صفحات من مذكراتها 6

ومر الفصل الدراسي الاول هادئا بما تحمله الكلمه من معنى
وكلما وقعت في ضيق امسكت بالهاتف لتزيح بعض الهم من على قلبها الا ان الهاتف لم يعد يطيعها فرمته بعيدا وكلما احست بما يقبض روحها ذهبت الى واجهه البحر عند المركز العلمي وامسكت شراب الشوكولاته الساخنه لعلها ترد الحياة الى قلبها البارد المهجور تمر ساعه او مايزيد ثم تعود الى المنزل ..بل تعود الى الواقع

عندج دراسه
لا يمه تفضلي
شلون الجامعه
زينه
ام عبدالوهاب كلمتني امس وتبي تخطبج حق ولدها وانتي تدرين ماعليهم قصور وخوش ناس والولد ماعنده شروط اهو شافج بالجامعه لما قط اخته وسألها عنج
مابي اتزوج ( كان ردها مسرعا لدرجه انها نفسها نطقته قبل ان يمر بذاكرتها)
ليش؟ ترا عمرج عمر مناسب
بعدين يما ..بعدين
واحمد
اي احمد
ولد خالج .. مالج خاطر فيه
اهو كاكاو اللي مالي خاطر فيه؟ احمد مثل اخوي
وانتي كل الديره اخوانج مردج بتقعدين هني لين تشيبين زين في احد شافج وعجبتيه وانتي ماتطلعين توجبين العالم عشان يشوفونج انتي الله رازقني فيج حق عوار القلب
الله يعينج

فترميها والدتها بنظره متكرره هي مزيج من الغضب وعدم الرضى برغد .. تلك النظره التي اعتادت رغد رؤيتها منذ الصغر
الا انها لم تعد تؤثر فيها ابدا فهي تعلم ان بدايه اي حوار لا بد ان يكون هادئ ومتزن الا ان مجرد جوابها بغير نعم عند والدتها سيقلب الحوار الى تلك النظره بكل اختصار

لا تحمل الدراسه اي مفاجآت مجرد ساعات دراسيه يتخللها الحديث عن الموضه .. عن فلان وفلانه.. عن واسطات الدكتور الفلاني.. و صفات الدكتور العلاني ولان السفر في ذلك الصيف سيتأخر الى بدايه شهر اغسطس فآثرت رغد ان تسجل في الفصل الصيفي فبقائها بالبيت لن يفيدها وهو مجرد شهر سيمضي سريعا وسيحمل بعض الوحدات التي ستعجل من تخرجها

بحثت عن رقم القاعه .. لان الجدول لم يطبع سوا اسم الماده تاركا اسم الدكتور ورقم قاعته فراغ وبعد اتصالها على صديقتها دخلت القاعه متاخره بعد ان ضربت الباب وسمح لها الدكتور بالدخول

فيسألها الدكتور:
شسمج؟
رغد

فتلتفت الوجوه لتسمع مصدر الصوت ولترى من تأخر وترا بينهم وجهه مبتسما وكأنما هو طفل كوفئ بالهديه التي يريد فارتبكت ولم تسمع ماقاله الدكتور
اقولج جم رقمج الجامعي
فتقول له الرقم وتجلس في اخر القاعه

يعني انا الحين بتم طول الصيفي بجابله... شهالوهقه... عفيا رقبه ماتعبت كل شوي لاف ويهه من زين ويهه... عاد رغد قولي الصج اهو مزيون ... الله يسامحك يابدر كل شي مالنا تحكم فيه قاعد يجمعنا وانت بتصرفك رميت قلبي بابعد مكان ... انا شسوي ان كلمتني ومجرد صوتك يرد قلبي لمكانه .. لمكانه بداخلك وهالعيون اللي يحاول نظرها يحادثني انا اضعف مايكون جدامها ... ياترا البنت اللي دورها الحين تحبك كثري ولا اكثر... موجوده بالقاعه مكانا ولا خليتها تسجل بماده ثانيه عشان تلعب على وحده هني

كانت هذه الكلمات تتزاحم في رأسها الى ان انتهت المحاضره
فيمر بقربها وتكاد الدنيا ان تتوقف بهذه اللحظه فحتى هي ذاتها التي كانت تمر احيانا بجانبه في اروقه الكليه تجمدت ولم تقوى على التحرك الى ان خرج فجمعت اشيائها وخرجت فكرهت ذاتها هي بهذا التصرف اثبتت انه مازال يملك شيئا فيها .. مازال يملك كل مافيها

