Saturday 6 September 2008

صفحات من مذكراتها 2

قبل هذا الوقت بتسع سنين
وفي العطله الصيفيه حيث تمر النفس بموجات من الوحده او البهجه قد تكون في قمتها حينا
وتلمس القاع حينا اخر
اعتادت ان تقضي الايام في بيت خالتها فلربما يكسر اجتماعهم ضيق وطول العطله التي قضو السنه الدراسيه بانتظارها الا انهم استمتعو باسبوع واحد منها وترقبو ابتداء الدراسه!
رغد تسأل نور:
شبتسوين
بشبك
شلون! متى اشتركتو؟
ابوي راح حولي امس واشترك طافج تدرين احس كل الكويت يعرفون يشبكون الا احنا
زين علميني

لما تذكر رغد هالبدايه تقول(ريتني ماتعلمت!)
الانترنت كان يمثل شي واحد في تلك الفتره
ايميلات وبرنامج محادثه اسمه mirc
وباب يفتح على قصص بعضها حقيقي والاخر منسوج من خيالات الرواد


مامليتي؟
لا بس تبين تشبكين شوي
اي ابي

اختاريلج نك نيم
مممم شحط
شدراني يلا خو اي شي

زين بحط نكي رغرغ

شنو دوا مضمضمه؟ وبعدين مريوم رفيجتي قالت لاتحطين شي يدل على اسمج

زين زين..

اولااا كل هالعالم قاعدين هالحزة الساعه 12 ماينامون

نامي انتي حبيبتي هالحزة اهيا اللي الناس فاضين فيها


مسا الخير
مسا النور
شخبارج
زينه خير يبا؟
خير يبا؟ خير بويهج شدعوة
امر
انتي داشه النت تزفين العالم مايامر عليج ظالم انا ابي اسولف وياج زهقان
اوكي
شسمج
وانت شكو
ايا شقول! خو سؤال
اسمي رغد

وبعد ان تكتب الاسم تصرخ عليها نور
شفيييج قلتلج لاتقولين اسمج!
يعني ماكو رغد الا انا خو بس اليوم بشبك ولا راح ادري عنه

وانت؟
انا بدر

وبعد ان استمر الحديث حول العمر البرج الهوايات السنه الدراسيه
اذن المؤذن معلنا صلاة الفجر مما يعني ان البنات لابد ان يتركو الكمبيوتر ليصلو حتى لايصيبهم عقاب عظيم نظرا لسهرهم الى هذا الوقت

زين انا بقوم اصلي وانام باي
زين رغد بتشبكين باجر؟
ماعندي انا بنت خالتي تشبك
باي
الله معاج


بعد الغدا واهم يطالعون مسلسل مدبلج من سوالف ام بي سي
نور تقول:
بدر يسلم
منو؟ بدر امس؟
اي بدر امس واليوم يسلم شبكي يبي يكلمج
زين بعدين
وين اللي مهي شابكه وكله يوم واحد
زين مو لازم اشبك
لا شبكي
وبعد بضع ايام تتكرر تلك المحادثات بين بدر ورغد ورأت رغد شخص اخر هارب من الواقع وتصادمات الوالدين الى عالم الشبكه

قولي حق ابوج يشتركلج ترا ماصارت كل ما ابيج اطر اكلمج من المليقه بنت خالتج
ويه ابوي صعب مالي خلق حتى اطلب
طلبي وجربي
يصير خير
سولفيلي شسويتي اليوم

واستمرت تلك المحادثات
كانت عالم اخر لم تشعر فيه الا انها تعيش شخصيتها
لم تلق بالا لتحذيرات والدتها ان الشباب نواياهم سيئه وهالايام مايبون الا يخربون سمعه البنت وابوج ترا عصبي وعمج واعيال عمج .. الى اخره من اقربائها والذين سيربونها ان ماحدث وخرجت لمسافه سانتي واحد عن الخط المرسوم لها
تركت لهم الواقع
فلم تظن انها ستعاقب لوجودها في عالم خيالي
لتحدثها بما تشاء ساعه ماتشاء
لوجود من يسمعها تاره وتسمعه تاره اخرى
فكان هذا الامر وحده كفيلا بان يحيي فيها شجاعه تركتها منذ زمن واصرت على والدها بان ياتي لها باشتراك اسوه ببنت خالتها الا انها اشترطت منه ان يكون افضل وذو ساعات اطول فهي ليست( بالقلاده) ولن تكون!

