لمسه حانيه الى طريق الصواب واي قسوه قد تكسرها وحينها لن يقومها كائن من كان

وبنبره طفل باكي هجرت الالوان رؤياه تكلم رغد بدر وتسأله
انت راعي مشاكل؟
شنو؟
انت ماتداوم محاضراتك
اي محاضرات شفيج
كلمني؟
يبا انتي عبالج الجامعيين مالهم الا محاضراتهم باجر تداومين ومرات بتزهقين
انت راعي مشاكل ماجاوبتني
كنت قبل بس الحين ورويسج لا.. شفيج قلبي شفيه صوتج
احمد .. احمد ولد عمتي عرف باللي بينا وحذرني اني اقطع علاقتي فيك و .. بدر ما اقدر انا ماعرف شنو يعني اقطع علاقتي فيك
واهو شدراه!
مادري يقول سائل عنك و .. بدر شسوي
مادري
ماتدري؟
لا مادري انتي اللي بتسوينه سويه
شنو يعني
يعني اللي سمعتيه انا مابي مشاكل يارغد والطريج جدامي طويل ماقدر اجذب عليج واقولج مستعد الحين اخطبج واسكت احمد واللي اكبر منه
بدر من صجك هذا ردك



هذا كان رده .. لكن هالرد مافهمته او ماقدرت تستوعب انها لازم تفهمه.. بيوم واحد تخيلت ان اللي مره فيه جايز يكون كابوس .. مو بدر يقول جذيه .. معقوله؟ لا اهو عمره مازهق من كلامي.. عمره مارد لي طلب
اصلا بدر كان همه رضاي لاني ماكنت مقصره معاه! زين جايز يكون معصب وانا ييتله بوقت غير مناسب
اكيد كان معصب! لان اهو مايكلمني جذيه

ازدحم قلبها بمشاعر تائهه لم تعرف الى اين تتجه .. فتلك المشاعر كانت هي من يقودها في هذه الحياة , تلك المشاعر كانت تسجل اعذب الكلمات لترسلها لهاتف بدر وهي نفسها من تملك ان تراضيه حين غضبه.. مشاعر لم تمل يوما من احاطته ومرافقته .. مشاعر للمره الاولى تعجز عن التكهن بالذي سيأتي

سويتي اللي قتلج عليه
ينساب صوت احمد هادئا وحازما ليصدم بكلمات بدر المركونه في ذاكرتها
اي
تخرج خجله من فم رغد
انا بنسي اللي صار كله وبشوفج مثل ماكنت اشوفج قبل لين وعدتيني انج بتقوليلي كل شي تمرين فيه انتي على ابواب تخرج ووراج جامعه ماراح اسمح لمخلوق يخرب حياتج حتى لو كان خالمخلوق انتي
ان شاءالله
رغد
هلا
ترا اللي سويته عشانج
عارفه

يتبع