Friday 26 September 2008

صفحات من مذكراتها 8

مسا الخير
اهلين هلا رغود
شفيج ؟
ماكو شي متضايقه زهقانه من البيت
اي طلعي؟
ماقدر
امج كاهي تقول طلعيها ختغير جو لايكون شين الحلايا بعد حاطلج قوانين
شسوي يعني اهو قالي تبيني اطيعج لازم تطيعيني
ريلج اهو ! ابوج! انتي حتى ابوج ماتطيعينه جذيه المهم سمعيني هالريال نيته شينه ومو ناوي على خير.. وانا اقول وخري عنه تستاهلين احسن منه وباجر ربي يرزقج ريل يعلمج شنو يعني حب واهتمام
شفيها فوزيه دريع؟ انا نصحتج بشي ويا روميو زمانه؟ ولا يبتلج طاريه بزينه ولا بشينه؟ مثل ما انا ماتدخلت انتي ماتدخلين
شفيج
مافيني شي! كاهو قص عليج وباقربها مطب وخر عنج وراح واتيين تنصحيني؟ وبعدين انتي شلون تعرفين جاسم عشان تقولين نيته شينه اهو الحين توه بدا يشتغل كلها اشهر ويتقدملي
تحلمين
بنشوف منو الشاطره اللي حبيبها باعها برخيص من مليون شهر وللحين تفز لما تشوفه ولا تسمع صوته ولا اللي عقب فتره بتحط دبلتها بويهج
ينيتي وقعدتي شفيج تكلميني جذيه عشان ريال غريب
مو غريب واذا مو عاجبج منتي ملزومه تكلميني



ركبت السياره وهسترت من الضحك , من صجها ... ويه طاف شبيضرني انا


اليوم التالي يوصلها من بدر مسج كلمتيها؟
ماردت عالمسج

وبالجامعه مع صديقتها ساره
بقولج شي
شفيج سارون قوليلي؟
انخطبت
حلفي! عالبركه منو؟
ولد عمي يوسف يعني منو غيره مثلا تبين انطرد من العايله
ليش تنطردين
حبيبتي يا يوسف ياواحد من نفس عايلتنا قبيلتنا نفس مستوانا نفس شهادتي واعلى
بيه نسيت انتي قصتج قصه يالله الف مبروك وهم يوسف الحمدلله مو ناقصه شي ترا
اي ادري خوش ريال بس ابيج تيين معاي ابي بدله حق الخطبه الرسميه والملجه والعرس
اولا كل هذيل
الفال لج
تسلمين
ناطرته؟
لا
عيل ليش موقفه نصيبج
النصيب مايوقف الا بامر الله




وبعد فتره عقب الملجه وبوقت العرس
وحده من الحريم اعجبت برغد وخذت رقم امها ودقت عليها
ولما ام رغد عطتها خبر للمره الاولى رغد مامانعت وماقالت شي


سوير شرايج؟
رغد شفيج؟ تحسسيني انج بتبوقين مو بتنخطبين ترا اهل الريال خوش ناس والله وامه فقيره مسكينه مالها حس
انتي فاهمه شقصد؟!؟ انا ماعرف اخون
شتخونين انتي منفصله عن الريال من دهر خلاص عيشي حياتج مرو جم شهر ماتدرين عنه شدراج اذا اهو ماعنده احد او تلاقينه خاطب الحين رغد خلاص لكل قصه في لها نهايه والاحسن انج انتي تسكرين عليها الكتاب ولا تنطرينه اهو يسكره لما تشوفينه مع وحده ولا شي وبعدين انتي للحين ماقعدتي ويا الريال يمكن عقب كل هذا مايعجبج عقب مااييون بيتكم انتي فكري جايز انتي ماتعجبينه كل انسان حاط صفات معينه بشريك حياته شوفيني انا من صغري مجبوره على ولد عمي بس ماحسست نفسي اني مجبورة لا دورت الاشيا الحلوة اللي فيه وحببت نفسي فيه وكاني الحمدلله مرتاحه ونصيبي وايد زين الحمدلله
ان شاءالله ..راح اشوف شيصير
بيوم الخطبه

