Friday, 5 September 2008

صفحات من مذكراتها

بيدها جهاز الرموت كنترول
والذي قد تعود على مراقصة اناملها فهو لعبتها الوحيده بعد احرف اللاب توب
واحيانا تدمجهما معا
فهذا مايقتل وحدتها..او ينسيها تلك الوحده احيانا
ولاصدق القول
هذا مايشعرها بوحدتها في غالب الاحيان
ترا جهاز الهاتف النقال صائم كما هو الجميع في هذا الشهر
الا ان صومه دائم
تستغرب من حالها
فهي بنفسها لاتحب كثره العلاقات الاجتماعيه
الا انه وحدتها انستها ماتحب
وماتكره

بقلبها تقول:حتى مايدق بالغلط.. زين مسج اعلاني..راضيه بمسج فواتيري ..الله والفواتير يتروالي اني الوحيده بالكويت اللي فواتيرها ماعدو 21 دينار

صوت امها يكسر (تحلطمها) المستمر!
متى بتقومين تبدلين؟
وليش ابدل! منو بيزورنا؟
محد بيزورنا ,يعني ماتدرين زواره بيت يدتج هذا ثاني اسبوع وانتي للحين ماباركتيلها بالشهر!
مالي خلق ازور,,اشوفهم بالعيد مره وحده
وانتي كله شايفه عمرج عالناس؟ وكله مالج خلق احد والله لو شوق داقه عليج تطلعين تفرفرين بالسوقه يصير لج خلق
اوكي
دقي على بنت خالج ترا من يوم ملجت وانتي حتى ماباركتيلها
مادقيت على خواتها يوم تزوجو بدق عليها اهيا شمعنى مو من حبي لها
اي مادري منو تحبين انتي
محد
ويه عساج ماحبيتي وترا يوم الثلاثه استقبال نور بعد قولي مالج خلق
ابفهم انا متى كان لي خلق زيارات اجتماعيه شنو حلاو خطبه ملجه حنه عرس استقبال بس مليت يه
اي روحي جود احد يشوفج ويخطبج
مو انتي هذا اللي هامج احد يشوفني ويخطبني صح
والله انا ماودي حتى عدو يشوفج وانتي نفسج جذيه مع الناس تقعدين عندي ولا تفشليني باجر كافخه الريال ومناجره اهله
اي احسن شفيها القعده كاني تخرجت وبتوظف باحسن مناك وبروح دورات وبكمل ماستر بعيش حياتي
باجر بتحسفين لا رحنا ترا حتى الاخوان ماقامو يشيلون اهلهم فما بالج بخواتهم!
اعوذ بالله يما شفيج اليوم ,جنج تأخرتي على بيت يدتي روحي ترا انا حافظه اسطوانتج
ماتستحين!

تتنهد وترد اللاب توب جدامها
تذكر ايام اول
ايام ماكانت ويا بنات خالتها مثل الخوات
بس
كانت تغار
تغار من اهتمام امها باي احد غيرها
وماتحب اي احد يقلدها باي شي
بجر امها وابوها
ودلوعه يدها ابو ابوها لانها ساكنه ببيتهم ورباها مثل ماربى عياله

كبرت شوي
وصارت محل مقارنه مع بنات خالتها
بنات رفيجات امها
رغم تفوقها الا ان امها كانت تطلب منها المزيد والمزيد
كانت تبي تشوف فيها صورة شي اهيا ماعاشته
او جايز عاشت بعضه وتمنت بنتها تعيد تجربتها بصورة افضل

بالثانويه كملت شخصيتها او خلنا نقول شخصيتها السابقه
ماعادت ترضى باي مقارنه
جايز ضيقها من هالشي بنا فيها حاجز غرور خصوصا انها عايشت شله بنات لهم كلهم نفس الطبع نفس الذوق ونفس الاسلوب
ووجود بنت خالتها بمدرستها ماكان ابد شي يسعدها الا بوقت واحد لما كانت تتكرم بحفلات التفوق بعكس بنت خالتها

ترجع فرحانه توري اهلها صور الحفله بعد مايطلعون
امها تتنهد
مسكينه نور اكيد ضاق خلقها
اففف تنطقها بصوت عالي
وبداخلها صرخه تكتمها تشق الصور
الام تتفاجأ:
شفيج الحمدلله والشكر ينيتي؟
اي ينيت
وقبل اي رده فعل من امها يدوي صوت غلق الباب
غلقه عن العالم..غلقه عن امها ورده فعلها اللي ماتغيرت طوال سنين الدراسه
تغلقه عن واقع كارهته
تغلقه عن كل شي
وتفتح الكمبيوتر
وتفتح عالم خيالي اشبع جانب فيها وبنى جزء من شخصيتها وحطم جزء اخر
باختصار
عالم تمنت تكون فيه للابد رسمت فيه كل اللي ناقصها
وحلت فيه كل عقد الطفوله
وحققت فيه كل احلامها
او
هذا اللي تصورته




يتبع!

22 comments:

Free_Moi said...

واي اكره شي بالدنيا لمن اللي حولينج وجودهم وعدمه يصير واحد

والا لمن يقارنونج فبنات خالتج وانتي تدرين انه انتي احسن منهم بكل شي بس دايما يخلونهم اهما الاحسن

اكره شي لمن الكل يدري انج ماتحبين العلاقات الاجتماعيه ويحنجون نزلي قعدي شحقه شليخه عليهم


nice post

waiting for the rest of it

الزين said...