تصلها رساله من احمد

تغدين بره على حسابج؟
شهالعزيمه الغريبه احمد
يلا ادري انج يوعانه
زين زين وين تبي
اي مكان قريب

وبالمطعم
شلون الصيفي؟
حررر
ادري ماتنلامون .. فرن بشري هالجو بس ماعليه المهم تخلصين هالمادتين تخففين وحداتج
اي عدل وانت شبتسوي عقب التخرج
اخطبج
شنو؟
ماعرف الف وادور واقعد اتحجى حجي تلفزيون.. انا عارفج وعارف تربيتج وشاريج واليوم ياي اكلمج عشان هالموضوع
بس احمد انا توني بالجامعه و جدامي...
يقاطعها: وانتي بتمين تدرسين وانا بشتغل ومن تخرجين اكمل ماستر بره واخذج وياي رغد هالاشيا انا عارفها ومو انا اللي بمنعج عن دراستج ولا بكون حاجز انتي فكري واي شرط عندج قوليه ترا عادي بالاصل انا ولد خالج يعني لاتستحين مني قولي اللي ودج وانا حاضر حتى لو مو عاجبتج لحيتي اصير راعي سكسوكه بعد شتبين


وحين عودتها تنظرها امها بابتسامه فعرفت حينها ان امها علمت بطلب احمد قبل ان يسألها

يعني تدرين؟
اي ادري يما وما حبيت اتدخل بينج وبين ولد خالج بس ها شرايج تبين عرسج الحين ولا نخليه براس السنه
عرسي؟ هذا وانتي تقولين ماتبين تتدخلين وافقتي عني
اي بعد ليش ترفضين انتي واحمد الكل يدري تبون بعض ولا جان مو 24 ساعه مجابلين بعض بالزواره ولا بهالمسجات وهالانترنت يعني ليش بتكابرين على امج
فكرتي؟
يما شرايج تسأليني هالسؤال عقب الكورس الاول
وليش؟
يما تو الناس تو الناس بستانس بعمري بروح وبرد مالي خلق مسئوليه!
اعوذ بالله منج من بنت ماعمرج بردتي قلبي
انتي عندج البنت تنولد عشان تترزز بالعروس والاستقبالات ويطالعونها الناس ووتتزوج وتسوي عرس الناس يتكلمون فيه وتييب درزن عيال وتقعد بس ! انا بتخرج وبسافر وبدرس وبروح وبرد مالي خلق ريل فوق راسي يحن ولا لي خلق عيال يركضون وراي وانا اصلا للحين ابي احد يداريني خلاص متى ما ابي اتزوج اقولج
انتي شفيج قدري موقفي! هذول اهلج ماقدر اردهم .. عيب يما عيب...
و تبيني اتزوج واتدبس على بو ان عيب اردهم.. احمد مافيه شي بس مابيه يما مو غصب مو غصب

وبعد عده ايام يتصل احمد
شقلتي؟
مو ببالي هالشي الحين
منو ببالج؟

ازعجها ذلك السؤال فقد كان من غير اللائق القاؤه عبثا لازعاجها ولم تعتد ذلك من احمد الا انها لم تهتم كثيرا
وكان كل مايدور برأسها هو بدء العد التنازلي على انتهاء الفصل الصيفي الذي سيعلن انعدام اي فرصه لرؤيه بدر فهو سيتخرج ولن تراه بعدها الا صدفه ان سمحت لها الحياه بتلك الصدفه

في احد الايام تفقد رغد وجوده ولا تراه.. حاولت الا تهتم ولم تستطع فتسلل قلبها الى انحاء الفصل ليبحث عنها الا انه لم يجده فحاولت ان تقنع نفسها لربما خرج مع اصدقاءه فهو ليس معروفا بالمثابره
الا ان غيابه تكرر لثلاثة ايام متتاليه وباليوم الثالث سأل دكتور الماده احد زملائه عما ان كانت بدر قد اصبح بحال افضل

شفيه؟ مرت دقائق الساعه الدراسيه وكأنها سنه باكملها بل ان كرسيها يكاد ينبذها فلم تتجمل الدقائق الاخيره فاستأذنت الدكتور بالخروج ولم تشغل بالا لتحذذيرات عقلها ولافكارها فتسارعت ايديها لتتصل به

فلم يرد الا بعد الرنه الخامسه ويصلها صوته متألما الووو منو رغد
اي .. شفيك ؟
حادث بسيط والحمدلله انا احسن
وينك
بالمستشفى
اي مستشفى واي دور واي غرفه
ليش
قولي!