يه يه يه اللهم صلي على محمد وال محمد شزينج شوفي شحلوج لما تسمعين كلام امج
متى بيوون؟
مستعيله ها
يما شفيج؟ سؤال اهو متى بيوون
بعد نص ساعه نطري خل اييبلج ساعتي
يما ماله داعي ماني رايحه عرس
خل يشوفون انج مدلــله وبنت عز
يا الله .. يما اذا بتأذيني من الحين قوليلي عشان اخذ سيارتي واروح اتمشى
لا خلاص كاني طالعه حسبي الله عليج مهددتني


ولما نادوها
وكانت بتنزل دار ببالها هالكلام
(لو ناطره شوي مو يمكن بدر يخطبني.. اخر عمري اصير Show حق الناس يطالعوني ويدورون الاخطاء السبعه.. طريقه تقليديه سخيفه.. لا اطيح بهالكعب جدامهم فشله .. عاد عسى ما اقط بدليه الله يستر .. ان ماكان جوتيه ييديد كيفه والله حتى لو كان علمه علمه اينشتاين ورزقه رزق قارون مابيه.. اخاف يطلع قصير وانا لابسه كعب عشره سانتي.. اذا خواته يخزون مابيه...)
لما وصلت سلمت

والام تسألها عن دراستها وشكثر بقالها
وتقولها ام عبدالرحمن:
رغد قومي قعدي ذاك الصوب وسألي عبدالرحمن لاتستحين يما عادي


يما اقوم؟
اي قومي

السلام عليكم
وعليكم السلام ( عشتو رغد والله انج خجوله زين طاعيه شوفي حول عور عنده صبع زود )
شلونج رغد
الحمدلله( يحليله فيه لدغه هيهيهيهي مالقو يخطبوله الا وحده اسمها رغد .. بس رغد احترمي نفسج ولاتضحكين)
شلون الدراسه.. عاد انا متخرج من الاداريه
تمام الدراسه... صج؟ انت اي دفعه ( ماشاءالله كل الناس متخرجين من الاداريه عسى بس مايكون رفيج بدر )
انا دفعه 98 ايام العديليه كان اسمها كليه التجاره
ومادار بينهم اسئله وايد لخجل الطرفين
ولما طلعو سألتها امها ها شرايج؟
زين مافيه شي بس انتي لاتستانسين خل اسال عنه
تسألين عنه! شنو ماكو رياييل يسألون عنه بعايلتنا؟
خو اسال عنه بالكليه
وي وي لاتطيح علينا السما انتي شفيج بتيننيني انتي مالج شغل تسألين اخوج وابوج يسالون انتي لج شغل تقولين زين ولا مو زين
يما لاتعصبين ترا تدرين فيني اذا نرفتزتيني شسوي صح بعدين انا يمكن ما اعجبه
وي تعجبينه والمنه عليه!
لا اله الا الله

ساره تدق عليها بعد ساعه
يه يه يقولون عنج شحلوج وخوش بنت
صج؟
اي والله رغود الام وايد مدحتج ومدحت امج
ويه ماتعرف امي
يغربل ابليسج يوزي المهم اهم عقب يومين بيدقون على ما انتي تفكرين مبدأيا عشان يزورونكم الزياره الثانيه
جم زياره اهم وانا كل يومين برتز جذيه
اي ارتزي ماعليه

بعد شوي تسألها امها:
ساره مادقت؟
اي دقت
شتقول
ماتقول شي يما تقول يقولون اهيا خوش بنيه بس الام كله تخوزز فينا وبجناطنا وبساعاتنا
وي وي انا اخوزز فيهم من زين جناطهم اهم ولا من زين ساعاتهم بس مانبيهم مانبيهم... شفيج تضحكين
اتغشمر وياج شفيج انتي
وانتي حتى بهالسوالف غشمره لا صج شقالو
قالو عني اينن سمالله علي الرحمن الرحيم
اي مو شي ييديد
نعم..نعم .. ام عبدالله بجلاله قدرها تمدحني من متى من متى
دايم امدحج بس مو جدامج