كملي

البنت هذي فيها مني وايد

فوق ما تتصورين

كملي

انتي جنج تقولين قصتي

:**

Sn3a said...

فري موا

اي والله واحد
المشكله مو انج احسن منهم
لان الشخصيات وتمايزها موضوع نسبي
لكن يقارنونج بصفه او ثنتين من مزاياهم ولين تحجيتي عن عيوبهم يصير قلبج اسود وماتسترين عالناس

نايس كومنت خيتو
يعطيج العافيه

Sn3a said...

الزين
هلا بالزين كله

ان شاء الله بكمل باقرب فرصه
يسلملي هالتواصل الحلو

Sowhat said...

جميلة و اجمل مافيها واقعيتها
احلام الأهل ... ومقارانتهم تظلم الطفل وبسبتها يا انه يصير شي مو طبيعي او انه ينكسر بسبب لهاثة وراء ارضائهم وسماع كلمة حلوة

ساعات لما افكر تفكير الابوين مالومهم ...
وساعات احسن انه over doing it

ناطرين التكلمة :)
ابدعتي مثل العادة

Najmah said...

سنعة شلوووونج
:*

انا اندمجت وااايد

وتحبطت لما شفت يتبع
:))

يالله كمللللي

مُحَسّدْ said...

تكسر الخاطر :(

فريج سعود said...

واذا انقطع النت اشبتسوي ؟

Sn3a said...

دكتور سو وات

شكرا كلامك الاجمل
عدل كلامك بخصوص نقطه الاهل
لازم يشدون على عيالهم
بنفس الوقت لا يزودونها

يسلمو على هالتواصل الحلو

Sn3a said...

هلاا نجمه
هلا الغاليه

لا تحبطين ان شاء الله اكملها
وان شاءالله تعجبج التكمله

Sn3a said...

محسد

اي والله
بس ملسونه لاتحاتيها

يسلمو على المرور
منور البلوق خيو

Sn3a said...

الحاج فريج سعود

اي دا ياعمي الحاج
هوا مافيش بنت من الإصص بتوعتي بتعجبك؟

اذا انقطع النت
تشارك بمسابقه شعريه

والله مادري شقولك فريج سعود لووول

eShamiYa_RockS said...

فيني منها..أو فيها مني وايد

فوق ما تتصورين

واي حسيت البوست وايد قريب مني

بس بدون سالفة الغيرة.. اهما يغارون مني
:/


waiting for the rest.

CeCe said...

القصة حدها عجيبة وأحس إن في وايد بنات على نفس الحالة وآنا فيني منها شوي بعد (أو العكس)...

ناطرين تكملة القصة...

|:| DUBAI |:| said...

كملي سنعة

بانتظار ابداعج اليديد

مبارك عليج الشهر الفضيل

و كل عام و أنتي أقرب الى الله

: )

!!

esTeKaNa said...

يا مسا السنع كله
:*
كيف للهاتف ان يصوم
كيف يطاوعه قلبه ان يتركها وحيده
تتطلع فيه في كل حين
عله يضئ
يهتز
اويرن بأي لحظة
ولكنه بخيل
لا جدوى من الانتظار
وما اقبح الانتظار
!!
مميزة هي
اراها جميلة
ذكية
ولكن...بعدها عن الجميع
مؤلم لها قبل الناس
:(
دائما ما نسمع الكثير
وتحيط بنا تعليقات من الجميع
ولكن
تعليق الام وكلامها دائما اوقع
وبالتالي...جرحها يكون اكبر
صح؟

الانترنت عالم
نعمة
يعوض نقص البعض
ويشبع حاجات البعض
ويرسم عالم لمن ليس له عالم احيانا
!!



صفحة ممتعه
مؤلمه
كلها واقعيه
وبانتظار باقي صفحاتها


الله يحفظج
استمتع بقرائتك دائما
:)

Sn3a said...

الشاميه روكس

اهلين وسهلين بعيال الشاميه
تسلمين عالمرور وهالكومنت الحلو
ان شاء الله اكمل عن قريب

Sn3a said...

cece

البنات يتشابهون وايد بطريقه محد يتصورها
لكن يختلفون بكذا صفه تبني شخصيتهم المستقله
يسلمو

Sn3a said...

دبي
هلا باهل دبي الغاليه
ان شاءالله بكمل تسلمينلي على هالتواصل الحلو
فديتج

Sn3a said...

استكانه
هلا والله بالغاليه
مسا الورد وريح الهيل

فعلا فما اقبح الانتظار
خصوصا انتظار مالا نعرفه

اصبتي يالغاليه
مؤلم لها قبل الناس

فديت الكومنت وصاحبته
يسلملي هالتواصل اخيتي

feelingstalk said...

المقارنه واايد صعبه خاصه اذا كانت من الاهل وبالاخص الام
انا ماادري ليش الام ما تتقبل ابناءها وتحبهم بالشكل اللي اهم فيه

تقبلوو عيالكم يا ناس

New Bride said...

واااااي امبيه
صج صج

مشالله قصة واقعية عجيبة

امبيه نفس حالتي

بكل شي مقارنات

و اخر شي الحين

انه فلانه حملت

و انت لي الحين

عاد انا شكو الا هالشي انا مالي شغل فيه

امبيه انا انا هالبنيه