تهقى انا وين؟
يعني وين
انا بداري
حلفي!
والله
شوفي عاد قومه من النت ماكو مثل مابهدلتيني وغداي وعشاي كله على طاوله الكمبيوتر بتصيرين جذيه
تضحك..اوكي اوكي لاتبدا بالشروط بقولك شي
خير يبا؟
بسافر
ليش؟!؟ ومتى
شنو ليش بدور خو نص الديره تسافر بالصيف بروح عقب اسبوع بس ماراح اطول بس شهر...تضحك بخبث
30يوم وماراح تطولين عيل لو بتطولين جان شسويتي
امها تطالعها وتستغرب
شفيج وايد تبوسمين؟
ماكو شي ماتبيني اتبوسم
لا بس مادري شفيج عكس قبل
ماكو شي ماكو شي

وتحادثها ساره زميلتها في المدرسه واقرب شخص لها من الشله
شقال بدر وشصار اليوم ؟
ماكو قلتله بسافر وجذيه تخيلي يقول راح يوله علي
جذاب كلهم يقولون جذيه
منو كلهم؟
الشباب
وانتي شدراج شيقولون الشباب
والله امي تقول


تمر ايام السفر بطيئه فلاول مره تشتاق رغد لشي في الديار
او لنصدق القول
احد بالديار
احد اعطى تلك الديار روح!

اولعت رغد بكمبيوترها ودخلت محلا متخصص يبيع قطع مختلفه للكمبيوتر باشكال متميزة والوان لافته
وبعد ان اشترت ما ارادت دعاها والدها لتناول ايس كريم تنتصفه قطعه من الشوكولاته

بابا شلونج ويا النت
تمام!

مما يعرف عن رغد انها خوافه
دائما يتراءى لها ان الجميع قد علم انها كلمت بدر وتصادقت معه عبر خبوط الشبكه
وظنت ان اباها علم بالموضوع

بابا انا اعرفج واعرف تربيتج
وصدقيني ماقولج هالحجي لاني مو واثق فيج بالعكس انا اقول لان بنيتي كبرت ولازم اسولف وياها باشيا تناسب سنها
بلهفه يعتريها الخوف
اي ليش شصاير
مو صاير شي بس ابيج تديرين بالج انتي بنيه متفوقه ومحافظه على صلاتج انا حطيتلج النت عشان ينفعج بالدراسه ويونسج اذا زهقتي ترا تلقين فيه نص القصص اللي تشترينهامن المكتبات
بس انتي دوري وين وانا اخلي ولد عمج يعلمج وين تلقينهم ان مالقيتي

ان شاء الله.. ان شاءالله يبا
وافلحت قطرات مطر لندن ان تخفي دمعه تسللت من قلبها
لم تشعر يوما بالذنب مثلما شعرت به هذا اليوم
ذهبت زهوة حاجياتها الجديده
وتلاشى الشوق الذي زاحم الدم في عروقها
هي في داخلها تعلم بل متيقنه من ان هذا الامر ولا بد ان يكون غير جائز سواء اجتماعيا او دينيا فهذا ماتعلمت عليه الا انها احتاجت لتلك الفسحه احتاجت لمن لا يضحك على امالها ويحبط من احلامها الا ان امال والدها كانت اعظم بل هي اعظم فلا لحظه في العالم تستحق اكثر من فخر اباها بها

منذ رجوعها وهي لم تتجرأ الى النظر الى شاشه الكمبيوتر التي كساها الغبار وكلما بدأت نور بذكر سلام بدر وسؤالها واستغرابه غيرت الموضوع وتعذرت بان جهازها قد اصابه عطل ما او ان اشتراكها قد انتهى
يتبع

31 comments:

Anonymous said...

الوحدة تصنع ما هو اعظم !

Najmah said...

صح كلام محسد
الوحدة تخلي الشخص ينسى كل شي بس يدور شغلة مختلفه تكسر وحدته
خاصة اذا ماكانت وحدة بالجسد
كثر ما اهيا وحدة بالشعوور
!!

متابعيييين
ولا تطولين
:**

Sowhat said...

اشوة انه قبل 9 سنين بس ...
جان كنت انا بدر :P

اتغشمر ,...

الأي ار سي ... نعمة و نقمة ... مثل اي شي ثاني ... وسوا سوايا بالكويت

ننتظر التكملة باحر من الجمر

ضـاد said...

واقعي وايد


ناطره التكملة



:)

كاريكاتير said...

السلام

مدونة جميلة جدا

اتصور ما راح ترضين يصير فيجمثل ما صار فيني

التفاصيل في مدونة
موضوع بعنوان انا وجريدة الجريدة توارد خواطر كلاكيت ثاني مرة!!

Anonymous said...

قصه واقعيه .. حدثت لكثير من البنات .. قصه ذكرتني بالماضي ايام mrc

NewQ8 Bride said...

ويييييه ايام

اتوقع الأنترنت اول ما هبوا في الناس بالكويت وايد صارت فيه سوالف

الله يستر على الجميع و يستر على عيال هالوقت

الحين الوضع يخرع اكثر

mo3ath said...

نبي التكمله :)

كلام واقعي جدا وشعور الوحده والملل قاتل

esTeKaNa said...