وبعد 4 ايام كان اللقاء الثاني
واقعتنعت رغد ان لازم تفتح صفحه ييديده
وان ماطاوعتها الصفحه
ترمي الكتاب وتبدا بكتاب جديد ابيض تتمنى ان مايحوي الا افراحها ومستقبلها واحلامها
ويقولها عبدالرحمن:
تقدرين تسأليني كل اللي تبينه رغد مو تستحين
اي ان شاءالله ( اخليه شيقول شارعنا اكبر من شارعكم وشارعكم اصغر من شارعنا ... لا لا بعدين ماطاحت الميانه)
ناويه تكملين دراستج ؟
والله لما دشيت الكليه كنت حاطه ببالي هالشي بس الحين لا
ليش؟
لاني ان كملت ماستر ماراح تسوى السالفه والماستر لازم يتبعه دكتوراه.. وانا مابي اصير دكتوره بالجامعه.. افضل اني اتقدم بمجال شغلي احسن
المهم تسوين اللي مقتنعه فيه
انت ليش دشيت الجيش عقب الكليه؟
انا احب اسوي اللي براسي.. وكنت ابي اصير عسكري وبنفس الوقت ابي شهاده وهالشي وايد ساعدني بمنصبي
الله يوفقك ( ذكرني بنفسي قبل.. بس اهو احسن انا خليت كل عقبه توقف جدامي اما اهو وقف على كل عقبه ووصل اماكن اعلى وجايز تعدا احلامه )

وبعد يومين تسمع صوت يناديها بالجمعيه
رغد
هلا عبدالرحمن
شلونج؟
زينه
بكلمج بموضوع
اي تفضل
عادي نقعد بستار بكس
اي عادي


شافت بعيونه شي ثاني ماشافته لما كان ببيتهم وقالت اكيد صاير شي لان تردده بالكلام شي غريب

مابيج تزعلين مني ولا ابيج تاخذين الكلام بحساسيه رغد انا ماكان بظني لما اشوفج اني راح اعيد حساباتي.. ولا كان ظني اني بستعصب كلمه لا وارفضج واقول حق امي انج ماعجبتيني لكن انربط لساني لانج فعلا عجبتيني بس انا ابيج تتفهمين اللي بقوله
شفيك؟ قولي
رغد انا احب وكان في مشاكل كبيره بيني وبين اللي احبها والمشاكله من زمان وللحين فحاولت استقر كل ما اخطب وحده اقول مابيها لاني اشوف فيها البنت اللي احبها وعلى هالشي صارلي سنتين ومرات الحظ يساعدني والبنت نفسها ترفضني قبل لا ارفضها لكن انتي ماقدرت ارفضج اصلا انتي الوحيده اللي سألتها وكلمتها من امس وانا حاس بالذنب لاني دخلتج بمشاكلي انا اسف رغد بس ماقدر اقص عليج او اقص على نفسي الانسان يحب مره برضاه وجايز يحب مرتين والثانيه غصب
خلاص عبدالرحمن انا فهمت
رغد مو تزعلين ولانج غير ماحبيت امي تدق وتكنسل الموضوع بس جذيه عشان جذيه لحقتج من الكليه لين الجمعيه وكلمتج عشان تتأكدين انج ماعليج قاصر واكبرها واسمنها يتمنونج ويتمنون رضاج
عن اذنك باي


شهالموقف اللي انا فيه!
انا امس شفت نفنوف الملجه .. امس قسته وباجر كنت بمر اخذه
وتركب السياره وماتاخذها السياره الا لذاك المكان اللي يحضن دموعها
يتبع

53 comments:

الزين said...

ايا اللي شقول

مالت عليه حتى مالت عليه

يوم اهو مو قد الزواج

ليش يلعوز بنات الناس وياه

لو انا مكانها جان شرشحته ومشيت عنه

ت*&^&%$# على هيك رجال

ساره النومس said...

حقارة


كل الرياييل حقارة .. والله
تلعب عليه البنت وتخرفنه ولمن تيي الي تحبه وتصونه يقول لها ماقدر وانا أحب عقب ما يربطها فيه ... مافيهم خير والله

رغد كسرت خاطري .. أحسج قاعدة تتكلمين عني :(

مشكورة سنعة ببجي والله لووول

MakintoshQ8 said...