اغلقت الهاتف واهو مازال يتكلم

وفي هذه الاثناء ارسل بدر والدته الى البيت معللا زياره اصدقائه الا انه سألها بسؤال عرفت منه ان من سيزوره ليس اصدقاؤه البته

يما اكو جل؟
جل شنو؟

حق شعري
وانت حق منو بترزز حق ربعك اللي ينامون عندنا بالديوانيه
يما دبريلي جل وخلاص
زين مو تعصب .. ماتبي اييبلك موس تضبط لحيتك بعد
تحرشين يام بدر... بس ماني رادج ييبلي وطلعي روحي نامي كلشي ولا راحتج
عيارتك يا يما

ضربت الباب ضربه واحده خجلى ارادت بها الا يسمعها فتتعلل بنومه وتذهب الا ان حواسها لم تعد تطيعها فهي ظمأى لرؤيته لصوته ولوجوده فزادت على الضربه..ضربه اخرى
ودخلت ولم تحب رؤيته وقد اسر الجبس حريته

الحمدلله على السلامه
الله يسلمج.. مم مشكوره
وانت بالله ماتيوز قولي حق شنو دايس .. ماوراك اهل ينطرونك ماوراك مستقبل ولا خلاص مستعيل على رزقك
يضحك .. لو ادري بتييني وبسمع هالزفه الحلوة جان سويت حادث من زمان
ويضيف
فقدتيني؟
لا
عيل ليش دقيتي
اسوي الواجب واكسب فيك اجر
بس
اي.. توني ادري اللي يسوي حادث يحط جل للزوار
ومحدد لحيتي بعد شوفيني

ضاعت الكلمات .. حاولت ان تنتقي الافضل منها قبل ضياعها الا انها لم تستطع
فيقول
اشتقتلج
حتى انا اشتقتلك عن اذنك

وحين يعود للكليه تتظاهر بتجاهله فيرسل لها
شفيج؟
ماكو شي الحمدلله على سلامتك..بغيت شي؟
سلامتج

فيني وايد اشيا,
فيني لك شوق ماينوصف.. وبجوفي قلبن منتلف ..
وزولك بعيني منتصف ...
وحظوظي رديا...

وباخر يوم!
انا خلصت اخر فاينل وحبيت اسلم عليج واقولج تسامحيني .. انا مالي ويه اكلمج بالتلفون لان مبين للحين زعلانه بس ان شاءالله اقدر اعوضج تالي لما اتوظف ان الله قدرني
مو زعلانه .. عالبركه التخرج وحط بالك على نفسك


يعوضني شلون!
الظاهر كان كاتب شي وطلعت بدليه مادري

الفصل الدراسي التالي كان ممل .. جدا ممل جايز انها ماكانت تشوفه او كل اللي تقدر عليه تذكر وقفته عند الدرج.. كلامه ويا الدكتور الفلاني.. الزاويه اللي يدخن فيها.. كل اللي بقى ذكرى فقط

وفي مكانها .. هناك في الواجهه البحريه تحكي للبحر ما مرت به وتشكي مدى اشتياقها
حسبته حب يهال.. تهقى انا ياهل للحين؟ ولا ان حب الياهل كبر وياي
ولهت عليه حيل.. اشتقتله... بس لو يبررلي ليش سوى جذيه
خل يجذب ... ماعليه بس خل يقولي ليش رد علي ذاك الرد...
ليش محد غيره ترس عيني
وكل من اشوفه اقارنه فيه

شتسوين هني
مكاني هني
انت شتسوي
انا كل يوم امشي بالليل بس اليوم ييت المغرب..حظي حلو
توظفت
قبلوني ببنك والحين بتدرب الا شلون الكليه بدوني
اتينن ماعمري جابلت دراستي جذيه
اي لان مالقيتي احد تجابلينه ماتنلامين انا وايد لهيتج
انت خبيث
انا احبج .. وين رايحه!
البيت باي

يتبع