أقسى احساس على القلب احساس الانسان بأنه خيب ظن اقرب الناس له
!!
وبالمقابل...قمة العذاب صراع العقل بكل ما يحمله من اخلاق ومخزون مبادئ
ومابين القلب الذي يون من وحدته

بوست قمة بالواقعيه
وبانتظار المزيد من المبدعه سنعه
:)

Super Woman said...

قصه واقعيه

تعور القلب

شعور حلو لما تحسين عندج احد يسمعج وفاهمج
بس تأنيب الضمير يعور القلب ولا يخليج تتهنين بشي

القلب يهوى
والعقل والاخلاق يمنعون

ومابين هذا وهذا البنت تعيش بوضع مأساوي

أبو لطيف said...

...........

لم تشعر يوما بالذنب مثلما شعرت به هذا اليوم
ذهبت زهوة حاجياتها الجديده
وتلاشى الشوق الذي زاحم الدم في عروقها
هي في داخلها تعلم بل متيقنه من ان هذا الامر ولا بد ان يكون غير جائز سواء اجتماعيا او دينيا فهذا ماتعلمت عليه الا انها احتاجت لتلك الفسحه احتاجت لمن لا يضحك على امالها ويحبط من احلامها الا ان امال والدها كانت اعظم بل هي اعظم فلا لحظه في العالم تستحق اكثر من فخر اباها بها

...........

الفطرة السليمة في داخلنا جميعا

تحتاج فقط من يستنهظها ...في الوقت المناسب


احسنت في عرض الواقع ... والغوص في مشاعر قد لاتظهر للاخرين

وقانا الله واياكم شرور انفسنا

حفظك الله ورعاك

SHAHAD said...

احس اني عشت القصه
اسلوبج عيشني مع رغد
وكأن الشخصيات تتراءى أمامي
أهنئك على هالابداع
وناطرة التكملة بفارغ الصبر
لا تبطين : ))

ومباارك عليج الشهر عسولة

kuwaitawy said...

انا اتفق مع محسد


الوحده تصنع ماهو اعظم



ذكرتيني بايامي مع الانترنت والايرسي


اياااام





---------


ناطر التكمله

Sn3a said...

محسد
الوحده جايز تغير افكار وعادات تربى عليها الانسان طول عمره

Sn3a said...

نجمه
عدل كلامج
ان شاءالله ماراح اطول

Sn3a said...

دكتور سو وات

تهقى جم بدر اكو بالبلوقرز:P
يتروالي الاي ار سي البرنامج الوحيد بالدنيا اللي ماله فايده بس كنا ندخله فراغه

يسلمووو

Sn3a said...

ضاد

يسلمو عالزياره الحلوة
خوش نك نيم

Sn3a said...

كاريكتير
يسلمو عالمرور
ورديت عليك ببلوقك خيو

Sn3a said...

feelingstalk

صحيح وايد مرو بنفس الموقف او بموقف مشابه

يسلمو عالمرور الحلو

Sn3a said...

نيو برايد
صدقتي
سوالف الحين وين وعبط قبل وين

الله يستر عالجميع ويهدينا ويهديهم

Sn3a said...

معاذ
هلا اخوي
ان شاءالله بكمل
يسلمو عالتواصل

Sn3a said...

الغاليه استكانه
ماكو اسوأ من خيبه الامل
يسلمو على هالكومنت الحلو

Sn3a said...

شلالات
عدل كلامج
الوقوف بالمنتصف صعب

Sn3a said...

ابو لطيف

الانسان غالبا بداخله فطره سليمه بريئه وبامكانه يرجع لها
وبامكان الغير يرجعه لها

لكن الفطره السليمه لوحدها ماتعالج الوحده
الايمان القوي المصاحب لهالفطره يعالجها


يعطيك العافيه على هالكومنت ونورت البلوق

Sn3a said...

شهد

يسلمو حبيبتي
علينا وعليج
وكل عام وانتي بالف خير

Sn3a said...

كويتاوي

والله الايام لما ارجع لها
ساعات اضحك
وساعات اذكر ناس فيه مليانين حكم وثقافه

يعطيك العافيه فاير فايتر

. . . ساخر كويتي said...
This comment has been removed by the author.
. . . ساخر كويتي said...

ترابط القصة جميل جدا اخت سنعة
ماشاء الله عليج
بانتظار تكملة القصة للتعليق عليها

|:| DUBAI |:| said...

صدق صدق حقيقي و واقعي يا سنعة يا بنت السنع كله

: ) !!

Sn3a said...

ساخر كويتي
يسلمو على هالكومنت الحلو
وترا ناطره تعليقك عقب ما اكملها كلها

يعطيك الف عافيه

Sn3a said...

بنت دار زايد وحما ال مكتوم
الغاليه دبي

بعد عمري تسلمييين
نورتي البلوق