عاد انا هذي اخر سنه لي بالاداريه ادعولي

انزين هذا الي مايتسمى مايستحي يوم انك تحب وحده شحقه اطق بيوت الناس ماتدري انه شي متعب حق البنت تلبس بدله وتترزز وتستحي وترتبك عالفاضي

وبعدين اهي الله يهداها شلون تقعد مع واحد غريب بالكافيه ماعجبني موقفها

elq87obi said...

مساء الخير

سنعة

بصراحة آنا حدي لا تعليق على هالريال

تقبل الله طاعتج
و عيدج مبارك مقدماً
و كل عام و انتي بخير

واصلي

سلامي لج :)

ZooZ "3grbgr" said...

صج ما احب الريال اللي ما عنده جرأة يصارح أقرب الناس له

تروح تدور ببيوت البنات وترفض فلانة وعلانة ماتخاف الله

ترى من الامهات اللي يجبرون عيالهم بخطبلك بخطبلك بخطبلك حنة طول الوقت

الله يكون بعونها ردينا حق المليق

ضـاد said...

اففففففف يا هالكلمه اللي تجرح وتسم البدن [[[[ انتي ماتنعابين بس مابينا نصيب ]]]]] !!!

في رياييل اغبيا بشكل مو طبيعي

الا مو غباء! هذي انانيه وتفاهه وكل شي مو زين
خليتيني اسب بهلليله الطيبه

الله يحبها افتكت من امثاله



مالت عليه وعشره على لدغته

:@

Anonymous said...

والله قالوها عني البنات!!!! يوم انك مو معزم على زواج اشحقة تدخل بيوت الناس وتخبص قلوبهم وياك؟
ليالسفلة!!! ـ

|:| DUBAI |:| said...

: (

wa7ed-shad-7ailah said...

أحس اني غبي لأني بعلق بعد كل هالتعليقات الساخنة التي سبقتني



لكن ما شاء الله مبدعة بمعنى الكلمة ولاتطولين كملي بسرعة بعرف شيصير


وييع طبعا اكيد راح تلقا بدر بذاك المكان والا بيدز مسج بالغلط

اهي لو الله يفكها من ذاك المكان اهي بخير

Super Woman said...

:(
:(
:=(

حرام عليج

terkwaz said...

واعليا عليها
صج حظها عوي
يوم رضت وخلاص
ياها واحد مايبيها

kuwaitawy said...

سنعه


هالمذكرات لن اقرئها الآن


يبيلها جو هادئ



اذاً سوف أقرأ جميع المذكرات في وقت لاحق




تحياتي

Najmah said...

ابيه

انا بروحي معصبه

وعصبت حدي

!!

سنعة لا تطولييين

5roofa said...

سنعه الحلوة امبي القصه شكلها تشووق

راح ارد اقراها على راحتي بليل

بس يايه اقولج مبارك عليج الشهر مقدماا و اشتقت لسوالفج خيتووو

salamz sweetee....

Anonymous said...

ay shay@@

Anonymous said...

حراااااام شو هااا .. قلبي عورني ..

نتريااا التكملة..

تحياتي لج

kuwaitawy said...

كـــل عــام وأنــت بخــير


وعيـــدك مبـــارك

Sn3a said...

الغاليه الزين

ترا وايد سمعت عن بنات جذيه
عشان جذيه ذكرت هالشي بالقصه

يسلمو عالتواصل العسل وعيدج مبارك

Sn3a said...

الساروونه
هلا والله

لا حرام مو كلهم شزينهم عيالنا بس يحوشهم ينون شوي
لاتبجين ولا شي الليله ليييله عيييد لول

Sn3a said...

ماكنتوش
ربي يوفقج ويسهل عليج

اهيا غلطت
بس لوما هالغلطه جان ابتلشت!

Sn3a said...

الكويت حبي

مسا الخير والنوير هلا والله
الله يسلمك الله يتقبل منا ومنكم صالح الاعمال
عيدك مبارك وعساك من العايدين

Sn3a said...

زووز
الله وكيلج تدرين ان في حريم يروحون يزورون بيت البنت ويهدون الولد جدام الامر الواقع وهات تبجبج وتصرخ وانا امك والولد ماكو على ويهه يتزوج
تالي يا يخون يايطلق

Sn3a said...

ضاد

ضحكتيني وعشره على لدغته
الله يسلمج ومشكورة على هالتواصل عيدج مبارك

Sn3a said...

ضاد

ضحكتيني وعشره على لدغته
الله يسلمج ومشكورة على هالتواصل عيدج مبارك

Sn3a said...

دله

ماله كلمه جدام امه
لو له كلمه جان ماخذ اللي يبيها

Sn3a said...

دبي الغاليه
وشفيج اختي
ماعاش اللي يزعلج
مانبي القصه خلاص

Sn3a said...

واحد شاد حيله

محشوم اخوي مشكووور عالكومنت يسلمو
عيدك مبارك
والله مايندرا شنو اخرتها ويا هالبدر

Sn3a said...

شلالات

خلاص نقص القصه مانبيها ولا زعلكم

Sn3a said...

تركواز

اي والله حظها عوي
صدقتي

Sn3a said...

فاير فايتر كويتاوي

المكان مكانك اخذ راحتك خيو
وعيدك مبارك

Sn3a said...

نجمه
ماكو شي يستاهل الاعصاب حبيبتي
عيدج مبارك
ان شاءالله اكملها قريب

Sn3a said...

لوكوو
اهلين خيو

ان شاءالله عاجبتك القصه للحين
عيدك مبارك

Sn3a said...

هلا عواشي هلا الغاليه
كل عام وانتي بخير
وعيدج مباارك

ان شاءالله بكملها قريب

Sn3a said...

كويتاوي
وانت بالف خير وصحه وسلامه
عساك من العايدين الفايزين

Anonymous said...

مسكينه
حظها جدا قوي :p


ناطرين التكمله

Salah said...

تقبل الله أعمالكم

عيدكم مبارك وكل عام وانتم بخير

Sn3a said...

فري موا
على قوله المثل
لي قام حضك باعلك واشترالك


كل عام وانتي بخير

Sn3a said...

اخوي صلاح
منا ومنك صالح الاعمال
تقبل الله صيامكم وقيامكم
وعساكم من العايدين الفايزين بحق محمد وال محمد

بـابـل said...

قصة حلوة ومتابعها من زمااان


وعيدك مبارك سنعة


:)


وبس



بابل

أبو لطيف said...

عيدكم مبارك

اسأل الله ان يتقبل منا ومنكم

وعساكم من عواده

أبو لطيف said...

عيدكم مبارك

اسأل الله ان يتقبل منا ومنكم

وعساكم من عواده

AbWaBy said...

أنطر الباجي مو تطولين :)

Blog 3amty said...

متابعين وعيدج مبارك :)

MakintoshQ8 said...

3edich Mubark
o Taqabal allah 6a3tich

منطلقة بطموحي said...

عيدج مبارك عزيزتي سنعة :)
تقبل الله طاعتج
كل عام و انتي بخير

و يعطيج العافية :)

Don Juan said...

لو انا من هالمسكينة إحتمال أصير مينونة و أكره الرياييل

ترى هالرد اهو عصارة مخي عاد لقي عصارة مخي ويه و نزلي الجزء التاسع ترى للحين ناطره ;Pp

T.C

Sn3a said...

بابل
هلا والله اخوي
يسلمو عالمتابعه
مشكور وكل عام وانت بخير

Sn3a said...

ابو لطيف
ايامك سعيده
ربي يتقبل منا ومنكم صالح الاعمال
منور البلوق

Sn3a said...

منطلقه بطموحي
هلا والله الغاليه نورتي المكان
كل عام وانتي بالف خير
وتقبل الله منا ومنكم صالح الاعمال

Sn3a said...

احساس
هلا والله
كاهو الجزء نزل
يسلموووو

Sn3a said...

بلوق عمتي
عمتك تحب هالسوالف اكثر منك مو خبرك احنا البنات نحب كثره الحجي لول
منور البلوق طبعا
حياك

Sn3a said...

ماكنتوش
ايامج سعيده ياقلبي
تقبل الله منا ومنج صالح الاعمال

Sn3a said...

دون هوان
ياهلا ومسهلا
عصاره مخك المكان مكانها يبا
والله تصدق يمكن تصير مينونه بسبتهم
والله اهيا اللي ملقتهم ويه

منور البلوق طبعا